Tou Tokaga Ki Te ʼu Hahaʼi ʼAē ʼe Lotolelei
1 Mole he tahi age ia Sehova ʼe tokaga lelei ki te ʼu hahaʼi. ʼE mole gata pe ʼi tana foaki mai kia tatou te ʼu meʼa fakamālama, kae ʼe ina toe foaki mai foki te ʼu meʼa fakalaumālie ʼaē ʼe ʼaoga ki totatou maʼuli fīmālie. ʼE tokaga fakamalotoloto ia kia tatou koia ʼaē ʼe ina fakasiosioʼi ai te meʼa ʼe ʼi totatou loto. — Pes. 139:23.
2 ʼI te temi ʼaē neʼe nofo ai Sesu ʼi te kele, neʼe ina muliʼi fakaleleiʼi te faʼifaʼitaki ʼo tana Tāmai ʼaki tana tokaga ʼaē ki te hahaʼi. Tou manatuʼi te tagata ʼaē neʼe ina ʼui age kia Sesu: “ ʼAliki, kapau ʼe ke loto ki ai, pea ʼe feala ke ke fakaliliu ʼau ke ʼau maʼa.” Neʼe tali age e Sesu ki ai: “ ʼE ʼau loto ki ai.” (Mat. 8:1-3). ʼI te sio ʼaē ʼa Sesu ki te fafine vituʼa ʼe putu, koteā ʼaē neʼe ina fai? Neʼe tuʼu tona fagona ʼo tokoni ki ai (Luka 7:11-15). ʼE feala koa hatatou tokaga ʼo lahi age ki te ʼu hahaʼi ʼaē ʼe lotolelei?
3 ʼAki te faʼifaʼitaki ʼo totatou Tāmai, ia Sehova, pea mo tona ʼAlo, ia Sesu Kilisito, ʼe tonu ke tou tokaga lelei ki te kāiga. ʼE tou fai te fahaʼi ʼaia ʼaki tatatou tohi ke totonu te ʼu nota ʼo te ʼapi. ʼE tonu ke tohi te higoa pea mo te tuʼasila totonu ʼo ia ʼaē neʼe lotolelei, ʼo feiā foki mo te meʼa ʼaē neʼe tou palalau ki ai ʼi tatatou ʼuluaki felogoi. ʼOsi ʼaia, ʼi muʼa ʼo te fai ʼo te ʼaʼahi, tou teuteuʼi fakalelei. Kapau neʼe tou tuku he ʼu nusipepa ʼi muʼa atu, ʼe lagi tou faigaʼi anai ʼo fai te ʼaʼahi ʼo fakatafito ki he manatu ʼo he alatike ʼo te ʼu nusipepa ʼaia. Tou vakaʼi peʼe feafeaʼi anai tatatou fai te fahaʼi ʼaia.
4 Kapau neʼe tou tuku Te Tule Leʼo ʼo te ʼaho 1 ʼo ʼoketopeli 1992 pea neʼe tou fakatokagaʼi ia ia ʼaē ʼe palalau mo tatou ki te alatike ʼaē “ ʼE ʼaoga moʼoni koa he Mesia ki te tagata?”, ʼe feala tatatou teuteu ʼo fakaʼaogaʼi ia Fakahā 21:4 pea mo Soane 17:3 lolotoga te ʼaʼahi.
Ohage la, ko te ʼosi lau ia Fakahā 21:4, ʼe feala ke tou fehuʼi age:
◼ “Koteā ʼaē ʼe tonu ke tou fai moʼo maʼuli ʼi he mālama feiā? [Tuku ke fai mai hana tali.] Koutou vakaʼi te meʼa ʼaē ʼe tonu ke fai, ʼi te tonu ʼa te Mesia, ke tou maʼu ai te maʼuli ʼi he mālama fēnei.” Tou lau ia Soane 17:3 ʼo fakahā ko te maʼuli heʼegata ʼi he mālama foʼou pea mo tokalelei ʼe feala mokā ʼe ako ke ʼiloʼi ia te ʼAtua pea mo Kilisito. Kapau ko ia ʼaē ʼe palalau mo tatou ʼe ina fakahā mai tana fia logo, tou faigaʼi ke kamata he ako faka tohi-tapu ʼaki te kiʼi pepa lotu ʼaē Une vie paisible dans un monde nouveau.
5 Ko ia ʼaē ʼe palalau mo tatou ʼe lagi ʼe ina leleiʼia anai mokā ʼe tou fai palalau ki he manatu ʼo te alatike “ ʼE feala takotou tauʼi te ʼu manatu ʼe mole totonu”, ʼe hā ʼi te numelo ʼo te Koutou ʼaʼala! ʼo te ʼaho 8 ʼo ʼoketopeli 1992. Lolotoga te ʼaʼahi, ʼe feala anai ke tou fakatafito tatatou fai palalau kia Filipe 4:6, 7.
ʼE feala anai ke tou fehuʼi age:
◼ “ ʼI takotou manatu, ʼe feafeaʼi tatatou tauʼi te ʼu manatu ʼe mole totonu ia ʼaho nei?” Tou fakalogo ki tana tali, ʼosi ʼaia pea tou ʼui age: “ ʼE ko he meʼa lelei te ʼiloʼi ʼaē ko te Tohi-Tapu ʼe tuʼu ai te ʼu fakatuʼutuʼu, kapau ʼe tou maʼuliʼi, ʼe ko he tokoni anai ki te tokalelei ʼo te laumālie pea mo te loto. [Fakatokagaʼi age ki te ʼu faʼahiga manatu ʼaoga ia Filipe 4:6, 7.] ʼE fakahā mai e te Tohi-Tapu he temi ʼe muliʼi ai e te hahaʼi katoa te ʼu fakatuʼutuʼu ʼaia pea ʼe mole ʼi ai he faʼahiga meʼa ʼe ina toe uga ai he ʼu manatu ʼe mole totonu.” ʼOsi ʼaia tou palalau ki ʼihi tapuakina ki te temi ka haʼu ʼo fakasiosio te kiʼi pepa lotu ʼaē Une vie paisible dans un monde nouveau, pea tou kamata he ako faka tohi-tapu.
6 Koteā te meʼa ke fai mokā ko ia ʼaē ʼe palalau mo tatou kua ia ia hatatou tohi? He koʼe ʼe mole fakaʼaogaʼi moʼo kamata ʼo he ako faka tohi-tapu? Kapau ko te tohi Mauli heegata, tou avahi ʼi te tanakiʼaga ʼo te ʼu koga tohi pea tou ʼui age ki ai ke ina fili he faʼahiga meʼa ʼe loto ia ke tou palalau ki ai. ʼE lagi ʼe tou kamata anai he ako faka tohi-tapu ʼaki tatatou fakasiosio he palakalafe e tahi peʼe lua.
7 Kapau ʼe tou tokaga ki te ʼu hahaʼi ʼaē ʼe lotolelei ʼo tou teuteu fakalelei pea mo fai he ʼu ʼaʼahi fakapotopoto, ʼe tou fakahā anai ko tatou ko te ʼu faʼifaʼitakiʼaga ʼa te ʼAtua pea mo Kilisito, pea ʼe tou fakaʼamu ke tokolahi ia nātou ke maʼuʼuli. — 2 Petelo 3:9.