ʼI Takotou ʼUluaki Fai Palalau, Neʼe Kotou Fakahā Koa Peʼe Feafeaʼi Te Fai ʼo He Ako?

Kā tou fakaafe ia te hahaʼi ke fai hanatou ako Tohi-Tapu, ʼe ʼui e ʼihi ʼe mole natou loto kiai peʼe kua fai tanatou ako Tohi-Tapu ʼi tanatou lotu. ʼI tanatou lagi mole mahino ki te kehekehe ʼo tatatou ako ia te Tohi-Tapu pea mo ʼihi atu lotu, ʼe mole natou ʼiloʼi ai ia te ʼatamai mālama ʼaē ʼe feala ke natou maʼu pea mo te fiafia. Koia, ʼi tatatou ʼuluaki fai palalau mo te hahaʼi, ʼe mole tonu pē ke tou talanoa age ʼo ʼuhiga mo te ako Tohi-Tapu, kae ʼe lelei mokā tou fakahā age ʼi he ʼu kiʼi minuta peʼe feafeaʼi te fai ʼo te ako Tohi-Tapu. Ohagē lā, ʼi hona ʼaluʼaga fakatā, ʼe mole kotou ʼui age pē ki te hahaʼi ʼe kotou kuka lelei pea ʼe kotou toe fia liliu mai ʼaki he pā neʼe kotou kuka; kailoa, ʼi te temi pē ʼaia, kotou fakaʼahiʼahiʼi age te pā ʼaē neʼe kotou kukaʼi! Koʼenī te faʼifaʼitaki ʼe fakahā ai peʼe feafeaʼi hakotou fai ʼi he ʼu kiʼi minuta, ʼo kotou fakatafito ki he manatu ʼi te pāsina 6 ʼo Te Minisitelio ʼo Te Puleʼaga, ʼo Sānualio 2006.

“ ʼE ke manatu koa ʼe hoko anai te ʼu palalau ʼaenī? Kotou lau age ia Isaia 33:24, pea kotou tuku ke fai mai hana tali. ʼE au fia fakahā atu he manatu maʼuhiga ʼo ʼuhiga mo te faʼahi ʼaia.” Kotou foaki age kiā ia te tohi Te Ako Mai Te Tohi-Tapu, pea kotou fakahā age ia te palakalafe 22 ʼi te pāsina 36. Kotou lau ia te fehuʼi ʼo te palakalafe, pea kotou kole age ki ai ke ina kumi tona tali ʼi te palakalafe ʼaē kā kotou lau. Kotou lau ia te palakalafe. Pea kotou toe fai ia te fehuʼi, pea mo fakalogo ki tana tali. Kolua lau fakatahi te vaega e tahi ʼi te ʼu vaega Tohi-Tapu. Kotou lagaʼi ia he fehuʼi ʼe maʼu tona tali ʼi te palakalafe ʼaē ʼe hoa mai kiai, pea kotou fakatuʼutuʼu ke kotou toe liliu mai ki ai. Kua kotou kamata ʼi temi ʼaia te ako Tohi-Tapu!