Ko Te ʼu Fono Gāue ʼo Sanualio
Vāhaʼa ʼe Kamata ʼi te 3 Sanualio
Katiko 101
10 mn: Ko te ʼu logo ki te kokelekasio. Fakahā fakanounou te ʼu puani tafito ʼo te ʼu nusipepa foʼou ʼe ʼaoga anai ki te hahaʼi ʼi te telituale.
20 mn: Ko te ʼu logo ʼe ʼaoga ki te kokelekasio. Peʼe ko he akonaki ʼe fai e he tagata ʼāfea ko tona kupu tafito “Ayons un bon point de vue sur la miséricorde divine,” (Ke ia tatou he manatu poto ʼo ʼuhiga mo te manavaʼofa ʼo te ʼAtua) ʼe fakatafito ki Te Tule Leʼo, ʼo te ʼaho 1 ʼo ʼOketopeli 1993, ʼi te ʼu pasina 22 ki te 25.”
15 mn: “Tou Tokoni Ki Niʼihi Ke Nātou Leleiʼia Te Maʼuhiga ʼo Tatatou ʼu Tohi.” Fai palalau mo te kokelekasio ki te alatike. Fai he ʼu faʼifaʼitaki fakanounou ʼo mulimuli ki te ʼu palakalafe 3 pea mo te 4. Fai he faʼifaʼitaki ʼo fakaʼaogaʼi te tohi ʼaē ʼe tou tufa ʼo mulimuli te fai palalau ki te palakalafe 5.
Katiko 116 pea mo te faikole fakaʼosi.
Vāhaʼa ʼe Kamata ʼi te 10 Sanualio
Katiko 147
10 mn: Ko te ʼu logo ʼo te kokelekasio pea mo te ʼu Tonu ʼo te Minisitelio ʼo Te Puleʼaga.
15 mn: Kua Koutou Teuteu Koa Ke Feala Hakotou Tauʼi He Faigataʼaʼia ʼi Te Lopitali ʼe Fakafeagai Ki Takotou Tui? Akonaki fakafiafia ʼe fai e he tagata ʼāfea ʼe faiva ʼo tokoni ki te ʼu tēhina ke nātou leleiʼia te maʼuhiga ʼo tanatou kate “Attestation”. Neʼe laka ʼi te 50 ki te teau te ʼu kate neʼe fakaʼaogaʼi lolotoga te taʼu ʼaenī neʼe mole sinie, neʼe mole hona ʼu fakamoʼoni, pea kua ʼāfea. Ko te ʼu kate foʼou ʼe tufa pe kia nātou ʼaē kua ʼosi papitema, ʼosi ʼaia pea vakaʼi te tohi ʼo te ʼaho 15 ʼo Tesepeli 1991 ʼo ʼuhiga mo te tohi ʼo te ʼu kate. Tokoni ki te ʼu tēhina ke ʼAUA naʼa nātou tohi tanatou ʼu kate ʼi te afiafi ʼaia kae ke nātou ʼave ki tonatou ʼapi, ʼo nātou fakakaukauʼi ʼi te faikole te meʼa ʼe ʼaoga kia nātou, ʼosi ʼaia pea nātou tohi. Kae ʼAUA NAʼA NĀTOU SINIE tanatou kate ʼi te temi ʼaia. Koutou ʼaumai ʼakotou kate ʼaē kua ʼosi tohi ki te Ako Tohi ʼo te Kokelekasio, ke feala ai te sio ʼa te ʼu tagata ʼāfea ki te sinie ʼo te ʼu kate, ʼo fakamoʼoni, pea mo tohi ai te ʼaho. Ko ia ʼaē ʼe ina takitaki te ʼu Ako Tohi ʼo te Kokelekasio ʼe ina fai anai he lisi ʼo fakafoʼou ke ʼaua naʼa galo he tahi ia nātou fuli ʼaē ʼi tana ako tohi. (ʼE feala anai te tokoni ki te ʼu mātuʼa ʼaē kua papitema ʼo ʼuhiga mo te tohi ʼo te ʼu Cartes dʼidentité ʼo tanatou fānau.) Kapau ko he tahi neʼe mole kau ki te ako tohi ʼaia ʼe kei feala pe te tokoni ki ai te ʼu tagata takitaki/te ʼu tagata ʼāfea ʼi te hili ʼo te Fono Gāue ʼo aʼu ki te tohi fakalelei e te kau fai faka mafola tanatou ʼu kate pea mo nātou sinie. ʼE tonu anai ke fai e te ʼu tagata ʼāfea he lisi ʼo te hahaʼi ʼaē kei toe pea ke nātou faigaʼi fakavilivili ke katoa te ʼu kate.
20 mn: “Tou Liliu ʼo Fakatafito Te Fia Logo.” Fai palalau mo nātou ʼaē ʼi te fono. Fai he faʼifaʼitaki ʼo fakahā ai peʼe feafeaʼi te ʼaʼahi ki he tahi neʼe ina toʼo te tohi ʼaē ʼe tou tufa ʼo fakaʼaogaʼi te ʼu manatu ʼi te palakalafe 5.
Katiko 154 pea mo te faikole fakaʼosi.
Vāhaʼa ʼe Kamata ʼi te 17 Sanualio
Katiko 167
10 mn: Ko te ʼu logo ki te kokelekasio pea mo lau te tānaki falā. ʼO kau ki ai mo te fakamālo ʼo ʼuhiga mo te ʼu meʼa ʼofa. Fai he fakamālo ki te kau fai faka mafola ʼo ʼuhiga mo tanatou lagolago paʼaga ki te ʼu gāue ʼa te Sosiete ʼo feiā aipe mo te gāue ʼa te kokelekasio. Fakamanatuʼi ko nātou ʼaē neʼe mole heʼeki tohi tanatou ʼu kate “Attestation” ʼe feala ke nātou fai ʼi te afiafi ʼaia ʼo nātou ʼolo ki te tagata takitaki ʼo te Ako Tohi ʼo te Kokelekasio peʼe ko he tahi ʼi te ʼu tagata ʼāfea ʼaē.
20 mn: “Ko Tatatou Gāue ʼi Te ʼu Telituale ʼAē ʼe Fai Tuʼumaʼu.” ʼO fai ʼaki he ʼu fehuʼi pea mo he ʼu tali ʼo fai e te tagata taupau ki te gāue. ʼI te ʼu kokelekasio ʼaē ʼe nātou fai tuʼumaʼu tonatou ʼu telituale, ko he faʼifaʼitaki lelei e tahi ʼi te ʼu ʼuluaki palalau ʼo te tohi Comment raisonner ʼo mulimuli ki te manatu ʼe tuʼu ʼi te ʼu palakalafe 4 pea mo te 5 ʼo feiā ai foki mo he tahi ʼuluaki palalau ʼe ʼaoga ʼo mulimuli ki te ʼu palakalafe 6 pea mo te 7 pe neʼe teuteuʼi he manatu tāfito ʼe ʼaoga ki te telituale ʼo te kokelekasio. ʼI te ʼu kokelekasio ʼaē ʼe mole nātou fai tuʼumaʼu tonatou ʼu telituale, ʼe ʼaoga ki ai ʼihi ʼu ʼuluaki palalau ʼi te tohi Comment raisonner ʼe tonu anai ke fakaʼiloga ʼi te ʼu faʼifaʼitaki. Ko te ʼu faʼifaʼitaki ʼe tonu anai ke liuliuga fakalelei.
15 mn: Koteā Te Meʼa Ka Hoko Ki Te Kele ʼi Te Temi Ka Haʼu? ʼO fakatafito ki te tohi Comment raisonner, ʼi te ʼu pasina 403 ki te 408. (5 mn.) Akonaki ʼo mulimuli ki te ʼu puani ʼi lalo ʼo te kupu ʼo te ʼu pasina 403 pea mo te 404, ʼo vakaʼi katoa te puani ʼi te pasina 405. (7 mn.) Ko he tahi ʼe foʼofoʼou ʼi te fai faka mafola pea mo he tahi kua fakapotopoto pea mo faiva ʼe nā fai palalau ki te manatu ʼe tuʼu ʼi te ʼu pasina 405 ki te 407. ʼE ʼui age e te ʼu kāiga ʼo te kau fai faka mafola foʼou ʼe fakahā ʼi te Tohi-Tapu ʼe pulihi anai te kele. Ko ia ʼaē ʼe foʼou ʼi te fai faka mafola ʼe ina kole tokoni kia ia ʼaē kua lahi tona faiva ke ina fakamahino age te ʼu vaega ʼo te Tohi-Tapu ʼo ʼuhiga mo te kele. (3 mn.) Moʼo fakaʼosi ʼo te fai palalau, ʼe ʼaoga ke vakaʼi te fehuʼi ʼi te pasina 408 “A qui Dieu accordera-t-il le privilège de vivre éternellement ici-bas?” (Ko ai koa ʼaē ʼe foaki e te ʼAtua ki ai te pilivilesio ʼaē ko te maʼuli heʼegata ʼi te kele?) Fakaloto mālohiʼi ia nātou fuli ʼi te fono ke nātou haga gāue ke nātou maʼu ai te taʼi pilivilesio ʼaia.
Katiko 176 pea mo te faikole fakaʼosi.
Vāhaʼa ʼe Kamata ʼi te 24 Sanualio
Katiko 178
10 mn: Ko te ʼu logo ki te kokelekasio. Fakaloto mālohi ia nātou fuli ke nātou kau ki te fai faka mafola ʼi te vāhaʼa ʼaenī. Fakahā ki te kokelekasio te ʼu fakatuʼutuʼu ʼo ʼuhiga mo te fai faka mafola.
15 mn: Ko Te ʼu Tali Ki ʼAkotou ʼu Fehuʼi. Akonaki, pea mo fai palalau mo nātou ʼi te fono. Tokoni kia tatou fuli ke tou mahino pe koʼe ʼe tonu anai ke tou mulimuli ki te manatu ʼi te ʼu ʼuluaki palakalafe e tolu. ʼE tautau tali e te Sosiete te ʼu telefoni pea mo nātou maʼu te ʼu tohi ʼa ni hahaʼi ʼe nātou fakahāhā ai tonatou ʼiʼita ki te kau Fakamoʼoni ʼa Sehova koteʼuhi kua tuʼa lahi tanatou fakagata te fisifisi ʼo tonatou matapā, kae ʼe hoholo atu pe tanatou ʼolo age. Koia, ka tou fai faka mafola ʼi te ʼu ʼapi, ʼe tou tokakaga anai ʼo vakaʼi fakalelei te pepa ʼe piki tahi mo te telituale pea ke tou tohi te ʼu ʼapi ʼaē ʼe mole gafua tona fai.
20 mn: Te Gāue Fai Faka Mafola ʼa te Kokelekasio. Ko te tagata taupau ki te gāue pea mo he tahi tagata ʼāfea ʼe nā vakaʼi te gāue ʼa te kokelekasio ʼi te ʼu māhina e fā kua hili. Kua hili leva te ʼu māhina e fā ʼo te taʼu gāue (Sepetepeli-Tesepeli). E feafeaʼi koa te gāue ʼa te kokelekasio? Fakamālo ki te kokelekasio ʼi te ʼu faʼahi ʼaē neʼe lelei ai tana gāue. Vakaʼi foki mo te ʼu faʼahi ʼaē ʼe feala ke tuputupu ai te kokelekasio, pea mo foaki he ʼu manatu ʼe ʼaoga. ʼO kau ai mo he fakamatala fakaloto mālohi e tahi peʼe lua ʼi te fai faka mafola ʼo te ʼu ʼuluaki māhina e fā ʼo te taʼu gāue. Fakaʼosi ʼaki he manatu tāfito mo ʼaoga. Ko te fiafia ʼo Sesu neʼe tupu mai tona minisitelio. Mo tatou foki ʼe tou maʼu anai he fiafia lahi ʼaki tatatou maʼumaʼua ʼi te gāue neʼe tuku mai e Sehova kia tatou.—Soane 4:34; 1 Ko. 15:58.
Katiko 179 pea mo te faikole fakaʼosi.
Vāhaʼa ʼe Kamata ʼi te 31 Sanualio
Katiko 186
10 mn: Ko te ʼu logo ki te kokelekasio. Fakaloto mālohiʼi ia tatou fuli ke vave te kamata ʼo tatatou gāue faka mafola ʼi te fakaʼosi vāhaʼa ʼaenī. ʼE feala ke tuku he ʼu tokoni ʼaoga moʼo fakahā ʼo te nusipepa foʼou.
15 mn: ʼE koutou fakahā te tohi E Feala Keke Mauli O Heegata Ite Palatiso Ite Kele ʼi te ʼu ʼapi. Akonaki fiafia ʼo fai fakanounou ʼo fakahā ai te maʼuhiga ʼo te tohi moʼo tokoni ki te hahaʼi ke nātou ʼiloʼi pea mo tauhi kia Sehova. Fai he faʼifaʼitaki ʼo fakahā ai peʼe feafeaʼi te fakaʼaogaʼi e he tahi ʼe fai faka mafola ʼo te alatike ʼi te Minisitelio ʼo Te Puleʼaga moʼo teuteuʼi ʼo tana fakaʼaogaʼi te tohi ʼaia ki te fai faka mafola.
20 mn: “Ko Te Kau Ki Te ʼu Fono—Ko He Maʼua Maʼuhiga.” ʼO fai ʼaki he ʼu fehuʼi pea mo he ʼu tali. ʼO ʼalutahi mo te palakalafe 2, fakafehuʼi he ʼu hahaʼi fai faka mafola ʼaē neʼe nātou tauʼi te ʼu faigataʼaʼia ʼo nātou kau tuʼumaʼu ki te ʼu fono.
Katiko 188 pea mo te faikole fakaʼosi.