Ke Lelei Age Tatatou Minisitelio: Tufa Te Tohi Te Ako Mai Te Tohi-Tapu

He Koʼe ʼe Maʼuhiga? ʼE tou fakaʼaogaʼi ia te tohi Te Ako Mai Te Tohi-Tapu moʼo tokoni ki te hahaʼi ke natou ako te Tohi-Tapu. Kaʼe, ʼi muʼa ʼo hatatou fai he ako, ʼe tonu muʼa ke tou tuku age ki ai te tohi. Koia ʼae ʼe tonu ai kia tatou fuli ke tou faiva ʼi te tufa ʼo te tohi Te Ako Mai Te Tohi-Tapu ʼi te faifakamafola. (Taag. 22:29) ʼE lahi te ʼu faʼahiga fai moʼo tufa ʼo te tohi ʼaia. Koia, ʼe tonu ai ke tou fakaʼaogaʼi te ʼu faʼahiga fai ʼae ʼe ʼi ai ʼona fua lelei ʼi te minisitelio. Ko te ʼu manatu ʼae ʼe hoa mai ʼe tokoni mai anai.

Te ʼu Meʼa ʼAe ʼe Tonu Ke Ke Fai:

Fai he fehuʼi ʼe tupu ai hana fia logo pea ʼe ʼaumai ai ia ia ki he kapite ʼi te tohi. ʼE feala ke ke fakaʼaogaʼi ia te ʼu fehuʼi ʼae ʼe tuʼu ʼi te kamata ʼo te ʼu kapite. Hili tana tali, lau he vaega ʼe alu tahi mo te manatu ʼae ʼe koulua palalau ki ai. Pea fakaha age ki ai te palakalafe ʼo ʼuhiga mo te faʼahi ʼaia pea mo koulua faipalalau fakanounou ki ai.
ʼE feala ke ke fakaʼaogaʼi te ʼu ʼuluaki pasina. Pea fakaha age ki ai pe ʼe ina maʼu ʼifea te ʼu tali Fakatohi-tapu ʼi te tohi. Ohage la, ʼe feala ke ke talanoa ki he aluʼaga fakamataku neʼe fakaha ʼi te televisio. ʼOsi ʼaia pea ke fakamahino age ko te tokolahi ʼe natou kumi he ʼu tali ki te ʼu fehuʼi ʼe tou maʼu ʼi te pasina 3. Peʼe ke ui age ʼe ke fia vaevae mo ia he logo lelei. Fakaha age te ʼu pāki ʼae ʼe tuʼu ʼi te ʼu pasina 4-5 pea mo fai age te fehuʼi ʼaeni: “Kotea te fakapapau ʼe ke fakaʼamu ke hoko?” Koʼeni te tahi faʼahiga fai, fakaha age ki ai ʼe ke ʼaʼahi fakavilivili te hahaʼi ke natou maʼu he ʼu tali ki te ʼu fehuʼi maʼuhiga ʼo te maʼuli. Pea ke fakaha age ki ai te ʼu fehuʼi ʼae ʼe tou maʼu ʼi te pasina 6. Kole age ki ai pe ʼe ko te fehuʼi fea la ʼae ʼe ina leleiʼia.
Mulimuli ki te faʼahi ʼaia ke feala hau kamata he ako Tohi-Tapu. ʼE feala ke ke ui fenei: “ ʼE matou tufa ia te tohi ʼaeni ki te hahaʼi. Neʼe kua ke maʼu koa hau tohi feia? [Tuku ke fai mai hana tali.] Kapau ʼe maʼu hou temi, ʼe feala ke au fakaha atu pe ʼe feafeaʼi tona fakaʼaogaʼi mo tau Tohi-Tapu.”

ʼAhiʼahi Fai Te Faʼahi ʼAeni Lolotoga Te Mahina:

Fai he ʼu faʼifaʼitaki lolotoga takotou ako fakafamili.
Ka ke alu ki te faifakamafola, fakaha ki ʼihi age kau faifakamafola te ʼu ʼuluaki palalau ʼae neʼe ke teuteuʼi. (Taag. 27:17) Fetogi ʼau ʼuluaki palalau mo kapau ʼe ke tokagaʼi ʼe mole leleiʼia e te hahaʼi.