Ke Lelei Age Tatatou Minisitelio: Fai He Ako Tohi-Tapu ʼAki Te Tohi Te Ako Mai Te Tohi-Tapu

He Koʼe ʼe Maʼuhiga? Tokolahi ʼe mole natou mahino pe koʼe ʼe tou kole age ke fai hanatou ako Tohi-Tapu ʼe mole totogi. ʼE lagi ʼe natou manatu ʼe tonu ke natou kau ki he kiʼi kutuga ako peʼe ke natou fefaitohiʼaki. Koia la ʼae ʼe tonu ai ke tou fakaha age pe ʼe fai feafeaʼi he ako Tohi-Tapu. ʼE feala ke tou fakaha age ki he tahi ʼi ni ʼu kiʼi minuta, ʼi te muʼa matapa ko te ako ʼo te Tohi-Tapu ʼe mole ko he meʼa ʼe faigataʼa pea ʼe ko he faʼahi ʼe ʼaoga kia ia.

Te ʼu Meʼa ʼAe ʼe Tonu Ke Ke Fai:

Hili tau fakaha age tou higoa, fakalavelave age ki ai pe ʼe tuʼania ki te ka haʼu.
Ui age ki ai ʼe maʼu e te tokolahi ia te manatu ʼaia, pea mo fakaha age te ʼu kupu tafitō ʼo te tohi Te Ako Mai Te Tohi-Tapu. Fakamahino age ki ai, ʼe maʼu ʼi te tohi ʼaia he ʼu kapite ʼe mahino gafua pea ʼe fakaha ai pe ʼe kotea ʼae ʼe akoʼi mai ʼi te Tohi-Tapu ʼo ʼuhiga mo te ka haʼu pea mo ʼihi atu faʼahi. Kole age ke ina filifili ia te kapite ʼae ʼe ina leleiʼia.
Foaki age hana tohi pea mo fakaha age te kapite ʼae neʼe ina filifili. Fakamahino age ki ai ko te ʼu fehuʼi ʼae ʼe tuʼu ʼi te kamata ʼo te kapite ʼe tali anai ki ai te ʼu palakalafe ʼae ʼe hoa mai.
Kole age ke ina lau ia te ʼuluaki palakalafe mo kapau ʼe lotolelei ki ai. ʼOsi ʼaia, fai te fehuʼi ʼo te palakalafe pea mo vakaʼi fakatahi ia te tali. Vakaʼi pea mo faipalalau ki te ʼu vaega Tohi-Tapu ʼae ʼe fakatafito ki ai te tali. Fakaha age pe neʼe ke fakailoga feafeaʼi ia te tali ʼi tau tohi.
Vakaʼi te palakalafe ʼae ʼe hoa mai, pea mo kole age ke ina tali ki te fehuʼi ʼaki ʼana palalau ʼa ia totonu.
Fakamalo age ki ai pea mo fakatuʼutuʼu ke ke toe liliu age ke hoko atu ia te ako.
Kapau ʼe feala, fakaha age te kiʼi ʼata viteo ʼE Feafeaʼi Te Fai ʼo He Ako Tohi-Tapu? ʼi tatatou tuʼasila ʼi te Neti jw.org/wls.

ʼAhiʼahi Fai Te Faʼahi ʼAeni Lolotoga Te Mahina:

Faikole kia Sehova ke ina tapuakiʼi ʼau faiga ʼae ke ke kamata hau ako Tohi-Tapu foʼou.—Filp. 2:13.
Moka ke faifakamafola, ʼahiʼahi fakaha age pe ʼe feafeaʼi ia te fai ʼo he ako Tohi-Tapu ʼaki te tohi Te Ako Mai Te Tohi-Tapu, peʼe fakaha age ia te kiʼi ʼata viteo ʼE Feafeaʼi Te Fai ʼo He Ako Tohi-Tapu?