Tou Tokoni Ke Nātou Kau Ki Te ʼu Fono
1 “Ko he kaumeʼa pe ʼi te ʼu tafaʼaki . . . ʼe fia kau ki te ʼu fono, ʼe fakaafe ʼaki he lotoʼofa ke haʼu.” Talu mai te tala ʼo te logo ʼaia ʼi te nusipepa Le Phare de la Tour de Sion ʼo Novepeli 1880, ʼe fakaafe e te kau Fakamoʼoni ʼa Sehova te hahaʼi ke nātou fakatahitahi moʼo ako te Tohi-Tapu. (Apk. 22:17) ʼE ko he faʼahi maʼuhiga ʼaia ʼo te tauhi moʼoni.
2 ʼE Maʼuhiga Ke Tou Kau Kiai: ʼE tou maʼu he ʼu tapuakina mokā tou fakatahi mo te kokelekasio. ʼE lahi age te ʼu meʼa ʼe tou ʼiloʼi ʼo ʼuhiga mo totatou ʼAtua fakatalakitupua, ko Sehova. ʼI te kokelekasio, ʼe tou fakatahitahi ke “akoʼi [tatou] e Sehova.” (Isa. 54:13) ʼE faka maʼuhigaʼi e tona kautahi te polokalama ako ʼo te Tohi-Tapu, ʼe ina fakaōvi tatou kia te ia, pea mo foaki mai he ʼu tokoni moʼo maʼuliʼi “te tokoni fuli ʼa te ʼAtua.” (Gaue 20:27, MN; Lu. 12:42) ʼE foaki mai e te ʼu fono he ako kia tatou takitokotahi ke tou popoto ʼi te akoʼi ki te hahaʼi ia te Folafola ʼa te ʼAtua. Ko te ʼu fakamanatu mai te Tohi-Tapu, ʼe tokoni kia tatou ke tou felogoi lelei mo te hahaʼi pea mo Sehova totonu. Ko tatatou fakatahi mo nātou ʼaē ʼe ʼoʼofa ki te ʼAtua ʼe ina fakaloto mālohiʼi tatatou tui.—Loma 1:11, 12.
3 Koutou Fai He Fakaafe Fakahagatonu: ʼO kamata ʼi te ʼuluaki ako, koutou fakaafe takotou ʼu ako ke nātou ʼōmai ki te ʼu fono. Koutou ʼavage ki ai he pepa fakaafe. Koutou lagaʼi tana fia logo ʼo koutou vaevae mo ia he manatu neʼe ina fakaloto mālohiʼi koutou ʼi te fono fakamuli, pea mo koutou palalau ki he meʼa ʼe vakaʼi anai ʼi te fono ka hau. Koutou fakamatala te agaaga ʼo te Fale ʼo te Puleʼaga, pea ke ina ʼiloʼi tona tuʼuʼaga.
4 Kapau ʼe mole haʼu ʼi te temi ʼaia, koutou haga fakaafe tuʼumaʼu. Koutou fakaʼaogaʼi he ʼu kiʼi minuta veliveli ʼi te vāhaʼa fuli moʼo fakahā ki ai peʼe feafeaʼi te ʼu gāue ʼa te kautahi. Koutou fakaʼaogaʼi te kaupepa lahi Logo Tahi Moʼo Fai ʼo Te Finegalo ʼo Te ʼAtua pea mo te foʼi fime viteo Les Témoins de Jéhovah : un nom, une organisation ke ina ʼiloʼi lelei tatou pea mo tatatou ʼu fono. Koutou ʼolo mo te tahi ʼu kaugā fagona ke feʼiloʼiʼaki mo nātou. ʼI te faikole, koutou fakafetaʼi kia Sehova ʼo ʼuhiga mo tana kautahi pea koutou talanoa ki te ʼaoga ʼaē ke fakatahi kiai ia ia ʼaē ʼe ako.
5 Koutou tokoni kia nātou ʼaē ʼe foʼofoʼou mai ke nātou fakatahi mo tatou. ʼI te tuputupu ʼo tanatou loto fakafetaʼi kia Sehova, ʼe uga anai nātou ke nātou maʼuliʼi te ʼu meʼa ʼaē ʼe nātou ako pea mo nātou liliu ʼo kau ki te kautahi logo tahi ʼa te ʼAtua.—1 Ko. 14:25.