Tou Liliu ʼo Fakatafito Te Fia Logo
1 ʼE hā mai ko te ʼu ʼaʼahi ʼaē fai fakalelei ʼe uga pea mo fakatuputupu ai te hahaʼi ke nātou liliu ʼo tui. Koteā ʼihi ʼu manatu ʼe ʼaoga ke tou manatuʼi mokā ʼe tou ʼaʼahi ia nātou ʼaē neʼe nātou fakahā mai tanatou fia logo?
2 ʼUluaki, ke koutou teuteu lelei. ʼE kamata te faʼahi ʼaia ʼi te ʼuluaki palalau. ʼO feafeaʼi? ʼAki takotou taupau fakalelei te ʼu manatu neʼe koutou tohi ʼo ʼuhiga mo te faʼahi ʼaē neʼe fia logo ki ai. Koutou tohi te higoa ʼo ia ʼaē neʼe palalau mo koutou, te faʼahi neʼe koutou palalau kiai, te tali, pea mo te ʼu tohi peʼe ko te ʼu nusipepa neʼe koutou tuku. ʼOsi ʼaia pea koutou toe vakaʼi ʼakotou nota ia muʼa ʼo takotou fai te ʼaʼahi, pea koutou fakakaukauʼi ʼi te faikole te meʼa ʼaē ka koutou palalau anai kiai.
3 ʼI te temi ʼaenī kua koutou ʼosi teuteu ai. Koteā koa te meʼa ʼe feala ke koutou palalau kiai? Kapau neʼe koutou lagaʼi he fehuʼi ʼi takotou ʼuluaki fai palalau, ʼe feala ke koutou fakatafito kiai te fai palalau mokā koutou fai te ʼaʼahi. Ohage la, kapau neʼe fakatafito te ʼuluaki fai palalau ki te ʼu tapuakina ʼo te Puleʼaga ʼo te ʼAtua, ʼe feala ke koutou lagaʼi te fehuʼi ʼaē “He koʼe koa ʼe fakagafua e te ʼAtua te agakovi?”
Ka koutou toe liliu, ʼi te ʼosi ʼo takotou fakahā tokotou higoa ʼe feala ke koutou ʼui age:
◼ “ ʼI tata fai palalau talu mai, neʼe tā vakaʼi ai pe koʼe ʼe lahi te fakagafua e te ʼAtua ʼofa ia te agakovi ia ʼaho nei. Neʼe ke fakakaukauʼi koa la te faʼahi ʼaia? [Tuku ke fai mai hana tali.] ʼI tau manatu ʼe tokaga moʼoni koa te ʼAtua ki te malamanei? [Tuku ke fai mai hana tali.] Koutou vakaʼi te meʼa ʼe ʼui mai e te Tohi-Tapu ia Soane 3:16.” ʼI te ʼosi lau ʼo te vaega, koutou fakahā te ʼu puani tāfito ʼo te kapite 11 ʼo te tohi E Feala Keke Mauli O Heegata, ʼaē ʼe tuʼu ai te ʼu tupuʼaga ʼo te fakagafua e te ʼAtua te agakovi ia ʼaho nei.
4 Ko he tahi fehuʼi ʼe ina uga ai te fakakaukau ʼi te hili ʼo takotou ʼuluaki fai palalau ʼe feala ke fai fēnei: “Kapau neʼe fakatuʼutuʼu e te ʼAtua ke maʼuli heʼegata te tagata, he koʼe ʼe matutuʼa te hahaʼi pea mo mamate?” ʼI takotou toe liliu, ʼe feala ke koutou fakahā age kia nātou te tali ʼa te Tohi-Tapu ki te fehuʼi ʼaia ʼo fakatafito kia Loma 5:12. ʼI te ʼosi lau ʼo te vaega, koutou vakaʼi te kapite 7 ʼo te tohi E Feala Keke Mauli O Heegata, ʼo koutou palalau ai ki te tupuʼaga tāfito ʼo te liliu ʼo te tagata ʼo matuʼa pea mo mate.
5 Kapau ʼi takotou ʼuluaki palalau neʼe koutou talanoa ki te ʼu ala ʼaē ʼe ʼiloʼi ai te lotu moʼoni pea mo koutou tuku te tohi E Feala Keke Mauli O Heegata, ʼe feala ke fakatafito takotou ʼaʼahi ki te fehuʼi lelei ʼaenī: “He koʼe ʼe tonu anai ke tou fakasiosioʼi tatatou lotu?” ʼI takotou toe liliu, ʼe feala ke koutou palalau ki te ʼu puani tāfito ʼi te kapite 3 ʼo te tohi.
6 Ke ia koutou te aga fakapotopoto. Koutou tokaga lelei ki te ʼu fehuʼi ʼe koutou fai mokā ʼe koutou fai te ʼu ʼaʼahi. Ko te ʼu fehuʼi ohage la “Neʼe koutou lau koa la te tohi ʼaē neʼe ʼau tuku atu?” “Kei ke manatuʼi koa la ia ʼau?” peʼe “Kei ke manatuʼi koa la te meʼa neʼe tā palalau ki ai ʼi taku haʼu fakamuli?” ʼe feala ke mole faʼa leleiʼia e ia ʼaē ʼe palalau mo tatou. Ko te ʼu taʼi fehuʼi ʼaia ʼe mole maʼu ai he ʼu fua ʼe lelei. Kae, ʼe tonu ke koutou agaʼi kāiga, mo aga fakapotopoto, pea mo palalau fakanounou. Ko te ʼu kalitate ʼaia ʼe nātou fakahikihiki anai te logo.
7 Ko te ʼu meʼa ʼaia ʼe ko te tahi faʼahi ke tou fakaʼaogaʼi moʼo uga ʼo te ʼu loto ʼo te hahaʼi ʼaē ʼe fia logo ki te moʼoni. He koʼe koa ʼe mole koutou fai he fakatuʼutuʼu takitokotahi ʼo koutou fai he ʼaʼahi e tahi ʼi te vāhaʼa fuli? Koutou fakaʼaogaʼi te ʼu manatu ʼaoga neʼe fakahā ʼi ʼoluga, pea ke koutou ʼolo ki te kau faka mafola faiva ʼe feala anai hanatou tokoni kia koutou ke lahi ʼaupito tokotou faiva. ʼE tuputupu anai tokotou fiafia mokā ʼe koutou fakatafito takotou fai palalau ki te ʼuluaki fia logo ʼo koutou fai fakalelei te ʼu ʼaʼahi.