ʼE ʼAoga Ki Te Hahaʼi Ke Nātou Kumi Te ʼAtua
1 Lolotoga te 20 sekulo neʼe hoko te ʼu feʼaluʼaki maʼuhiga ʼa te hahaʼi ʼuhi ko te ʼu tau, te ʼu maʼuli neʼe gaohi koviʼi pea mo te ʼu maveumaveu ekonomike. Koteʼuhi ʼi te temi nei, ʼe faigafua tatatou folau pea kua feala tatatou felōgoʼi fakavilivili, ko te mālama ʼe hage ia kua nounou. Ko te kaugā hahaʼi ʼo te ʼu lotu kehekehe kua nātou felōgoʼi. Ko te ʼu logo ʼe hā ai, ʼi te ʼu fahaʼi kehekehe ʼo te mālama, ko te lotu ʼe talatuʼu ki te maʼuli ʼo te ʼu hahaʼi.
2 Ko te ʼu faʼahi ʼaia ʼe ʼi ai foki tona talatuʼu ki tatatou gāue faka mafola. ʼE mole kei faigataʼa te felāveʼi mo he ʼu hahaʼi lotu ʼe mole tou faʼa ʼiloʼi lelei.
3 Moʼo tokoniʼi tatou ke tou mahino lelei ki ʼihi atu lotu pea mo tonatou hisitolia, ko te tohi ʼaē ko tona kupu L’humanité à la recherche de Dieu neʼe ta ki te fahaʼi ʼaia. ʼE ina tali ki te ʼu fehuʼi ʼe lauʼi teau ʼo ʼuhiga mo te tui tāfito ʼa te ʼu lotu lalahi ʼo te mālama. ʼE tou fakahā anai te tohi ʼaia ʼi totatou minisitelio ʼi te māhina ko sūnio. Koteā koa he ʼu manatu ʼe fakahā ʼi te tohi maʼuhiga ʼaia ʼe feala ke tou fakahāhā moʼo fakaloto mālohiʼi ai te ʼu hahaʼi fakamalotoloto ke lahi ai tanatou ako he ʼu meʼa ʼo ʼuhiga mo te ʼAtua?
4 Ko he fehuʼi tāfito, ʼe lolotoga fakasiosio ʼi te tohi ʼaia, ʼe ko te manatu ʼaenī: ʼE ʼi ai koa he laumālie tuputupua ʼo te tagata, ʼe ʼalu ki he tahi atu fahaʼi, ʼi te temi ʼaē ʼe mate ai te sino? ʼO ina toʼo he faʼahiga sino, teitei katoa pe te ʼu lotu fuli tanatou akonakiʼi te manatu ʼaia. ʼE ʼi ai foki ʼihi atu manatu ʼe fakasiosio ʼi ai: ʼE ʼi ai koa he ʼifeli ʼe gaohi koviʼi ai te ʼu hahaʼi? Koteā koa te falala moʼoni ʼe tou maʼu ʼo ʼuhiga mo te kau mate? ʼE ko he ʼAtua koa ʼe tahi pe ʼe lahi he ʼu ʼatua? ʼE feala hatatou faigaʼi te hahaʼi ke nātou fakasiosio te ʼu fehuʼi ʼaē ʼe fai ʼi te ʼu pasina 17 pea mo 18 ʼo te tohi ʼaia. Tatau aipe pe ʼe tou palalau mo he tahi ʼe mole tui pe ʼe ko he tahi ʼe mole ina ʼiloʼi te ʼAtua, ʼe feala ke tou lagaʼi tana fia logo ʼaki te ʼu fehuʼi 4 pea mo 5, pea ʼe lagi feala ke kamata ai he fai palalau lelei mo ia.
5 Ko te hahaʼi fuli ʼi te temi nei ʼe ʼaoga ke nātou kumi te ʼAtua ʼo feiā foki mo tona ʼofa. Ko te ʼu faʼahiga meʼa kua hoko ʼi te malamanei ʼe hā mai ai kua ōvi mai Halamaketone. Ko te temi ʼaenī ke tou faiva ai ʼi te gāue. ʼE ko he pilivilesio tatatou fakaloto malohiʼi niʼihi ke nātou kumi ia Sehova ʼi te temi nei, heʼe kei feala tona maʼu (Is. 55:6, 7)! ʼE feafeaʼi te tokoni ʼa te tohi L’humanité à la recherche de Dieu ki te ʼu hahaʼi ʼi tanatou kumi te ʼAtua? ʼE ina foaki he fakakaukau ki te ʼu hahaʼi ʼo te ʼu lanu kehekehe. Ohage la, ki te kau mahometa, ko te palakalafe 26, ʼo te pasina 297, ʼe fakahā ai ko te lotu faka kilisitiano moʼoni ʼe mole ina akonaki te Tahitolu. Koutou fakatokagaʼi foki pe ʼe feafeaʼi ʼi te palakalafe 43, ʼo te pasina 229, tana tokoniʼi te kau sutea ke nātou fakakaukau ki te fakaʼaoga ʼo te huafa ʼo te ʼAtua.
6 ʼE ʼi ai te ʼu tupuʼaga ʼo tatatou fiafia mokā tou fakahā te tohi ʼaia. Kapau ʼe tou ʼiloʼi lelei te tohi ʼaia, ʼe tou maʼu anai he ʼu faʼahi moʼo uga ai te ʼu hahaʼi fakamalotoloto ʼo te ʼu lotu kehekehe. Koia ke tou faiva ʼi te gāue ʼaia!
7 Ko Sehova ʼe ko he ʼAtua agaʼofa pea mo manavaʼofa. Ko tana fakaafe ʼaē ke ako ke ʼiloʼi ia ia ʼe ko he finegaloʼofa ia! ʼE lagi ʼe lahi anai te ʼu hahaʼi ka liliu ko te kau ʼatolasio ʼa Sehova ʼi te temi ka haʼu. ʼI sūnio, ʼaki te tohi L’humanité à la recherche de Dieu, ʼe feala ai hatatou tokoniʼi he tokolahi ʼi te keletiate ʼo feiā foki ki te ʼu hahaʼi ʼe mole kilisitiano pe ko he ʼu hahaʼi ʼe mole lotu ke nātou ʼatolasio kia Sehova “ ʼaki te laumālie pea mo te moʼoni”. (Soane 4:23, 24.) Ke hoholo atu tatatou kumi nātou ʼaē ʼe holi ke nātou maʼu te moʼoni pea ke tou tokoniʼi nātou ke nātou faigaʼi ke lelei tanatou felōgoʼi mo te ʼAtua ʼo te moʼoni, heʼe, ʼe moʼoni, ʼe feala tona maʼu!