ʼE Tou Fai Faka Mafola Ki “Te Faʼahiga Tagata Fuli Pe”
1 Ka tou felāveʼi mo he ʼu hahaʼi mai he ʼu fenua kehekehe pea mo he ʼu lotu kehekehe, ʼe tou manatuʼi ʼe ko te finegalo ʼa te ʼAtua “ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Tim. 2:4) ʼO hilifaki ki te tuʼuga kiʼi pepa lotu pea mo te ʼu kaupepa lalahi ʼaē neʼe teuteuʼi moʼo fai ʼo tatatou gāue, ʼe tou toe maʼu foki mo he ʼu tohi ʼe lelei ʼaupito ʼaē ʼe feala ke tou fakaʼaogaʼi ʼi te ʼu faigamālie fuli pe, moʼo tokoni ki te hahaʼi ʼaē neʼe mole akoʼi kia nātou e tonatou lotu te moʼoni ʼo ʼuhiga mo te ʼAtua pea mo Kilisito.
2 ʼE kau ki te ʼu tohi ʼaia te tohi Te tagata ʼaē ʼe lahi tokotahi ʼo te ʼu temi fuli. ʼI tana fakamatala te maʼuli ʼo Sesu Kilisito, ʼe feala ke tokoni te tohi ʼaia ki te hahaʼi ke nātou ʼiloʼi lelei age te ʼAlo ʼo te ʼAtua pea ke nātou fia fakaōvi kia te ia, ohage ko te meʼa ʼaē neʼe fai e te tokolahi ʼi te ʼuluaki sēkulō. (Soane 12:32) ʼI te ʼu temi faigamālie fuli, ʼe lagi feala ke koutou fakaʼaogaʼi te ʼu faʼifaʼitaki ʼaē ʼe hoa mai moʼo fakahā te tohi ʼaia.
3 ʼE feala ke koutou kamata palalau ʼo koutou lagaʼi te fehuʼi ʼaenī:
◼ “Koteā koa te ʼu meʼa ʼaē ʼe ke manatu kiai mokā ke fakakaukauʼi te maʼuli ʼo Sesu Kilisito? [Tuku ke fai hana tali.] ʼE tokolahi te hahaʼi fai hisitolia ʼe nātou faka tui ko Sesu ʼe ko te tagata ʼaē ʼe lahi tokotahi ʼi te ʼu temi fuli. [Koutou fakaʼaogaʼi he fakamatala ʼe tuʼu ʼi te ʼu ʼuluaki palalau ʼo te tohi Te tagata ʼaē ʼe lahi tokotahi.] ʼE fakahā mai e te Tohi-Tapu, ko te maʼuli ʼo Sesu ʼe ko he faʼifaʼitaki ʼe tonu ke tou mulimuli kiai.” Koutou lau ia 1 Petelo 2:21 pea mo te ʼuluaki palakalafe ʼo te pasina fakaʼosi ʼo te ʼu ʼuluaki palalau ʼo te tohi Te tagata ʼaē ʼe lahi tokotahi. Kapau ko ia ʼaē ʼe koutou fai palalau mo ia ʼe ina fia ʼiloʼi he ʼu meʼa ʼo ʼuhiga mo Sesu, pea koutou tuku age te tohi. ʼI muʼa ʼo takotou mavae, koutou lau age ia Soane 17:3 pea mo fehuʼi age kia ia, “ ʼE lava feafeaʼi hatatou maʼu te ʼatamai mālama ʼaia ʼe ina taki ki te maʼuli heʼegata?” Koutou fakatuʼutuʼu ke koutou toe liliu mai moʼo tali ki te fehuʼi ʼaia.
4 Ka koutou ʼaʼahi ia ia moʼo fakamahino age peʼe feafeaʼi hakita maʼu te ʼatamai mālama ʼaē ʼe ina taki ki te maʼuli, ʼe feala ke koutou ʼui fēnei:
◼ “Neʼe ʼau fakapapau atu ʼe ʼau toe liliu mai anai ʼo fakahā atu peʼe lava feafeaʼi hakita maʼu te ʼatamai mālama ʼaē ʼe ina taki ki te maʼuli heʼegata.” Koutou fakahā age te kaupepa Fakamaʼua, pea mo fakahā kia ia ʼaki te ʼuluaki kapite peʼe feafeaʼi te fai ʼo te ako.
5 ʼE toe feala foki ke tou fakaʼaogaʼi he ʼu kiʼi pepa lotu moʼo fakahā te tohi Te tagata ʼaē ʼe lahi tokotahi. Kapau ʼe tou fai te faʼahi ʼaia, pea ʼe feala ai anai ke tou ʼiloʼi peʼe lahi feafeaʼi te fia logo ʼa te hahaʼi, pea mo tou ʼiloʼi ʼi tatatou ʼuluaki fai palalau, peʼe lelei ke tou tuku te tohi ʼaia peʼe ko he tahi age tohi ʼe tali anai ki te ʼu meʼa ʼaē ʼe ina fia ʼiloʼi.
6 Ka koutou fakaʼaogaʼi te kiʼi pepa lotu “Ko Te Malamanei ʼo Te Temi ʼAenī ʼe Hāo Anai Koa?”, ʼe feala ke koutou fai te ʼu palalau ʼaenī:
◼ “ ʼI taku fai palalau mo te hahaʼi, neʼe ʼau fakatokagaʼi ʼe tokolahi ia nātou ʼaē ʼe nātou tuʼaniaʼi . . . [koutou fakahā he meʼa neʼe hā ʼi te tala logo]. ʼE fakaʼāsili kovi te ʼaluʼaga ʼo te malamanei. Ko ʼihi ʼe nātou feʼekeʼaki peʼe hāo anai te malamanei ʼaenī. Koteā tau manatu ki te faʼahi ʼaia? [Tuku ke fai hana tali. Tokolahi te hahaʼi ʼe nātou falala ki te ka haʼu.] Neʼe ʼau lau te manatu fakaloto mālohi pea ʼe ʼau fia fakahā atu te manatu ʼaia. ʼE tuʼu ʼi te kiʼi pepa lotu ʼaenī. [Koutou foaki age te kiʼi pepa lotu Ko Te Malamanei ʼo Te Temi ʼAenī ʼe Hāo Anai Koa? pea koutou toʼo he tahi kiʼi pepa lotu feiā.] Fakatokagaʼi te meʼa ʼaē neʼe fakakikite e Sesu . . .” Koutou lau he palakalafe ʼe tuʼu ʼi te pasina 4 peʼe ko te pasina 5 ʼe ʼalutahi mo te ʼu ʼuluaki palalau ʼaē neʼe koutou fai. Kapau ʼe fia logo moʼoni, ʼe lagi koutou fakatuʼutuʼu anai ke koutou fakahā age kia ia te tohi Te tagata ʼaē ʼe lahi tokotahi. Kapau ʼe feala, pea koutou fuli age te kapite 111 moʼo fakahā ki ai he tahi ʼu fakamatala ʼo ʼuhiga mo te fakakikite ʼa Sesu. ʼI muʼa ʼo takotou mavae, ʼe lagi koutou fakamahino fakanounou anai kia ia te ʼaluʼaga ʼo tatatou gāue fai faka mafola ʼaē ʼe fai ʼi te kele katoa. Tahi ʼaē, koutou lagaʼi he fehuʼi ʼo ʼuhiga mo he faʼahi ʼe koutou talanoa anai kiai ʼi takotou toe ʼaʼahi ia ia.
7 Kapau ʼe tou manatuʼi ko tatatou fakatuʼutuʼu ʼe ko te kamata ʼo he ako Tohi-Tapu mo te tagata peʼe ko te fafine ʼaia, pea ʼe maʼua anai ke tou teuteuʼi lelei tona ʼaʼahi. Koia, ʼe lava feafeaʼi hatatou kamata he ako Tohi-Tapu ʼaki te kapite 111?
8 ʼI takotou ʼosi fakamatala fakanounou te palakalafe tolu pea mo fakaʼaogaʼi te ʼu fehuʼi ʼo te palakalafe fā ʼo te kiʼi pepa lotu moʼo fai ʼo takotou ʼuluaki palalau, ʼe feala ke koutou ʼui fēnei:
◼ “ ʼE ke ʼiloʼi koa ko te ʼu tisipulo ʼa Sesu neʼe nātou fia ʼiloʼi te ʼu meʼa ʼaia? Ko te tali ʼaē neʼe ina fai age kia nātou, ʼe toe maʼuhiga foki kia tatou.” ʼOsi ʼaia, pea koutou avahi te tohi ʼi te kapite 111, pea koutou lau age te ʼu ʼuluaki palakalafe e tolu. E lagi feala anai hakotou fai te ʼuluaki fehuʼi ʼaē ʼi te fakaʼosi ʼo te kapite: “Koteā te tupuʼaga ʼo te lagaʼi e te kau ʼapositolo te fehuʼi, ka koteā te meʼa neʼe lagi manatu kiai ʼihi?” Koutou tokoni kia ia ke ina fakakaukauʼi te tali ki te fehuʼi, pea koutou fakamatala te ʼuhiga ʼo te paki moʼo fakamahino age kia ia. ʼI takotou ʼosi lau te palakalafe fā ki te ono, koutou fai te lua fehuʼi: “Ko te faʼahi fea ʼo te lea faka polofeta ʼa Sesu neʼe hoko ʼi te taʼu 70, ka koteā te meʼa ʼaē neʼe mole hoko ʼi te taʼu ʼaia?” Kapau ʼe ina fia ʼiloʼi te faʼahi ʼaia, pea kapau ʼe ʼi ai hona temi, pea koutou hoko atu takotou fai palalau.
9 Ko te ʼu faʼahiga hahaʼi kehekehe ʼe nātou kumi te moʼoni ʼo ʼuhiga mo te ʼAtua pea mo Kilisito. ʼE feala ke tou tokoni kia nātou ʼi tatatou gāue fai faka mafola. Koia, tou haga “gāue mālohi pea mo faiga mālohi, he neʼe tou tuku tatatou falala ki he ʼAtua maʼuli, ʼaē ko te Fakamaʼuli ʼo te faʼahiga tagata fuli pe.”—1 Tim. 4:10.