Ke Lelei Age Tatatou Minisitelio: Akoako Ia Natou ʼAe Kei Foʼofoʼou

He Koʼe ʼe Maʼuhiga? ʼE tonu ki te kau tisipulo foʼou ʼa Sesu ke natou fakalogo ki “te u mea fuli” ʼae neʼe ina fakatotonu. Koia ʼe tonu ai ke natou akoʼi ia te moʼoni ki ʼihi. (Mat. 28:19, 20) Tokolahi te kau ako kua natou fai ʼanatou lautohi peʼe ko hanatou kiʼi faipalalau ʼi te Ako Fakateokalatike. Pea ʼe lagi kua natou palalau ki tonatou famili peʼe ko ʼonatou kaumeʼa ʼo ʼuhiga mo te moʼoni. ʼAki te temi, ʼe natou leleiʼia te ʼu moʼoni ʼae ʼe natou ako pea mo mahino ʼe loto e Sehova ke iloʼi e te hahaʼi fuli ia te logo lelei. ʼO tupu ai leva tanatou fia kau ki gaue faifakamafola. (Loma 10:13, 14) Ka kua feala ki he tahi ʼe ako ke alu ʼo faifakamafola, ʼe ʼaoga ke akoako leleiʼi ia ia ke lotomalohi pea mo tuputupu ia tana mahino ʼae ki te moʼoni.—Luka 6:40.

Te ʼu Meʼa ʼAe ʼe Tonu Ke Ke Fai:

Foaki age te ʼu tohi ʼae ki te faifakamafola pea mo te ako. Fakaha age ki ai pe kotea ʼae ʼe tonu ke ina ʼai ki tana kato faifakamafola. Fakamahino age pe kotea te ʼaoga ʼo te ʼu tohi takitahi ʼaia.
Filifili fakatahi he ʼu ʼuluaki palalau ʼe tuʼu ʼi Te Minisitelio ʼo Te Puleʼaga pea mo fai he faʼifaʼitaki. Fakalotomalohiʼi ia ia ke ina fai ʼaki ʼana kupu ʼa ia totonu. Filifili ʼi te kiʼi kaupepa Ke ʼAoga Kia Koutou Ia Te Ako Fakateokalatike ia he ʼu aluʼaga ʼe tautau hoko ʼi tokotou telituale. Fakamahino age ia te maʼuhiga ʼae ke teu fakaʼapaʼapa.—2 Ko. 6:3, 4.
Haga tokoni kia ia. Fakaha age ki ai ia te mape ʼo te telituale pea mo fakaha age ki ai pe kotea te ʼu nota ʼe tonu ke ina tohi ʼi tana faifakamafola ʼi te ʼu ʼapi. Fakaha age ki ai pe kotea ʼae ʼe tonu ke tou tohi ʼo ʼuhiga mo he tahi ʼe tonu ke tou toe ʼaʼahi. Akoʼi age ki ai te fakaʼaogaʼi ʼo tatatou tuʼasila ʼi te Neti jw.org ʼi te faifakamafola, ohage la ko te kiʼi kaupepa Une bonne nouvelle pour des gens de toutes nations. Fakalotomalohiʼi ia ia ke ina ʼaʼahi ia natou ʼae neʼe fia faipalalau mo ia.—1 Ko. 3:6.
Ke ke faʼa kataki pea mo fakalotomalohiʼi ia ia. (Taag. 25:11) Ke ke tuku he faʼifaʼitaki ʼe lelei. Kapau ʼe ke faʼafai pea mo tokoni lelei ki ai, ʼe fua lelei anai ki ai tau tokoni ʼo fualoa.

ʼAhiʼahi Fai Te Faʼahi ʼAeni Lolotoga Te Mahina:

Kapau ʼe kotou ako mo he tahi kua liliu ko he kaugā fagona, kotou faifakamafola fakatahi mo ia pea mo tuku age ki ai hana ako Tohi-Tapu peʼe ko hana ʼaʼahi. Kapau ʼe mole kotou ako mo he tahi kei foʼofoʼou, kotou kole age ki he tahi ʼe kei foʼofoʼou ke gaue fakatahi mo koutou.