ʼE Uga Tatou e Te ʼOfa Ke Tou Fai Faka Mafola
1 ʼI totatou ʼuhiga kau Fakamoʼoni ʼa Sehova, ʼe ʼiloʼi lelei tatou ʼi tatatou faiva ʼi te faka mafola ʼo te logo ʼo te Puleʼaga. (Mat. 24:14) Ko hahaʼi ʼe toko ono miliona tupu ʼe nātou fai faka mafola ʼi te malamanei katoa; ʼe hilifaki kiai te hahaʼi foʼou mokā nātou fakatahi mo tatou ʼi te fai faka mafola. ʼE fai te tānaki ʼo fakatafito ki te lahi ʼo te hahaʼi ʼaē ʼe kau ki te gāue ʼaia.
2 Koteā ʼaē ʼe ina uga tatou ke tou lotolelei ʼo fakahoko te fakatotonu faigataʼa ʼaia? ʼE mole fakakinauʼi tatou, peʼe tou fai ʼuhi ko hatatou fia maʼu koloā, peʼe tou fai moʼo faka maʼuhigaʼi ʼo tatou. ʼI te kamata, tokolahi ia tatou neʼe tou umiuminoa he neʼe tou manatu ʼe mole tou popoto, pea neʼe mole tali lelei tuʼumaʼu tatou e te hahaʼi. (Mat. 24:9) Tokolahi ia nātou ʼaē ʼe sio kia tatou ʼe mole nātou lava mahino ki te meʼa ʼaē ʼe ina uga tatou. ʼE ʼi ai te tupuʼaga mālohi ʼo tatatou kātaki ʼaia.
3 Te Mālohi ʼo Te ʼOfa: Neʼe fakahā e Sesu te fakatotonu ʼaē ʼe lahi tokotahi, ʼi tana ʼui ʼaē ʼe tonu ke ‘tou ʼofa kia Sehova ʼaki totatou loto katoa pea mo totatou nefesi katoa pea mo totatou laumālie katoa pea mo totatou mālohi katoa.’ (Mko. 12:30) ʼE tupu totatou ʼofa kia Sehova ʼuhi ko totatou loto fakafetaʼi kia te ia pea mo tona tuʼulaga—tona ʼuhiga Tuʼi ʼAliki, Tupuʼaga ʼo meʼa fuli, ia Ia ʼaē ʼe ‘tāu ke ina tali te kolōlia, mo te fakaʼapaʼapa, pea mo te mālohi.’ (Apk. 4:11) ʼE mole he fakatatau ʼo tona ʼu kalitate fakatalakitupua.—Ek. 34:6, 7.
4 Ko tatatou ʼiloʼi ia Sehova pea mo tatatou ʼofa kia te ia, ʼe ina uga tatou ke tou fakagigila totatou mālama ia muʼa ʼo te tagata. (Mat. 5:16) ʼE gigila totatou mālama mokā tou fakavikiviki kia te ia ʼi muʼa ʼo te hahaʼi, mo tou palalau ʼo ʼuhiga mo tana ʼu gāue fakaofoofo, pea mo faka mafola te logo ʼo ʼuhiga mo tona Puleʼaga. Ohage ko te ʼaselo ʼi te lotomalie ʼo te lagi, ʼe tou maʼu te “evaselio heegata ke fagonogono kia natou e nofo i te kelekele, ki te u puleaga, mo te u hako, mo te u lea pea mo te hahai fuape.” (Apk. 14:6) Ko totatou ʼofa ʼe ko te mālohi ʼaē ʼe ina uga tatou ke tou fai faka mafola ʼi te malamanei katoa.
5 Maʼa te mālama, ko tatatou fai faka mafola “e ko [he aga] vale,” ʼe mole tonu ke tokagaʼi. (1 Ko. 1:18) Neʼe faiga lahi ke molehi tatatou gāue. Ko totatou ʼofa agatonu neʼe ina fakaloto mālohiʼi tatou ke tou lototoʼa ʼo tali ohage ko te kau ʼapositolo: “E mole mo feala [tamatou] fakalologo, kae ke [mātou] tala te u mea nee [mātou] mamata mo logo ki ai. . . . E maua ke fakalogo ki te Atua i te fakalogo ki te tagata.” (Gaue 4:20; 5:29) ʼE hoko atu te gāue fai faka mafola ʼi te ʼu koga meʼa fuli pe ʼo te kele logola te fakafeagai.
6 Ko totatou ʼofa kia Sehova ʼe hage ko he afi ʼe kakaha, ʼe ina uga tatou ke tou faka mafola tona ʼu kalitate. (Sel. 20:9; 1 Pet. 2:9) ʼE hoko atu anai tatatou “fakaʼilo ki te hahaʼi tana ʼu faʼahiga aga . . . he neʼe ina fai te ʼu meʼa fakaofoofo!”—Isa. 12:4, 5.