Koga Hogofulu: Tou Fai He ʼu Ako Tohi-Tapu ʼe Tuputupu
Tou Akoako Te Kau Ako Ki Te Fai Faka Mafola ʼi Te ʼu ʼApi
1 Ka kua fakafuafua e te kau tagata ʼāfea kua lava fai faka mafola he tahi ʼe ako Tohi-Tapu, pea ʼe feala anai kiā ia ʼaia ke kau mo te kokelekasio ki te fai faka mafola. (Vakaʼi te tohi Organisés pour faire la volonté de Jéhovah, pasina 79 ki te 81.) Koteā ʼaē ʼe feala ke tou fai moʼo tokoni ki he tahi ʼe ako ke kau ki te fai faka mafola ʼi te ʼu ʼapi?
2 Koulua Teuteuʼi Fakatahi Te Fai Faka Mafola: ʼE maʼuhiga ia te teuteuʼi lelei ʼo te fai faka mafola. Fakahā kiā ia ʼaē ʼe ako ʼe feala ke ina maʼu ʼi Te Minisitelio ʼo Te Puleʼaga pea mo te kiʼi kaupepa Te ʼu Tokoni Ki Te ʼu Fai Palalau Faka Tohi-Tapu ia he ʼu ʼuluaki palalau moʼo fakaʼaogaʼi ki tana fai faka mafola, pea koulua kumi fakatahi he ʼu ʼuluaki palalau ʼe ʼaoga anai ki te telituale. Fakaloto mālohiʼi ia ia ke ina fakaʼaogaʼi te Tohi-Tapu ʼi tana fai faka mafola.—2 Tim. 4:2.
3 ʼE ʼaoga ʼaupito ki he kaugā fagona foʼou ke ina akoako tana ʼu ʼuluaki palalau. ʼI te ʼu temi ʼaē ʼe ina akoako ai tana ʼu ʼuluaki palalau, fakahā age peʼe feafeaʼi hana tali fakapotopoto ki te ʼu fehuʼi ʼaē ʼe fai māhani e te hahaʼi ʼo te telituale. (Kol. 4:6) Koutou ʼui age ʼe mole fakamaʼua ki te kau minisi Kilisitiano ke nātou ʼiloʼi ia te tali ki te ʼu fehuʼi fuli ʼaē ʼe lagaʼi e te hahaʼi ʼo te telituale. Lagi ʼe lelei ke fai muʼa he ʼu kumi ki te ʼu fehuʼi ʼaia pea ke kita toe liliu leva ʼo tali ki tana ʼu fehuʼi.—Taag. 15:28.
4 Koulua Fai Faka Mafola Fakatahi: Ka kamata fai faka mafola ia ia ʼaē ʼe ako, ʼe lelei muʼa ke ina sioʼi takotou fakaʼaogaʼi ia te ʼu ʼuluaki palalau ʼaē neʼe koulua teuteuʼi fakatahi. ʼOsi leva, pea koutou ʼui age ke ina fisifisi hana matapā. ʼI ʼihi temi, ʼe lagi lelei age ki te kaugā fagona foʼou ke ina kamata he kiʼi koga ʼo te ʼu ʼuluaki fai palalau, ohage la ʼe ina lau anai he vaega pea ke ina fakamahino. Koutou mulimuli pe ki tona ʼulugaaga pea mo tona ʼu fealagia. (Filp. 4:5) Koutou vikiʼi tana tuputupu ʼi te ʼu agaaga kehekehe ʼo te gāue fai faka mafola.
5 ʼE tonu ke kita tokoni ki he kaugā fagona foʼou ke ina fai hana polokalama ke kau tuʼumaʼu ki te minisitelio, ohage la ʼi te vāhaʼa fuli mo kapau ʼe fealagia. (Filp. 3:16) Fai he ʼu fakatuʼutuʼu ke koulua fai faka mafola fakatahi, pea fakaloto mālohiʼi ia ia ke gāue mo ʼihi kau fai faka mafola faʼafai. Ko te faʼifaʼitaki ʼa te kau fai faka mafola ʼaia pea mo tanatou kaugā gāue mo ia, ʼe ʼaoga anai kiā ia ke feala hana fakatuputupu tona ʼu fealagia pea ke fiafia ʼi te fai faka mafola ʼi te ʼu ʼapi.