Te ʼu Tagata Taupau ʼe Ko He ʼu Faʼifaʼitaki—Te Tagata Taupau Pelesita
1 Ko te gāue tagata taupau ʼi te kokelekasio ʼe ko he maʼua mamafa. (Gāue 20:28; 1 Tim. 3:1) Ko te ʼuluaki alatike ʼaenī ʼo he ʼu alatike kehekehe ʼe fakahā ai anai te ʼu maʼua kehekehe ʼa te ʼu tagata taupau faka Kilisitiano, ke feala hatatou ʼiloʼi te gāue maʼuhiga ʼaē ʼe nātou fakahoko maʼa tatou.
2 Ko te Sosiete ʼe ina hinoʼi te tagata taupau pelesita ke gāue lolotoga he temi ʼe mole faka tuʼakoi. Ko te tagata taupau pelesita ʼe ina vakavakaʼi pea mo fakatuʼutuʼu te ʼu gāue ʼo te kokelekasio, pea ko te faʼahi ʼaia ʼe tokoni ai ki te kau tagata ʼāfea ke nātou fai fakalelei tonatou ʼu maʼua. (Notre ministère, pasina 41 pea mo te 42) Koteā tona faka ʼuhiga?
3 ʼE momoli ki te tagata taupau pelesita te ʼu tohi ʼa te sosiete, pea ʼe ina fakatoʼo te ʼu tohi ʼaia ki te sikalaipe ke ina taupau. ʼI tana teuteuʼi te fono ʼa te kau tagata ʼāfea, ʼe fakalavelave e te tagata taupau pelesita ki te kau tagata ʼāfea pe koteā te ʼu meʼa ʼaē ʼe tonu ke nātou talanoa kiai, pea ʼe ina tohi ki he moʼi pepa. ʼE ko ia ʼaē ʼe ina takitaki te ʼu fono ʼaia ʼa te kau tagata ʼāfea. Ka fai he ʼu tonu, pea ʼe ina vakaʼi peʼe fakahoko lelei te ʼu tonu ʼaia. ʼE ko ia ʼaē ʼe ina vaevae te ʼu akonaki ʼo te Fono Gāue pea mo ina fai te polokalama ʼo te ʼu akonaki ki te kaugamālie. ʼE ina vakaʼi te ʼu logo fuli ʼaē ʼe fakahā ki te kokelekasio, mo ina fakagafua te totogi ʼo te ʼu maʼua māhani, pea mo ina vakaʼi peʼe fai ʼi te māhina tolu fuli te vakaʼi ʼo te falā ʼo te kokelekasio.
4 ʼI tona ʼuhiga tagata takitaki, ʼe fakatuʼutuʼu e te tagata taupau pelesita te gāue ʼo te Komite Gāue ʼo te kokelekasio. Ka fia faka mafola he tahi ʼe ako peʼe fia papitema, pea ʼe fakatuʼutuʼu e te tagata taupau pelesita ke ʼolo he ʼu tagata ʼāfea ʼo palapalalau mo ia. ʼE toe teuteuʼi foki e te tagata taupau pelesita te ʼaʼahi ʼo te tagata taupau faka silikosikilipisio, ke maʼu e te kokelekasio he ʼu fua lelei ʼi te vāhaʼa makehe ʼaia.
5 ʼE lahi te ʼu maʼua kehekehe ʼa te tagata taupau pelesita. ʼE ina fakahoko tona ʼu maʼua “ ʼaki he faʼafai” pea mo he agavaivai, pea ʼe feala kia tatou fuli ke tou lagolago ki te kau tagata ʼāfea. (Loma 12:8) Kapau ʼe tou “talagafua” pea mo “fakalogo” kia nātou ʼaē ʼe nātou takitaki tatou, pea ʼe nātou fakahoko fakalelei anai tanatou gāue ʼaki he fiafia lahi.—Hep. 13:17.