Ke Koutou ʼIloʼi Lelei ʼOkoutou ʼu Tēhina
1 Ko tatatou felogoi mo ʼotatou ʼu kauga fagona ʼe laka age ia ʼi te fakatahi pe ʼaē mo nātou ʼi te ʼu fono ʼi te Fale ʼo te Puleʼaga. ʼE tou fai te finegalo ʼo te ʼAtua, pea ko te faʼahi ʼaia ʼe feala ai hatatou felogoi fakalaumālie mo Sesu. (Maleko 3:34, 35) Koia, ʼi te faʼahi ʼaia, ʼe feala ai hatatou felogoi tahi mo niʼihi ʼi te kokelekasio faka Kilisitiano, ko ʼotatou ʼu tēhina pea mo tuagaʼane fakalaumālie, ʼaē ʼe fakamaʼuaʼi ke tou ʼoʼofa kia nātou. (Soane 13:35) Koia, ko nātou ʼaē ʼe fakatahi mo te “hahaʼi ʼo te ʼapi ʼo te ʼAtua” ʼe tonu ke nātou faigaʼi ke nātou feʼiloʼaki lelei.—Ef. 2:19.
2 Ke Koutou ʼIloʼi Te ʼu Higoa ʼo Te ʼu Tēhina: ʼE koutou ʼiloʼi koa te ʼu higoa ʼo te ʼu tēhina pea mo te ʼu tuagaʼane ʼi takotou Ako Tohi ʼo te Kokelekasio? Ko te ʼu ako tohi ʼe mole hahaʼi, ʼe faigafua ai te ʼiloʼi ʼo te ʼu higoa ʼo te tokolahi, peʼe ko nātou fuli ʼaē ʼe kau ki te ako tohi. Kapau ʼe mole koutou ʼiloʼi foki ʼonatou ʼu higoa, ʼe feala koa ke koutou ʼui ʼe koutou ʼiloʼi lelei ia nātou?
3 Kae e feafeaʼi ʼihi, ʼo kau ai te tamaliki, ʼaē ʼe kau ki te ʼu fono ʼi te Fale ʼo te Puleʼaga? E lagi ʼe tou holi pe anai ke tou fakatahitahi mo he kūtuga ʼi ʼotatou ʼu kaumeʼa. Logope la te mole kovi ʼo te fakatahitahi tuʼumaʼu mo he kūtuga, ʼe mole tou loto anai ke gata pe tatatou fakatahi mo te kiʼi kūtuga ʼaia. ʼE tonu ke tou “faka fālahi,” ʼo tou faiga ke tou ʼiloʼi lelei ʼotatou ʼu tēhina pea mo tuagaʼane fuli. (2 Ko. 6:11-13) Koia ʼe tonu ai foki ke tou ʼiloʼi lelei ʼonatou ʼu higoa.
4 Ko te ʼu tēhina ʼaē ʼe nātou taki te ʼu fono ʼo te kokelekasio ʼe tonu ke nātou faigaʼi ke nātou ʼiloʼi te ʼu higoa ʼo nātou fuli ʼaē ʼi te fono. Ko te hinoʼi ʼo he tahi mai muʼa ʼaki tona higoa ʼe feala ke ina logoʼi ko tana tali ʼe leleiʼia, pea tahi ʼaē meʼa, ʼe toe tokoni ki niʼihi ke nātou ʼiloʼi tona higoa. ʼE mahino papau ia, ʼe ʼi ai tuʼumaʼu anai niʼihi ʼe foʼofoʼou peʼe ko ni hahaʼi neʼe ʼōmai pe ʼo mamata, ʼo fakatupu faigataʼa ai te ʼiloʼi ʼo te ʼu higoa fuli. Kae, ko he faiga fakamalotoloto ʼe ina fakaloto mālohiʼi niʼihi pea ʼe fakaʼiloga ai te ʼofa fakamalotoloto ʼaē kia nātou.—Lom. 1:11, 12.
5 Tou Fakatuʼutuʼu Ke Tou Feʼiloʼiʼaki Lelei: Ko te ʼu tagata taupau feʼaluʼaki ʼe nātou māhani lelei ki te ʼu higoa ʼo te tokolahi ʼi te ʼu tēhina pea mo te ʼu tuagaʼane. E feafeaʼi koa tanatou fai te faʼahi ʼaia? Ko te ʼu faʼahi e tolu tāfito ʼe nātou fai: (1) ʼE nātou gāue tuʼumaʼu mo nātou ʼi te fai faka mafola; (2) mokā ʼe feala, ʼe nātou tali te ʼu fakaafe ki te ʼu ʼapi ʼo te ʼu tēhina; pea (3) ʼe nātou fakatuʼutuʼu ke nātou ʼalofa ki te hahaʼi lalahi pea mo te ʼu tamaliki ʼi te ʼu fono.
6 Koteā te ʼu ʼaluʼaga ʼe feala ai ke koutou faka fālahi ʼokotou fakakaugā pea ke koutou ʼiloʼi lelei ai ʼokotou ʼu tēhina? ʼE feala ke koutou fakaafe niʼihi ke nātou kauga ʼolo mo koutou ʼo fai faka mafola. Ko te fai faka mafola ʼi te ʼu ʼapi, peʼe ko te fai ʼo te ʼu ʼaʼahi, mo te ʼu ako faka Tohi-Tapu, peʼe ko te fagonogono ʼi te ala ʼe ko te ʼu faʼahi lelei fuli ʼaia ke koutou feʼiloʼiʼaki lelei ai. ʼE lelei foki ke koutou fakaafe niʼihi ki tokotou ʼapi, lagi ʼo koutou kakai fakatahi peʼe koutou ʼinu fakatahi mo nātou ʼaia mokā ʼe faigamālie. Ko te fakatuʼutuʼu ʼaē ke koutou fakaōvi ki te ʼu hahaʼi foʼou peʼe ko nātou ʼaē ʼe umiuminoa ʼe mole gata ʼaki pe takotou tokoni ki tanatou tuputupu fakalaumālie kae ʼe koutou toe maʼu ai foki te ʼu tapuakina.—Gāue 20:35; 1 Tes. 5:11.
7 Neʼe ʼiloʼi lelei e Paulo ʼona ʼu tēhina. ʼI tana fakaʼaogaʼi te ʼu higoa ʼo te tokolahi ʼi tana ʼu tohi ʼe ko te fakamoʼoni ʼaia ʼo tana tokaga pea mo tana ʼofa moʼoni kia nātou. (1 Tes. 2:17; 2 Tim. 4:19, 20) Ko tatatou ʼu faiga ʼaē ke tou ʼiloʼi lelei ʼotatou ʼu tēhina ko tona faka ʼuhiga ko tatatou maʼu fuli anai te ʼu tapuakina.