Ko Te Fakahā ʼo Te Tohi L’humanité à la recherche de Dieu
1 Ki te ʼu hahaʼi ʼe tokolahi ʼi totatou temi, ko te fili ʼo te lotu ʼe fakalogo pe ia kia nātou takitokotahi. ʼO faigataʼa ai foki te palalau ki te fahaʼi ʼaia. Kae, ʼi te temi nei, ʼe ia tatou te tohi L’humanité à la recherche de Dieu, ʼe ko he tokoni lelei ʼaia ki te fai faka mafola ki te ʼu hahaʼi ʼo te ʼu lotu kehekehe.
2 Koteā koa te meʼa ka tou ʼui age moʼo uga ai he tahi ke ina fia lau te tohi? Koteā koa te ʼu manatu pe ʼe ko te ʼu faʼahi ʼo te tohi ke fakahāhā moʼo tokoniʼi ai te hahaʼi ʼaē ʼe nātou ʼui ʼe nātou kilisitiano? Ia nātou ʼaē ko tanatou tui ʼe mole ʼalu tahi mo te lotu faka kilisitiano? Pe ʼe ko nātou ʼaē ʼe mole tui ki te ʼAtua? Ko te ʼu manatu ʼe hoko ki muli mai ʼe tokoniʼi ai tatou ke tou teuteu moʼo fakahā ki totatou kāiga ʼe ʼaoga te ‘kumi ʼo Sehova’ pea mo ‘kalaga kia te ia, lolotoga te temi kei ōvi mai ai kia tatou (Is. 55:6). Ko te ʼu manatu ʼaia ʼe tonu ke fakaʼaoga mo mulimuli ki te ʼu hahaʼi ʼo te telituale.
3 He koʼe ʼe tonu ke fakakaukauʼi te meʼa ka tou ʼui age?: Koteʼuhi ʼaē ʼe tokolahi te hahaʼi ʼe nātou leleiʼia pe tanatou lotu pea ʼe mole nātou fia fetogi, koia ʼe tonu ai ke tou fai tatatou fakahā mo mulimuli ki te faʼahi ʼaia ko he tokoni ʼaia ki ai ke ina fakasiosio ʼaki he fakakaukau lelei te meʼa ka tou ʼui age anai.
4 ʼI te ʼosi ʼo tatatou fakamālo ki he tahi, ʼe feala ke tou ʼui age:
◼ “ ʼI tamatou fai palalau mo tomatou ʼu vāhaʼa fale, ʼe mātou siosio ʼe tokolahi te ʼu hahaʼi ʼe nātou leleiʼia tanatou lotu pea ʼe mole nātou fia fetogi. Kae kapau ʼe faigaʼi e te hahaʼi he kiʼi temi moʼo fakasiosio ʼo te tui ʼa ʼihi, ʼi takotou manatu ʼe mole nātou femahinoʼaki koa pea mo siʼisiʼi ai te fehiʼa ʼi te malamanei? [Tuku ke fai mai hana tali.] Koutou sisio ki te fakahā mai ʼa te Tohi-Tapu ʼo ʼuhiga mo nātou ʼaē ʼe ʼoʼofa ki te ʼAtua pea mo te meʼa ʼe tonu ke nātou fai maʼa niʼihi atu.” ʼI te ʼosi lau ʼo Gāue 17:26, 27, lagaʼi tana fakasiosio ʼaki te ʼu palakalafe 15 pea mo te 16 ʼo te pasina 10 ʼo te tohi L’humanité à la recherche de Dieu.
5 Tokolahi neʼe nātou tokagaʼi ʼe feala ke fia logo he tahi mokā ʼe avahi te tohi ʼi he kapite ʼe palalau ai ki tana lotu. Koʼeni he faʼahiga fai.
6 ʼI te ʼosi ʼo takotou fakahā tokotou higoa, ʼe feala ha kotou ʼui age:
◼ “ ʼE lahi te ʼu lotu ʼi te temi nei. Neʼe kua koutou fehufehuʼi koa pe ʼe feafeaʼi te leleiʼia ʼo he lotu e te ʼAtua? ” ʼI tana ʼosi fakahā mai tana manatu, fakahā age te pasina 377 ʼo te tohi L’humanité à la recherche de Dieu, ʼe fakahāhā ai te ʼu faʼahi e hogofulu ke ʼiloʼi ai te lotu moʼoni. Fakatokagaʼi te puani numelo 7. Fehuʼi age ki ai pe ʼe ina fakamoʼoni ʼe feiā te fai ʼa he tahi ʼe ina maʼuliʼi te lotu moʼoni ʼo ʼuhiga mo te ʼu lanu pea mo te ʼu fenua. Kapau ʼe loaloaga te temi, koutou toʼo te ʼu vaega faka tohi-tapu ʼaē e tolu ʼe tuʼu ʼi ai. Pea fakaʼosi ʼaia takotou fai palalau ʼo ʼui age ko te ʼu faʼahi ʼaē e hiva ʼe toe fakatafito pe ki te Tohi-Tapu.
7 Ko ʼihi faʼahi ʼe ʼaoga: ʼE feala foki takotou fakaʼaogaʼi te kumiʼaga ʼe tuʼu ʼi te fakaʼosi ʼo te tohi. Koteā he ʼui, ohage la, mokā ʼe tokolahi te ʼu hahaʼi ʼi te telituale ʼe manatu ko te ʼu lotu fuli, ko te ʼu ala kehekehe kae ʼe ʼolo fuli pe ki te ʼAtua? Koutou sioʼi te kupu “Religion”, ʼe ʼi ai tona tahi koga “ ‘religions tendent toutes vers le même but’: 12”. ʼE feala foki takotou maʼu he ʼu manatu moʼo fai palalau ʼaki te tokoni ʼa te kumiʼaga. Kapau ʼe koutou palalau ki ni hahaʼi ʼe mole tui ki te ʼAtua, ʼe feala takotou fakahā age te ʼu palakalafe 1 pea mo 2 ʼo te pasina 329, ʼe palalau ai ki te mole kei tui ʼi te temi nei. ʼE lagi ko te ʼu “questions qui méritent une réponse” ʼaē e nima ʼe tuʼu ʼi te ʼu pasina 17 pea mo 18, ʼe ʼaoga tāfito anai ki te ʼu hahaʼi ʼaē ʼe nātou fehufehuʼi pe ʼe akoʼi e te Tohi-Tapu te logo ʼaē ʼe faka mafola e te ʼu lotu.
8 ʼAki he fakahā fakapotopoto ʼo te tohi L’humanité à la recherche de Dieu, ʼe lagi feala anai hatatou tokoniʼi ia nātou ʼaē ʼe fai palalau mo tatou ke nātou kumi te ʼAtua moʼoni e tahi, ia Sehova.