Tou Fakaʼaoga Leleiʼi Te ʼu ʼAho Mālōlō Moʼo Hikihiki ʼo Tatatou ʼu Gāue Faka Teokalatike
1 ʼE ʼui fēnei ko te temi ka haʼu ʼa nātou ʼaē ʼe nofo teuteu. ʼE tonu ke tou fai he ʼu fakatuʼutuʼu mokā ʼe tou fia fakaʼaoga leleiʼi totatou temi pea ke hake ia tatou te manatu ʼaē ʼe tou fai he meʼa ʼe lelei. ʼI te māhina ko tesepeli ʼe tou hu anai ki te ʼu ʼaho mālōlō, temi ʼaia ʼe lahi ai totatou temi moʼo fai ʼo tatatou ʼu gāue takitokotahi. Ko te ʼu fakatuʼutuʼu fea koa ʼaē ʼe feala ke tou fai moʼo fakaʼaogaʼi lelei ʼo totatou temi ki te ʼu gāue faka teokalatike?
2 Tokolahi te hahaʼi neʼe fia logo kua ʼosi ki ai he kiʼi temi siʼisiʼi neʼe kua nātou ʼolo ki te fakatahi faka tisitilike “Te hahaʼi toʼo mālama”. Ko tanatou tuputupu fakalaumālie ʼe fakalogo ki te tokoni ka tou foaki age anai. ʼE fua lelei anai kia nātou mokā ʼe fai hanatou ako faka tohi-tapu ʼi tonatou ʼapi. ʼE feala ke tou fakahā age kia nātou te ʼu manuʼia fakalaumālie ʼe nātou maʼu ai anai.
3 ʼI te kau ki te fakatahi makehe ʼaho tahi ʼi sanualio, ʼe lahi anai te ʼu fealagia ke tou fai ai te fagonogono faigamālie. ʼE tou teuteu anai ʼo tou ʼave te ʼu tohi foʼou. ʼE feala hatatou palalau ki te moʼoni ki te hahaʼi ʼe gāue ʼi te ʼu faʼahi ʼutuʼaga penesini, te ʼu otele, te ʼu fale kai. ʼE ko he faʼahi lelei ʼaia ke kita maʼu ai he ʼu temi fakafiafia.
4 Ki te kau tūpulaga, ko te temi vela ʼe faka ʼuhiga ia ko he temi ʼāteaina. Kae, ko te mālōlō ʼe ko he meʼa lelei foki, kae ko he koga ʼo te temi ʼaia ʼe mole feala koa ke fakaʼaogaʼi ke hikihiki ai te fai faka mafola, ohage la ko te toʼo ʼo te pionie vaeluaʼi temi? Ko te ʼu mātuʼa ʼe feala ke nātou kamata ʼi te temi nei ʼo tokoniʼi tanatou ʼu fānau ke nātou fai hanatou ʼu fakatuʼutuʼu. Ko te ʼu fānau ʼo te ʼu famili ʼe feala anai ke nātou pionie pea mo faka mafola fakatahi. Ko ʼihi ʼe mole feala ke pionie ʼe feala anai hanatou faiga ke lahi tanatou fai faka mafola tāfito ʼi te lolotoga vāhaʼa. ʼE feala ke fai he ʼu fakatuʼutuʼu moʼo fakahā ʼo te moʼoni ki hotatou kāiga ʼe nofo ʼi he koga meʼa ʼe mamaʼo atu mo totatou telituale. ʼE tou tokaga anai ʼo faka felogoi ki te ʼu tagata ʼāfea ʼo te ʼu kokelekasio ʼaē ʼe nātou fakasiosio te telituale ʼaē ʼe tou fia ʼaʼahi. Kapau ko he telituale ʼe mamaʼo, ke tou faka felogoi ki te taupau faka silikosikilipisio ke ina foaki atu anai te ʼu faʼahiga meʼa ʼe ʼaoga.
5 ʼE ʼi ai ʼihi ia tatou ʼe toʼo anai hona ʼu ʼaho mālōlō pea ʼe nātou ʼolo ki he tahi ʼu koga meʼa. Tou fai he fakatuʼutuʼu ke tou kau ki te ʼu fono ʼi te kokelekasio ʼo te kolo ʼaia pea ke tou fai faka mafola mo nātou: ʼe ko he faʼahi ʼaia ʼe feala ai ke tou fefakaloto mālohiʼaki. ʼE lagi ʼe koutou ʼolo anai ki he telituale ʼe mole tautau fai, ko he faka fealagia ʼaia kia koutou ke koutou fakahā te moʼoni ki te hahaʼi ʼe mole tautau logo ki te logo ʼo te Puleʼaga.
6 Tokolahi te kau tūpulaga kua ʼosi peʼe kua vave fakaʼosi tanatou ako. Koʼena te faʼahi ʼe tonu ke nātou fakakaukauʼi lelei ki te ʼu faʼahiga fakatuʼutuʼu ʼe nātou fai. Ko te kau tūpulaga ʼaē ʼe nātou fai he ʼu fakatuʼutuʼu faka teokalatike ʼe nātou ʼiloʼi papau ʼe tapuaki anai nātou (1 Soane 2:15-17). ʼI tanatou liliu ko te ʼu pionie katoa, ʼe nātou maʼu anai he maʼuli maʼuhiga pea mo he ʼu pilivilesio ʼi te gāue ʼo lahi age.
7 Tokolahi ia tatou ʼe ʼi ai tona temi ʼāteaina, koia ʼe tonu ai ke tou aga fakapotopoto ‘ ʼo totogi maʼa tatou te temi faigamālie ʼaia’. (Ef. 5:15, 16.) Ko te ʼu fakatuʼutuʼu ʼaē ʼe faka fealagia kia tatou ke tou maʼumaʼua ʼi te gāue ʼa Sehova ʼe ina foaki mai te ʼu manuʼia ʼe tologa, kia tatou pea mo te kāiga. — 1 Tim. 4:15, 16.