E Feafeaʼi Hakotou Fakafuafua Te Maʼuli Lelei?

ʼE ʼUI e te tikisionalio ko te maʼuli lelei ʼe ko te “maʼu ʼo te koloā, te ʼofainaʼi ʼo kita e te hahaʼi, pea mo te maʼu tuʼulaga māʼoluga.” ʼE ko te faka ʼuhiga katoa koa ʼaia ʼo te maʼuli lelei? Ko te ʼu koloā, mo te ʼofainaʼi ʼo kita, peʼe ko te maʼu tuʼulaga māʼoluga ʼe ko te ʼu meʼa pe koa ʼaia moʼo fakafuafua ʼo he maʼuli lelei? ʼI muʼa ʼo hakotou tali kiai, koutou fakatokagaʼi te faʼahi ʼaenī: Neʼe mole maʼu koloā ia Sesu Kilisito ʼi tana maʼuli ʼi te kele. Neʼe mole hahaʼi ia nātou ʼaē neʼe ʼoʼofa kia te ia; pea neʼe mole faka maʼuhigaʼi ia ia e te hahaʼi ʼo tona temi. Logola la te ʼu meʼa ʼaia, kae ko Sesu neʼe ko te tagata neʼe maʼuli lelei. Koteā tona tupuʼaga?

ʼI tana ʼi te kele, ko Sesu neʼe “maʼu koloā ki te ʼAtua.” (Luka 12⁠:​21, MN ) ʼI tona ʼosi fakatuʼuake, neʼe fakapale ia ia e te ʼAtua “aki te kololia mo te fakaapaapa.” Ko Sehova neʼe ina hikihiki tona ʼAlo “ki he tuʼulaga māʼoluga pea mo ina tali fakalelei ke ina foaki age te higoa ʼaē ʼe māʼoluga age ʼi te ʼu higoa fuli pe.” (Hepeleo 2⁠:9; Filipe 2⁠:​9, MN ) Ko te maʼuli ʼo Sesu neʼe ina fakafiafia te loto ʼo Sehova. (Tāʼaga Lea 27⁠:11) Neʼe maʼuli lelei Sesu ʼi te kele, koteʼuhi neʼe ina fakahoko tana fakatuʼutuʼu. Neʼe fai e Sesu te finegalo ʼo te ʼAtua pea neʼe ina faka maʼuhigaʼi Tona Huafa. Koia ʼaē neʼe faka maʼuhigaʼi ai e te ʼAtua ia Sesu, ʼo ina foaki age te koloā, te ʼofa, pea mo te tuʼulaga māʼoluga, ʼaē ʼe ko he ʼu meʼa neʼe mole heʼeki hoko ki he tahi ʼi te ʼu faleako lalahi, peʼe ki he tagata fai politike, peʼe ko he tahi ʼe faigaoʼi. Ko Sesu tokotahi pe neʼe ko te tagata neʼe maʼuli lelei ʼaupito ʼi te kele.

ʼE ʼiloʼi e te ʼu mātuʼa Kilisitiano kapau ʼe muliʼi e tanatou ʼu tamaliki te ala ʼo Kilisito, ʼaki hanatou maʼu koloā ki te ʼAtua ohage ko tona fai ʼaē e Sesu, ʼe nātou utu anai te ʼu tapuakina lahi ʼi te temi nei pea mo maʼu te ʼu fakapale taulekaleka ʼi te tuʼu ʼo te ʼu faʼahiga meʼa ʼaē ka haʼu. ʼE mole he tahi age meʼa ʼe lelei ki he tūpulaga, ke ina muliʼi te ala ʼo Kilisito ʼaki hana fai te gāue ʼaē neʼe fai e Sesu​—⁠ke kau ki te minisitelio katoa mo kapau ʼe feala.

Kae ʼi ʼihi agaʼi fenua, ʼi te agamāhani ko te kau tūpulaga ʼe mole nātou kau ki te minisitelio katoa. Ka kua ʼosi te ako ʼa he tūpulaga, ʼe tonu muʼa ke ina kumi hana gāue ʼaho katoa, pea ke ʼohoana, pea ke maʼuli fakafīfīmālie. ʼI ʼihi temi, ʼe faihala te kau tūpulaga ʼaē ʼe mulimuli ki te ʼu agaʼi fenua ʼaia, ʼi tanatou mole kau ki te minisitelio katoa. (Tāʼaga Lea 3⁠:27) Koteā tona tupuʼaga? Koteʼuhi ʼi te mālohi ʼo te faka uga, ʼe nātou muliʼi te ʼu lekula faka agaʼi fenua. Neʼe ko he meʼa ʼaia neʼe hoko kia Robert.a

Mokā ʼe Mole ʼAlutahi Te Agaʼi Fenua Pea Mo Te Leʼo ʼo Loto

Neʼe lahilahi ake ia Robert ohage pe ko he tahi ʼe kau ʼi te kau Fakamoʼoni ʼa Sehova. ʼI tona temi tūpulaga, ko tana aga pea mo tana ʼu fakakaugā neʼe mole faʼa lelei. Neʼe kamata tuʼaniaʼi e tana faʼe te faʼahi ʼaia. Koia neʼe ina kole ai ki te pionie, ʼe ko te Fakamoʼoni ʼa Sehova ʼe gāue temi katoa ʼi te minisitelio, ke ina fakaloto mālohiʼi ia Robert. ʼE fakamatala e Robert te meʼa ʼaē neʼe hoko ki muli age.

“Neʼe ʼau leleiʼia ʼaupito te tokaga ʼaē neʼe fakahā e te tēhina pionie kia ʼau. ʼAki tana faʼifaʼitaki lelei, neʼe ʼau loto ke ʼau kau mo ʼau ki te gāue pionie ohage ko haku gāue mokā ʼosi anai taku ako. Ko te faʼahi ʼaia neʼe toe tuʼaniaʼi e Mama​—⁠kae mole tatau leva mo tana ʼuluaki tuʼania. Koteʼuhi ʼi tamatou agaʼi fenua, ʼe ko he meʼa lelei mokā pionie he taʼahine ʼi te hili pe ʼo tana ako, kae ki he tama ʼe tonu muʼa ke lelei tona maʼuli fakasino, pea feala leva hana kau ki te gāue pionie.

“Neʼe maʼu taku gāue pea neʼe ʼau kamata laga taku matani gāue. Mole tuai, pea lahi ʼosi taku tokaga ki taku gāue pea neʼe ʼau ʼalu pe ʼo fono pea mo fai faka mafola kae neʼe mole kei hona ʼuhiga kia ʼau. Neʼe vevele toku leʼo ʼo loto​—⁠he neʼe ʼau ʼiloʼi neʼe feala pe ke lahi age taku gāue ʼaē maʼa Sehova. Koia neʼe ko he meʼa faigataʼa ʼaupito haku situʼa ki te ʼu fakaʼamu ʼa ʼihi ʼo ʼuhiga pea mo ʼau, kae ʼe ʼau fiafia ʼo ʼuhiga mo te meʼa ʼaē neʼe ʼau fai. ʼI te temi nei kua ʼau ʼohoana, pea kua taʼu lua nei tamā pionie taumatuʼa. Mole heʼeki faʼa fualoa, neʼe hinoʼi ʼau ke ʼau tagata faifekau faka minisitelio. ʼI te temi nei, kua lava ke ʼau tala fakahagatonu kua ʼau ʼiloʼi te maʼuli fakafeauga ʼaki taku kaugana kia Sehova mo toku loto katoa, pea mo toku ʼu fealagia katoa.”

Ko te nusipepa ʼaenī neʼe ina tokoniʼi tuʼumaʼu te kau tūpulaga ke nātou ako hanatou gāue peʼe ke nātou faigaʼi he tahi ʼu fealagia ʼe ʼaoga​—⁠ʼi tanatou kei ako mo kapau ʼe feala. Koteā tona tupuʼaga? Ke nātou liliu koa ʼo maʼu koloā? Kailoa. ʼE ʼaoga ʼuluaki te ako ʼaia ke nātou lava taupau tonatou maʼuli ʼi te faʼahi fakasino, pea mo nātou gāue lahi kia Sehova ʼo mulimuli pe ki tonatou ʼu fealagia, kae tāfito ʼi te minisitelio katoa. Kae ko te meʼa ʼe tautau hoko, ko te kau tūpulaga ʼi te lahi fau ʼo tanatou tokakaga ʼaē ke nātou maʼu tuʼulaga ʼi tanatou gāue fakamālama, ʼe tokosiʼi ia nātou ʼaē ʼe nātou kau ki te minisitelio katoa. Ko ʼihi ʼe mole nātou fakatuʼutuʼu pe la ke nātou kau ki te selevisi katoa. Koteā tona tupuʼaga?

ʼE tou mahino leva ki te faʼahi ʼaia ʼaki te fakamatala ʼa Robert. ʼI tana kua mahino ki te gāue ʼaē neʼe ina ako, neʼe kamata laga e Robert te matani gāue. Mole tuai pea liliu tona maʼuli ko he meʼa fakapiko ʼe mole hona ikuʼaga. Neʼe fakatuʼutuʼu pe ia ke lelei tona maʼuli fakasino. Kae ʼe ʼi ai koa he tahi ʼi te kokelekasio faka Kilisitiano peʼe ʼi tuʼa kua ina maʼu katoa te fakatuʼutuʼu ʼaia? Ko te kau Kilisitiano ʼe tonu ke nātou faiga ʼo puipui nātou ʼi te faʼahi fakasino, ʼo nātou fakahoko lelei tonatou ʼu maʼua fakasino; kae ʼe tonu pe foki ke nātou mahino, ʼi te ʼu temi maveuveu ʼaenī, ʼe tokosiʼi ia nātou ʼaē neʼe lava ke nātou maʼu moʼoni he puipui fakasino. Koia la ʼaē ko te fakapapau ʼa Sesu ia Mateo 6⁠:33 ʼe fakaloto fīmālie ki te kau Kilisitiano.

ʼE fiafia ia Robert ʼi tana fakahoko te ʼu meʼa ʼaē neʼe holi kiai tona loto kae neʼe mole mulimuli ki te agaʼi fenua. Ia ʼaho nei, ʼe fiafia ʼi tana kau ki te selevisi katoa. Ei, ko te minisitelio katoa ʼe ko he gāue maʼuhiga. Ko Robert ʼe tokalelei mo tana fakakaukau koteʼuhi ʼe kaugana kia Sehova, ohage ko tana ʼui ʼaenī, ‘ ʼaki tona ʼu fealagia katoa.’

Koutou Fakaʼaogaʼi Lahi Tokotou ʼu Faiva

ʼE lahi te hahaʼi faiva ʼi te kau Fakamoʼoni ʼa Sehova. Ko ʼihi ʼe nātou ʼatamai, pea ko ʼihi ʼe nātou popoto ʼi te ʼu gāue fakasino. Ko te ʼu meʼa ʼofa fuli ʼaia ʼe haʼu mai ia Sehova, heʼe ina foaki “ki te mea fulipe te mauli mo te manava pea mo meafuape.” (Gaue 17⁠:25) Kanaʼaua te maʼuli, ʼe mole he ʼuhiga ʼo te ʼu meʼa ʼofa ʼaia.

Koia ʼe tau mo feʼauga ke tou fakaʼaogaʼi totatou maʼuli moʼo kaugana kia Sehova. Neʼe ko te faʼahi ʼaia neʼe fakatuʼutuʼu e te tagata faiva ke ina fai. Neʼe maʼuli ʼi te ʼuluaki sēkulō ʼo totatou temi. Ko te tagata ʼaia neʼe tupu mai te famili ʼiloa, pea neʼe maʼuli ʼi tona temi tūpulaga ʼi te kolo maʼuhiga ko Talesi ʼi Silisia. Logola neʼe ko te Sutea ʼi tana tupu ake, kae neʼe liliu ko te tagata Loma ʼuhi ko tana tāmai. Neʼe feala ʼaki te faʼahi ʼaia ke ina maʼu he ʼu fakagafua pea mo he ʼu pilivilesio ʼe lahi. ʼI tana lahilahi ake neʼe ina ako te Lao mo te tagata neʼe maʼuhiga ʼaupito ʼi “te ʼu tagata faiako” ʼo te temi ʼaia​—⁠ko Kamaliele. Mole faʼa fualoa pea ina mau ‘te koloā, te ʼofa pea mo te tuʼulaga māʼoluga.’​—⁠Gaue 21⁠:39; 22⁠:​3, 27, 28.

Neʼe ko ai koa te tūpulaga ʼaia? Ko tona higoa neʼe ko Saulo. Kae ko Saulo neʼe liliu ko te Kilisitiano pea ki muli age, neʼe liliu ko te ʼapositolo ko Paulo. Neʼe ina tuku keheʼi te ʼu meʼa ʼaē neʼe holi mālohi kiai kae ina foaki tona maʼuli katoa moʼo kaugana kia Sehova ʼi tona ʼuhiga Kilisitiano. Neʼe ʼiloa ia Paulo, ohage ko he tagata fai faka mafola faʼafai ʼo te logo lelei, kae neʼe mole ʼiloa ia ohage ko he tagata poto ʼo te lao. Hili taʼu e 30 ʼi tana gāue misionea, neʼe faitohi Paulo ki tona ʼu kaugā fagona ʼaē ʼi Filipe. ʼI te tohi ʼaia, neʼe talanoa ai ki te ʼu meʼa ʼaē neʼe ina fai ki muʼa atu ʼi tana liliu ko te Kilisitiano pea neʼe ina toe ʼui fēnei: “Uhi ko [Sesu Kilisito], kuʼau sakilifisioʼi ia meafuape, o au lau ko meafuape aia e ko te otaota, koteuhi ke au mau ia Kilisito.” (Filipe 3⁠:⁠8) Neʼe mole fakahemala Paulo ʼo ʼuhiga mo tana faʼahiga fakaʼaogaʼi ʼo tona maʼuli!

Kae neʼe feafeaʼi ki te ako ʼaē neʼe mau e Paulo mai ia Kamaliele? Neʼe ʼi ai koa hona ʼaoga kia te ia? Ei! ʼI te ʼu lakaga kehekehe, neʼe lagolago ki “te maluʼi ʼo te logo lelei pea mo fakamoʼoni kiai te lao.” Kae neʼe ko te gāue tāfito ʼa Paulo ke liliu ko he tagata faka mafola ʼo te logo lelei​—⁠neʼe mole feala ke akoʼi age te faʼahi ʼaia ʼi tana ʼuluaki ako.​—⁠Filipe 1⁠:​7, MN; Gaue 26⁠:​24, 25.

ʼO toe feiā pe ia ʼaho nei, ko ʼihi neʼe feala ke nātou fakaʼaogaʼi tonatou ʼu meʼa ʼofa pea mo tonatou ʼu faiva, feiā mo tanatou ako moʼo fakahaʼele ki muʼa te ʼu gāue ʼo te Puleʼaga. Ohage la ko Amy neʼe maʼu pepa ʼi te univelesitē, ko te tahi pepa ʼo ʼuhiga mo te gāue faifakatau pea ko te tahi pepa ʼo ʼuhiga mo te gāue avoka. ʼI te tahi lakaga neʼe lelei te totogi ʼo tana gāue fai avoka, kae ʼi te temi ʼaenī, ʼe gāue ʼaki tona lotolelei ʼi te Petele ʼo te Sosiete Watch Tower. ʼE fakamatalatala fēnei e Amy tona maʼuli ʼi te temi nei: “ ʼE ʼau ʼiloʼi papau neʼe ʼau filifili te meʼa ʼaē ʼe lelei ki toku maʼuli. . . . ʼE mole ʼau fia fetogi toku maʼuli ʼaenī mo he tahi ia nātou ʼaē neʼe kaugā ako pea mo ʼau ʼi te univelesitē. ʼE ʼau fiafia ʼi te ala ʼaē neʼe ʼau fili. ʼE ʼau maʼu te meʼa fuli ʼaē ʼe ʼaoga kia ʼau pea mo ʼau loto kiai​—⁠ʼaē ko he maʼuli fakafeauga mo fakafiafia, pea mo te gāue ʼe lelei ʼaupito.”

Neʼe fili e Amy te ala ʼaē neʼe ina maʼu ai te ʼatamai tokalelei mo fiafia, pea mo te tapuakina ʼa Sehova. ʼE mahino papau ia ʼe ko te ʼu meʼa ʼaia ʼe loto te ʼu mātuʼa Kilisitiano maʼa tanatou fānau!

Ko He Maʼuli Lelei ʼi Te Minisitelio Faka Kilisitiano

ʼIo, ʼe maʼuhiga ke kita maʼu he fakakaukau ʼe lelei ʼo ʼuhiga mo te fua lelei ʼo te minisitelio Kilisitiano. ʼE mole faigataʼa tatatou fiafia mokā neʼe tou maʼu he temi fiafia ʼi te minisitelio, ʼo tuku he tohi faka Tohi-Tapu ki he tahi peʼe fai palalau mo he tahi ʼo ʼuhiga mo he ʼu manatu faka Tohi-Tapu fakaloto mālohi. Kae kapau ʼe tahitahiga tatatou maʼu he tahi ʼe fia logo, pea ʼe feala ai ke tou manatu neʼe pulinoa totatou temi. Kae ke tou manatuʼi, ko te tahi fakaliliu ʼo te maʼuli lelei ‘ke ʼofainaʼi kita.’ Ko te ʼofa koa ʼo ai ʼaē ʼe tou fia maʼu? ʼE mahino ia ko te ʼofa ʼo Sehova. Ko te ʼofa ʼaia ʼe lava hatatou maʼu, tatau aipe peʼe fakalogo te hahaʼi peʼe kailoa ki tatatou logo. Neʼe foaki e Sesu te ako maʼuhiga ki tana kau tisipulo ʼo ʼuhiga mo te faʼahi ʼaia.

ʼE koutou manatuʼi neʼe fekauʼi e Sesu te kau fai faka mafola ʼo te Puleʼaga e toko 70 “kia kolo fuape mo te u nofoaga nee amanaki haeleʼage ki ai.” (Luka 10⁠:⁠1) Neʼe tonu ke nātou faka mafola ʼi te ʼu kolo lalahi pea mo te ʼu kolo liliki kae neʼe mole kaugā gāue Sesu mo nātou. Neʼe ko he ʼaluʼaga foʼou ʼaia kia nātou. Kae ʼi muʼa ʼo tana fekauʼi nātou, neʼe foaki age e Sesu kia nātou te ʼu fakatotonu lelei. Mokā nātou felāveʼi mo he ‘kaumeʼa ʼo te tokalelei,’ pea neʼe tonu ke nātou foaki age kia te ia he fagonogono maʼuhiga ʼo ʼuhiga mo te Puleʼaga. Kae kapau neʼe mole tali leleiʼi nātou, pea ʼe tonu ke hoko atu tanatou ʼolo, ʼo mole nātou tokagaʼi te faʼahi ʼaia. Neʼe fakamahino e Sesu ko te hahaʼi ʼaē neʼe mole fia fakalogo ki tanatou gāue, neʼe nātou situʼa moʼoni kia Sehova totonu.​—⁠Luka 10⁠:​4-7, 16.

ʼI te kua ʼosi ʼo te fai faka mafola ʼa te toko 70, neʼe nātou liliu kia Sesu ʼi te “[fiafia ʼo ʼui maʼa nātou]: Aliki, mo te faga temonio nee natou fakalogo kia matou i tou huafa.” (Luka 10⁠:17) Lagi neʼe ko he meʼa fakatupu fiafia ki te ʼu tagata heʼe haohaoa ʼaia tanatou kapu te ʼu laumālie mālohi! Kae neʼe fakatokagaʼi fēnei e Sesu ki tana kau tisipulo loto fiafia: “ ʼAua naʼa koutou fakafiafia ʼi te fakalogo atu ʼa te ʼu laumālie kia koutou, kaʼe ke koutou fakafiafia ʼi te kua tohi ʼo tokotou ʼu higoa ʼi te lagi.” (Luka 10⁠:​20, MN ) Neʼe mole feala ke maʼu tuʼumaʼu e te toko 70 tisipulo te mālohi ʼaē moʼo kapu te kau temonio, peʼe ke fua lelei tuʼumaʼu tanatou minisitelio. Kae kapau neʼe nātou nofo agatonu, pea ʼe nātou maʼu tuʼumaʼu anai te ʼofa ʼo Sehova.

ʼE Koutou ʼOʼofa Koa Ki Te ʼu Kaugana ʼAē ʼe Gāue Katoa ʼi Te Minisitelio?

ʼI te tahi ʼaho neʼe ʼui fēnei e te tūpulaga ki te tagata ʼāfea Kilisitiano: “Ka ʼau maʼu anai toku pepa, pea ʼe ʼau faiga anai ke ʼau maʼu haku gāue. Kapau ʼe mole ʼau maʼu haku gāue, pea ʼe ʼau toʼo anai he faʼahiga selevisi e temi katoa.” Kae neʼe mole ko te manatu ʼaia ʼa te tokolahi ia nātou ʼaē neʼe nātou toʼo te minisitelio katoa. Ke liliu ʼo pionie, ko ʼihi neʼe nātou situʼa ki te kumi ʼo he ʼu gāue ʼe totogi lelei. Ko ʼihi neʼe nātou līaki te fealagia ʼaē ke hoko atu tanatou ako. Ohage ko te ʼapositolo ko Paulo, mo Robert pea mo Amy neʼe nātou fai te ʼu sakilifisio, pea neʼe mole nātou fakahemala. ʼE nātou leleiʼia tonatou pilivilesio ʼaē ko te fakaʼaogaʼi ʼo tonatou ʼu meʼa ʼofa moʼo fakavikivikiʼi ia Sehova, ia ia ʼaē ʼe tāu mo te faʼahi ʼaia, ʼe ko he meʼa lelei ʼe feala ke nātou momoli kia te ia.

ʼUhi ko he ʼu tupuʼaga kehekehe, e tokolahi te kau Fakamoʼoni agatonu ʼa Sehova, ʼe mole feala hanatou kau fuli ki te gāue pionie. ʼE lagi ʼe ʼi ai tonatou ʼu maʼua ʼe hinoʼi nātou kiai e te Tohi-Tapu ʼe tonu ke nātou fakahoko. Kae kapau ʼe nātou lolotoga tauhi ki te ʼAtua ʼaki tonatou ‘loto katoa, mo tonatou nefesi katoa, pea mo tonatou ʼatamai katoa,’ pea ʼe fiafia Sehova ia nātou. (Mateo 22⁠:37) Logola ʼe mole feala hanatou pionie, kae ʼe nātou ʼiloʼi ko nātou ʼaē ʼe pionie neʼe nātou filifili te gāue maʼuhiga.

Neʼe tohi fēnei e te ʼapositolo ko Paulo: “Koutou fakagata takotou muliʼi te tuʼu ʼo te ʼu faʼahiga meʼa ʼaenī.” (Loma 12⁠:​2, MN ) ʼO mulimuli ki te tokoni ʼa Paulo, ʼe mole tonu ke tou tuku te ʼu agaʼi fenua peʼe ko te ʼu lekula ʼo te tuʼu ʼaenī ke nātou faʼufaʼu tatatou ʼu manatu. Tatau aipe peʼe lava hakotou pionie peʼe kailoa, kae koutou faiga ke liliu te selevisi kia Sehova ko te fakatuʼutuʼu ʼaia ʼo tokotou maʼuli. ʼI te temi fuli pe ʼaē ka koutou maʼu ai te ʼofa ʼo Sehova ʼe koutou maʼuʼuli lelei anai.

[Kiʼi nota]

[Paki ʼo te pasina 19]

ʼAua naʼa koutou faiga ki he meʼa ʼe mole koutou maʼu anai