Tou Taki Te Kau Ako Ki Te Kautahi ʼa Te Kau Fakamoʼoni ʼa Sehova
1 “Neʼe fakahā te logo ʼaia ʼi te ʼu lea e 200 tupu. Ko te logo ʼaia neʼe fai ʼi te ʼu fenua e 210 tupu. Ko te logo ʼe fakahā ki te ʼu potu fuli pe ʼaē ʼe nonofo ai te hahaʼi. ʼE mole heʼeki hoko he fai faka mafola feiā ki muʼa atu, ʼo he logo ʼe ina fakatahiʼi te lauʼi miliona hahaʼi ʼi te kele katoa. Neʼe teuteu te kau Fakamoʼoni ʼa Sehova ke nātou fakahoko te gāue ʼaia kua hili kiai taʼu ʼe lauʼi teau!”
2 ʼE kamata feiā te fakamatala ʼo te foʼi fime viteo Les Témoins de Jéhovah : un nom, une organisation. ʼE tali te foʼi fime viteo ʼaia ki te ʼu fehuʼi ʼaenī: Ko ai moʼoni koa te kau Fakamoʼoni ʼa Sehova? ʼE fai feafeaʼi koa tanatou gāue? ʼE takitaki feafeaʼi tanatou gāue? ʼE haʼu maifea tanatou falā? ʼE ko he meʼa fakapunamaʼuli ki te hahaʼi tanatou sio ki te kau “Fakamoʼoni ʼa Sehova ʼi te malamanei katoa neʼe akoʼi ko he kautahi ke nātou tokoni ki tonatou ʼu tatau ke mālohi tanatou tui ki te Tohi-Tapu,” pea ʼe ina fakaloto mālohiʼi nātou ke nātou tokagaʼi ʼe ko te kautahi ʼaia ʼa te kau Fakamoʼoni ʼa Sehova. ʼI tana ʼosi sioʼi te foʼi fime viteo ʼaia, neʼe tagi te fafine ʼe lolotoga ako, pea mo loto fakafetaʼi ʼo ina ʼui fēnei: “ ʼE lava feafeaʼi ki he tahi ke mole ina tokagaʼi ʼe ko te kautahi ʼaia ʼa te ʼAtua moʼoni, ko Sehova?”—Vakaʼi ia 1 Kolonito 14:24, 25.
3 Ko te tahi fafine neʼe ina ako te Tohi-Tapu, pea ina tuku, pea ina toe ako ʼi he temi loaloaga, kae neʼe mole ina tali te ʼui ʼaē ko te Tahitolu ʼe ko he akonaki hala. Pea neʼe sioʼi e te fafine ʼaia mo tona ʼohoana te foʼi fime. Neʼe nā punamaʼuli ʼaupito ʼi te meʼa ʼaē neʼe nā sio kiai ʼi te foʼi fime, pea neʼe nā sioʼi tuʼa lua ʼi te po pe ʼaia. ʼI tanā tahi ako, neʼe fakahā e te fafine tona loto ʼaē ke liliu ko he Fakamoʼoni. Neʼe ʼui maʼana neʼe tokaga fau ki tana tui ʼaē ki te Tahitolu, kae neʼe mole ina tokagaʼi tatatou kautahi pea mo te hahaʼi ʼaē ʼe nātou faʼufaʼu te kautahi ʼaia. ʼI tana sioʼi te foʼi fime viteo ʼaia neʼe mahino ai kia ia kua ina maʼu te kautahi moʼoni ʼa te ʼAtua. Neʼe kua fia kau ia ki te fai faka mafola. ʼI te ʼosi fakamahino age ki ai te ʼu meʼa ʼaē ʼe ʼaoga ke ina fai ke liliu ai ko he kaugā fagona, neʼe ina ʼui fēnei: “ ʼE ʼau fai anai te ʼu meʼa ʼaia.” Neʼe ina līaki tana lotu ʼāfea, mo kamata tana fai faka mafola, pea neʼe liliu ia ʼo faiva ʼi te fakahā ko te Tahitolu ʼe ko he akonaki hala.
4 ʼE kua ʼiloʼi papau ko te kau ako Tohi-Tapu ʼe vave tanatou tuputupu ʼi te faʼahi fakalaumālie pea mo nātou mahino vave, mokā nātou fakamoʼoni ki te kautahi ʼa Sehova pea mo nātou kaugā gāue mo ia. Tou fakatokagaʼi, ʼi te ʼosi papitema ʼa te toko 3 000 ʼi te Penikosite, “neʼe nātou haga mulimuli aipe ki te akonaki ʼa te kau ʼapositolo pea mo nātou fefakatahitahiʼaki.” (Gāue 2:42, kiʼi nota ʼi te lalo pasina) ʼE ʼaoga ke tou tokoni ki te kau ako Tohi-Tapu ke nātou fai te meʼa ʼaia ia ʼaho nei. ʼE lava feafeaʼi hatatou fai te faʼahi ʼaia?
5 Tou Fakahoko Totatou Maʼua: Ko nātou fuli ʼaē ʼe nātou fai ni ʼu tisipulo, ʼe tonu ke nātou ʼiloʼi ko tonatou maʼua ko te taki ʼo ia ʼaē ʼe ako Tohi-Tapu ki te kautahi ʼa te ʼAtua. (1 Tim. 4:16) Ko te ʼu ʼaho fuli ʼaē ʼe fai ai te ako, ʼe tonu ke faka ʼuhiga ʼe ko he tokoni ki te ʼaho ʼaē ka momoli ai, ʼe ia ʼaē ʼe ako, tona maʼuli kia Sehova ʼaki te papitema ʼi te vai. Koʼeni te fehuʼi ʼaē ka fai anai ki ai lolotoga te toʼotoʼoga ʼaia ko te papitema: “ ʼE koutou mahino koa ko takotou foaki tokotou maʼuli pea mo takotou papitema, ʼe koutou liliu ai ko he Fakamoʼoni ʼa Sehova, ʼo koutou fakatahi mo te kautahi ʼaē ʼe takitaki e te laumālie ʼo te ʼAtua?” Koia, ʼe maʼuhiga ke ina ʼiloʼi ʼe mole feala ke tauhi ki te ʼAtua mo kapau ʼe mole gāue mālohi mo te kokelekasio faka Kilisitiano moʼoni.—Mat. 24:45-47; Soa. 6:68; 2 Ko. 5:20.
6 Koutou haga akoʼi ia ia ʼo ʼuhiga mo te kokelekasio pea mo te kautahi faka malamanei ʼa te kau Fakamoʼoni ʼa Sehova. Koutou fai te faʼahi ʼaia ʼi tana ako ʼi te vāhaʼa fuli, ʼo kamata ʼi te ʼuluaki ako. ʼI te kamata, ʼe koutou fakaafe ia ia ʼaē ʼe ako ke haʼu ki te ʼu fono, pea koutou fakaafe tuʼumaʼu ia ia.—Fkhā. 22:17.
7 Tou Fakaʼaogaʼi Te ʼu Tohi ʼAē Neʼe Foaki Mai: Ko te ʼu tohi ʼaē ʼe lelei moʼo fai ʼaki he ʼu ako Tohi-Tapu, ʼe ko te kaupepa Koteā ʼAē ʼe Fakamaʼua Mai e Te ʼAtua Kia Tatou? pea mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te ʼu meʼa gāue maʼuhiga ʼaia ʼe nā fakahā te maʼuhiga ʼaē ke kita fakatahitahi mo te kokelekasio. ʼE ʼui fēnei ʼi te fakaʼosi ʼo te ako 5 ʼo te kaupepa Fakamaʼua: “ ʼE tonu ke hoko atu takotou ako ʼo ʼuhiga mo Sehova pea mo koutou fakalogo ki te ʼu meʼa ʼaē ʼe ina fakamaʼua atu. Ko te kau ki te ʼu fono ʼi te Fale ʼo te Puleʼaga ʼa te kau Fakamoʼoni ʼa Sehova, ʼe tokoni anai kia koutou ke koutou fai te faʼahi ʼaia.” Ko te tohi Te ʼAtamai Mālama ʼe liuliuga tana fakaloto mālohi ia ia ʼaē ʼe ako ke kau ki te ʼu fono. Ko te kapite 5, ʼi te palakalafe 22, ʼe ina fakahā te fakaafe ʼaenī: “Te kau Fakamoʼoni ʼa Sehova . . . ʼe nātou uga fakafiafia koutou ke koutou fakatahi mo nātou ʼo tauhi ki te ʼAtua ‘ ʼaki te laumālie pea mo te moʼoni.’ (Soane 4:24)” Ko te kapite 12, ʼi te palakalafe 16, ʼe ina ʼui fēnei: “ ʼAki takotou hoko atu te ako ʼaia pea mo takotou fakamāmāhani ʼo ʼolo ki te ʼu fono ʼa te kau Fakamoʼoni ʼa Sehova, ʼe toe ʼāsili mālohi anai takotou tui.” Ko te kapite 16, ʼi te palakalafe 20 ʼe ina ʼui fēnei: “Koutou fakamāmāhani ʼo koutou kau ki te ʼu fono ʼa te kau Fakamoʼoni ʼa Sehova.” ʼE ina toe ʼui fēnei: “Ko te faʼahi ʼaia ʼe tokoni anai kia koutou ke koutou mahino pea mo koutou maʼuliʼi te ʼatamai mālama ʼo ʼuhiga mo te ʼAtua ʼi tokotou maʼuli, pea ʼe ina foaki atu anai te fiafia. Ko takotou kau ki te fakatahi fakatautehina faka Kilisitiano ʼi te malamanei, ʼe tokoni anai kia koutou ke koutou nofo ōvi kia Sehova.” Ko te kapite 17 ʼe ina fakahā peʼe feafeaʼi te maʼu e he tahi ia te fīmālie moʼoni ʼi te hahaʼi ʼa te ʼAtua. ʼI tatatou ako mo te hahaʼi, ʼe ko totatou maʼua ko te faka maʼuhigaʼi ʼo te ʼu koga ʼaia ʼo te kaupepa pea mo te tohi.
8 Ko te kaupepa Te Kau Fakamoʼoni ʼa Sehova Logo Tahi Moʼo Fai ʼo Te Finegalo ʼo Te ʼAtua ʼi Te Malamanei ʼe ko he kaupepa lelei neʼe fai ke feala ai te ʼiloʼi lelei e te hahaʼi te kautahi fakahāhā ʼa Sehova ʼaē ʼe ina fakaʼaogaʼi ia ʼaho nei moʼo fakahoko tona finegalo. Ko te ʼu puani ʼaē ʼe maʼu ai ʼo ʼuhiga mo totatou minisitelio, mo tatatou ʼu fono, pea mo tatatou kautahi, ʼe ina fakaloto mālohiʼi anai ia ia ʼaē ʼe ina lau ke fakatahitahi mo tatou ʼi te tauhi ki te ʼAtua. Kapau kua fai he ako Tohi-Tapu, pea ʼe maʼuhiga ke tou foaki kia ia ʼaē ʼe ako te kaupepa ʼaia ke ina lau. ʼE mole kei ʼaoga ia ke kita ako mo ia te kaupepa ʼaia ohage ko te ako ʼaē neʼe fai ki muʼa atu.
9 Ko ʼihi ʼu foi fime viteo ʼaē neʼe fai e te Sosiete ʼe ko he ʼu meʼa gāue lelei moʼo takitaki ʼo te kau ako ki te kautahi ʼa te kau Fakamoʼoni ʼa Sehova. ʼE lelei anai mo kapau ʼe feala ke nātou sioʼi te ʼu foʼi fime: (1) La société du monde nouveau en action, ko he fakafoʼou ʼaia ʼo te foʼi ʼata ʼo te taʼu 1954 ʼaē neʼe ina faka maʼuhigaʼi te tokalelei, te fua lelei, pea mo te ʼofa ʼaē ʼe maʼu ʼi te kautahi ʼa Sehova; (2) Ko te foʼi fime Unis grâce à lʼenseignement divin, ʼe ina fakamatala te logo tahi ʼaē neʼe fakahā ʼi tatatou ʼu fakatahi faka malamanei ʼi te Potu Hahake ʼo Eulopa, ʼi te Potu Toga ʼo Amelika, ʼi Afelika, pea mo Asia; (3) Ko te foʼi fime La fermeté des Témoins de Jéhovah face à la persécution nazie, ʼe talanoa ki te hisitolia fakaloto mālohi ʼo te lototoʼa ʼa te kau Fakamoʼoni pea mo tanatou mālo ʼi tonatou fakatagaʼi e Itilele; (4) Ko te foʼi fime Jusquʼaux extrémités de la terre, neʼe ina fakahā ʼe kua taʼu 50 te Ako Faka Tohi-Tapu ʼo Kalaate ʼo te Watchtower pea mo fakahā te fua lelei ʼo te gāue fai faka mafola ʼa te kau misionea ʼi te malamanei, pea (5) mo te foʼi fime Les Témoins de Jéhovah : un nom, une organisation.
10 Tou Fai He ʼu Fakatuʼutuʼu ʼo ʼUhiga Mo Te ʼu Fono: ʼE tonu ke tou fakamahino ki te kau ako, ʼe ʼaoga te ako ʼaē ʼe foaki age kia nātou mokā ʼe fai tanatou ako, pea ʼe toe ʼaoga kia nātou te ʼu akonaki ʼaē ʼe fai ʼi te ʼu fono ʼo te kokelekasio. (Soa. 6:45) Ko he tahi neʼe hoki kamata tana ako, ʼe ʼaoga ke ʼalutahi tana mahino ki te Tohi-Tapu pea mo tana mahino ki te kautahi. Moʼo fakahoko te faʼahi ʼaia, ʼe ʼaoga ke nātou kau ki te ʼu fono. (Hep. 10:23-25) Tou fakaafe ia ia ki te ʼu fono ʼo te kokelekasio. Ko ʼihi hahaʼi foʼou, neʼe nātou kamata kau ki te ʼu fono ʼi muʼa ʼo te fai tuʼumaʼu ʼo tanatou ako Tohi-Tapu. ʼE mahino papau ia, ʼe tou fia tuku he faʼifaʼitaki lelei ʼo tou kau tuʼumaʼu ki te ʼu fono.—Lu. 6:40; Filp. 3:17.
11 Tou fakamahino ki ai te ʼu fono pea mo fakahā ki ai peʼe feafeaʼi tona fai, ke faigafua ai kia ia tana ʼuluaki kau kiai. Mai tona ʼuhiga ʼaē ko ʼihi ʼe nātou ufiufi mokā nātou ʼuluaki ʼolo ki he koga meʼa, koia ʼe lelei anai ke tou kaugā ʼolo mo ia ʼaē ʼe ako ki te Fale ʼo te Puleʼaga ʼi te temi ʼaē ʼe ʼuluaki kau ai ki te ʼu fono. ʼE mole ufiufi anai mo kapau ʼe koutou ʼolo mo ia ʼi te temi ʼaē ʼe ʼalu ai ʼo fakaʼalofa ki te ʼu tēhina mo tuagaʼane ʼo te kokelekasio. Ko te meʼa ʼaē ʼe maʼuhiga tāfito, ke koutou tali lelei ia ia ʼi te fono, ke ʼaua naʼa ufiufi pea mo umiuminoa.—Mat. 7:12; Filp. 2:1-4.
12 Koutou fakaloto mālohiʼi ia ia ʼi te ʼuluaki ako ke kau ki te fakatahi makehe ʼaho tahi, ki te fakatahi faka silikosikilipisio, peʼe ko te fakatahi faka tisitilike. ʼE lagi feala ke koutou fakatuʼutuʼu ke koutou ʼave ia ia ʼi takotou motokā.
13 Tou Uga Ia Ia Ke Loto Fakafetaʼi Fakamalotoloto: ʼE ʼui fēnei e te tohi Organisés pour bien remplir notre ministère, ʼi te pasina 93: “Kapau ʼe hā takotou loto fakafetaʼi ki te kautahi ʼa Sehova ʼi takotou ʼu fai palalau mo te hahaʼi ʼaē ʼe fia logo ki te moʼoni, ʼe faigafua anai kia nātou hanatou maʼu te loto fakafetaʼi ʼaia, ke feala ai hanatou tuputupu ʼi te ʼiloʼi ʼo Sehova.” Koutou palalau tuʼumaʼu ki te ʼu meʼa ʼe lelei ʼo ʼuhiga mo tokotou kokelekasio, kae ʼaua naʼa koutou palalau ki he ʼu meʼa ʼe fakaloto vaivai. (Pes. 84:10; 133:1, 3b) ʼI te ʼu faikole ʼaē ʼe koutou fai ʼi te ako Tohi-Tapu, koutou talanoa ʼo ʼuhiga mo te kokelekasio pea mo te maʼuhiga ʼaē ʼo te kau tuʼumaʼu ki te ʼu fono ʼo te kokelekasio.—Ef. 1:15-17.
14 ʼE mahino papau ia ʼe tou loto ke fakatuputupu e te hahaʼi ʼaē ʼe foʼofoʼou mai, te loto fakafetaʼi ʼo ʼuhiga mo te ʼu kaumeʼa agalelei, pea mo te fīmālie fakalaumālie ʼaē ʼe tou maʼu ʼi te hahaʼi ʼa te ʼAtua. (1 Tim. 3:15; 1 Pe. 2:17; 5:9) ʼI totatou ʼuhiga kau Fakamoʼoni ʼa Sehova, ʼe tou fai ia meʼa fuli, moʼo taki te kau ako ʼo te Folafola ʼa te ʼAtua ki te kautahi ʼa te kau Fakamoʼoni ʼa Sehova.
[Talanoa ʼo te pasina 3]
ʼE vave te tuputupu ʼa te kau ako Tohi-Tapu ʼi te faʼahi fakalaumālie mokā ʼe nātou sio totonu ki te kautahi
[Talanoa ʼo te pasina 4]
ʼAua naʼa tuai tatatou fakaafe te kau ako Tohi-Tapu ke nātou kau ki te ʼu fono