Taupau Ia Tau Faʼafai ʼi Te Minisitelio

KO TE gaue maʼuhiga ʼae ʼe lolotoga fakahoko nei ʼi te kele, ʼe ko te fakamafola ʼo te logo lelei. Pea ʼe ko he toe pilivilesio ia tatatou fakafofoga ia Sehova ʼi te gaue ʼaia ʼae ko te fai ʼo ni tisipulo. Kaʼe ʼi ʼihi temi, ʼe faigataʼa ki te kau pionie pea mo te kau faifakamafola hanatou taupau ia tanatou faʼafai ʼi te minisitelio. Kotea tona tupuʼaga?

ʼE ui e ʼihi kau faifakamafola ʼe mole lahi ʼanatou faipalalau moka natou faifakamafola ʼi te ʼu ʼapi, koteʼuhi tokolahi ʼe mole natou ʼi fale. Pea moka maʼu atu natou ʼi fale, ʼe lagi mole natou tali leleiʼi ia te logo ʼo te Puleʼaga peʼe lagi natou iita mai kia tatou. Ko ʼihi kau faifakamafola ʼe lahi ia tanatou telituale pea ʼe tali leleiʼi ai ia te logo. ʼE natou tuʼania naʼa mole feala hanatou faifakamafola ki te hahaʼi fuli ʼo te telituale ʼaia. Kaʼe ko ʼihi ʼae neʼe natou faifakamafola talu mai fualoa, kua natou lotovaivai koteʼuhi ʼe heʼeki hoko mai ia te fakaʼosi.

ʼE tou tau anai mo he ʼu fihifihia ʼe feala ke malave ki tatatou faʼafai ʼi tatatou minisitelio. Pea ʼe tou maʼuʼuli ʼi he malama ʼe puleʼi nei e te agakovi, ia Satana te Tevolo. Koia ʼae ʼe mole tou punamaʼuli anai moka ʼe faigataʼa kia tatou ia te fakamafola ʼo te logo lelei.—1 Soane 5:19.

Tatau aipe pe kotea ia te ʼu fihifihia ʼae ʼe ke tau mo ia ʼi tau minisitelio, kaʼe ʼe feala ke ke tui papau ʼe tokoni atu anai ia Sehova ke ke tauʼi ia te ʼu fihifihia ʼaia. Kaʼe kotea ʼae ʼe ke lava fai ke toe lahi age ia tau faʼafai ʼi te minisitelio? Tou vakaʼi ia he ʼu tokoni ki te faʼahi ʼaia.

TOKONI KI TE KAU FAIFAKAMAFOLA FOʼOU

ʼI te taʼu fuli, ko te ʼu toko lauʼi afe ʼe natou papitema ʼo natou liliu ai ko he kau Fakamoʼoni ʼa Sehova. Kapau neʼe hoki ke papitema age pe, ʼe lahi te ʼu faʼahi ʼe feala ke ke ako mai ia natou ʼae kua fualoa ia tanatou faifakamafola. Kaʼe kapau kua fualoa ia tau faifakamafola, ʼe feala koa ke ke akoako ia natou ʼae ʼe kei foʼofoʼou ʼi te faifakamafola? Ka ke fai ia te faʼahi ʼaia, ʼe feala ke ke fiafia moʼoni ai.

Neʼe iloʼi e Sesu neʼe ʼaoga ki ʼana kau tisipulo ia he takitaki ke natou liliu ko he kau faiako faiva. Pea neʼe ina fakaha age kia natou pe ʼe feafeaʼi ia te fakahoko ʼo te gaue faifakamafola. (Luka 8:1) Ia ʼaho nei, ʼe toe ʼaoga ia te faʼahiga akoako ʼaia kia natou ʼae ʼe kei foʼofoʼou ke natou liliu ai ko he kau faifakamafola ʼe faiva.

ʼAua tatatou manatu ʼae ʼe faiva anai ia he kaugā fagona foʼou ʼi te faiako ʼaki pe ia tana kau ki te faifakamafola. ʼE ʼaoga ke akoako ia ia e he tahi ʼaki te agalelei pea mo te ʼofa. ʼE akoʼi anai e te kaugā faifakamafola ʼae kua faiva kia ia pe ʼe feafeaʼi (1) hana teuteuʼi mo akoako he ʼu ʼuluaki palalau, (2) tana faʼahiga faipalalau mo te hahaʼi, (3) tana tufa ia te ʼu tohi, (4) tana fai te ʼu ʼaʼahi, pea (5) hana kamata ia he ako Tohi-Tapu. ʼE feala ke liliu ia ia ʼae ʼe kei foʼofoʼou ʼo faiva mo kapau ʼe ina sioʼi pea mo faʼifaʼitakiʼi ia te faʼahiga faiako ʼa te kaugā faifakamafola faiva. (Luka 6:40) Pea ʼi te iloʼi ʼae e te kaugā fagona foʼou ʼe tokoni anai ia he tahi kia ia, ʼe ina maʼu anai ia te loto falala. ʼE feala ke toe tokoni ki he tahi ʼe kei foʼofoʼou ʼi te faifakamafola ia tatatou ʼu fakamalo pea mo te ʼahiʼahi fai ʼae ʼe tou fakaha age ki ai.—Ekelesiasi 4:9, 10.

FAIPALALAU MO IA ʼAE ʼE KOLUA FAIFAKAMAFOLA

Logo la ia tau ʼu faiga ʼae ke ke faipalalau mo he tahi ʼi tau faifakamafola, kaʼe ʼi ʼihi ʼaho ʼe ko tou kaugā faifakamafola ʼae ka ke faipalalau lelei anai mo ia. Manatuʼi neʼe fekauʼi e Sesu ʼana kau tisipulo ke natou olo “taki toko lua” ʼo faifakamafola. (Luka 10:1) Neʼe feala ke natou fefakalotomalohiʼaki pea mo feugaʼaki, ʼaki tanatou gaue fakatahi. Moka tou gaue fakatahi mo ʼotatou tehina mo tuagaʼane ʼi te minisitelio, ʼe tou maʼu ai he faigamalie ke tou ‘fefakalotomalohiʼaki.’—Loma 1:12.

Kotea la he ʼu faʼahi ʼe feala ke kolua faipalalau ki ai? Neʼe kolua felaveʼi koa mo he aluʼaga fakalotomalohi ʼe heʼeki faʼa fualoa ki ai ʼi te minisitelio? Neʼe ʼi ai koa he puani ʼaoga neʼe ke maʼu ʼi tau ako takitokotahi peʼe fakafamili? Neʼe fakalotomalohiʼi koa koulua e he manatu neʼe kolua logo ki ai ʼi te ʼu fono? ʼE feala ʼi ʼihi temi, ke ke faifakamafola mo he kaugā fagona ʼe mole ke iloʼi lelei. Lagi ʼe feala ke ke fehuʼi age ki ai pe neʼe ina maʼu feafeaʼi ia te moʼoni. Kotea te faʼahi ʼae neʼe tui papau ai ia ia ʼe kau ki te kautahi ʼa Sehova? Kotea ʼona pilivilesio peʼe ko te ʼu aluʼaga ʼae neʼe hoko ki ai? ʼE lagi feala ke ke toe vaevae mo ia te ʼu aluʼaga ʼae neʼe hoko ʼi tau tauhi ʼae kia Sehova. Tatau aipe pe kotea te faʼahiga manatu ʼa te hahaʼi ʼo te telituale, kaʼe moka ke faifakamafola mo he tahi, ʼe ko he faigamalie lelei ʼaia ke kolua haga “fefaufauaki.”—1 Tesalonika 5:11.

HIKIHIKI TE LELEI ʼO TAU AKO TAKITOKOTAHI

Ke tou taupau ia tatatou faʼafai ʼi te minisitelio, ʼe ʼaoga ke tou hikihiki te lelei ʼo tatatou ako takitokotahi. Ko “te tagata faifekau agatonu mo poto” ʼe ina ta ia manatu kehekehe ʼe feala ke tou ako. (Mateo 24:45) Tou vakaʼi te manatu lelei ʼaeni ki tatatou ako takitokotahi: He koʼe ʼe maʼuhiga ʼaupito ia te gaue faifakamafola? ʼE tou maʼu ʼihi tupuʼaga ʼi te fakamatala ʼae ʼi te ʼa takai “He Koʼe ʼe Tonu Ke Ke Taupau Ia Tau Faʼafai ʼi Te Minisitelio?”

ʼAki tau vakavakaʼi ia te ʼu puani ʼae ʼi te fakamatala ʼae ʼi te ʼa takai, ʼe feala ke uga ai koe ke ke haga faʼafai ʼi te faifakamafola. Ohage ko he fakatuʼutuʼu ki he ako, faigaʼi ke ke fai he lisi ʼo he tahi ʼu tupuʼaga Fakatohi-tapu ʼae ke ke faʼafai ai ʼi te faifakamafola. ʼOsi ʼaia, metitasio ki te ʼu tupuʼaga ʼaia. Pea moka ʼe ke fai ia te faʼahi ʼaia, ʼe malohi age ai anai ia tau faʼafai ʼi te minisitelio.

KE KE LOTOLELEI ʼO ʼAHIʼAHI HE ʼU FAʼAHIGA FAI FOʼOU

ʼE foaki tuʼumaʼu mai e te kautahi ʼa Sehova ia he ʼu tokoni ke tou hikihiki ai ia tatatou minisitelio. Ohage la, ʼo hilifaki ki tatatou faifakamafola ʼi te ʼu ʼapi, ʼe feala ke tou ʼahiʼahi ia te faitohi, te telefoni, te faifakamafola ʼi te ala peʼe ko te ʼu koga meʼa ʼae ʼe maʼu ai te hahaʼi, te fagonogono faigamalie peʼe ʼi te ʼu fale gaue. ʼE lagi feala ke tou fakatuʼutuʼu ke tou toe faifakamafola ʼi te ʼu koga meʼa ʼae ʼe tokosiʼi ai peʼe mole ʼi ai he Fakamoʼoni.

ʼE ke lotolelei koa ke ke ʼahiʼahi he ʼu faʼahiga fai foʼou? Neʼe fua lelei ki te tokolahi ia tanatou ʼahiʼahi te ʼu faʼahiga fai ʼaia. Tou vakaʼi faʼifaʼitaki ʼe tolu.

Neʼe fakatotonu e te tuagaʼane ko April ke ina ʼahiʼahi he faʼahiga fai ʼe tuʼu ʼi te alatike ʼo ʼuhiga mo te kamata ʼo ni ako Tohi-Tapu ʼi Te Misitelio ʼo Te Puleʼaga. Neʼe ina fakalavelave ki ʼona kaugā gaue ʼe toko tolu pe ʼe natou loto ke ina fai hanatou ako Tohi-Tapu. Neʼe punamaʼuli mo fiafia ia April ʼi tanatou lotolelei fuli ʼae ke fai hanatou ako pea mo natou kau ki te ʼu fono.

Neʼe toe fakalotomalohiʼi tatou ke tou kumi ia te hahaʼi ʼae ʼe lagi natou leleiʼia ia he ʼu alatike ʼaoga ʼi ʼatatou nusipepa. Ohage la, neʼe fakatotonu e he tehina taupau ʼo te siliko ʼi Amelika, ke ina tufa ia te Réveillez-vous ! ʼae ʼe maʼu ai ia te alatike ʼo ʼuhiga mo te ʼu kiliʼi teka ki te ʼu pule ʼo te ʼu fale teka fuli ʼo he koga fenua. Ko ia mo tona ʼohoana, neʼe nā toe tufa ki te ʼu fale toketa ʼe 100 tupu ia te Réveillez-vous ! ʼae ko tona kupu tafitō “Mieux comprendre son médecin” (Kotou Mahino Ki Takotou Toketa). Pea ʼe ui e te tehina taupau ko tanā faʼahiga fai ʼaia, neʼe tokoni ki te hahaʼi ke natou fakamamahani mo tatatou gaue faifakamafola pea mo ʼatatou tohi. Hili tanā feiloʼiʼaki lelei mo te hahaʼi ʼo te telituale, neʼe lahi ai ʼanā ʼaʼahi.

Neʼe faitohi te tuagaʼane ko Judy ki ʼotatou pilo lalahi, koteʼuhi neʼe lotofakafetaʼi ʼo ʼuhiga mo te fakalotomalohi ʼae ʼo te faifakamafola ʼi te telefoni. Neʼe ina ui, ko tana faʼe ʼae ʼe taʼu 86 pea mo mahamahaki, neʼe faifakamafola tuʼumaʼu ki te hahaʼi ʼi te telefoni. Koia, neʼe ina kamata ai te ako Tohi-Tapu ʼa te finematuʼa ʼe taʼu 92.

Ko te ʼu tokoni ʼae ʼe tou maʼu ʼi ʼatatou tohi ʼe fua lelei moʼoni. Faigaʼi ke ke ʼahiʼahi fai ia te ʼu tokoni ʼaia. ʼE feala ke tokoni atu ke ke taupau ia tau fiafia pea mo tau faʼafai ʼi te minisitelio.

FAI HAU ʼU FAKATUʼUTUʼU ʼE FAKAPOTOPOTO

Kotea ʼae ʼe fua lelei ai ia tatatou gaue faifakamafola? ʼE mole ko te lahi ʼo te ʼu tohi ʼae ʼe tou tufa, peʼe ko te lahi ʼo ʼatatou ako Tohi-Tapu, peʼe ko te tokolahi ʼo natou ʼae neʼe tou tokoni ki ai ke natou liliu ko he kau Fakamoʼoni ʼa Sehova. Tou manatuʼi ia Noe. ʼI tuʼa atu ʼo tona famili, neʼe ko te tokofia ʼae neʼe tokoni ki ai ia Noe ke natou liliu ko he ʼu kaugana ʼa Sehova? Logo la te faʼahi ʼaia, kaʼe ʼe mahino ia neʼe ko he tagata faifakamafola faiva. Ko te faʼahi ʼae ʼe maʼuhiga tafitō, ʼe ko tatatou tauhi agatonu kia Sehova.—1 Kolinito 4:2.

Tokolahi te kau faifakamafola ʼe natou mahino ʼe ʼaoga ke natou fai he ʼu fakatuʼutuʼu ʼe fakapotopoto ke lahi ai ia tanatou fiafia ʼi te gaue faifakamafola. Kotea ʼihi ʼo te ʼu fakatuʼutuʼu ʼaia? ʼE tou maʼu he ʼu manatu ʼo ʼuhiga mo te faʼahi ʼaia ʼi te fakamatala ʼae ʼi te ʼa takai, “Fai Hau ʼu Fakatuʼutuʼu ʼe Fakapotopoto.”

Kole kia Sehova ke tokoni atu ke fua lelei pea ke ʼaoga ia tau minisitelio. Pea moka ʼe ke kakusia ia tau ʼu fakatuʼutuʼu, ʼe ke fiafia anai koteʼuhi ʼe ke iloʼi neʼe ke faiga malohi moʼo fakamafola ia te logo lelei.

ʼE moʼoni, ʼe feala ke faigataʼa ia te fakamafola ʼo te logo lelei. Kaʼe ʼe ʼi ai te ʼu faʼahi ʼe ke lava fai ke ke faʼafai ai ʼi te minisitelio. Ko tau ʼu faipalalau fakalotomalohi mo ia ʼae ʼe ke faifakamafola mo ia, tau fai tuʼumaʼu ia tau ako takitokotahi, tau ʼahiʼahi ia te ʼu faʼahiga fai ʼae ʼe foaki mai e te tagata faifekau agatonu mo poto pea mo tau fai hau ʼu fakatuʼutuʼu ʼe fakapotopoto. Pea ko te faʼahi ʼae ʼe maʼuhiga tafitō, ke ke manatuʼi ko Sehova ʼAtua ʼae ʼe ina foaki atu ia te pilivilesio ke ke fakamafola ia te logo lelei, koteʼuhi ko koe ko tana Fakamoʼoni. (Esaia 43:10) ʼEi, ʼe ke maʼu anai ia he toe fiafia moka ʼe ke haga taupau ia tau faʼafai ʼi te minisitelio.