Ko Te Fai Faka Mafola—Ko He Pilivilesio Ke Tou Faka Maʼuhigaʼi
1 Ko te faka mafola ʼo te logo lelei ʼe ko he pilivilesio ke tou faka maʼuhigaʼi neʼe tuku mai e Sehova kia tatou. (Lom. 15:16; 1 Tim. 1:12) ʼE feiā koa la takotou fakatokagaʼi te gāue ʼaia? Tatau aipe peʼe fakalaka te temi peʼe fakalainoaʼi tatou e ʼihi, ʼe mole tonu ke tou faka fealagia ki te ʼu meʼa ʼaia ke nātou fakavaivai te maʼuhiga ʼo tatatou fai faka mafola. Ko te fua ʼo te huafa ʼo te ʼAtua ʼe ko he meʼa maʼuhiga ʼe foaki pe ia ki te tokosiʼi. Koteā te meʼa ʼe feala ke tou fai ke tuputupu tatatou leleiʼia te pilivilesio ʼaia?
2 Ko te faka mafola ʼo te logo ʼo te Puleʼaga ʼe mole ina ʼaumai anai te fiafia ʼa te malamanei. Tokolahi ʼe nātou tokagaʼi tatatou gāue ʼaki te ʼita peʼe ko te fakafeagai. Ko ʼihi ʼe nātou fakalainoaʼi tatou pea mo fakafeagai ki te gāue faka mafola. Ko te taʼi fakafeagai ʼaia ʼe feala ke haʼu mai ʼotatou ʼu kaugā gāue, ʼotatou vāhaʼa fale, peʼe ko niʼihi ʼi totatou famili. ʼE hage kia nātou, ʼe tou faihala pea ʼe tou vavale. (Soane 15:19; 1 Ko. 1:18, 21; 2 Tim. 3:12) Ko ʼanatou ʼu palalau fakaloto vaivai ʼe fakatuʼutuʼu moʼo fakasiʼisiʼi ʼo tatatou gāue mālohi, pea mo fakatupu ʼaki ai hatatou gāue māmālie peʼe tou lītuʼa ki totatou pilivilesio ʼaē ʼe ʼaoga ke tou faka maʼuhigaʼi. Ko te ʼu manatu ʼaē ʼe mole lelei ʼe haʼu ia mai ia Satana, ʼaē ʼe ina “fakakiviʼi te ʼatamai ʼo te hahaʼi ʼe mole tui, talia naʼa fakamālamaʼi nātou e te mālama gigila ʼo te logo lelei faka kolōlia.” (2 Ko. 4:4) ʼE feafeaʼi anai takotou aga ʼo ʼuhiga mo te faʼahi ʼaia?
3 ʼE maʼuhiga ke tou manatuʼi tuʼumaʼu ko tatatou fai faka mafola ʼo ʼuhiga mo te Puleʼaga ʼe ko te gāue maʼuhiga ʼaupito ʼaia ʼe lava fai pe e he tahi ia tatou ia ʼaho nei. ʼE mole he tahi age faʼahi ʼe feala ke tou fakahā ai te logo fakatupu hāofaki ʼaia. (Lom. 10:13-15) Ko te maʼu ʼo te ʼofa ʼo te ʼAtua, ka mole ko te ʼofa ʼo te tagata, ʼe ko he meʼa maʼuhiga ia. Ko te ʼu manatu ʼo te malamanei ʼaē ʼe mole lelei ʼo ʼuhiga mo tatatou gāue faka mafola ʼe mole tāʼofi ai tatou ke tou lototoʼa ʼi te fakahā ʼo te logo lelei.—Gāue 4:29.
4 Neʼe faka maʼuhigaʼi e Sesu tona pilivilesio ʼaē ko te fai ʼo te finegalo ʼo tana Tāmai. (Soane 4:34) Neʼe ina foaki tona temi katoa ʼi te minisitelio pea neʼe mole ina faka fealagia ki te ʼu fakafiafia peʼe ko tona ʼu fili ke nātou fakaloto vaivai tana gāue. Ko te faka mafola ʼo te logo ʼo te Puleʼaga neʼe ina fakamuʼamuʼa tuʼumaʼu ʼi tona maʼuli. (Luka 4:43) ʼE fakamaʼuaʼi tatou ke tou mulimuli ki tana faʼifaʼitaki. (1 Pe. 2:21) ʼI tatatou fai te faʼahi ʼaia, ʼe tou gāue ʼi totatou ʼuhiga “ko te kau kaugā gāue ʼa te ʼAtua.” (1 Ko. 3:9) ʼE tou fakaʼaoga katoa koa te pilivilesio ʼaia? ʼE tou maʼu koa he ʼu faigamālie ke tou vaevae ai te logo lelei mo niʼihi ʼi te fai faka mafola ʼi te ʼu ʼapi pea mo te fagonogono ʼi te ʼu koga meʼa fuli? Mai tona ʼaluʼaga ʼaē ko tatou, ko te kau Fakamoʼoni ʼa Sehova, ʼe tonu ke tou teuteu tuʼumaʼu ke tou “fai te fakahā ia muʼa ʼo te hahaʼi ki tona huafa.”—Hep. 13:15.
5 Ko tatatou kau ki te minisitelio ʼe fakahā ʼi tatatou aga. ʼE loloto koa tatatou fakafetaʼi ki te ʼu meʼa fuli ʼaē ʼe foaki mai e Sehova? Kua tou fakatuputupu koa ʼi totatou loto te ʼofa kia Sehova ʼo feala ke ina uga tatou ke tou fai ia meʼa fuli ʼe feala ke tou fai ʼi tana gāue? Ko te metitasio ki te ʼu tapuakina ʼaē ʼe tou maʼu ʼi te temi ʼaenī ʼo feiā aipe ki te ʼu meʼa ʼe fakapapau mai e Sehova ki te temi ka haʼu ʼe tokoni anai kia tatou ke lahi totatou ʼofa ki totatou Tupuʼaga. Ko te taʼi ʼofa ʼaia ʼe ina uga tatou ke tou gāue—ke tou faʼa kātaki pea ke tou kau tuʼumaʼu ki te faka mafola ʼo te Puleʼaga, ʼo tou fakaʼaogaʼi te ʼu fealagia ʼe tou maʼu ʼi te temi ʼaenī. Ko tatatou gāue mālohi ʼe ina fakamoʼoni anai totatou ʼofa kia Sehova pea mo ʼotatou kāiga.—Maleko 12:30, 31.
6 ʼE tou fakahā peʼe feafeaʼi hatatou hikihiki he meʼa maʼuhiga ʼaki te meʼa ʼaē ʼe tou fai pea mo te meʼa ʼe tou fakahā ʼi ʼatatou ʼu palalau. ʼE tou mahino moʼoni koa ki te maʼuhiga ʼo totatou pilivilesio ʼaē ko te faka mafola ʼo te Puleʼaga? ʼE tou faka kolōlia koa totatou minisitelio? Kua tou fakatuʼutuʼu koa ke tou faʼa kātaki ʼi te gāue maʼuhiga ʼaia māʼiape la te fakafeagai? Kapau ʼe tou faka maʼuhigaʼi te pilivilesio taulekaleka ʼaia, ʼe tou ʼiloʼi papau anai ʼe tou faiva pea ʼe tou fai ʼaki totatou loto katoa.—2 Ko. 4:1, 7.