Tou Tokoni Ki Niʼihi Ke Nātou Leleiʼia Te Maʼuhiga ʼo Tatatou ʼu Tohi
1 “Ko te folafola ʼa te ʼAtua ʼe maʼuli pea ʼe ina fakalogoʼi tana gāue.” (Hep. 4:12) Koteʼuhi ko ʼatatou ʼu tohi ʼe fakatafito ki te Tohi-Tapu ʼe nātou tokoni ki te hahaʼi ke nātou maʼu he fua lelei mai te mālohi ʼo te Folafola ʼa te ʼAtua, ʼe tou fakaʼaogaʼi moʼo uga ʼo te fia logo ki te Tohi-Tapu ʼi te fagonogono faigamālie peʼe ʼi te fai faka mafola ʼi te ʼu ʼapi.
2 Ko te tufa ʼo Sanualio ko te ʼu kaupepa ʼaē Kote puleaga ae ka ina fakatuu anai te Palatiso pea mo Te ʼu laumālie ʼo te kau mate. Koutou teuteuʼi takotou fakahā ʼo te logo ʼo te Puleʼaga ke feala ai hakotou tāʼofi he puani tāfito ʼi te kaupepa ʼaē ka koutou fakaʼaogaʼi. E feafeaʼi koa te fai ʼo te faʼahi ʼaia?
3 E Feafeaʼi Te Teuteu: Moʼo kamata, koutou tāʼofi he talanoa ʼi te kaupepa ʼaē ʼe koutou fakaʼaogaʼi ʼe fia logo anai ki ai te hahaʼi agatonu ʼi tokotou telituale. ʼOsi ʼaia, koutou manatuʼi he meʼa neʼe hoki hoko peʼe ko he logo ʼe feala hakotou palalau fakanounou kiai ia muʼa ʼo takotou fakahā age ia te talanoa ʼaē neʼe koutou tāʼofi ʼi te kaupepa. E lagi ʼe ʼi ai he talanoa peʼe ko he vaega faka Tohi-Tapu ʼe feala ke koutou lau, koutou fai he faʼahi ʼi te ʼu manatu ʼaia e lua ʼi te Tohi-Tapu peʼe koutou lau fakahagatonu ʼi te kaupepa, moʼo lagolago ki ʼakotou ʼu manatu. ʼAua naʼa koutou lotolotolua ʼo tufa te kaupepa mo fakahā tona totogi fakaʼofa. Vakaʼi naʼa galo ke koutou fai he fehuʼi peʼe ko he manatu ʼe feala hakotou fakaʼaogaʼi moʼo fakatafito kiai takotou ʼaʼahi.
4 ʼE ʼi ai te tahi ʼu kaupepa ʼi te lea ʼaē ʼe fakaʼaogaʼi e te kokelekasio. Kapau ʼe maʼu te ʼu kaupepa ʼaia, he koʼe koa ʼe mole koutou teuteuʼi ʼakotou ʼu fai palalau mo te hahaʼi ʼaē ʼe koutou maʼu ʼi te telituale? Koutou fakaloto mālohiʼi ia nātou ke nātou lau he kaupepa ʼi te ʼu kaupepa lelei ʼaia.
5 Koutou Tufa Te Tohi E Feala Keke Mauli O Heegata Ite Palatiso Ite Kele: ʼE feala ke kamata takotou fai palalau ʼo talanoa ki he logo foʼou ʼe fakahā ai te kau ʼa te ʼu lotu ki te ʼu faʼahiga meʼa ʼo te mālama ʼaenī peʼe ko tona ikuʼaga mālohi ki te maʼuli ʼo te hahaʼi.
ʼOsi ʼaia koutou fai he fehuʼi, ohage la:
◼ “ ʼI takotou manatu e feafeaʼi te fakasiosio ʼa te ʼAtua ki te ʼu tuʼu faka lotu ʼaē ʼe nātou uga fakamālohi te ʼu faʼahiga meʼa ʼo te mālama ʼaenī? [Tuku ke fai mai hana tali.] ʼE fakapuna’maʼuli anai koa mokā ʼe koutou ʼiloʼi ko te ʼu akonaki tāfito ʼo te ʼu lotu fuli ʼaia ʼe tatau pea ʼe kehekehe ia mo te ʼu akonaki ʼo te Tohi-Tapu?” ʼOsi ʼaia pea koutou fakahā age kia ia ʼaē ʼe palalau mo koutou te tānakiʼaga ʼo te ʼu kupu, pea mo fakamahino fakanounou age tatau aipe peʼe lotu peʼe kailoa, ko tona maʼuli ʼe uga e te mālohi ʼo te ʼu lotu. Koutou fakahā age ki ai ʼe feala tana ako peʼe feafeaʼi te ʼiloʼi ʼo te lotu moʼoni.
6 ʼI ʼihi temi e lagi ʼaoga tatatou tuku he ʼu nusipepa peʼe ko he kiʼi pepa lotu. ʼE lahi te ʼu tupuʼaga ʼaē ʼe tonu ai ke tou fiafia pea mo faiva ʼo tou fakaloto mālohiʼi niʼihi ke nātou lau te ʼu kaupepa ʼaia ke feala ai hanatou mahino ki te mālohi ʼo te Folafola ʼa te ʼAtua ʼi tonatou maʼuli ʼo nātou tali tana takitaki.