Koutou Vakaʼi Fakatomuʼa Takotou ʼu Fakatuʼutuʼu!
1 ʼE foaki tuʼumaʼu mai e te kautahi ʼa Sehova he polokalama ʼo ʼuhiga mo te ʼu fakatuʼutuʼu fakalaumālie ʼaē ʼe fai moʼo fafaga ʼo tatou ʼi te faʼahi fakalaumālie. Kapau ʼe tou loto fakafetaʼi, pea ʼe tou faiga anai ke tou fakaʼaogaʼi fuli te ʼu meʼa ʼaē ʼe fakatuʼutuʼu maʼa tatou, ohage ko te ʼaʼahi ʼo te tagata taupau faka silikosipisio, mo te ʼu fakatahi lalahi, pea mo te tahi ʼu gāue ʼaē ʼe fakatuʼutuʼu ʼi tatatou telituale. (Mat. 5:3) Kae ʼe ʼi ai ʼihi ʼe mole nātou maʼu te ʼu fua lelei ʼo te ʼu fakatuʼutuʼu fakalaumālie ʼaia, he kua ʼi ai tanatou tahi ʼu fakatuʼutuʼu. Koteā ʼaē ʼe feala ke tou fai ke ʼaua naʼa hoko te faʼahi ʼaia? Koteā ʼaē ʼe feala ke tou fai ke ʼaua naʼa maʼuhiga age te ʼu fakatuʼutuʼu fakamālama ʼi te “ ʼu meʼa ʼaē ʼe maʼuhiga tāfito”?—Filp. 1:10, MN.
2 ʼE Maʼuhiga Ke Tou Fai He Polokalama Fakapotopoto: ʼE fai te fakatokaga ʼaenī ia Tāʼaga Lea 21:5: “Ko te ʼu fakatuʼutuʼu ʼo te tagata poto ʼe fua manuʼia moʼoni, kae ko ia ʼaē ʼe gāue fakavilivili ʼe hoge anai ia.” Ke “fua manuʼia” totatou maʼuli fakalaumālie, ʼe maʼua ke tou fai fakatomuʼa hatatou ʼu fakatuʼutuʼu, ʼo tou manatuʼi te ʼu gāue faka teokalatike ʼaē kua ʼosi fakatuʼutuʼu. ʼE tonu ke tou vakaʼi fakalelei tatatou ʼu fakatuʼutuʼu takitokotahi, naʼa fakatupu kovi ki te ʼu fakatuʼutuʼu fakalaumālie ʼaē ʼe fua lelei kia tatou. Kapau ʼe tou fai fakavilivili he ʼu fakatuʼutuʼu ʼo ʼuhiga mo te ʼu meʼa ʼaē ʼe tou loto kiai, ka mole tou vakaʼi te ʼu meʼa faka teokalatike ʼaē ʼe ʼamanaki hoko mai, pea ʼe lagi tou “hoge” anai ʼi te faʼahi fakalaumālie.
3 ʼAua Naʼa Tou Tō Fono! Ko tatou fuli ʼe tou fai hatatou ʼu fakatuʼutuʼu ʼo ʼuhiga mo te ka haʼu, mo te ʼu temi mālōlō, mo te ʼu folau, mo te ʼaʼahi ʼo totatou ʼu kāiga, pea mo te tahi ʼu meʼa. ʼI muʼa ʼo takotou fai he tonu fakaʼosi ʼo ʼuhiga mo takotou ʼu fakatuʼutuʼu, koutou ʼuluaki vakaʼi muʼa te polokalama ʼo te ʼu meʼa fakalaumālie ʼaē kua ʼosi fakatuʼutuʼu. Kapau ʼe koutou fakatokagaʼi ʼe tō tahi te vāhaʼa makehe pe ko he fakatahi mo te temi ʼaē ʼe koutou ʼamanaki mavae ai, pea koutou faiga mālohi ke koutou fetogi takotou ʼu fakatuʼutuʼu ke feala hakotou kau ʼi te ʼu fono maʼuhiga ʼaia. ʼE fakahā fakatomuʼa mai te ʼu ʼaho maʼuhiga ʼo te taʼu. ʼE feala ke fakahā atu e te kau tagata ʼāfea pe koteā te ʼu fakatuʼutuʼu ʼaē neʼe fai ʼo ʼuhiga mo tokotou kokelekasio.
4 Kapau ʼe tou sio mamaʼo pea mo tou fakatuʼutuʼu fakatomuʼa te ʼu meʼa ʼaē ʼe maʼuhiga, pea ʼe tou “fonu [anai] i te fua o te susitisia . . . ki te kololia mo te vikiviki o te Atua.”—Filp. 1:11.