Koteā Takotou ʼu Fakatuʼutuʼu?
1 Ko tatou fuli ʼe tou fakakaukauʼi tatatou ʼu fakatuʼutuʼu ki te ka haʼu. Ko nātou ʼaē ʼe ʼamanaki ke nātou maʼuʼuli ʼi te kele, ʼe nātou fakatuʼutuʼu ke nātou maʼuʼuli ʼo heʼegata ʼi te mālama foʼou pea mo faitotonu ʼaē ka fakatuʼu e te ʼAtua. Kae ʼe ʼi ai te ʼu meʼa ʼe feala ke nātou toʼo te ʼamanaki ʼaia mai totatou loto. ʼE tonu ke kita faiga mālohi moʼo fakamuʼamuʼa te ʼu gāue ʼo te Puleʼaga, pea ke ʼaua naʼa tou hēʼia ʼi te ʼu fakahala ʼo te kakano.—1 Soa. 2:15-17.
2 ʼE mole feala ki te malamanei ke mahino ki te ʼu fakatuʼutuʼu ʼo te hahaʼi ʼaē ʼe maʼuhiga kia nātou te ʼu meʼa fakalaumālie. (1 Ko. 2:14) Ko te hahaʼi ʼo te malamanei ʼe nātou faiga ki te mālohi, ki te ʼu koloā, pea ke nātou logona, kae ʼe tou faiga tatou ki te ʼu koloā fakalaumālie. (Mat. 6:19-21) Kapau ʼe tou faiga ke tou faka ʼalutahi tatatou ʼu manatu mo te ʼu manatu ʼo te mālama, ʼe tou lava fakahoko anai koa tatatou ʼu fakatuʼutuʼu fakalaumālie? ʼE faifai pea manako ʼaupito totatou loto ki te ʼu meʼa faka mālama. ʼE feafeaʼi hatatou tekeʼi ia te faʼahi ʼaia?
3 “Tou Faʼifaʼitaki Ki Totatou ʼAliki Ko Sesu Kilisito”: Moʼo ʼiloʼi peʼe tou tokagaʼi te ʼu meʼa ʼo te Puleʼaga ʼi tatatou faʼufaʼu totatou ka haʼu, tou vakavakaʼi peʼe koteā te ʼu meʼa ʼaē ʼe tou palalau kiai. ʼE tou palalau tuʼumaʼu koa ki te ʼu koloā pea mo te ʼu meʼa faka mālama? Kapau koia, pea ʼe tonu ke tou vakaʼi totatou loto, heʼe mole lagi kei maʼuhiga kia tatou te ʼu meʼa fakalaumālie. E lagi tonu ke tou tokakaga tāfito ʼo ‘faʼifaʼitakiʼi totatou ʼAliki ko Sesu Kilisito, kae ke ʼaua naʼa tou fai he ʼu fakatuʼutuʼu maʼa te ʼu holi ʼo te kakano.’—Loma 13:14, MN.
4 ʼE feala ki te kau tūpulaga ke nātou ‘faʼifaʼitaki kia Kilisito,’ ʼo nātou fai fakatomuʼa he ʼu fakatuʼutuʼu ki te ʼaho ʼaē ka nātou kamata ai te minisitelio temi katoa. Neʼe ʼi ai te tūpulaga neʼe fia pionie katoa, kae ʼi tana agaʼi fenua, ʼe tonu ki te tamaliki tagata ke nātou maʼu hanatou gāue lelei. Koia, neʼe lahi tāfito tana gāue, pea ohage ko te agamāhani neʼe ʼalu pe ia ʼo fono pea mo kau ki te minisitelio. ʼI te tahi ʼaho leva, neʼe ina kamata ʼahiʼahiʼi te ʼu palalau ʼa Sesu ia Mateo 6:33, pea neʼe ina tuku tana gāue faka mālama, pea neʼe ina toʼo te selevisi temi katoa. ʼI te temi nei ʼaki he leʼo ʼo loto ʼe lelei, ʼe ina ʼui ʼe tauhi kia Sehova ‘ ʼaki tona ʼu fealagia fuli.’
5 ʼE ʼui e te Tohi-Tapu ʼe ko he aga fakapotopoto hakita fakatuʼutuʼu ki te ka haʼu. (Taag. 21:5) Tou fakaʼamu mo tatou fuli ke tou fakamuʼamuʼa feiā te finegalo ʼo te ʼAtua.—Ef. 5:15-17.