Kapite 23
Te kautahi faka haha ate Atua
1. Kotea ae e ui ete Tohi-Tapu o uhiga mote kautahi faka pulipuli ate Atua?
KOTE ATUA eiai koa hana kautahi faka haha? Ei, koteuhi eiai mo tana tahi kautahi e faka pulipuli. Nee fakatupu e Sehova te u Kelupimi, te u Selafimi mote tahi u aselo ke natou fai tona finegalo i selo (Senesi 3:24; Isaia 6:2, 3; Pesalemo 103:20). Ko Sesu kote Alekaselo, ko tona faka uhiga nee maoluga ia ite kau aselo fuli aia (I Tesalonika 4:16; Suta 9; Fakaha 12:7). Maa te Tohi-Tapu, kote kautahi ote kau aselo e kohe u “afio aga faka hau, pee kohe u alikiaga, pee kohe u puleaga, pee kohe u malohi”. (Kolose 1:16; Efese 1:21.) E natou fakalogo fuli kite u faka totonu a Sehova, mo fai ite logotahi te gaue ae nee foaki age kia natou.—Taniela 7:9, 10; Sopo 1:6; 2:1.
2. E iloga feafeai mai ite malama katoa mo ona mea fuli e tou sio kiai te mauhiga ae kite Atua te faka tokatoka ote mea fuli?
2 Kote u mea ae nee fakatupu ete Atua e iloga mai ai te mauhiga ae kia teia ote faka tokatoka. Kote malama katoa e laui afei miliale tona u fetuu ae e faufau aki te u faka pupuaga lalahi e higoa kote u (galaxies). Kote u faka pupuaga fetuu aia e natou fegaueue aki ite toka lelei ite lagi, pea kote u fetuu mote u mape ae e fakapupu ai e toe fai feia mo natou. Koia, ko totatou mape te Kele ite tau fuli e fai tana foli ite laa, te fetuu ae e ovi mai kia tatou, kote foli aia e aho 365, hola e 5, minuta e 48 mo sekonita e 45,51. I faka tuutuu leva!
3. Kotea ae e mahino mai ai kia tatou o uhiga mote faka tuutuu lelei kehe ae e mau ite u mea faka pulipuli ate Atua pea mo tona malama katoa ae e tou sio kiai?
3 Kotea ae e ha mai ai kia tatou ite fakatuutuu lelei kehe aia e mau ite u mea faka pulipuli ate Atua pea mo tona malama katoa ae e tou sisio kiai? Kote potu aeni: ko Sehova kote Atua ote faka tokatoka. E mole feala ke tou manatu kohe Atua feia eina tuku noai te hahai ae e oofa kia teia ke mole iai honatou takitaki pea mo honatou kautahi.
KOTE KAUTAHI FAKAHAHA ATE ATUA—ITE TEMI MUA PEA MOTE TEMI AENI
4, 5. E tou iloi feafeai nee takitaki ete Atua tana hahai o faka tokatoka lelei ite temi o Apalahamo mote puleaga o Iselaele?
4 Kote Tohi-Tapu eina fakaha mai ko Sehova nee ina takitaki tuumau aipe tana hahai kaugana aki te faka tokatoka lelei. O hagela, kote hahai tui, hage ko Apalahamo, nee natou faka totonu ki onatou famili mo anatou hahai faifekau te mea ae o uhiga mote tauhi kia Sehova. Ko Sehova nee ina fakaha tona finegalo kia Apalahamo (Senesi 12:1) pea ina fekau keina ako tana hahai. Nee ui maa te Atua: “Nee au palalau mo ia [Apalahamo] koteuhi keina faka totonu ki ona u foha mo tona loto fale katoa, ke natou taupau te ala o Sehova.” (Senesi 18:19). Kote faka tuutuu lelei aia e feala ai kihe u hahai tanatou atolasio kia Sehova o hage kote mea ae e tonu ke fai.
5 Ki muli age, ite kua kaugamalie ate kau Iselaele o laui miliona, nee mole tuku ia natou e Sehova ke natou tahi atolasiope o takitahi fai ki tona loto, ka mole iai he faka tuutuu. Kailoa, nee faka tuutuu natou kohe puleaga ohe hahai atolasio kua faka tokatoka lelei. Kote puleaga o Iselaele nee higoa kote “kokelekasio a Sehova”. (Faka-au 20:4; I Fakamatala 28:8.) Kapau nee ko koe kohe tagata atolasio mooni a Sehova ite temi aia, nee maua ia keke kau kite kokelekasio aia pea e tonu ia ke aua naa ke toe mavae mai ai.—Pesalemo 147:19, 20.
6. a) Nee fakaha feafeai ete Atua e faka mooni kite kau tisipulo a Kilisito? b) Kote faka mooni fea e tou mau kote kau kilisitiano nee faka tuutuu kite tauhi lotu?
6 Ka nee feafeai ite uluaki sekulo? Kote ofa o Sehova nee ite kau tisipulo a Kilisito. Nee folahi e Sehova tona laumalie maonioni kia natou. Moo faka mooni o tana kua faka aogape leva te kautahi faka kilisitiano aia kae tuku te puleaga o Iselaele, nee ina foaki age ki ihi ote kau kilisitiano aia te malohi moo faka fimalie ote u mahaki, te faka tuuake ote u mate, pea mo ihi atu mea. Ite lau ote u Tohi faka keleka e ha mai ai kote u uluaki kilisitiano nee faka tuutuu natou kite tauhi lotu. Nee faka totonu kia natou ke natou fakatahi moo atolasio kite Atua (Hepeleo 10:24, 25). Koia, kapau nee ko koe kohe tagata atolasio mooni ate Atua ite temi aia, nee maua ia keke kau kite kautahi faka kilisitiano.
7. E tou iloi feafeai ko Sehova nee mole ina faka aoga ni kautahi e lua pee tolu?
7 Ka nee mole koala faka aoga ia e Sehova ni kautahi e lua pee tolu? Ite temi o Noe, nee kote pateliakape mo natou ae nee ite loto aleka mo ia nee haofaki ete Atua pea natou hao ite tulivio (I Petelo 3:20). Ite uluaki sekulo, nee felogoipe te Atua mote kautahi e tahi. Nee kote “Aliki pe e tahi, te tui e tahi, mote papitema e tahi”. (Efese 4:5.) Pea maa Sesu, ki totatou temi, kote matapunape anai e tahi ote u faka totonu faka laumalie kite hahai ate Atua.
8. Nee fakaha feafeai e Sesu kote kautahipe anai e tahi faka haha ate Atua ka ite kele anai i totatou temi?
8 I tana talanoa kite temi ae ka afio ai anai i tona uhiga Hau, nee ui e Sesu: “Koai mooni te tagata kaugana agatonu mo poto, ae kua fakanofo e tona aliki ki tana hahai faifekau, moo tufaki kia natou tanatou meakai i tona lakaga totonu? Manuia te tagata kaugana aia, moka hau, tona aliki, o mau mai eina fai feia! Eau tala mooni atu kia koutou: Eina fakanofo anai ia ki tana u mea fuli.” (Mateo 24:45-47). I tana liliu mai kohe Hau ite 1914, nee mau mai koa e Kilisito te kalasi aia ote “tagata kaugana” eina lolotoga tufaki te “meakai” pee faka totonu faka laumalie? Ei, kote toe o tona toko 144 000 “tehina”. (Fakaha 12:10; 14:1, 3.) Talumai te 1914, e laui miliona te hahai nee natou tali te “meakai” ae e tufaki ete tagata kaugana aia pea natou fakatahi ai mo ia o taupau te lotu mooni. Kote kautahi aia ae e faufau aki te kau kaugana ate Atua e iloi ia ite higoa ae kote kau Faka mooni a Sehova.
9. a) He koe e faka higoa te kau kaugana ate Atua kote kau Faka mooni a Sehova? b) He koe e natou faka higoa onatou u fale tauhi lotu kote u Fale ote Puleaga?
9 Kote kau Faka mooni a Sehova e natou haga kite Atua mo tana Folafola ke akoi ai natou ite mea fuli. Ko tonatou higoa e ha mai ai kote uluaki gaue tafito a natou kote faka mooni kite huafa pea mote Puleaga o Sehova, o faifaitakipe kia Kilisito (Soane 17:6; Fakaha 1:5). E natou faka higoa kote u Fale ote Puleaga tonatou u fale faikole, koteuhi kote Puleaga ote Atua pea mo Kilisito kote uho tafito aia ote Tohi-Tapu. E mole he toe mahalohalo kiai kote lotu faka kilisitiano ote uluaki sekulo nee lelei ia ete Atua; koia kote kau Faka mooni a Sehova kua natou faka tuutuupe ia natou o hage kote kau kilisitiano ote temi aia. Tou vakavakai mua te u mea ae e tatau ite u faka tuutuu aia e lua.
TE FAIFAITAKI OTE ULUAKI SEKULO
10. Kotea te u ihi faahiga agaaga ote kautahi faka kilisitiano ote uluaki sekulo?
10 Ite uluaki sekulo, kote kau kilisitiano nee natou faufau te u kokelekasio e fakatahi tuumau moo atolasio, mo faka tahi faka tautehina pea mo ako te Tohi-Tapu (Hepeleo 10:24, 25). Ko tanatou gaue tafito kote logologo mo faka ako te Puleaga ote Atua, o faifaitakipe kia Sesu (Mateo 4:17; 28:19, 20). Kapau eiai he tahi ote kokelekasio e ina fai ia te mea ae e kovi, pea e faka mavae ia.—I Kolonito 5:9-13; II Soane 10, 11.
11, 12. a) Kotea ae e faka mooni aki kote u uluaki kokelekasio faka kilisitiano nee natou mau te tokoni pea mote takitaki maite kau apositolo pea mote u “tagata mua” o Selusalemi? b) Kotea tona mahino mai kia tatou ia te takitaki “faka teokalatike”? c) Nee tali koa ete u kokelekasio te takitaki aia, pea kotea tona u fua?
11 Kote u kokelekasio koa aia ote uluaki sekulo e natou tahi faipe koa? Kailoa, nee natou fakatahi ite tui faka kilisitianope ae e tahi. E natou mau te u faka totonu mai te matapunape e tahi. Koia, ite malaga ote fihi lahi nee fai o uhiga mote silikosisio, nee mole kote u kokelekasio pee kohe u tagata taki tokotahi ae nee natou fau he tonu kite potu aia. Nee fai leva te tonu aeni ko Paulo, pea mo Palanapasi mo ihi ke natou “hake ki Selusalemi kite kau apositolo mote u tagata mua, o uhiga mote fihi aia”. Ite kua osi fai leva ote tonu ete u tagata fakapotopoto aia aki te tokoni ate Folafola ate Atua pea mote “laumalie maonioni”, nee natou fekaui ai leva te u tagata agatonu ke olo o logologo ite u kokelekasio.—Gaue 15:2, 27-29.
12 Nee tali feafeai ete u kokelekasio te u faka totonu faka teokalatike aia (pee hau mai te Atua)? E ui ete Tohi-Tapu: “Pea, i tanatou [te apositolo ko Paulo pea mo tona u kauga fagona] olo ite u kolo, nee natou tuku kia natou ae e nonofo ai, ke natou mulimuli kiai, te u lao ae nee faka tuu ete kau apositolo pea mote u tagata mua ae nee i Selusalemi. Koia nee malohi ai te u kokelekasio ite tui pea mo natou tuputupu o hahai ite aho fulipe. Kote u kokelekasio nee natou mulimulipe kite tonu aia nee fai ete kolesi ote kau tagata mua o Selusalemi, pea nee natou malohi ai ite tui.
KOTE TAKITAKI FAKA TEOKALATIKE IA AHO NEI
13. a) Koai pea e mai fea ae e hau ai te u faka totonu kite kautahi faka haha ate Atua? b) Kotea ae e fakatahi ai te kolesi pule pea mote “tagata kaugana agatonu mo poto”?
13 Ia aho nei, kote kautahi faka haha ate Atua eina tali, mo ia, te u faka totonu faka teokalatike. Ite fale lahi ote kau Faka mooni a Sehova ae i Brooklyn (New York), eiai te kolesi ote kau tagata mua mai te lanu ote fenua kehekehe, e natou siosioi ke alu lelei te u gaue ite malamanei ate hahai ate Atua. Kote kolesi pule aia e faufau aki te hahai ae e kau ite “tagata kaugana agatonu mo poto”. Koia [te kolesi pule] kote tagata ave palalau ate “tagata kaugana” agatonu aia.
14. E faka tuutuu kitea te fai ote u tonu ate kolesi pule ote hahai ate Atua?
14 O hage pe kote kau apositolo mote u tagata mua o Selusalemi, kote hahai ote kolesi aia kua fualoa aupito tanatou gaue ite tauhi kite Atua. Kae mole natou fakatuu onatou tonu kite poto faka tagata. Kailoa, i tanatou nofo ite pule faka teokalatike, e natou faipe o hage kote kolesi pule o Selusalemi ae nee faka tuutuupe anatou tonu kite Folafola ate Atua mo fai aki te takitaki ate laumalie maonioni.—Gaue 15:13-17, 28, 29.
TE TAKITAKI OTE KAUTAHI FAKA MALAMANEI
15. He koe e ha mai ite u palalau a Sesu ae e tuu ia Mateo 24:14 kote Atua eiai anai tana kautahi lahi ite kele ite temi faka osi?
15 Nee tuku mai e Sesu te faka fuafua kite mafola ote kautahi ate Atua ite temi faka osi aeni i tana palalau aeni: “Kote logo lelei aeni ote puleaga e logologo anai ite kele katoa, moo faka mooni kite u puleaga fuli; pea hoko mai ai leva anai te faka osi”. (Mateo 24:14). Koutou faka kaukau atu mua kite lahi aupito ote gaue ae kote fakaha ote kua faka nofo ote Puleaga ote Atua kite u miliale hahai ote malamanei. Kote kautahi faka kilisitiano ote u temi aeni, ae e takitaki etona Kolesi pule, eai koa hana u mea gaue moo fai ote toe gaue lahi aia?
16. a) He koe nee laga ete kau Faka mooni a Sehova te u fale fau tohi lalahi? b) Kotea ae e fau ai?
16 Kote kau Faka mooni a Sehova e natou faka mafola nei te logo ote Puleaga ia fenua mo motu e 200 tupu. I tanatou fia tokoni kite toko 3 500 000 hahai faka mafolalogo ote Puleaga (ite 1988) ke natou fai te gaue aia, nee lahi aupito leva te u fenua nee laga ai te u fale fau tohi lalahi. O fau ai te u Tohi-Tapu moihi atu tohi faka tohi-tapu. Ite aho fulipe, e ta pea mofetuku o laui miliona tupu te u nusipepa e higoa kote Te Tule Leo pea mote Koutou-aala!
17. a) Kotea te tupuaga tafito ote fau ote u tohi faka tohi-tapu aia? b) Kotea ae e faka afe atu ai koutou ke koutou fai?
17 Kote u tohi faka tohi-tapu fuli aia e fau moo tokoni kite hahai ke natou iloi te u faka tuutuu lalahi a Sehova. Koia, kote palalau ae kote “fakaha te Puleaga o Sehova” e tuu fakatahi mote higoa ae kote Te Tule Leo. E matou faka afe atu koutou ke koutou tufaki te u tohi aia pea mo faka mahino kite tagata fulipe te u mooni faka tohi-tapu ae e tuu ai. E mole koala iai he tahi e feala ke koutou fakaha kiai te u malama tafito ae kite mauli ae nee kua koutou ako ite tohi aeni?
18. a) Kote faahiga kautahi feafeai te kautahi ate Atua ite temi nei? b) He koe e aoga ite temi nei ke faka malohii te hahai ate Atua?
18 O hagepe kote uluaki sekulo, kote kautahi faka atua ote temi aeni e kote kautahi ia ote hahai faka mafolalogo ote Puleaga kua osi natou foaki ia natou pea kua natou papitema. Nee faka tuu moo faka malohii faka laumalie tona u hahai fuli; hee aoga aupito kia natou, koteuhi ko Satana mo tana u hahai e natou faka feagai kite logo ote Puleaga ae e natou faka mafola. Ko natou ae nee natou fakapogi Sesu uhi kote faka mafola logo, pea e tala mai ete Tohi-Tapu ko tana u tisipulo e toe fakatagai anai mo natou.—Soane 15:19, 20; II Timoteo 3:12.
19. a) Koai ae nee faka nofo ite temi nei moo faka malohii ote hahai ate Atua? b) E feafeai te haofaki ote kokelekasio mai te mulimuli kite u faifaitaki kovi e feala ke kovi ai?
19 O hage kote uluaki sekulo, e toe feia mote temi aeni kote u “tagata mua” pee afea e faka nofo moo faka malohii ote u kokelekasio takitahi. E feala ke natou foaki atu, kia koutou, te u tokoni faka tohi-tapu ae e feala ai ke koutou faka tokatoka aki okotou u fihifihia. Kote u tagata afea aia e natou toe haofaki foki “te fagaovi ate Atua”. Koia, kapau eiai he kilisitiano kua ina fai ia te mea ae e kovi ka mole ina fia tuku ia, pea e faka mavae anai ia ete u tagata mua ite kokelekasio moo haofaki te mauli pea mote maa faka laumalie ote kokelekasio.—Tito 1:5; I Petelo 5:1-3; Isaia 32:1, 2; I Kolonito 5:13.
20. a) Ite uluaki sekulo, koai ae nee fekaui ete Kolesi pule o Selusalemi, pea kotea tona tupuaga? b) Koai ae e fekaui ete Kolesi pule ote temi aeni?
20 Kote kolesi pule o Selusalemi nee ina fekaui te u faka fofoga, o hage ko Paulo mo Silasi, moo ako pea mo faka loto malohii te hahai ate Atua; kote Kolesi pule ote temi aeni eina toe fai feia aipe te mea aia ite temi faka osi aeni (Gaue 15:24-27, 30-32). O tua lua ite tau, kote minisi kua mahani ite gaue e higoa kote tagata taupau silikosikilipisio, eina fai tona vahaa e tahi ite u kokelekasio takitahi o tona silikosikilipisio.
21. E feafeai te tokoni ate u tagata taupau silikosikilipisio kite u kokelekasio ote hahai ate Atua?
21 Ko kokelekasio e 60 000 tupu ote kau Faka mooni a Sehova ite malamanei; e vahei faka silikosikilipisio ia natou o taki kokelekasio 20 te silikosikilipisio. Ka hau te tagata taupau silikosikilipisio o aahi kite u kokelekasio, eina faka loto malohii te kau faka mooni ote Puleaga i tana fakatahi mo natou kite faka mafola logo pea mote fai akonaki. E mole gataakipe tana faka loto malohii natou, eina toe foaki foki kia natou te u tokoni e aoga tafito kite haele ki mua o tanatou gaue faka minisitelio.—Gaue 20:20, 21.
22. a) Tua lua ite tau, kotea te tahi u faigamalie kite hahai ate Atua ke natou malohi ai? b) Kotea te faka afe ae e fai atu?
22 Tua lua ite tau, kote u kokelekasio ote u silikosikilipisio taki tahi e natou fakatahitahi kite fono faka silikosikilipisio lolotoga aho e lua; kote tahi ia aia u faigamalie aga kite faka loto malohi. Kote u fono aia e natou fakatahii te toko 200 kite toko 2 000 hahai. E matou faka afe atu koutou ke koutou olo kite fono ae ka fai anai i tokotou fenua. E matou iloi faka papau eina faka malohii faka laumalie anai koutou.
23. a) Tua tahi ite tau, kotea te tahi u fono ae e fai? b) Nee mauhiga feafeai te fono e tahi ote u fono aia?
23 Tua tahi ite tau, e fai ai te fono faka tisitilike ia aho e tolu pee fa. Koutou kataki o faigai ke koutou kau ai, koteuhi e koutou mau ai anai te u lelei faka laumalie. I ihi tau, nee mole leva fai ai he u fono faka tisitilike, kae fai te u fono faka fenua pee faka malamanei. Kote fono ae nee lahi tokotahi tona fai ko ae nee fai ite 1958, ite Yankee Stadium pea mote u Polo Grounds o New York; nee aho valu tona fualoa. Ite fono aia, nee toko 253 922 tona hahai nee natou faka logo ai te akonaki ae nee faka higoa “Kote Puleaga ote Atua kua hoko tona lakaga pule—Kua ovi mai koa te faka osi ote malamanei?”. Talumai ai, kote u fono kua fai pe ite u kolo lalahi, koteuhi e mole kei iai he potu e feauga tona lahi moo tali ai ohe u toe hahai kaugamalie feia.
KOTE U FONO ITE U KOKELEKASIO
24. Kotea te u fono ae e nima ite vahaa e fai ite u kokelekasio ote hahai ate Atua?
24 Kote kolesi pule ote kau Faka mooni a Sehova e toe tokaga foki keiai he polokalama ako faka tohi-tapu fakatahi ke fai ite u kokelekasio fuli ote hahai ate Atua. Ia natou takitahi e fai ai fono e nima ite vahaa: kote Ako ote minisitelio faka teokalatike, kote fono faka gaue, kote fono kite hahai fuli, kote ako ote Tule Leo pea mote ako tohi ate kokelekasio. Tou talanoa mua kite u fono aia takitahi.
25, 26. Kotea te tupuaga ote fai ote Ako ote minisitelio faka teokalatike pea mote fono faka gaue?
25 Kote Ako ote minisitelio faka teokalatike e tokoni kite kau ako ae nee tohi kiai ke popoto lelei ite palalau kite Puleaga ote Atua. E natou tautau fai tanatou u kii lea nounou kite u mea faka tohi-tapu ia mua ote hahai ote fono, pea eiai leva te tagata afea eina fai age kia natou te u tokoni e aoga ke natou popoto lelei ai.
26 E mahani ite afiafi pe aia e fai ai mote fono faka gaue, kotona polokalama e tohi ite minisitelio ote Puleaga, kote pepa aia ite mahina fuli e pasina fa pee laka atu, e tohi mai ete Kolesi pule. Ite fono aia e fai ai te u tokoni mote u faifaitaki ote u puleaki lelei kite ave ote logo ote Puleaga. Nee feiape mo Sesu nee ina ako tana u tisipulo kite agaaga ote fai o tanatou gaue faka minisitelio.—Soane 21:15-17; Mateo 10:5-14.
27, 28. Kote u faahiga fono feafeai ia te fono kite hahai fuli, te ako ote Tule Leo pea mote ako tohi ate kokelekasio?
27 Kote fono kite hahai fuli pea mote ako ote Tule Leo e mahani e fai ahotapu. Kote hahai foofoou e faka afe natou kite fono kite hahai fuli, aia e fai ai ehe minisi ia he akonaki faka tohi-tapu. Kote ako ote Tule Leo e kohe fai ia ohe palapalalau aki te u fehui pea mote u tali kihe kogai tohi faka tohi-tapu e tuu ihe numelo foou ote nusipepa aia kote Tule Leo.
28 Kote kokelekasio katoa e fakatahi kite Fale ote Puleaga kite u fono aeni kua tou osi talanoa kiai, kae vaevae leva te hahai o taki toko veliveli pe te vaega, o natou faka tahitahi kite u fale o ihi kite ako tohi. Kote tohi ae ka ako, ehage kote tohi aeni, koia ae ka fai aki te palapalalau o hola tahi tona fualoa.
29. a) Kote fakamanatu fea ae e fai ete kau kilisitiano mooni ite tau fuli? b) Koai ae e kai kite pane mo inu kite vino o hage kote mea ae etonu ke fai?
29 O kehepe te u fono i vahaa aia, kote kau Faka mooni a Sehova e natou toe fakatahitahi foki ite tau fuli ite aho faka manatu ote mate a Sesu. I tana fakatuu te Taumafa fakamanatu o tona mate, nee ui e Sesu: “Ke koutou haga fai te mea aeni moo faka manatu kia teau.” (Luka 22:19, 20). Nee faka aoga ai e Sesu te vino mote pane mole hona fakatupu moo fakatata te mauli ae ka ina amanaki foaki moo te malama. Koia, ite fai ote taumafa aia, kote toe ote 144 000 tisipulo fakanofo a Kilisito e natou kalagai ai tanatou amanaki kite mauli i selo o natou kai te pane mo inu te vino.
30. a) Koai te tahi u hahai e kau kite Fakamanatu, pea e kotea e natou amanaki kiai? b) Nee talanoa feafeai ia Sesu kite hahai aia?
30 E laui miliona te hahai ae e kau kite Fakamanatu aia o hage he hahai mamata. E faka manatu ai, kia natou, te mea ae nee fai e Sehova mo Sesu Kilisito moo faka mavae ia natou ite agahala pea mote mate. E natou amanaki kenatou mauuli, mole i selo, kae o heegata ite palatiso kelekele. E natou hage ko Soane Patita, ae nee hau o hage kohe “kaumea ote tagata ohoana” kae mole o hage kohe koga o tona ohoana ae e faufau aki te toko 144 000 (Soane 3:29). Kote u miliona hahai aia e natou kau ite “tahi u ovi”, kae mole ite “kii fagaovi”. Kae logopela te mea aia, o hage ko tona ui e Sesu, e natou gaue ite logotahi mote hahai ote “kii faga ovi”, koteuhi ke natou liliu fuli kote “faga ovi e tahi”.—Soane 10:16; Luka 12:32.
TOU TAUHI KITE ATUA AKI TANA KAUTAHI
31. Kotea ae e ha mai ai e mole lelei ia ete Atua ia natou ae e nonofo ihe lotu hala kae natou faiga kenatou kau ki tona kautahi?
31 O hage kote temi mua, eiai te kautahi faka haha a Sehova ite temi nei. Aki ia te mea gaue aia, eina ako tana hahai kite mauli ite tuu foou mo fai totonu. Kae mole feala ke kita kau kite kautahi faka atua pea mote lotu hala. E ui ete Tohi-Tapu: “Aua naa koutou kauga fatogia fakatahi mote hahai ae e mole tui hee mole alu tahi. Koteuhi, e faka tahi feafeai te fai totonu pea mote meanoai ote lao? Pee (. . .) ia te malama pea mote faka pouli? (. . .) Pee kote vahe fea ae e fakatahi ai te tagata tui mo ae e mole tui?” Pea e faka totonu e Sehova: “Koia ke koutou mavae mai ite lotolotoiga o natou, pea ke kotou mavete.”—II Kolonito 6:14-17.
32. a) Kotea ae e tonu ke fai ke kita “mavae ite lotolotoiga o natou”? b) Kotea te u lelei ae e mau e ia ae kua ina faka totonu e tauhi kite Atua aki tana kautahi faka teokalatike faka haha?
32 Kotea te faka uhiga ote ui ae ke “mavae ite lotolotoiga o natou?” E mole feala ke kita faka logo kite fakatotonu aia mo hoko atupe takita kau ihe tahi ia Ekelesia age i ae e faka aoga e Sehova pea mo tokoni kiai. Koia kapau eiai he tahi ia tatou e kei kau ihe Ekelesia feia, e maua ia ke ina fakaha kiai tana mavae. Iloga ae e mavete nei mote kau tauhi ote lotu hala moo tauhi malohi kite Atua aki tana kautahi faka teokalatike faka haha, e kau ia ia natou ae nee ui kiai ete Atua: “Eau nofo anai ia natou pea eau haele anai ia natou, pea eau liliu anai ko tonatou Atua, pea e natou liliu anai ko taku hahai.”—II Kolonito 6:16.
[Paki ʼo te pasina 192]
Ite temi ote tulivio, nee lahi koa he u kautahi ate Atua?
[Paki ʼo te pasina 196]
Kote u pilo takitaki
TE NOFOAGA FAKA MALAMANEI OTE KAU FAKA MOONI A SEHOVA
Te u masini hila
Te u masini faka pipiki tohi
Te u masini lomi tohi
Tona faka momoli
FALE TA TOHI O BROOKLYN
[Paki ʼo te pasina 197]
KO NIIHI OTE U TUUGA FALE TA TOHI ATE SOSIETE WATCH TOWER
Afelika Saute
Amelika (Wallkill)
Kanata
Pelesile
Pilitania
[Paki ʼo te pasina 199]
Polo Grounds
Yankee Stadium
Fono ate kau Faka mooni a Sehova i New York—toko 253 922 hahai
[Paki ʼo te pasina 201]
Polokalama ote ako faka tohi-tapu ite u fono ate kau Faka mooni a Sehova