“Tou ʼOlo Ki Te Fale ʼo Sehova!”

¹ Neʼe tali fakavilivili ia Tavite ki te fakaafe: “Tou ʼolo ki te fale ʼo Sehova!” (Pes. 122:1). Ko te “fale” ʼo Sehova, ko tona faka ʼuhiga ko te fale lotu, neʼe ko te koga meʼa ʼaē ʼe fakatahitahi ki ai ia nātou ʼaē ʼe fia atolasio ki te ʼAtua moʼoni. ʼE ko he tauʼaga fīmālie. Ia ʼaho nei, ko te kokelekasio faka kilisitiano faka malamanei ʼaē ko te “fale” ʼo te ʼAtua, “pou pea mo lagolago ki te moʼoni”. (1 Tim. 3:15.) Ko te ʼu fakatuʼutuʼu fuli neʼe fai ʼo ʼuhiga mo te fakamaʼuli ʼe haʼu mai te faʼahi ʼaia. Koia ʼaē “ko te fenua fuli ʼe ʼomai anai ki ai” mokā ʼe nātou fia ʼiloʼi te ʼu tapuakina neʼe fakapapau ʼe fakaʼiloga ʼaki ai te fai pule ʼo te Puleʼaga ʼa te ʼAtua. — Is. 2:2.

² Ko te “fale” ʼaia ʼe fakatuʼutuʼu ko te ʼu kokelekasio ʼe laka ʼi te 69 000 ʼe mavaevae ʼi te ʼu fenua pea mo te ʼu motu e 229. Ko te ʼu matapā ʼo te ʼu Fale ʼo te Puleʼaga ʼi te malamanei katoa ʼe kua ava, pea ko te kau gāue faiva kua laka ʼi te ʼu miliona e fā ʼe nātou fai te fakaafe ʼaenī: “Haʼu! (...) pea ko ʼaē ʼe loto ki ai ke ina toʼo te vai ʼo te maʼuli ʼaē ʼe mole totogi.” (Fkhā. 22:17). Tokolahi te hahaʼi neʼe logo ki te fakaafe ʼaenī pea neʼe nātou tali fakafiafia ki ai. Ko ʼihi neʼe nātou logo ki ai kae mole heʼeki nātou ʼomai ki te fale ʼo Sehova; ʼe mole heʼeki nātou kau ki te kokelekasio faka kilisitiano. ʼE ʼaoga kia nātou “te ʼu meʼa fakalaumālie” ʼaē ʼe hoki fakafimālie pe ʼaki te ʼu fakatuʼutuʼu neʼe fai ʼi te kokelekasio (Mat. 5:3). ʼE tou maʼuli nei ʼi he temi maʼuhiga, heʼe ko te fakaʼosi ʼo te faʼahiga meʼa ʼo te tuʼu ʼaenī kua fakaōvi fakavilivili mai. Ko te mole fia tokaga ki te logo peʼe ko te lotolotolua ʼe puli ai he temi maʼuhiga. ʼE tonu ke faiga fakavilivili te hahaʼi ke nātou ‘fakaōvi ki te ʼAtua’ ʼaki tanatou fakaōvi ki tona kautahi (Sake 4:8). E feafeaʼi koa hatatou tokoni kia nātou?

³ Tou taki te hahaʼi ʼe lotolelei ki te kautahi: ʼI te ʼuluaki fai palalau mo te hahaʼi ʼaē ʼe lotolelei, ʼe tonu ke tou taki ia nātou ke nātou fakatokagaʼi te kautahi. E lagi ʼe feala ke tou maʼu he ʼu vaega ʼi te Tohi-Tapu pea mo fakamahino te ʼu akonaki tāfito, kae ko te mālama ʼaia ʼe mole haʼu mai ia tatou. Ko te ʼu meʼa fuli ʼaē neʼe tou akoʼi ʼe haʼu mai te kautahi, pea ʼe foaki mai e te tokoni ʼo te kalasi ʼo te tagata kaugana ʼaē ʼe ina tufaki mai te “meʼa kai ʼi tona lakaga totonu”. (Mat. 24:45-47.) ʼI te kamataʼaga, ʼe tonu ke mahino te hahaʼi ʼaē ʼe fia logo ki te moʼoni ko te tauhi maʼa ʼe mole gata pe ia tatou, pe ko te kokelekasio faka kolo; e ʼi ai he kūtuga ʼe fakatahitahi, faka teokalatike pea mo faka malamanei, ʼe taki e Sehova.

⁴ Ko te taki ʼaē ʼe tou maʼu ʼi te temi nei ʼe hau mai ia Sehova, ʼaē neʼe ina fakapapau mai ʼe ina taki pea mo akoʼi tatou (Pes. 32:8; Is. 54:13). Ko te ako ʼaia ʼe fai tāfito ʼaki ʼatatou ʼu tohi. Kapau ʼe tou ʼaumai te hahaʼi ʼaē ʼe lotolelei ke nātou faka maʼuhigaʼi te ʼu tohi, ke mahino kia nātou ʼe maʼu ai te mālama ʼe maʼuhiga ʼaupito, ʼo faigamalie leva kia nātou tona lau, ʼo maʼuliʼi te ʼu tokoni ʼe tuʼu ʼi ai, pea ʼe mole nātou liaki fakavilivili anai. ʼE tonu ke tou fakahā pea mo fakaʼaogaʼi tuʼumaʼu te ʼu tohi ʼaki he faʼahiga fai mo fakaʼapaʼapa ki ai. ʼE tou akoʼi feiā anai kia nātou ʼe foʼofoʼou ke nātou leleiʼia te kautahi pea ke nātou falala ki te ʼu fakatuʼutuʼu ʼe ina fai.

⁵ Tou fakahā kia nātou ʼaē ʼe fia logo ki te moʼoni e ʼi ai te faʼahi ʼe fai ai te ʼu fono ʼe ōvi atu ki tonatou ʼapi pea ʼe fai tuʼumaʼu ai te ʼu akonaki. Tou fakahā kia nātou te tuʼasila ʼo te Fale ʼo te Puleʼaga pea mo te hola ʼo te ʼu fono. Tou fakamahino age kia nātou te kehekehe ʼo tatatou ʼu fono pea mo te ʼu fono faka lotu neʼe nātou kau ki ai ʼi te temi muʼa. Ko nātou fuli ʼaē ʼe ʼomai ʼe tali lelei, ʼe mole ʼi ai he tae falā, pea ʼe mole kole meʼa ʼofa ki he tahi. Ko te ʼu minisi neʼe hinoʼi ke nātou taki te faka ʼalu lelei ʼo te ʼu fono, kae ʼe feala ke kita kau pe ʼo fai he ʼu tali peʼe ko he fai ʼo he ʼu fai palalau. Ko te ʼu famili ʼe tali fakafiafia; ko te ʼu toe ʼe kau mo nātou ki tatatou ʼu fai palalau faka tohi-tapu. Ko tatatou ʼu minisi ʼe mole nātou kofuʼi he ʼu kofu patele peʼe ko he ʼu kofu makehe. Ko te Fale ʼo te Puleʼaga ʼe teuteuʼi fakalelei pea ʼe mole tou maʼu he ʼu sela, he ʼu fakatātā, he ʼu paki faka lotu. Tokolahi ia nātou ʼi te ʼu fono ʼe nonofo ʼi te ʼu tafaʼaki.

⁶ Tou taki fakalelei te fia logo ʼi te ʼu ako faka tohi-tapu: Ko te ʼuluaki faka ʼuhiga ʼo he ako faka tohi-tapu ko te akoʼi ʼo ia ʼaē ʼe ina ako te moʼoni ʼe tuʼu ʼi te Folafola ʼa te ʼAtua. Ko te ako ʼe tonu foki ke ina ʼaumai ia ke ina leleiʼia te kautahi ʼo Sehova pea mo fakamahino ki ai ʼe maʼuhiga ke liliu ʼo kau ki ai. Ko te gāue lahi neʼe fakahoko ʼi te ʼuluaki sēkulō e Sesu pea mo tana ʼu tisipulo neʼe uga ai te hahaʼi fakamalotoloto pea ina fakatahiʼi nātou ke nātou gāue tahi ʼo mulimuli ki te taki ʼa te kolesi pule. ʼI te ʼu kolo ʼaē e tokolahi te hahaʼi kua nātou kau ki te moʼoni, ʼe fakatuʼutuʼu te ʼu kokelekasio ke feala ai te foaki tuʼumaʼu kia nātou he ako. Ko nātou ʼaē ʼe kau ki te ʼu kokelekasio ʼaia neʼe fakamālohiʼi nātou ʼi te faʼahi fakalaumālie, ʼo faka fealagia ai kia nātou ke nātou faʼa kātakiʼi te ʼu temi mamahi (Hep. 10:24, 25; 1 Petelo 5:8-10). Ia ʼaho nei, ko te fakatuʼutuʼu ʼa Sehova ko te “toe fakatahiʼi ʼo te ʼu meʼa fuli ia Kilisito”. (Ef. 1:9, 10.) Koia ʼe tou ʼui ai, kua tou faʼu he ‘famili faka malamanei ʼo te ʼu tēhina’. — 1 Petelo 2:17.

⁷ Ko te ako faka tohi-tapu ʼi te vāhaʼa ʼe kau ki ai he ako ʼe ʼaumai ai ia nātou ʼaē ʼe ako ke nātou leleiʼia te kautahi pea mo nātou maʼu he ʼu fua lelei mai te ʼu fakatuʼutuʼu neʼe fai ʼo ʼuhiga mo tonatou fakamaʼuli. Tou foaki ʼi te vāhaʼa fuli he ʼu kiʼi minuta moʼo fakahā peʼe moʼo fakamahino ʼo he puani ʼo ʼuhiga mo te kautahi peʼe ko tona fakahaʼele. ʼE tou maʼu ai anai he ʼu manatu ke vakaʼi ʼi Te Tule Leʼo ʼo te ʼaho 1 ʼo malesio 1985. Ko te ʼu kaupepa lalahi Les Témoins de Jéhovah du XX ^e siècle pea Les Témoins de Jéhovah — Unis pour faire la volonté de Dieu sur toute la terre ʼe fakahā fakaleleiʼi te kautahi pea mo te ʼu tapuakina ʼe tou maʼu ai. Tou fakahā ʼi te Annuaire te ʼu tānaki pea mo he ʼu fakamatala ʼe hā mai ai te tuputupu ʼo te gāue ʼi te fenua kehe peʼe ko ʼihi ʼatu ʼu agaʼi fenua. ʼE feala ke tou fakaʼaogaʼi niʼihi ʼu tohi. ʼAki te temi, tou fakamahino age kia nātou ʼaē ʼe ako mo tatou pe koteā te tupuʼaga ʼo tatatou ʼolo ʼi te ʼu ʼapi, te tupuʼaga ʼo tatatou ʼu fono, te faka paʼaga ʼo tatatou gāue pea mo te maʼuhiga faka malamanei ʼo tatatou gāue.

⁸ Kapau ko te hahaʼi ʼaē neʼe hoki nātou ako te Tohi-Tapu ʼe nātou feʼiloʼiʼaki mo niʼihi kau Fakamoʼoni, ʼe feala ke uga ai nātou, heʼe nātou fakalahi ai tanatou fakasiosio ki te kokelekasio. ʼI te faʼahi ʼaia, tou tautau fakaafe niʼihi kau faka mafola kehekehe ke nātou ʼomai ki te ako. Ko te felāveʼi mo he tahi ʼi te kokelekasio e lanu tahi peʼe tatau te ʼu meʼa ʼe nā fia fai ki ai ʼe ʼaumai ai ia ia ʼaē ʼe ako te moʼoni ke ina sioʼi he tahi faʼahi ʼo te moʼoni. ʼE feala ke tou fakatuʼutuʼu ke tou kaugā ʼolo mo he tagata ʼāfea ke feala tana faka felāveʼi mo ia ʼaē ʼe ako. Kapau ʼe kaugā ʼolo mo tatou te tagata taupau faka silikosikilipisio ki he ako faka tohi-tapu peʼe ko tona ʼohoana, ʼe ko he fua manuʼia ia. Kapau ʼe nonofo he ʼu Fakamoʼoni ʼo ōvi mai, ʼe feala ke tou fakahā age nātou ki ai: ʼe toe feala ai foki ko he fakaloto mālohi makehe ʼaia ke ʼalu ai ki te ʼu fono ʼo te kokelekasio.

⁹ Tou fakaloto mālohiʼi te hahaʼi lotolelei ke nātou ʼolo ki te ʼu fono: E maʼuhiga ke mahino te hahaʼi ʼaē ʼe lotolelei ki te maʼuhiga ʼaē ʼo ʼolo ki te ʼu fono. Tou faiga ʼo uga tanatou fia logo. Tou fakatokagaʼi nātou ki te ʼu alatike ʼaē ʼe vakaʼi anai ʼi te ako ʼo Te Tule Leʼo. Tou lau age kia nātou te ʼu kupu ʼo te ʼu akonaki ki te hahaʼi. Tou fakahā he ʼu manatu tāfito ʼe vakaʼi anai ʼi te Ako ʼo te minisitelio faka teokalatike peʼe ko te ako tohi. ʼE feala ke tou fakahā age ʼe tou leleiʼia te meʼa ʼaē ʼe tou ako ʼi te ʼu fono ʼaia pea he koʼe ʼe maʼuhiga ke tou ʼolo ki ai. Ka ʼe feala, tou fakahā age kia nātou ʼe tou ʼomai ʼo ʼave nātou ki te ʼu fono. Ko he telefoni ʼi muʼa ʼo te fono ʼe ko he tahi fakaloto mālohi ʼaia moʼo uga ʼo ia ke ʼalu ki te fono.

¹⁰ Ka haʼu he tahi ʼe ina ako te Tohi-Tapu ki he fono, tou faiga ke lelei ia te ia. Tou fakahā age ki ai niʼihi kau faka mafola, tāfito te ʼu tagata ʼāfea. Kapau ʼe haʼu ki te akonaki ki te hahaʼi, tou fakahā age ki ai ia ia ʼaē ʼe ina fai te akonaki. Tou fakamamata ki ai te Fale ʼo te Puleʼaga. Tou fakamahino ki ai te tupuʼaga ʼo te faʼu ʼo te faʼahi ʼe tuku ai te ʼu tohi pea mo te ʼu nusipepa, te ʼu kesi meʼa ʼofa, te tānakiʼaga tohi pea mo te koga tohi ʼo te taʼu. Tou fakahā ki ai ko te fale ʼe mole ko he faʼahi pe ʼe fai ai he tauhi, kae ko te faʼahi ʼaia ʼe fakatahitahi ai ia nātou ʼe ōvi mai ki te fai faka mafola.

¹¹ Tou fakamahino age kia ia ʼaē ʼe ako te faka ʼaluʼalu ʼo tatatou ʼu fono. Tou fakahā ki ai te ʼu tohi ʼe fakaʼaogaʼi. Tou fakamahino age ko te Tohi-Tapu ko tatatou meʼa gāue tāfito ʼaia. Ko te hahaʼi fuli ʼe feala ke kau ki ai, feiā foki mo te ʼu toe. Tou fakahā age ki ai ko te musika pea mo te ʼu kupu ʼo te tohi katiko neʼe fai e te kau Fakamoʼoni ʼa Sehova ʼo ʼuhiga mo tatatou tauhi. Tou fakatokagaʼi age kia nātou ko te hahaʼi ʼaē ʼe ʼomai ki te ʼu fono ʼe ʼomai mai te ʼu lanu kehekehe. Tou palalau fakafiafia ʼo ʼuhiga mo te aga ʼofa pea mo te tali lelei ʼaē ʼe tou fai. Ko te tokaga lelei ʼaia, mo fakamalotoloto, ʼe ko he meʼa maʼuhiga ke feala ai hana toe fia haʼu.

¹² He koʼe ʼe lotolotolua ʼihi: Ko te meʼa e tautau hoko logope tatatou ʼu faiga, ko ʼihi hahaʼi ʼe mole nātou fia fakaōvi mai ki te kautahi. ʼAua naʼa lotovaivai. Tou fakakaukauʼi muʼa mo ka na pau la ko tatou ʼaia. ʼO aʼu mai ki te temi nei, e lagi mole heʼeki lave ʼi tonatou loto e nātou fia ʼolo ki he ʼu fakatahi faka lotu, gata pe ki he ʼu fakatahi makehe. Ko ʼihi ʼi tonatou famili peʼe ko ni ʼu kaumeʼa ʼe nātou ʼui age ke ʼaua naʼa nātou ʼolo ki te ʼu fono. ʼE lagi e nātou lotovaivai ʼuhi ko te ʼu fakahuahua ʼo tonatou ʼu vāhaʼa fale. Pea, e lagi ʼi te māhani, ʼe feala foki ke nātou maʼumaʼua ʼuhi ko te ʼu faʼahiga gāue mo tonatou ʼu kaumeʼa peʼe ko he ʼu fakafiafia, e lagi ko he ʼu meʼa faigataʼa ʼaia kia nātou. ʼE tonu ke tou tokoniʼi nātou ke nātou maʼu he manatu totonu pea ke nātou ‘ ʼiloʼi lelei te ʼu meʼa ʼe maʼuhiga age’. — Filp. 1:10.

¹³ Tou fakahā age kia nātou te ʼu tupuʼaga faka tohi-tapu ʼe tonu ai ke tou faʼa kātaki. Tou fakahā ʼe ʼaoga ke fakaloto mālohiʼi tatou pea mo tuputupu fakalaumālie, ko te meʼa ʼaia ʼe tou maʼu mai te fakatahi mo ʼotatou ʼu tēhina kilisitiano (Lom. 1:11, 12). Neʼe fakahā fakalelei e Sesu ko te fakafeagai ʼo te famili ʼe mole ko he meʼa ʼaia ʼe tonu ke tuku ai ta kita kau ki te moʼoni (Mat. 10:34-39). ʼE fakaloto mālohiʼi tatou e Paulo ke ʼaua naʼa tou ufiufi ʼo fakahā ia tatou ohage ko he ʼu tisipulo ʼa Sesu (2 Tim. 1:8, 12-14). Ko te lolomi ʼo kita e ko te meʼa maʼuhiga ʼaia ʼi tatatou ʼu fakatuʼutuʼu takitahi pea mo te ʼu fakafiafia, naʼa fokifā ʼe liliu ia ko he ʼu hele (Luka 21:34-36). Moʼo maʼu ʼo te tapuakina ʼa Sehova, ʼe tonu ke kaugana kia te ia ʼaki te nefesi katoa, kae ʼaua naʼa vaelua te loto (Kol. 3:23, 24). Ko te faka fealagia ki te hahaʼi ke nātou mahino ki te ʼu fakatuʼutuʼu faka tohi-tapu ʼaia, ʼe tou taki ai anai nātou ke nātou tuputupu ʼi te faʼahi fakalaumālie.

¹⁴ Ko te ʼu matapā ʼe kua ava: Ko te fale ʼo te tauhi moʼoni ʼa Sehova kua mahiki ia ki ʼoluga ia nātou fuli age ʼaē. ʼI te ʼu fenua pea mo te ʼu motu e 229 kua fai ai te fakaafe ʼaenī: “Koutou ʼomai pea ke tou hake ki te moʼuga ʼo Sehova (...); pea ʼe ina akonakiʼi anai tatou ki tona ʼu ala, pea ʼe tou haʼele anai ʼi tona ʼu ala foufou.” (Is. 2:3). Ko te hahaʼi ʼaē ʼe nātou tali te fakaafe e feala ke nātou maʼu te maʼuli. Ko he meʼa lelei moʼo tokoniʼi ʼonatou ko tonatou taki ki te kautahi ʼo Sehova.