ʼE Feala Koa Ke Lahi ʼAupito Takotou Fakavikiviki Kia Sehova ʼi ʼApelili?
1 Ko te tagata fai pesalemo ko Tavite neʼe ina maʼu te holi fakamalotoloto ʼaē ke ina fakavikiviki ia Sehova, pea koia ʼaē neʼe ina ʼui ai: “ ʼE lahi anai taku palalau kia Sehova ʼaki toku gutu, pea ʼi te lotolotoiga ʼo te hahaʼi tokolahi ʼe ʼau fakavikiviki anai ia ia.” (Pes. 109:30) Ko ʼApelili ko he temi lelei ʼaia moʼo ‘fakahoko ʼo tana fakavikiviki’ ʼo fakatuputupu ai tatatou kau ki te gāue ʼi te minisitelio. (Pes. 71:14) Kua koutou fai koa hakotou fakatuʼutuʼu ke koutou kau ki te tokolahi ʼaē ʼe nātou toʼo te pionie vaeluaʼi temi?
2 Te ʼu Fakatuʼutuʼu ʼi Te Temi Nei: “Ko te ʼu fakatuʼutuʼu ʼa te tagata poto ko tona ikuʼaga ko he meʼa ʼe lelei,” ko te fakamanatuʼi mai ʼaia ia Tāʼaga Lea 21:5. Ko te faʼahi ʼaia ʼe ʼaoga ke koutou palalau kia Sehova ʼi te faikole, ʼo koutou tuku ki muʼa ia ia ʼi ʼakotou ʼu fakatuʼutuʼu. (Taag. 3:5, 6) ʼOsi ʼaia pea koutou fakasiosio fakalelei takotou polokalama pe ko te ʼu faʼahi fea ʼaē ʼe tonu ke fetogi ke feala ai hakotou fakaʼaogaʼi he ʼu hola e lua ʼi te ʼaho ʼi te minisitelio. Ko takotou “totogi” he temi mai ʼihi ʼakotou ʼu gāue ʼe faka fealagia ai kia koutou ke lahi te temi ʼe koutou fakaʼaogaʼi ʼi te gāue faka mafola.—Ef. 5:16.
3 Ko Te Felogoi Pea Mo Te Faifaitahi: Neʼe ʼui e te ʼapositolo ko Paulo ko ʼihi ʼe ko “he meʼa fakaloto mālohi” kia ia ʼi tana fakahoko tona minisitelio. (Kol. 4:11) Koutou palalau mo niʼihi ʼe fia pionie vaeluaʼi temi ʼi ʼApelili ʼo ʼuhiga mo takotou ʼu fakatuʼutuʼu. Ko tanatou tokoni pea mo tanatou fakakaugā ʼe feala ke femaʼuʼaki ai he ʼu fua manuʼia ʼi te faʼahi fakalaumālie. Ko te tagata taupau ki te gāue ʼe feala ke ina tokoniʼi koutou mokā ʼe ʼi ai hakotou ʼu fehuʼi ʼo ʼuhiga mo te ʼu fakatuʼutuʼu ʼo te gāue peʼe ko te telituale.
4 Ko te faifaitahi pea mo te lagolago ʼa te famili ʼe feala ke tokoni ki niʼihi ke nātou pionie vaeluaʼi temi. Ko te ʼu gāue ʼi te loto fale ʼe feala pe ke toe vaevae. Ko te polokalama ʼo ʼuhiga mo te ʼu gāue ʼaia e lagi feala foki ke toe fakatonutonuʼi. Ko he fai palalau faka famili ʼo ʼuhiga mo te ʼu meʼa ʼaē ʼe ʼaoga ʼe feala ia ke ʼaoga ki te fakahoko ʼo takotou fakatuʼutuʼu. Ko te felogoi lelei pea mo te faifaitahi ko te kalavi ʼaia ʼo te fua manuʼia.
5 Tou Taupau Maʼu He Manatu ʼe Totonu: Ke ʼaua naʼa tou manatu fakavilivili ʼe mole feala hatatou pionie vaeluaʼi temi koteʼuhi ʼe mole lelei totatou ʼaluʼaga. Ko te kau tūpulaga ʼaē kei ako, te hahaʼi letelete, te ʼu faʼe mo te ʼu fānau, mo te ʼu pule famili ʼaē ʼe gāue ʼi te ʼaho katoa, ko nātou fuli ʼaia neʼe feala tanatou fai he sakilifisio—pea ʼaki te fiafia—neʼe nātou pionie vaeluaʼi temi ʼi ʼApelili. ʼE nātou loto tahi mo te tagata fai pesalemo ʼi tana ʼui ʼaē “ ʼi te hahaʼi totonu ʼe ʼaoga te fakavikiviki,” pea neʼe mole nātou faigataʼaʼia foki tanatou faiga mālohi moʼo fai ʼo te ʼu hola e 60 ʼi te minisitelio. (Pes. 33:1) Kapau ʼe mole feala hakotou pionie, he koʼe ʼe mole koutou kau ki te fakafiafia ʼaia ʼo koutou fakatuputupu takotou gāue ko he kauga faka mafola ʼo te kokelekasio?
6 Ki te tokolahi, ko te pionie vaeluaʼi temi ʼaē ʼi ʼApelili ʼe ko he faigamālie ʼaia ki te pionie katoa. ʼI te kua tuputupu ʼo tanatou gāue, neʼe nātou fakatokagaʼi neʼe faigafua age leva hanatou liliu ko he ʼu pionie katoa.
7 ʼIo, ʼe tou fia fai ia meʼa fuli moʼo fakavikiviki ʼo totatou ʼAtua, ko Sehova. Ko te toʼo ʼo te pionie vaeluaʼi temi ʼi ʼApelili ʼe ko he faʼahi lelei ʼaia moʼo fakahā ʼo tatatou fakafetaʼi ki tana ʼu gāue lahi ʼo ina fakahā mai ai tona ʼofa heʼe tau kia tatou.