Koutou Feʼiloʼiʼaki Mo ʼOkotou ʼu Tēhina
1 ʼE ʼui e te Tohi-Tapu ko he kaumeʼa moʼoni ʼe lahi age tona ʼofa ʼi te ʼofa ʼa he tēhina, ʼe agatonu tuʼumaʼu, pea ʼe tokoni ki tona kaumeʼa ʼi te ʼu temi ʼaē ʼe tau ai mo he ʼu faigataʼaʼia. (Taag. 17:17; 18:24) ʼE tou maʼu anai he ʼu kaumeʼa feiā ʼe tokolahi ʼi te kokelekasio, mo kapau ʼe tou faiga ke tou feʼiloʼiʼaki pea mo ʼofa kia nātou.—Soane 13:35.
2 ʼI muʼa ʼo te kamata ʼo te ʼu fono pea ʼi te hili ʼo te ʼu fono, ʼe feala ai ke tou feʼiloʼiʼaki mo ʼotatou ʼu tēhina. He koʼe koa ʼe mole koutou ʼōmai fakatomuʼa pea mo koutou nonofo muʼa ʼi he kiʼi temi ʼi te hili ʼo te fono, ke koutou fai palalau fakafiafia ai mo ʼokotou ʼu tēhina mo tuagaʼane? Koutou fai palalau mo he ʼu tēhina kehekehe, ohage la ko nātou ʼaē kua matutuʼa, mo nātou ʼaē kua aga fakapotopoto, pea mo te kau tūpulaga pea mo nātou ʼaē ʼe umiuminoa.
3 Koutou Kamata Te ʼu Fai Palalau: ʼE mole tonu ke gata ʼaki pe takotou fakaʼalofa ki tokotou ʼu tēhina. Kae ʼe feala ke koutou kamata fai palalau, ʼo koutou fakamatala he meʼa neʼe hoko kia koutou ʼi te fai faka mafola, pe ko he manatu ʼe koutou leleiʼia neʼe koutou lau ʼi he nusipepa, pe ko he manatu ʼo ʼuhiga mo te fono ʼaē kua ʼosi. ʼE lahi anai te ʼu meʼa ʼaē ʼe feala ke koutou ʼiloʼi ʼo ʼuhiga mo tokotou ʼu tēhina, mo kapau ʼe koutou fakalogo lelei, mo fakaloto mālohiʼi nātou ke nātou fakamatala atu he ʼu meʼa neʼe hoko kia nātou, pea mo te ʼu meʼa ʼaē ʼe nātou ako. Kapau ʼe koutou fehuʼi age pe neʼe ina ʼiloʼi feafeaʼi te moʼoni, pea ʼe lagi feala anai ke lahi te ʼu meʼa ʼaē ka koutou ʼiloʼi ʼo ʼuhiga mo ia. Ko ʼihi neʼe hoko kia nātou he ʼu meʼa neʼe fakaloto mālohi ai tanatou tui, pea ko ʼihi ʼe nātou lolotoga kātakiʼi he ʼu ʼaluʼaga ʼe faigataʼa ki he tokolahi hanatou mahino kiai. Ko te fai ʼo te ʼu faʼahi ʼaia, ʼe tokoni anai kia tatou ke tou ʼofa ki ʼihi pea mo tou fakafimālieʼi te ʼu meʼa ʼaē ʼe ʼaoga kia nātou, ohage ko he ʼu kaumeʼa moʼoni.
4 Koutou Kaumeʼa Mo ʼIhi: ʼI te mate ʼo tana kiʼi taʼahine, neʼe ko he meʼa faigataʼa ki te tuagaʼane tana hivaʼi te ʼu katiko ʼo te Puleʼaga ʼaē ʼe talanoa ai ki te fakatuʼuake. ʼE ina manatuʼi fēnei: “ ʼI te tahi lakaga, ko te tēhina neʼe nofo ʼi te tahi faʼahi ʼo te fale fono, neʼe sio ki taku tagi. Neʼe haʼu ʼo hili tona nima kia ʼau, pea mo hiva fakatahi mo ʼau te fakaʼosi ʼo te katiko. Neʼe ʼau fonu ʼi te ʼofa ki ʼoku tuagaʼane pea mo tēhina pea mo ʼau fiafia ʼi tamatou kau ki te ʼu fono, ʼo mahino ai kia ʼau ko te potu ʼaē ʼe tou maʼu ai te tokoni ʼe ko te Fale ʼo te Puleʼaga.” ʼE tonu ke tou kaumeʼa mo ʼotatou ʼu tēhina ʼo tou foaki he fakaloto fīmālie mokā ʼaoga pea mo tou fakaloto mālohi ʼi te temi fuli pe.—Hep. 10:24, 25.
5 ʼI te tuputupu ʼo te lotomamahi ʼi te malamanei ʼāfea ʼaenī, tou fakatuʼutuʼu ke tou feʼiloʼi leleiʼaki mo ʼotatou ʼu tēhina. Ko te fefakaloto mālohiʼaki ʼaia ʼe liliu anai ko he tapuakina kia tatou fuli.—Loma 1:11, 12.