ʼE Feala Ke Tou Fai He ʼu Gāue ʼe Lahi Ake
1 ʼI tana minisitelio, neʼe fai e Sesu te ʼu gāue fakaofoofo. Neʼe ina fafaga faka milakulo te hahaʼi e toko lauʼi afe, mo ina fakamālōlō te tokolahi, pea mo ina fakatuʼuake ʼihi mai te mate. (Mateo 8:1-17; 14:14-21; Soane 11:38-44) Neʼe ʼiloʼi tana ʼu gāue ʼi te puleʼaga katoa. Kae ʼi te po fakamuli ʼi muʼa ʼo tana mate, neʼe ina ʼui fēnei ki tana kau tisipulo agatonu: “ ʼE ʼau tala moʼoni atu kia koutou, ko ʼaē ʼe tui kia te ʼau, ʼe ina toe fai anai mo ia te ʼu gāue ʼaē ʼe ʼau fai; pea ʼe ina fai anai he ʼu gāue ʼe lahi ake ʼi te ʼu gāue ʼaenī.” (Soane 14:12) ʼE lava feafeaʼi hatatou fai he ʼu gāue ʼe “lahi ake”?
2 Tou Fai Ke Lahi Ake Tatatou Gāueʼi Te Telituale: Neʼe gata pe te gāue ʼa Sesu ʼi Palesitina, te potu ʼaē neʼe ina fakatotonu ai ki tana ʼu ʼuluaki tisipulo ke nātou faka mafola “ ʼo kaku ki te potu taupotu ʼo te kele,” ʼo mamaʼo atu ʼi te potu ʼaē neʼe fai faka mafola ai ia Sesu. (Gāue 1:8) Ko te gāue fai faka mafola ʼaē neʼe ina kamata, kua mafola ʼi te temi nei ʼi te malamanei katoa, ia fenua e 232. (Mateo 24:14) ʼE lahi koa takotou lagolago ki te gāueʼi ʼo te telituale ʼo takotou kokelekasio?
3 Tou Fai Palalau Mo He ʼu Hahaʼi ʼe Tokolahi Age: Neʼe tokosiʼi te ʼu tisipulo ʼaē neʼe fakatotonu age e Sesu ke nātou hoko atu te gāue fai faka mafola. Kae ʼaki tanatou fai faka mafola lahi ʼi te Penikosite ʼo te taʼu 33 ʼo totatou temi, ko te toko 3 000 neʼe nātou tali te moʼoni pea mo nātou papitema. (Gāue 2:1-11, 37-41) Ko te fakatahitahi ʼo te hahaʼi ʼaē “neʼe lotolelei ki te maʼuli heʼegata” neʼe hoko atu ʼo aʼu mai ki totatou temi, pea ʼe fakafuafua ʼe papitema te toko 1 000 hahaʼi ʼi te ʼaho fuli. (Gāue 13:48) ʼE koutou faiga mālohi koa ke koutou fai palalau mo te ʼu hahaʼi fakamalotoloto ʼi te ʼu faʼahi fuli pe ʼaē ʼe koutou maʼu atu ai ia nātou pea mo koutou ʼaʼahi fakavilivili nātou mo kapau ʼe feala?
4 Ke Fualoa Takotou Fai Faka Mafola: Neʼe fai faka mafola ia Sesu ʼi te kele lolotoga taʼu e tolu vaelua. Tokolahi ia tatou kua fualoa age tatatou fai faka mafola. Tatau aipe peʼe ko temi e fia ʼaē ʼe kei toe ke hoko atu ai te gāue, kae ʼe tou fiafia ʼi hatatou tokoni ki te ʼu tisipulo foʼou fuli ʼaē kua kamata haʼele ʼi te ala ʼaē ʼe taki ki te maʼuli. (Mateo 7:14) ʼE lahi koa te ʼu meʼa ʼaē ʼe koutou fai ʼi te ʼu māhina fuli ʼi te gāue ʼo te ʼAliki?—1 Ko. 15:58.
5 ʼE feala ke tou falala, ʼaki te tokoni ʼa Sesu, ʼe tou fai anai he ʼu gāue ʼe lahi ake heʼe ko tatou tana ʼu tisipulo moʼoni.—Mateo 28:19, 20.