ʼE Feafeaʼi Te Akoako ʼa Te ʼu Kaugā Fagona Foʼou Ki Te Fai Fakamafola?
1. Neʼe koutou feafeaʼi ʼi takotou foʼofoʼou kau ʼaē ki te fai fakamafola?
1 ʼE kei kotou manatuʼi koa takotou foʼofoʼou kau ʼaē ki te fai fakamafola ʼi te ʼu ʼapi? ʼE mahino ia, neʼe kotou mātataku ʼaupitō. Kapau neʼe kotou gāue mo ia ʼaē neʼe ina fai takotou ako Tohi-Tapu, peʼe ko he tahi age kaugā fai fakamafola, ʼe mahino ia neʼe kotou fiafia ʼi tana tokoni atu. ʼI te temi nei, ʼi takotou kua kau tuʼumaʼu ki te fai fakamafola, kua feala ke kotou akoako te ʼu kaugā fagona foʼou ki te fai fakamafola.
2. Koteā ʼaē ʼe tonu ke ʼiloʼi e te ʼu kaugā fagona foʼou?
2 ʼE tonu ke ʼiloʼi e te ʼu kaugā fagona foʼou peʼe feafeaʼi te kamata ʼo he ʼu fai palalau mo te hahaʼi, te fakaʼaogaʼi ʼo te Tohi-Tapu ʼi te ʼu muʼa matapā, te fai ʼo he ʼu ʼaʼahi, pea mo te kamata ʼo he ʼu ako Tohi-Tapu, pea mo tona faʼahiga fai. ʼE tonu ke natou toe ako peʼe feafeaʼi hanatou kau ki te ʼu faʼahi kehekehe ʼo te fai fakamafola, ohagē ko te fagonogono ʼi te ala pea mo te fai fakamafola ʼi te ʼu fale gāue. ʼAki takotou faʼifaʼitaki pea mo takotou ʼu tokoni, ʼe kotou lava tokoni ai kiā nātou ke natou hikihiki ʼi te ʼu faʼahi ʼaia.
3. ʼE tou lava tokoni feafeaʼi ki ʼihi atu ʼaki tatatou faʼifaʼitaki?
3 Akoʼi Nātou ʼAki Te Faʼifaʼitaki: Neʼe fakahā e Sesu ki tana ʼu tisipulo peʼe feafeaʼi te fai fakamafola. (Luka 8:1; 1 Pet. 2:21) Kā kotou fakatuʼutuʼu ke kotou fai fakamafola mo he kaugā fagona foʼou, kotou teuteuʼi ia he ʼu ʼuluaki palalau ʼe faigafua, ʼe feala anai ke faʼifaʼitakiʼi e te kaugā fagona, lagi kotou fakaʼaogaʼi te ʼu ʼuluaki palalau faigafua ʼaē ʼe tuʼu ʼi tatatou ʼu tohi. Pea kotou ʼui age ʼe kotou fai anai ia te ʼuluaki matapā pea lagi mo te lua matapā, kae ʼe feala ke fakalogo ki takotou ʼu palalau. ʼI takotou ʼosi fai he matapā, ʼe feala ke kotou kole ki te kaugā fagona peʼe koteā tana manatu ki te fua lelei ʼaē ʼo takotou ʼu ʼuluaki palalau. ʼE kotou tokoni anai ki ai ke sio ki te maʼuhiga ʼaē ke tou gāue fakatahi ʼi te minisitelio, pea mo fakafaigafua kiā ia ke ina tali ia te ʼu manatu fuli ʼaē ʼe kotou fakahā age ʼi tana ʼosi fai tana palalau.
4. ʼE tou lava tokoni feafeaʼi ki he kaugā fagona foʼou ʼi tatatou ʼosi fakalogo ki tana ʼu ʼuluaki palalau?
4 Foaki Age He ʼu Tokoni: Neʼe toe foaki e Sesu he ʼu fakatotonu ki tana ʼu tisipulo peʼe feafeaʼi te fai ʼo te fai fakamafola. (Mat. 10:5-14) ʼE feala ke kotou toe tokoni fēia ki he kaugā fagona foʼou. Kā palalau ʼi he matapā, kotou fakalogo lelei. Pea ʼi takolua ʼosi mavae mai te ʼapi, fakamālo age ki tana ʼu faiga, tatau aipē pe neʼe kotou tokagaʼi he ʼu faʼahi ʼi tana ʼu ʼuluaki palalau ʼe kei tōtō ai. ʼI muʼa ʼo hakotou fai age he tokoni, ʼe lagi kotou loto muʼa ke kotou toe fakalogo peʼe lelei age tana ʼu ʼuluaki palalau ʼi he tahi matapā. Lagi neʼe mataku fau pē. Kotou toe manatuʼi foki, ko te ʼu kaugā fagona ʼe mole natou maʼu fuli te ʼu fealagia tatau, pea ʼi te agamāhani ʼe lahi te ʼu faʼahiga fai lelei ʼo he gāue.—1 Ko. 12:4-7.
5. Koteā ʼaē ʼe feala ke tou ʼui mokā tou fia foaki he ʼu tokoni?
5 ʼI ʼihi temi, ʼe kole tokoni atu anai he kaugā fagona foʼou. Kae kapau ʼe mole kumi tokoni atu, pea kotou foaki age he ʼu tokoni. ʼE kotou lava fai feafeaʼi te faʼahi ʼaia ʼaki he aga fakaʼapaʼapa? Ko ʼihi kau fai fakamafola kua māhani, ʼe natou fai pē te fehuʼi ʼaenī: “ ʼE feala lā ke au fakahā atu te manatu ʼaenī?” peʼe natou ʼui fēnei age: “Koteā lā tau manatu?” Peʼe feala ke kotou ʼui fēnei: “ ʼI taku kamata fai fakamafola, neʼe faigataʼa kiā au taku . . . , kae neʼe tokoni lahi mai ia te faʼahi ʼaenī . . . ” ʼI ʼihi temi, ʼe fua lelei mokā tou vakaʼi fakatahi ia te tohi Comment raisonner. ʼAua naʼa kotou tokoniʼi ki he ʼu tuʼuga meʼa, kae kotou tokoni age pē ki he faʼahi e tahi ʼo tana ʼu ʼuluaki palalau.
6. ʼO ʼuhiga mo te minisitelio, ʼe lava feafeaʼi ki ‘te ukamea ke fakamāsila ʼaki te ukamea’?
6 Ko Te Ukamea ʼe Fakamāsila ʼAki Te Ukamea: Ko Timoteo, te tagata fai fakamafola kua māhani, neʼe fakalotomālohiʼi ia ia e Paulo ke haga tokaga lelei ki tana faiakonaki pea mo tuputupu ʼi te faʼahi fakalaumālie. (1 Tim. 4:13, 15) Logolā kua lagi fakalaka ni ʼu taʼu talu mai takotou kau ʼaē ki te minisitelio, kae ʼe tonu pē ke hoko atu takotou faiga ʼaē ke hikihiki tokotou poto fai fakamafola. Kotou ako mai te kau fai fakamafola ʼaē ʼe gāue mo koutou, māʼia mo nātou ʼaē ʼe mole heʼeki faʼa māhani ʼi te minisitelio, pea kotou tokoni ʼaki he agalelei ki ʼihi, tāfito te ʼu kaugā fagona foʼou, ke natou liliu ko he ʼu minisi popoto ʼo te logo lelei.—Taag. 27:17.