Te Mālohi ʼo Te Folafola ʼa Te ʼAtua
1 Ko te Folafola ʼa te ʼAtua ʼe mālohi (Hep. 4:12). ʼE tou sio ki tona fakamoʼoni ia ʼaho nei: ko te maʼuli ʼo te hahaʼi ʼe lauʼi miliona kua haʼele lelei ʼuhi ko tanatou taupau leleiʼi te ʼu meʼa ʼe nātou ako ʼi te Tohi-Tapu. Neʼe fēia foki ʼi te ʼuluaki sēkulō, ʼi te faka mafola ʼaē e te kau tisipulo ʼa Sesu te mālama ʼo te Folafola ʼa te ʼAtua. — Lom. 12:2.
2 Ke ʼaoga te ʼu akonaki ʼa te Tohi-Tapu, ʼe tonu ke ʼiloʼi ia ohage ko te Folafola ʼa te ʼAtua (1 Tes. 2:13). ʼI novepeli, ʼe tou foaki anai ki te hahaʼi te fealagia ʼaē ke nātou mahino ʼo lahi age ki te maʼuhiga ʼo te Tohi-Tapu ʼo fakahā kia nātou fuli te Tohi-Tapu Les Saintes Ecritures — Traduction du monde nouveau pea mo te tohi La Bible: Parole de Dieu ou des hommes?
3 He koʼe ʼe mole toe vakaʼi he ʼu faʼahi ʼo te tohi Parole de Dieu? Ko te tanakiʼaga ʼo te ʼu kupu ʼo te tohi ʼaia ʼe ina fakamahino mai te ʼu kapite ʼaē ʼe palalau ai ki te ʼu milakulo, te ʼu fefakafeagai ʼe tou sio kiai, te felogoi tahi ʼa te Tohi-Tapu mo te poto fakatagata, te ʼu lea faka polofeta pea mo ʼihi ʼatu ʼu akonaki. ʼE lahi te ʼu paki pea mo te ʼu fakatā ʼi te tohi ʼaia. Ko te ʼu kumiʼaga ʼo te ʼu tohi ʼe fakamoʼoni ʼaki ʼe tuʼu ʼi te fakaʼosi ʼo te tohi. Ko te ʼu faʼahi ʼaia ʼe faka fealagia kia tatou ke tou fakahā fakamalotoloto te tohi ʼaia mo fakafiafia, ʼaki tatatou ʼiloʼi papau ʼe ʼaoga ke fagono te hahaʼi ʼo totatou telituale ki te logo lelei ʼaē ʼe tuʼu ai.
4 ʼE feafeaʼi hatatou fakaʼaogaʼi te tohi ʼaia mokā ʼe tou felāveʼi mo he tahi kua tui ia ko te Tohi-Tapu ʼe ko te Folafola ʼa te ʼAtua? ʼE feala hatatou taupau tana fia logo ʼo tou fakahā te maʼuhiga ʼo te kapite 2, ʼaē ʼe fakamatala ai te tau neʼe fai e te Tohi-Tapu lolotoga te Hisitolia ke aʼu mai ki te temi nei, pe ko te kapite 14, ʼe ina fakaloto mālohi ia ia ʼaē ʼe lautohi ke ina tali he tokoni ke mahino lelei ai ki te ʼuhiga ʼo te Tohi-Tapu ia ʼaho nei. ʼI te lau ʼo te ʼu vaega ʼaē ʼe hinoʼi mai ʼi te kapite 14, ʼe tou fakahā age ai kia ia ʼaē ʼe felogoi mo tatou te tui ko te fai palalau ʼe fakatafito ki te Tohi-Tapu.
5 Tokolahi ʼe fakafisi ko te Tohi-Tapu ʼe mole ko te Folafola ʼa te ʼAtua ʼuhi ko te ʼu agaaga ʼa te keletiate. Ko te kapite 3, “La fausse amie de la Bible” (Te kaumeʼa loi ʼo te Tohi-Tapu), ʼe ʼaoga anai kia tatou ʼi te faʼahi ʼaia.
6 Ka tou lau anai he ʼu vaega ʼi tatatou Tohi-Tapu, ʼe lagi palalau mai anai ia ia ʼaē ʼe fakalogo mai ki te mahino lelei ʼo te lea ʼe fakaʼaoga ʼi te Traduction du monde nouveau. Peʼe lagi tou sio ki he tahi ʼe fia logo, kae ʼe mole ʼi ai hana Tohi-Tapu. Koʼena te ʼu fahaʼi ʼe feala ai ke tou fakahāhā ia te ʼu ʼaoga ʼo te Tohi-Tapu ʼaē ʼe tou fakaʼaoga, pea mo te ʼu tupuʼaga ʼo tatatou leleiʼia age ʼi ʼihi ʼatu ʼu tohi. ʼE feala anai ke tou fakatokagaʼi ia nātou ki te “Kumiʼaga ʼo te ʼu kupu faka tohi-tapu ʼaē ʼe maʼuhiga” ʼe tokoni ke maʼu te ʼu vaega ʼaē kua ʼiloʼi. Pea, ko te “Sujets de conversation bibliques” ʼi te fakaʼosi ʼo te Tohi-Tapu ʼe feala ke tokoniʼi ai te hahaʼi ʼaē ʼe nātou fia maʼu te tali ki te ʼu fehuʼi ʼe tautau fai.
7 ʼAki te Tohi-Tapu, neʼe fakahā mai ai e Sehova tana ʼu faʼahiga agaaga ki te hahaʼi, pea neʼe ina faigaʼi tatou ke tou ʼiloʼi ia ia totonu. Ke feala hatatou fakaʼaoga lelei te Traduction du monde nouveau pea mo te tohi Parole de Dieu moʼo tokoniʼi ʼo te kāiga ke ina ʼiloʼi ia Sehova pea mo te mālohi ʼo tana Folafola! — 2 Ko. 10:4.