Ke Taupau Maʼu
Tou Fai He ʼu Ako Tohi-Tapu ʼe Tuputupu
Ko te pepa ʼaenī, ʼe tānaki ai te ʼu puani tāfito ʼo te ʼu alatike ʼo Te Minisitelio ʼo Te Puleʼaga, ʼaē neʼe talanoa ai ki te fai ʼo he ʼu ako Tohi-Tapu ʼe tuputupu. ʼE fakaloto mālohiʼi ia tatou fuli ke tou taupau maʼu te pepa ʼaenī pea mo fakaʼaogaʼi mokā tou fai he ʼu ako Tohi-Tapu. Tahi ʼaē meʼa, ʼe feala ke fakaʼaogaʼi te ʼu manatu ʼaenī lolotoga te ʼu fono ʼo te fai faka mafola, pea ʼe lava fakaʼaogaʼi te pepa ʼaenī e te ʼu taupau gāue moʼo fakatafito kiai tanatou ʼu akonaki ʼaē ʼe nātou fai mokā nātou ʼaʼahi he ʼu ako tohi.
Koga 1: Koteā Te Ako Tohi-Tapu?
ʼE lau ko he ako Tohi-Tapu, mo kapau ʼe koutou fai palalau tuʼumaʼu mo he tahi ki te Tohi-Tapu pea mo fai hoholo, tatau aipe peʼe nounou, pea mo koutou fakaʼaogaʼi te Tohi-Tapu pea mo he tohi ʼe fai kiai te ako. ʼE feala ke tohi ʼe ko he ako mo kapau ʼe kua fai tuʼa lua ʼi te ʼosi fakahāhā age te faʼahiga fai ʼo te ako pea mo kapau ʼe tou tui ʼe hoko atu anai te ako.—km 7/04 p. 1.
Te ʼu Tohi ʼAē ʼe Feala Ke Fakaʼaogaʼi
◼ Koteā ʼAē ʼe Fakamaʼua Mai e Te ʼAtua Kia Tatou?
◼ Te ʼAtamai Mālama ʼAē ʼe Ina Taki Ki Te Maʼuli Heʼegata
◼ Koutou Atolasio Ki Te ʼAtua Moʼoni Pe e Tahi
◼ ʼE Koutou Lava Kaumeʼa Mo Te ʼAtua! Ko te kaupepa ʼaia ʼe lava fakaʼaogaʼi ki te hahaʼi ʼaē ʼe faigataʼa tanatou mahino peʼe mole popoto lelei ʼi te lautohi.
Koga 2: Koutou Teuteuʼi Te Ako Tohi-Tapu
ʼI tatatou faʼahiga fai ʼo te ako, ʼe tonu ke tou fakahā te ʼu manatu ke malave ki te loto ʼo ia ʼaē ʼe ako. ʼE fakamaʼua e te faʼahi ʼaia ke tou teuteuʼi lelei te ako ke ʼi ai hona ʼu fua lelei kiā ia ʼaē ʼe ako.—km 8/04 p. 1.
Tona Faʼahiga Teuteuʼi
◼ Vakaʼi te kupu tāfito, te ʼu kupu tāfito ʼo te kapite, pea mo te ʼu pāki ʼo te kapite peʼe ʼo te ako.
◼ Koutou kumi te ʼu tali, ʼo fakaʼiloga pe te ʼu kupu tāfito peʼe ko te ʼu kupuʼi palalau tāfito ʼo te ʼu tali.
◼ Koutou vakaʼi peʼe ko te ʼu vaega fea ʼaē ka koutou lau lolotoga te ako. Koutou tohi he ʼu kiʼi manatu nounou ʼi te ʼu muliʼi pasina ʼo te tohi ako.
◼ Teuteuʼi he kiʼi fakamanatu nounou ʼo te ʼu puani tāfito.
Koutou Faka ʼAlutahi Te Ako Pea Mo Te ʼu Meʼa ʼAē ʼe ʼAoga Kiā Ia ʼe Ako
◼ Koutou faikole ʼo ʼuhiga mo ia ʼaē ʼe ako pea mo te ʼu meʼa ʼaē ʼe ʼaoga kiā ia.
◼ Koutou fakakaukauʼi fakatomuʼa ia te ʼu puani ʼaē ʼe feala ke mahino gataʼa kiai peʼe ina tali gataʼa.
◼ Koutou fakakaukauʼi ia te ʼu fehuʼi ʼaenī: Koteā ʼaē ʼe tonu ke mahino kiai peʼe koteā ʼaē ʼe tonu ke ina fai ke feala hana tuputupu ʼi te faʼahi fakalaumālie? ʼE au lava malave feafeaʼi ki tona loto?
◼ Kapau ʼe ʼaoga, koutou teuteuʼi he lea fakatātā, he fakamahino, peʼe ko he ʼu fehuʼi moʼo tokoni kiā ia ʼaē ʼe ako ke mahino ki he puani peʼe ko he vaega.
Koga 3: Koutou Fakaʼaogaʼi Lelei Te ʼu Vaega
Ka tou fai te ʼu ako Tohi-Tapu, ʼe tou fakatuʼutuʼu ke tou “fai ni ʼu tisipulo,” ʼo tou tokoni ki te hahaʼi ke nātou mahino pea mo tali ia te ʼu akonaki ʼo te Folafola ʼa te ʼAtua, pea mo nātou maʼuliʼi. (Mat. 28:19, 20, MN; 1 Tes. 2:13) Koia ʼe tonu ke fakatafito ia te ako ki te Tohi-Tapu.—km 11/04 p. 4.
Koutou Akoʼi ʼAki Ia Te Folafola ʼa Te ʼAtua
◼ Koutou fakahā age ki te ako peʼe feafeaʼi hana kumi ia te ʼu vaega ʼi tana Tohi-Tapu.
◼ Koutou kumi pea mo fai palalau ki te ʼu vaega Tohi-Tapu ʼaē ʼe fakatafito kiai tatatou ʼu akonaki.
◼ Koutou fai ni ʼu fehuʼi. ʼAua naʼa koutou fakamahino te ʼu vaega ki takotou ako, kae koutou tuku ke ina fakamahino atu.
◼ Koutou faka faigafua ia te ako. ʼAua naʼa koutou faiga ke koutou fakamahino te ʼu manatu fuli ʼaē ʼe tuʼu ʼi te vaega. Koutou talanoa pe ki te manatu ʼaē ka ina fakamahino lelei anai te puani.
◼ Koutou faigaʼi ke ʼalutahi te ako mo te ʼu meʼa ʼaē ʼe ʼaoga kiā ia ʼaē ʼe ako. Koutou tokoni ki te ako ke mahino ki te ʼaoga ʼo te ʼu vaega kiā ia.
Koga 4: Koutou Akoʼi Te Kau Ako Ke Nātou Teuteuʼi Tanatou Ako
Kapau ko ia ʼaē ʼe ako ʼe ina lau fakatomuʼa tana kapite, mo fakaʼiloga te ʼu tali, pea mo ina fakakaukauʼi peʼe feafeaʼi hana tali anai ʼaki tana ʼu faʼahiga palalau, pea ʼe tuputupu vave anai ʼi te faʼahi fakalaumālie. Koia, kapau kua fai tuʼumaʼu ia te ako Tohi-Tapu, pea koutou teuteuʼi mo ia he kapite moʼo fakahā age tona faʼahiga teuteuʼi. ʼI te agamāhani, ʼe ʼaoga anai ke koutou teuteuʼi fakatahi mo ia he kapite kātoa.—km 12/04 p. 1.
Te Fakaʼiloga ʼo Te ʼu Tali Pea Mo Te Tohi ʼo He Tahi ʼu Manatu
◼ Koutou fakamahino age peʼe feafeaʼi hana maʼu te ʼu tali ki te ʼu fehuʼi ʼaē ʼe tohi.
◼ Koutou fakahā age ki takotou ako takotou tohi ako, ʼaē neʼe koutou fakaʼiloga pe te ʼu kupu tāfito peʼe ko te ʼu kupuʼi palalau tāfito.
◼ Koutou tokoni ki te ako ke mahino kiā ia te pikipikiga ʼo te ʼu vaega pea mo te puani ʼo te palakalafe, pea mo fakahā age ki ai peʼe feafeaʼi hana tohi he ʼu kiʼi manatu nounou ia tafa ʼo te ʼu pasina ʼo tana tohi ako.
Ke Vakaʼi Fakanounou Pea Mo Fai He Fakamanatu
◼ ʼI muʼa ʼo tana teuteuʼi ia tana ʼu palakalafe, koutou akoʼi age kiā ia te faʼahiga sivi ʼo te kapite peʼe ko te kupu tāfito ʼo te ako, mo te tahi ʼu kupu tāfito pea mo te ʼu pāki.
◼ Fakaloto mālohiʼi te ako ke ina toe vakaʼi te ʼu puani tāfito ʼi te ʼosi teuteuʼi ʼo tana ako.
Koga 5: Ko Palakalafe e Fia ʼe Tonu Ke Vakaʼi ʼi Te Ako
ʼE fakalogo anai ia te lahi ʼo te ʼu palakalafe ʼaē ka ako ki te fealagia pea mo te ʼu ʼaluʼaga ʼo ia ʼaē ʼe faiako pea mo ia ʼaē ʼe ako.—km 1/05 p. 1.
Ke Liliu Tana Tui ʼo Mālohi
◼ ʼAua naʼa takimuʼa pe kiā koutou ia te lahi ʼo te ʼu palakalafe ʼaē ʼe tonu ke vakaʼi, kae mole mahino lelei ia ia ʼaē ʼe ako ki te Folafola ʼa te ʼAtua.
◼ Koutou fakaʼaogaʼi he temi feʼauga moʼo tokoni kiā ia ʼaē ʼe ako, ke mahino pea mo ina tali te ʼu meʼa ʼaē ʼe ina ako.
◼ Koutou fakaʼaogaʼi he temi feʼauga moʼo vakaʼi ia te ʼu vaega faka Tohi-Tapu tāfito ʼaē ʼe fakatafito kiai ia te ʼu akonaki.
ʼAua Naʼa Lahi Fau Ia Te ʼu Meʼa ʼAē ʼe Koutou Palalau Kiai
◼ Kapau ko ia ʼaē ʼe ako ʼe fakamāhani hana fai palalau loaloaga ʼo ʼuhiga mo ia totonu, ʼe lagi lelei ke hoki koutou fai palalau mo ia ʼi te ʼosi ʼo te ako.
◼ ʼAua naʼa lahi fau takotou fai palalau lolotoga te ako. Fakatuʼakoi te ʼu puani ʼaē ʼe mole maʼuhiga pea mo te ʼu fakamatala, ke feala kiā ia ʼaē ʼe ako ke ina maʼu ia he ʼatamai mālama totonu ʼo ʼuhiga mo te ʼu akonaki tāfito ʼo te Tohi-Tapu.
Koga 6: Ka Lagaʼi He ʼu Fehuʼi e Ia ʼAē ʼe Ako
Kapau kua haʼele lelei he ako Tohi-Tapu, ʼi te agamāhani ʼe lelei age hakotou mulimuli ki te ʼu kapite ʼaē ʼe vakaʼi ai te ʼu akonaki faka Tohi-Tapu ʼi hakotou hiki fakavilivili ki he tahi kapite. ʼE feala ai anai kiā ia ʼaē ʼe ako ke ina maʼu he fakatafito lelei ʼo te ʼatamai mālama pea mo tuputupu ʼi te faʼahi fakalaumālie.—km 2/05 p. 6.
Koutou Fakasiosio Poto
◼ Ko te ʼu ʼaluʼaga ʼaē ʼe ʼalutahi mo te ʼu meʼa ʼaē ʼe koutou lolotoga ako mo ia, ʼe feala he foimo fakamahino age ki ai.
◼ Kapau ko he ʼu fehuʼi ʼe mole hona pikipikiga mo te ʼu meʼa ʼaē ʼe koutou ako mo ia, ʼe feala anai ke koutou fai he ʼu kumi moʼo tali fakalelei kiai ʼi he tahi age lakaga. ʼE lagi lelei anai ke tohi ki he moʼi pepa te ʼu fehuʼi ʼaia.
◼ Kapau ʼe faigataʼa ki te ako hana tali he akonaki, koutou vakaʼi ʼi he tahi tohi ʼe fakamahino lelei ai te puani ʼaia.
◼ Kapau ʼe kei faigataʼa aipe tana tali te faʼahi ʼaia, pea koutou tuku ki he tahi temi kae koutou hoko atu tana ako.
Koutou Agavaivai
◼ Kapau ʼe mole koutou ʼiloʼi lelei te tali ki he fehuʼi, ʼaua naʼa koutou fakahā age takotou manatu tokotahi.
◼ Māmālie, koutou ako age kiā ia peʼe feafeaʼi hana fai he ʼu kumi.
Koga 7: Koutou Fai He Faikole ʼi Te Ako Tohi-Tapu
ʼE ʼaoga ke tapuakina e Sehova te kau ako Tohi-Tapu ke feala hanatou tuputupu ʼi te faʼahi fakalaumālie. Koia, ʼe lelei ke koutou kamata pea mo fakaʼosi he ako Tohi-Tapu ʼaki te faikole.—km 3/05 p. 4.
Te Temi ʼAē ʼe Feala Ai Ke Kamata Te Faikole
◼ ʼI te agamāhani, ʼe feala ke koutou fai te faʼahi ʼaia ʼi te ʼuluaki ako mo kapau ko he ʼu hahaʼi lotu.
◼ ʼO ʼuhiga mo te tahi kau ako, ʼe lagi tonu ke vakaʼi te temi ʼaē kua feala ai ke koutou fai ai he faikole.
◼ ʼE feala hakotou fakaʼaogaʼi ia Pesalemo 25:4, 5 pea mo 1 Soane 5:14 moʼo fakamahino pe koʼe ʼe tonu ke fai he kole.
◼ ʼE feala ke koutou fakaʼaogaʼi ia Soane 15:16 moʼo fakamahino age te maʼuhiga ʼaē ke faikole kiā Sehova ʼaki ia Sesu Kilisito.
Koteā ʼAē ʼe Feala Ke Koutou Talanoa Kiai ʼi Te ʼu Faikole
◼ ʼE tou fakafetaʼi anai kiā Sehova te Matapuna ʼo te ʼu akonaki ʼaē ʼe koutou ako.
◼ Koutou fakahā kiā ia ʼaē ʼe ako ʼe koutou fia tokoni moʼoni kiā ia.
◼ Koutou fakahā he loto fakafetaʼi ki te kautahi ʼaē ʼe fakaʼaogaʼi e Sehova.
◼ Koutou kole kiā Sehova ke ina tapuakina te ʼu faiga ʼo ia ʼaē ʼe ako ke ina maʼuliʼi te ʼu meʼa ʼaē ʼe ina ako.
Koga 8: Koutou Taki Te Kau Ako Ki Te Kautahi ʼa Sehova
Ka tou fai he ʼu ako Tohi-Tapu, ʼe mole tou fakatuʼutuʼu pe ke tou akoʼi age te ʼu akonaki tāfito, kae ʼe tou toe fia tokoni foki ki te kau ako ke nātou fakatahi mai ki te kokelekasio. Koutou toʼo he ʼu kiʼi minuta ʼi te vāhaʼa fuli lolotoga te ako, ke koutou vakaʼi ai he agaaga ʼo te kautahi ʼa Sehova.—km 4/05 p. 8.
Te ʼu Fono ʼo Te Kokelekasio
◼ Koutou fakamatalatala age te ʼu fono ʼaē e nima. ʼI takotou ʼuluaki fai te ako, koutou fakaafe nātou ke kau ki te ʼu fono.
◼ Koutou fakahā age te ʼu manatu maʼuhiga ʼaē ʼe talanoa kiai ʼi te ʼu fono.
◼ Koutou fakaloto mālohiʼi ia ia ke haʼu ki te ʼAho Fakamanatu, mo te ʼu fakatahi lalahi, pea mo te ʼaʼahi ʼa te taupau faka siliko.
◼ Koutou fakaʼaogaʼi te ʼu pāki ʼo tatatou ʼu tohi moʼo tokoni kiā nātou ke nātou mahino lelei ki tona faʼahiga fakaʼaluʼalu.
◼ Koutou fakaloto mālohiʼi nātou ke nātou lau te kaupepa lahi Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei.
Koutou Fakaʼaogaʼi Te ʼu Foʼi ʼAta Viteo Ke Nātou Mahino Ki Te Kautahi ʼa Sehova
◼ Les Témoins de Jéhovah : un nom, une organisation
◼ Toute la communauté des frères
◼ Unis grâce à lʼenseignement divin
◼ Jusquʼaux extrémités de la terre
Koga 9: Koutou Teuteuʼi Te Kau Ako Tohi-Tapu Ki Te Fagonogono Faigamālie
Ka kamata tui te kau ako Tohi-Tapu ki te ʼu meʼa ʼaē ʼe nātou ako, ʼe nātou fia fakahā ia te ʼu meʼa ʼaia ki te hahaʼi.—km 5/05 p. 1.
Koutou Fakaloto Mālohiʼi Nātou Ke Nātou Fai Fagonogono
◼ ʼE ʼi ai koa hona ʼu kaumeʼa pea mo hona ʼu kāiga ʼe feala ke ina fakaafe ki tana ako?
◼ ʼE ʼi ai koa hona ʼu kaugā gāue, mo kaugā ako peʼe ko niʼihi ake ʼe feʼiloʼiʼaki mo ia, ʼe nātou fia logo ki te logo lelei?
Koutou Akoako Nātou Ke Nātou Fakahā Te ʼu Akonaki ʼAē ʼe Nātou Tui Kiai
◼ Koutou filifili he ʼu puani lolotoga te ako, pea koutou fehuʼi age ki ai, “E feafeaʼi anai hau fakaʼaogaʼi te Tohi-Tapu moʼo fakamahino te moʼoni ʼaenī ki tou famili?”
◼ Koutou tokoni ki ʼaē ʼe ako ke mahino ʼe tonu ke aga fakaʼapaʼapa pea mo agalelei mokā fai palalau mo te hahaʼi ʼo ʼuhiga mo te ʼAtua pea mo tana ʼu fakatuʼutuʼu.
◼ ʼE feala ki te kau ako ke nātou fakaʼaogaʼi te kaupepa lahi Te Kau Fakamoʼoni ʼa Sehova —Logo Tahi Moʼo Fai ʼo Te Finegalo ʼo Te ʼAtua ʼi Te Malamanei, moʼo fakamahino ki tonatou ʼu kaumeʼa pea mo tonatou ʼu kāiga tatatou ʼu akonaki faka Tohi-Tapu pea mo tatatou ʼu gāue.
Koga 10: Koutou Akoako Te Kau Ako Ki Te Fai Faka Mafola ʼi Te ʼu ʼApi
Ka kua fakafuafua e te kau tagata ʼāfea kua lava fai faka mafola he tahi ʼe ako Tohi-Tapu, pea ʼe feala anai kiā ia ʼaia ke kau mo te kokelekasio ki te fai faka mafola.—km 6/05 p. 1.
Koutou Teuteuʼi Fakatahi Te Fai Faka Mafola
◼ Koutou fakahā kiā ia ʼaē ʼe ako peʼe kofea ʼaē ʼe feala ke ina maʼu ai he ʼu ʼuluaki palalau ki tana fai faka mafola.
◼ Koutou tokoni kiā ia ke ina filifili he ʼu palalau faigafua pea mo ʼaoga anai ki te telituale.
◼ Fakaloto mālohiʼi ia ia ke ina fakaʼaogaʼi ia te Tohi-Tapu ʼi tana minisitelio.
◼ Koulua akoako fakatahi he ʼu faʼifaʼitaki. Akoʼi age hana faʼahiga tali fakapotopoto ki te ʼu fehuʼi ʼaē ʼe fai māhani.
Koulua Fai Faka Mafola Fakatahi
◼ ʼE lelei anai ke sioʼi e ia ʼaē ʼe ako peʼe koutou fakaʼaogaʼi feafeaʼi ia te ʼu ʼuluaki palalau ʼaē neʼe koulua teuteuʼi fakatahi.
◼ Koutou mulimuli pe ki tona ʼulugaaga pea mo tona ʼu fealagia. ʼI ʼihi ʼaluʼaga, ʼe lagi lelei age ke ina fai pe he kiʼi koga ʼo te fai palalau ʼaē neʼe koutou teuteuʼi fakatahi.
◼ Koutou tokoni ki te kaugā fagona foʼou ke ina fai hana polokalama ke kau tuʼumaʼu ki te minisitelio.
Koga 11: Koutou Teuteuʼi Fakatahi Mo Nātou Tanatou ʼu ʼAʼahi
ʼE kamata teuteuʼi pe te ʼaʼahi ʼi te ʼuluaki felāveʼi. Koutou fakaloto mālohiʼi te kaugā fagona ke fakalogo lelei ki te ʼu meʼa ʼaē ʼe palalau kiai ia nātou ʼaē ʼe fai faka mafola ki ai. Koutou akoʼi māmālie age kiā ia, peʼe feafeaʼi hana faka fealagia kiā nātou ʼaē ʼe fai palalau mo ia ke nātou palalau faʼifaʼitaliha, pea ke fakalogo lelei ki tanatou ʼu palalau, pea ke ina tokagaʼi te ʼu meʼa ʼaē ʼe ʼaoga kiā nātou.—km 7/05 p. 1.
Koutou Teuteuʼi Fakatahi Te ʼAʼahi
◼ Koutou toe fakamanatuʼi ia takotou ʼuluaki fai palalau ʼaē ʼi te fai faka mafola, pea koutou tokoni ki te kaugā fagona ke ina filifili he manatu ʼe leleiʼia anai e ia ʼaē ʼe ʼaʼahi.
◼ Koutou teuteuʼi fakatahi he ʼuluaki palalau nounou ʼe talanoa ai ki he vaega faka Tohi-Tapu pea mo he palakalafe ʼi he tohi ako.
◼ Koutou teuteuʼi he fehuʼi ke lagaʼi ʼi te fakaʼosi ʼo te fai palalau.
Taupau Fakalelei Te Fia Logo ʼa Te Hahaʼi
◼ Koutou fakaloto mālohiʼi te kaugā fagona ke foimo liliu ʼo ʼaʼahi ia nātou fuli ʼaē ʼe nātou tali ia te logo lelei.
◼ Koutou tokoni kiā ia ke faʼa kātaki mo kapau ʼe faigataʼa hana maʼu ia te hahaʼi ʼaē ʼe ina ʼaʼahi.
◼ Koutou fakahā age ki te kaugā fagona foʼou peʼe feafeaʼi hana fakatuʼutuʼu he ʼaho ke toe liliu ʼo ʼaʼahi ia nātou ʼaē neʼe fia logo, pea ke mahino kiā ia te maʼuhiga ʼaē ke ina fakahoko tana fakatuʼutuʼu ʼaia.
Koga 12: Koutou Tokoni Ki Te Kau Ako Ke Nātou Kamata Pea Mo Fai He ʼu Ako Tohi-Tapu
ʼE tonu ke koutou faʼifaʼitaki kiā Sesu, ʼo koutou tuku he faʼifaʼitaki lelei ʼi takotou minisitelio. ʼAki te faʼifaʼitaki ʼaē ka koutou tuku anai ki ʼaē ʼe ako ʼi te minisitelio, ʼe mahino anai kiā ia ʼe fai te ʼu ʼaʼahi ki te hahaʼi ke feala hana kamata he ʼu ako Tohi-Tapu.—km 8/05 p. 1.
Te Fai ʼo He Ako Tohi-Tapu
◼ Koutou fakamahino age ki te ako, ʼi te agamāhani, ʼe mole tonu leva ke ina fakamahino fuli age te ʼu faʼahi kehekehe ʼo te ako.
◼ ʼE lelei age ʼaki he tohi ako, ke fakaʼaogaʼi he palakalafe pe e tahi peʼe lua moʼo fakahā ia te faʼahiga fai ʼo he ako.
◼ Koutou vakaʼi pea mo akoako ia te ʼu faʼifaʼitaki ʼaē ʼe ʼaoga moʼo kamata ʼaki he ako Tohi-Tapu.—km 8/05 p. 8; km 1/02 p. 6.
Koutou Akoako Takotou Kau Ako Ke Liliu Ko He Kau Faiako
◼ Koutou fakaloto mālohiʼi nātou ʼaē ʼe koutou ako ke nātou kau ki te Ako Faka Teokalatike.
◼ Kapau kua kaugā fagona, pea koutou fakaafe ia ia ke kaugā ʼolo mo koutou ki he ʼu ako Tohi-Tapu, ʼe feala anai hana kau kiai.