Koteā Takotou ʼu Fakatuʼutuʼu Ki Te Temi Māfana?
Ka tou talanoa ki te temi māfana, pea ʼe tou manatu ki te ʼaele lelei, mo tatatou fakatuʼutuʼu ke tou kau ʼi he fakatahi, pea mo tatatou ʼu fakatuʼutuʼu ke tou ʼolo ʼo mālōlō mo totatou famili pea mo totatou ʼu kaumeʼa. Kapau ʼe koutou fai hakotou ʼu fakatuʼutuʼu ki te temi māfana, pea koʼeni te ʼu tokoni ʼaē ka ʼaoga kia koutou moʼo fakamuʼamuʼa te ʼu meʼa ʼo te Puleʼaga:
◼ Koutou fakatuʼutuʼu fakalelei ke koutou kau ʼi te Fakatahi Makehe ʼaē ʼe ʼaho tahi. Koutou fakatuʼutuʼu fakatomuʼa takotou feʼoloʼaki pea mo tokotou nofoʼaga ke mole koutou fihifihia ʼi te faʼahi ʼaia.
◼ Kapau ʼe koutou ʼolo ʼo mālōlō ʼi he tahi telituale, koutou fakatuʼutuʼu ke koutou kau ʼi te ʼu fono ʼo te kokelekasio ʼaia pea mo koutou kau ʼi te minisitelio. Koutou vakaʼi pe neʼe koutou momoli takotou pepa tānaki gāue; kapau ʼe ʼaoga, pea koutou momoli ʼaki te laposi ki te sikalaipe ʼo tokotou kokelekasio.
◼ Kapau ʼe koutou ʼaʼahi tokotou ʼu kāiga ʼaē ʼe mole kau ʼi te moʼoni, pea ʼe ko he faigamālie ʼaia ke koutou fai faka mafola kia nātou. Koutou ʼave mo koutou tokotou Tohi-Tapu pea mo he ʼu tohi kehekehe.
◼ Kapau ʼe koutou nofo ʼi Niumea, pea kua koutou fakakaukauʼi koa peʼe feala hakotou ʼolo ʼo lagolago ki he kokelekasio ʼo te vao, ʼaē ʼe ʼaoga ai he tokoni moʼo faka mafola ki te hahaʼi Uvea ʼaē ʼe nonofo ʼi tonatou telituale? Koutou fakalavelave ki te kau tagata ʼāfea peʼe ki te tēhina taupau faka silikosipisio ʼo ʼuhiga mo te faʼahi ʼaia.
◼ Ko te temi mālōlō ʼo te ʼu faleako, ʼe ko he faigamālie lelei ʼaia ki te kau tūpulaga ke nātou fakalahi tanatou gāue fai faka mafola. ʼU tūpulaga, ʼe feala koa hakotou pionie vaeluaʼi temi?
◼ ʼUhi ko te ʼaele lelei pea mo te loaloaga ʼo te ʼu ʼaho, ʼe feala anai ke fua lelei tokotou minisitelio mo kapau ʼe koutou faka mafola ʼi te afiafi, ʼi te temi ʼaē ʼe maʼu ai te hahaʼi iō nātou.
◼ ʼE tonu ke vakaʼi e te kau tagata ʼāfea peʼe fakatuʼutuʼu fakalelei te ʼu gāue ʼa te kokelekasio, ʼo nātou hinoʼi ʼihi ke nātou fakahoko te ʼu gāue ʼo nātou ʼaē ʼe ʼolo ʼo mālōlō.
Koutou manatuʼi, “ko te ʼu fakatuʼutuʼu ʼo te tagata poto ʼe fua manuʼia moʼoni.” (Taag. 21:5) Koia, koutou faiga ke lahi takotou ʼu gāue faka teokalatike ʼi te temi māfana.