Koga Hogofulu-Ma-Tahi: Tou Fai He ʼu Ako Tohi-Tapu ʼe Tuputupu
Tou Teuteuʼi Fakatahi Mo Nātou Tanatou ʼu ʼAʼahi
1 Ka kamata fai faka mafola he tahi, ʼe ina maʼu anai te ʼu hahaʼi ʼe nātou tali ia te logo lelei. E feafeaʼi hatatou tokoni ki te ʼu kaugā fagona foʼou ʼaia ke nātou fai fakalelei tanatou ʼu ʼaʼahi pea mo taupau te fia logo ʼa te hahaʼi?
2 ʼE kamata teuteuʼi pe te ʼaʼahi ʼi te ʼuluaki felāveʼi. Koutou fakaloto mālohiʼi te kaugā fagona ke fakalogo lelei ki te ʼu meʼa ʼaē ʼe palalau kiai ia nātou ʼaē ʼe fai faka mafola ki ai. (Filp. 2:4) Koutou akoʼi māmālie age kiā ia, peʼe feafeaʼi hana faka fealagia kiā nātou ʼaē ʼe fai palalau mo ia ke nātou palalau faʼifaʼitaliha, pea ke fakalogo lelei ki tanatou ʼu palalau, pea ke ina tokagaʼi te ʼu meʼa ʼaē ʼe ʼaoga kiā nātou. Ka fia logo he tahi, ʼe tonu ki te kaugā fagona ke ina tohi te ʼu faʼahi fuli ʼo ʼuhiga mo te ʼaʼahi ʼaē ka ina fai. Koutou fakaʼaogaʼi te ʼu meʼa fuli ʼaia moʼo tokoni ki ai ke ina teuteuʼi he tahi fai palalau.
3 Koutou Teuteuʼi Fakatahi Te ʼAʼahi: Koutou toe vakaʼi takotou ʼuluaki fai palalau ʼaē ʼi te fai faka mafola, pea fakahā age ki te kaugā fagona peʼe feafeaʼi hana filifili he manatu ʼo ʼuhiga mo te logo ʼo te Puleʼaga ke fia palalau kiai te tagata peʼe ko te fafine ʼo te loto fale. (1 Ko. 9:19-23) Koutou teuteuʼi fakatahi he ʼuluaki palalau nounou ʼe talanoa ai ki he vaega faka Tohi-Tapu pea mo he palakalafe ʼi he tohi ako. Tahi ʼaē, koutou teuteuʼi he fehuʼi ʼe lagaʼi ʼi te fakaʼosi ʼo te fai palalau moʼo teuteuʼi he tahi ʼaʼahi. Fakahā age ki te kaugā fagona peʼe feafeaʼi hana fakatuputupu ia te ʼatamai mālama ʼa he tahi ʼo ʼuhiga mo te Folafola ʼa te ʼAtua ʼaki te ʼu ʼaʼahi ʼaē ka ina fai.
4 ʼE lelei ke koutou fakahā age ki te kaugā fagona he ʼu ʼuluaki palalau faigafua. ʼI tana ʼosi fakamālo ki ʼaē ʼo te loto fale, ʼe feala anai ke ina ʼui fēnei: “Neʼe au leleiʼia tatā fai palalau fakamuli, pea ʼe au toe liliu mai nei ʼo fakahā atu he tahi manatu faka Tohi-Tapu [fakahā age he manatu].” ʼE lagi lelei ke koutou fakahā ki te kaugā fagona foʼou hana tali mo kapau ko he tahi kehe ʼaē ʼe ina maʼu atu ʼi tana ʼaʼahi.
5 Taupau Fakalelei Te Fia Logo ʼa Te Hahaʼi: Koutou tokoniʼi te kaugā fagona ke ina tuku he faʼifaʼitaki lelei ʼaki tana foimo liliu ʼo ʼaʼahi ia nātou fuli ʼaē ʼe nātou tali ia te logo lelei. ʼE tonu ke faʼa kātaki mo kapau ʼe ina fia maʼu ia te hahaʼi mokā toe liliu ʼo ʼaʼahi nātou. Akoʼi age ki te kaugā fagona te ʼu fakatuʼutuʼu ʼaē ke ina fai moʼo teuteuʼi tana ʼu ʼaʼahi, pea ke mahino kiā ia te maʼuhiga ʼaē ke ina fakahoko tana fakatuʼutuʼu. (Mat. 5:37) Fakahā age ki te kaugā fagona, ʼe tonu ke agalelei, mo aga fakaʼeteʼete, mo aga fakaʼapaʼapa mokā ina kumi ia te hahaʼi ʼaē ʼe hage ko ni ʼu ōvi pea mokā ina fakatuputupu tanatou fia logo.—Tito 3:2.