Koutou Fakaafe Nātou Ke Nātou ’Ōmai
1 ʼI te temi nei, ʼe fai ʼi te ʼu fenua e 233 ʼo te malamanei katoa te fakaafe ʼaē neʼe kua fai kua hili kiai ni ʼu sēkulō: “Koutou ʼōmai pea ke tou hake ki te moʼuga ʼo Sehova, . . . pea ʼe ina akoʼi mai anai kia tatou tona ʼu ala, pea ʼe tou haʼele anai ʼi tona ʼu ala foufou.” (Isa. 2:3) Kapau ʼe tou taki te hahaʼi ki te kautahi ʼo Sehova, pea ʼe tou tokoni anai kia nātou ke nātou tuputupu ʼi te faʼahi fakalaumālie pea ke nātou maʼu te maʼuli heʼegata.
2 ʼE ʼi ai te kau fai faka mafola, ʼe mole nātou fia fakaafe te hahaʼi ki te Fale ʼo te Puleʼaga mo kapau ʼe mole heʼeki nātou tuputupu lelei ʼi tanatou ako ʼo te Tohi-Tapu. Kae, ʼe ʼi ai te hahaʼi ʼe nātou ʼōmai ki te ʼu fono ʼo te kokelekasio logola mole heʼeki kamata hanatou ako Tohi-Tapu. ʼE mole tonu ke tou tuai ʼi te fakaafe fakamalotoloto ʼo te hahaʼi ke nātou ʼōmai ki te ʼu fono.
3 Te Meʼa ʼAē ʼe Feala Ke Koutou Fai: Koutou fakaʼaogaʼi te ʼu kiʼi pepa fakaafe ki te ʼu fono moʼo fakahā ki te hahaʼi te ʼu ʼaho ʼaē ʼe fai ai te ʼu fono ʼo te kokelekasio. Koutou fakahā age ʼe mole totogi te ʼu fono, pea ʼe mole fai ai he tae falā. Koutou fakamahino age te fakaʼaluʼalu ʼo te ʼu fono. Koutou fakahā age kia nātou, ʼe ako moʼoni ai te Tohi-Tapu, pea ʼe feala ke tahi maʼu e te hahaʼi hanatou tohi ke nātou mulimuli ki te ako. Tahi ʼaē meʼa, koutou talanoa age ki te kehekehe ʼo te hahaʼi ʼaē ʼe nātou kau ʼi te ʼu fono ʼaia. Koutou fakatokagaʼi age kia nātou, ko te hahaʼi ʼaia ʼaē ʼe ʼōmai ki te ʼu fono, ʼe ko he ʼu hahaʼi ʼo henī, ʼe nonofo ʼi te kolo, pea ʼe feala kia nātou liliki ke nātou kau mo nātou ʼi te ʼu fono. ʼE tonu ke tou fakaafe ia nātou ʼaē ʼe tou fai hanatou ako, ʼo tou tokoni kia nātou ke nātou ʼōmai ki te fono.
4 Ko te fakamatala fakamuli ʼa te Tohi-Tapu, ʼe ko he fakaafe ʼe fai ki te hahaʼi fuli ke nātou maʼu te ʼu fua lelei ʼo te ʼu fakatuʼutuʼu ʼa te ʼAtua ʼo ʼuhiga mo te maʼuli: “Pea e lau e te Laumalie mo te Hoa: ‘Haele mai!’ . . . Ke haele mai iaʼia e fiaʼinu, ko ae e loto ki ai, ke ina too noa te vai mauli.” (Apk. 22:17) Kapau ʼe tou loto ke ʼōmai te hahaʼi ki te ʼu fono, pea ʼe maʼua ke tou fakaafe ia nātou.
5 Ia Isaia 60:8, ʼe maʼu ai te lea faka polofeta ʼo ʼuhiga mo te toko lauʼi afe hahaʼi ʼaē ka nātou ʼōmai ki te ʼu kokelekasio ʼo te hahaʼi ʼa te ʼAtua, pea ʼe fakatatau nātou ki he ʼu lupe “ ʼe nātou lele mai ohage ko he ʼao, pea ohage ko he ʼu lupe ʼe nātou liliu ki tonatou nofoʼaga.” ʼE feala kia tatou fuli ke tou fakaafe te hahaʼi ki tatatou ʼu fono pea mo tali leleiʼi nātou. Kapau ʼe tou fai te faʼahi ʼaia, pea ʼe tou lagolago anai kia Sehova ʼi tana fakavave ia te tātānaki ʼo te hahaʼi.—Isa. 60:22.