Kapite Hogofulu-Ma-Fā
ʼE Takitaki Feafeaʼi Koa e Sehova Tana Kautahi?
1. Koteā ʼaē ʼe fakahā mai e te Tohi-Tapu ʼo ʼuhiga mo te kautahi ʼa Sehova, pea he koʼe ʼe maʼuhiga kia tatou?
ʼE ʼI AI koa he kautahi ʼa te ʼAtua? Ei, ʼe fakahā mai e tana Folafola, te Tohi-Tapu tana kautahi fakatalakitupua ʼaē ʼi selo. (Esekiele 1:1, 4-14; Taniela 7:9, 10, 13, 14) Logola ʼe mole feala hatatou sio kiai, kae ʼe ʼiloga lelei tana ʼu gāue ki te kau atolasio moʼoni ia ʼaho nei. (2 Hau 6:15-17) Kae ʼe toe ʼi ai foki mo te koga fakahāhā ʼo te kautahi ʼa Sehova ʼi te kele. ʼE tokoni mai te Tohi-Tapu ke tou mahino peʼe koteā te kautahi ʼaia, pea e feafeaʼi tana takitaki e Sehova.
Ko Te ʼIloʼi ʼo Tona Koga Fakahāhā
2. Ko te kokelekasio foʼou fea ʼaē neʼe fakatupu e te ʼAtua?
2 Lolotoga taʼu e 1 545, ko te puleʼaga ʼo Iselaele neʼe ko te kokelekasio ʼa te ʼAtua. (Gaue 7:38) Kae neʼe mole taupau e te kau Iselaele te ʼu lao ʼa te ʼAtua, pea neʼe nātou fakafisi ki tona ʼAlo totonu. Koia neʼe līaki e Sehova te kokelekasio ʼaia. Neʼe tala fēnei e Sesu ki te kau Sutea: “Koutou sisio ko tokotou ʼapi kua līaki atu kia koutou.” (Mateo 23:38) ʼOsi ʼaia pea neʼe fakatupu e te ʼAtua te tahi kokelekasio, ʼo ina fai mo ia te fuakava foʼou, pea ko te kokelekasio ʼaia ʼe faʼufaʼu e te toko 144 000 hahaʼi neʼe fili e te ʼAtua ke nātou fakatahi mo tona ʼAlo ʼi te lagi.—Apokalipesi 14:1-4.
3. Koteā ʼaē neʼe hoko ʼi te Penikosite ʼo te taʼu 33 ʼo totatou temi, neʼe ina fakamoʼoni ai kua fakaʼaogaʼi e te ʼAtua te kokelekasio foʼou?
3 Ko te ʼuluaki hahaʼi ʼo te kokelekasio foʼou ʼaia, neʼe fakanofo ʼaki te laumālie maʼoniʼoni ʼa Sehova ʼi te Penikosite ʼo te taʼu 33 ʼo totatou temi. ʼE tou lau fēnei ʼi te Tohi-Tapu ʼo ʼuhiga mo te meʼa fakaofoofo ʼaia: “Pea ʼi te lolotoga ʼo te ʼaho lafeti ʼo te Penikosite, neʼe nātou nonofo fakatahi fuli ʼi te koga meʼa pe e tahi, pea fokifā pe kua logo ifo te logoaʼa mai te lagi ohage ko te logoaʼa ʼo he tuʼani matagi mālohi, pea neʼe ina fakafonu te fale katoa ʼaē neʼe nātou nonofo ai. Pea neʼe hā kia nātou te ʼu ʼalelo ohage ko te afi, pea neʼe fevaevaeʼaki ʼo tahi tuʼu ia nātou takitahi, pea neʼe nātou fonu fuli ʼi te laumālie maʼoniʼoni.” (Gaue 2:1-4) ʼAki tona laumālie maʼoniʼoni, neʼe fakamoʼoni ai e te ʼAtua, ʼe ko te kūtuga ʼaia ka ina fakaʼaogaʼi anai moʼo fakahoko tana fakatuʼutuʼu, ʼaki te takitaki ʼa Sesu Kilisito ʼi te lagi.
4. Ko ai ʼaē ʼe nātou faʼufaʼu ia te kautahi fakahāhā ʼa Sehova ʼi te temi nei?
4 ʼI te temi nei, ʼe kei maʼuʼuli ʼi te kele te kiʼi tokosiʼi ʼo te toko 144 000. Kae ʼo mulimuli ki te ʼu lea faka polofeta faka Tohi-Tapu, ko “te toe hahaʼi tokolahi,” ko te “tahi ʼu ōvi” ʼe lauʼi miliona, neʼe ʼōmai ʼo gāue fakatahi mo nātou. Ko Sesu, te Tagata Tauhi Ōvi Lelei, neʼe ina fakatahiʼi te tahi ʼu ōvi ʼaia pea mo te toe ʼo te kau fakanofo, ke nātou liliu ai ko te faga ōvi e tahi, pea ʼe ko ia tokotahi tanatou Tagata Tauhi Ōvi. (Apokalipesi 7:9; Soane 10:11, 16) ʼE nātou fakatahi ai ko te kautahi e tahi ʼe logo tahi, ko te kautahi fakahāhā ʼa Sehova.
Te ʼu Fakatuʼutuʼu Faka Teokalatike
5. Ko ai ʼaē ʼe ina takitaki te kautahi ʼa te ʼAtua, pea e feafeaʼi?
5 Ko te kupu faka Tohi-Tapu “ko te kokelekasio ʼo te ʼAtua maʼuli,” ʼe hā lelei mai ai ko he kautahi faka teokalatike, ko tona faka ʼuhiga ʼe takitaki e te ʼAtua. ʼE takitaki e Sehova tana hahaʼi, ʼaki ia ia ʼaē neʼe ina fakanofo ko te Pule fakapulipuli ʼo te kokelekasio, ia Sesu Kilisito, pea mo Tana Folafola, ʼaē ko te Tohi-Tapu.—1 Timoteo 3:14, 15; Efeso 1:22, 23; 2 Timoteo 3:16, 17.
6. (a) ʼI te ʼuluaki sēkulō, neʼe ʼiloga feafeaʼi ia te takitaki ʼaē mai lagi ʼo te kokelekasio? (b) Koteā ʼaē ʼe ʼiloga ai ʼe kei Pule tuʼumaʼu pe ia Sesu ki te kokelekasio?
6 Ko te takitaki faka teokalatike ʼaia neʼe ʼiloga lelei ʼi te Penikosite. (Gaue 2:14-18, 32, 33) Neʼe ʼiloga ʼi te temi ʼaē neʼe taki ai e te ʼaselo ʼa Sehova te faka mafola ʼo te logo lelei ʼi Afelika, pea ʼi te temi ʼaē neʼe foaki ai e Sesu te ʼu fakatotonu ʼo ʼuhiga mo te maliu ʼa Saulo ʼo Talesi ʼo kau ki te kau Kilisitiano, pea mo te kamata fai faka mafola ʼa Petelo ki te kau Senitile. (Gaue 8:26, 27; 9:3-7; 10:9-16, 19-22) Kae ʼaki te temi, neʼe mole kei logo leva te ʼu leʼo mai lagi, neʼe mole kei hā te kau ʼaselo, pea neʼe mole kei ʼi ai he ʼu fealagia faka milakulo neʼe foaki e te laumālie. Kae neʼe fakapapau fēnei e Sesu: “Koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:20; 1 Kolonito 13:8) ʼI te temi nei, ʼe tali e te kau Fakamoʼoni ʼa Sehova te takitaki ʼa Sesu. Kanaʼauala neʼe mole feala ke nātou faka mafola te logo ʼo te Puleʼaga, ʼi te lotolotoiga ʼo te ʼu fakafeagai mālohi.
7. (a) Ko ai ʼaē ʼe nātou faʼufaʼu “te tagata kaugana agatonu mo poto,” pea koteā tona tupuʼaga? (b) Ko te gāue fea ʼaē neʼe foaki age ki “te tagata kaugana” ʼaia?
7 ʼI he kiʼi temi siʼisiʼi ʼi muʼa ʼo tona mate, neʼe palalau ia Sesu ki tana kau tisipulo ʼo ʼuhiga mo “te tagata kaugana agatonu mo poto,” pea ko Sesu ʼi tona ʼuhiga Takitaki ʼe ina foaki anai ki ai he ʼu maʼua makehe. Ko “te tagata kaugana” ʼaia ʼe gāue anai ʼi te temi ʼaē ka hake ai te ʼAliki ki selo, pea ʼe kei haga gāue anai ʼi te temi ʼaē ka liliu fakapulipuli mai ia Kilisito, ʼi tona tuʼulaga hau ʼo te Puleʼaga. Ko te fakamatala ʼaia, ʼe mole feala ke faka ʼuhiga ki he tagata e tahi, kae ʼe faka ʼuhiga lelei ki te kokelekasio fakanofo ʼa Kilisito. ʼI tana kua totogi nātou ʼaki tona taʼataʼa, neʼe ʼui ai e Sesu ʼe ko tana “tagata kaugana.” Neʼe ina foaki age kia nātou te gāue, ke nātou fai he ʼu tisipulo pea mo fafaga māmālie ia nātou, ʼo nātou foaki age kia nātou “tonatou meʼa kai [fakalaumālie] ʼi tona temi totonu.”—Mateo 24:45-47; 28:19; Isaia 43:10; Luka 12:42; 1 Petelo 4:10.
8. (a) Koteā te ʼu maʼua lahi ʼe fakahoko e te kalasi ʼa te kaugana ia ʼaho nei? (b) He koʼe ʼe tonu ke tou faka maʼuhiga te ʼu akonaki fakaʼatua ʼaē ʼe foaki mai e te fakafofoga ʼaia?
8 ʼUhi he neʼe fakahoko agatonu e te kalasi ʼo te tagata kaugana ia te gāue ʼa te ʼAliki, ʼi te temi ʼaē neʼe toe liliu mai ai ʼi te fakapulipuli ʼi te 1914, ʼe mahino neʼe ʼavage ki ai te tahi ʼu gāue lahi age ʼi te taʼu 1919. Talu mai ai, neʼe fai e te kalasi ʼaia te fagonogono ʼi te malamanei katoa ʼo ʼuhiga mo te Puleʼaga, koia neʼe tānaki ai te toe hahaʼi tokolahi kau atolasio ʼa Sehova ke hāofaki nātou lolotoga te mamahi lahi. (Mateo 24:14, 21, 22; Apokalipesi 7:9, 10) Mo nātou foki ʼaia ʼe ʼaoga ki ai he meʼa kai fakalaumālie, pea ʼe tufa age e te kalasi ʼo te tagata kaugana. Ke leleiʼia tatou e Sehova, ʼe tonu ke tou tali pea mo mulimuli ki tana ʼu akonaki ʼaē ʼe ina foaki mai ʼaki tana fakafofoga ʼaia.
9, 10. (a) ʼI te ʼuluaki sēkulō, neʼe feafeaʼi te fakatokatoka ʼo te ʼu fihi ʼo ʼuhiga mo te tauhi pea mo te takitaki ʼo te faka mafola ʼo te logo lelei? (b) Ia ʼaho nei, ʼe takitaki feafeaʼi te ʼu gāue ʼa te hahaʼi ʼa Sehova?
9 Kae e feafeaʼi mo kapau ʼi ʼihi temi ʼe malaga ai he ʼu fehuʼi ʼo ʼuhiga mo te tauhi peʼe ko tona faʼahiga fai? Ia Gaue kapite 15 ʼe fakamatala mai ai pe neʼe feafeaʼi te fakatokatoka ʼo te fihi ʼo ʼuhiga mo te kau Senitile ʼaē neʼe nātou liliu ko he kau Kilisitiano. Neʼe ʼave te fihi ʼaia ki te kau ʼapositolo pea mo te ʼu tagata ʼāfea ʼo Selusalemi, he neʼe ko nātou te kolesi pule. Ko te ʼu tagata ʼaia neʼe mole nātou haohaoa, kae neʼe fakaʼaogaʼi nātou e te ʼAtua. Neʼe nātou vakaʼi he ʼu vaega ʼi te Tohi-Tapu ʼo ʼuhiga mo te fihi ʼaia, mo he ʼu fakamoʼoni neʼe ko te laumālie ʼo te ʼAtua ʼaē neʼe ina avahi te gāue ki te telituale Senitile, pea neʼe nātou fai ai te tonu. Neʼe tapuakina e te ʼAtua te faʼahiga fai ʼaia. (Gaue 15:1-29; 16:4, 5) Neʼe fekauʼi e te kolesi pule ʼaia he kau Kilisitiano moʼo fakahaʼele ki muʼa te faka mafola ʼo te logo lelei ʼo te Puleʼaga.
10 Ia ʼaho nei, ko te Kolesi Pule ʼo te kautahi fakahāhā ʼa Sehova ʼe faʼufaʼu e te ʼu tēhina ʼaē neʼe fakanofo e te laumālie, mai te ʼu fenua kehekehe, pea ʼe nonofo ʼi te ʼu pilō tāfito ʼa te kau Fakamoʼoni ʼa Sehova. ʼAki te takitaki ʼa Sesu Kilisito, ko te Kolesi Pule ʼe ina fakahaʼele ki muʼa te tauhi maʼa ʼi te ʼu fenua fuli, ʼo ina takitaki te gāue faka mafola ʼa te kau Fakamoʼoni ʼa Sehova ʼi te ʼu lauʼi hogofulu afe kokelekasio. Ko te kau Kilisitiano ʼaē ʼe nātou faʼufaʼu te Kolesi Pule, ʼe nātou manatu tahi mo te ʼapositolo ko Paulo, ʼaē neʼe faitohi fēnei ki tona ʼu tēhina: “ ʼE mole mātou pule ki takotou tui, kae ʼe mātou kaugā gāue mo koutou ki takotou fakafiafia, heʼe ʼaki takotou tui ʼe koutou tutuʼu maʼu.”—2 Kolonito 1:24.
11. (a) E feafeaʼi koa te fakanofo ʼo te ʼu tagata ʼāfea pea mo te ʼu tagata faifekau faka minisitelio? (b) He koʼe ʼe tonu ke tou gāue tahi lelei mo te ʼu tēhina ʼaē neʼe fakanofo ki te ʼu tuʼulaga ʼaia?
11 Ko te kau Fakamoʼoni ʼa Sehova ʼi te malamanei katoa, ʼe nātou tuku ki te Kolesi Pule ke nātou filifili he ʼu tēhina ʼe nātou maʼu te ʼu fealagia ʼaē ke nātou fakanofo ai he kau tagata ʼāfea pea mo he kau faifekau faka minisitelio ke nātou leʼoleʼo te ʼu kokelekasio. Ko te ʼu fakamaʼua moʼo fai ʼo te ʼu fakanofo ʼaia, ʼe tuʼu ʼi te Tohi-Tapu, pea ʼe tokagaʼi ʼi te ʼu fakamaʼua ʼaia ko te ʼu tagata ʼaia ʼe nātou heʼe haohaoa pea ʼe nātou lava faihala. Ko te kau tagata ʼāfea ʼaē ʼe nātou hinoʼi he ʼu tēhina pea mo nātou ʼaē ʼe nātou fai te ʼu fakanofo ʼaia, ʼe ko tonatou maʼua mamafa ʼaia ia muʼa ʼo te ʼAtua. (1 Timoteo 3:1-10, 12, 13; Tito 1:5-9) Koia ʼe nātou faikole ai ki te ʼAtua, ke tokoni age kia nātou ʼaki tona laumālie, pea mo nātou kumi te takitaki ʼo tana Folafola. (Gaue 6:2-4, 6; 14:23) Tou fakahā ʼe tou faka maʼuhigaʼi “te ʼu meʼa ʼofa ʼaē ko te ʼu tagata” ʼaia, ʼaē ʼe nātou tokoni mai ke tou kaku ki “te logo tahi ʼi te tui.”—Efeso 4:8, 11-16.
12. ʼE fakaʼaogaʼi feafeaʼi e Sehova te hahaʼi fafine ʼi te fakatuʼutuʼu faka teokalatike?
12 ʼE fakahā lelei mai e te Tohi-Tapu, ko te taupau ʼo te kokelekasio ʼe tonu ke fai e he ʼu tagata. Ko te faʼahi ʼaia ʼe mole ina meʼa noaʼi te ʼu hahaʼi fafine, koteʼuhi ko ʼihi ia nātou ʼe ko he kau maʼu tofiʼa ʼi te Puleʼaga ʼi selo, pea ko te tokolahi ʼe lahi ʼaupito tonatou temi fai faka mafola. (Pesalemo 68:11) Tahi ʼaē meʼa, ko te kau fafine Kilisitiano, ʼe nātou kau ki te lelei ʼo te logona ʼo te kokelekasio, mokā nātou fakahoko fakalelei tonatou ʼu maʼua faka famili. (Tito 2:3-5) Kae ko te faiakonaki ʼi te kokelekasio, ʼe fai e te ʼu tagata ʼaē neʼe fakanofo ki te faʼahi ʼaia.—1 Timoteo 2:12, 13.
13. (a) ʼO mulimuli ki te Tohi-Tapu, ʼe tonu ke faka ʼuhiga feafeaʼi e te ʼu tagata ʼāfea tonatou tuʼulaga? (b) Koteā te pilivilesio ʼe feala ke tou kau fuli kiai?
13 ʼI te malamanei, ʼe faka maʼuhigaʼi te tagata ʼaē ʼe maʼu tuʼulaga, kae ko te kautahi ʼo te ʼAtua ʼe mulimuli ki te lekula ʼaenī: “He ko ʼaē ia koutou fuli ʼe hage he kiʼi tamasiʼi, ʼe ko ia ia ʼaē ʼe lahi.” (Luka 9:46-48; 22:24-26) ʼE tokoniʼi e te Tohi-Tapu te ʼu tagata ʼāfea, ke ʼaua naʼa nātou puleʼi fakafefeka ia nātou ʼaē ko te tofiʼa ʼo te ʼAtua, kae ke nātou liliu ko ni ʼu faʼifaʼitaki ki te faga ōvi. (1 Petelo 5:2, 3) ʼE mole ko he tokosiʼi pe, kae ko te kau Fakamoʼoni ʼa Sehova fuli, tagata mo fafine, ʼaē ʼe nātou maʼu te pilivilesio fakafiafia ʼaē ko te fakafofoga ʼo te Tuʼi ʼo te ʼatulaulau, mo palalau ʼi tona huafa ʼaki he agavaivai, pea mo fakahā tona Puleʼaga ki te hahaʼi fuli ʼi te potu fuape.
14. ʼAki te ʼu vaega ʼaē ʼe tuʼu ʼi henī, koutou tali ki te ʼu fehuʼi ʼaē ʼe tuʼu ʼi te fakaʼosi ʼo te palakalafe.
14 Tou fai kia tatou totonu te ʼu fehuʼi ʼaenī: ‘ ʼE ʼau mahino koa pea mo loto fakafetaʼi moʼoni ki te faʼahiga takitaki e Sehova tana kautahi fakahāhā? ʼE hā koa te faʼahi ʼaia ʼi taku aga, mo taku ʼu palalau, pea mo taku ʼu gāue?’ Tou fakakaukauʼi muʼa te ʼu puani ʼaē ʼe hoa mai, ʼaē ʼe lava tokoni ke tou sivi ia tatou takitokotahi.
Kapau ʼe tou fakalogo moʼoni kia Kilisito, te Pule ʼo te kokelekasio, koteā te meʼa ʼaē ʼe tonu ke tou fai ohage ko tona ʼui mai ʼi te ʼu vaega ʼaenī? (Mateo 24:14; 28:19, 20; Soane 13:34, 35)
Ka tou tali ʼaki he loto fakafetaʼi te ʼu meʼa kai fakalaumālie ʼaē ʼe tufa mai e te kalasi ʼo te tagata kaugana pea mo tana Kolesi Pule, ko ai ʼaē ʼe tou fakaʼapaʼapa ki ai? (Luka 10:16)
E feafeaʼi tatatou aga, tāfito te kau tagata ʼāfea, kia nātou ʼaē ʼi te kokelekasio? (Loma 12:10)
15. (a) ʼI tatatou aga ki te kautahi fakahāhā ʼa Sehova, koteā ʼaē ʼe ʼiloga ai? (b) Ko te ʼu faigamālie fea ʼaē ʼe tou maʼu moʼo fakamoʼoni ko te Tevolo ʼe gutuloi pea mo tou fakafiafia te loto ʼo Sehova?
15 Ia ʼaho nei, ʼe takitaki tatou e Sehova ʼaki tana kautahi fakahāhā, ʼaē ʼe pule kiai ia Kilisito. Koia ko tatatou aga ki te kautahi ʼaia ʼe ʼiloga ai tatatou manatu ʼo ʼuhiga mo te fihi ki te pule faʼitaliha. (Hepeleo 13:17) ʼE ʼui e Satana ʼe tou ʼuluaki manatu muʼa kia tatou. Kae kapau ʼe tou lotolelei ke tou fai he faʼahiga gāue ʼe ʼaoga, kae mole tou faiga pe kia tatou totonu, ʼe tou fakahā ai anai ko te Tevolo ʼe gutuloi. Kapau ʼe tou ʼoʼofa pea mo fakaʼapaʼapa kia nātou ʼaē ʼe nātou takitaki tatou, kae mole tou ‘laupisi ki he ʼu hahaʼi ke tou maʼu ai hatatou ʼu meʼa,’ ʼe tou fakafiafia ai te loto ʼo Sehova. (Suta 16; Hepeleo 13:7) ʼAki tatatou agatonu ki te kautahi ʼa Sehova, ʼe tou fakahā ai ko Sehova ko totatou ʼAtua, pea ʼe tou logo tahi ʼi tana tauhi.—1 Kolonito 15:58.
Fakamanatu
• Ko ai te kautahi fakahāhā ʼa Sehova ʼi te temi nei? Koteā te fakatuʼutuʼu ʼa te kautahi ʼaia?
• Ko ai ʼaē neʼe fakanofo ko te Pule ʼo te kokelekasio, pea koteā te ʼu meʼa fakahāhā ʼaē ʼe ina fakaʼaogaʼi moʼo fai he takitaki ʼofa kia tatou?
• Koteā te aga ʼaē ʼe lelei ke tou maʼu ʼo ʼuhiga mo te hahaʼi ʼo te kautahi ʼa Sehova?
[Paki ʼo te pasina 133]
Ko Sehova ʼe ina takitaki tatou ʼaki tana kautahi fakahāhā ʼaē ʼe takitaki e Kilisito