Tou Teuteu Lelei Ki Te Faiako
1. He koʼē ʼe tonu ke tou faiga ke tou fakatuputupu iā ia ʼaē ʼe ako ia te manako ʼaē ki te ʼu moʼoni ʼo te Tohi-Tapu?
1 Kā tou fai he ako Tohi-Tapu, ʼe tonu ke tou teuteu lelei mo kapau ʼe tou fia uga ia ia ʼaē ʼe ako ke tauhi kiā Sehova. ʼE tonu ke tou faiga mālohi ke tuputupu ʼi te loto ʼo ia ʼaē ʼe ako ia te manako ki te ʼu moʼoni ʼo te Tohi-Tapu. Ko he faʼahi ʼe tupu ʼaki ai anai ia he fia tauhi ʼo ia ʼaē ʼe ako ki te ʼAtua. (Teu. 6:5; Taag. 4:23; 1 Ko. 9:26) Kae ʼe feafeaʼi hatatou lava fai ia te faʼahi ʼaia?
2. ʼE lava tokoni feafeaʼi mai ia te faikole ke kita teuteu lelei ʼi muʼa ʼo te fai ʼo he ako Tohi-Tapu?
2 Tou Faikole ʼi Tatatou Teuteuʼi Ia Te Ako: Mai tona ʼaluʼaga ʼaē, ko Sehova ʼaē ʼe ina fakatuputupu ia te moʼoni ʼi te loto ʼo ia ʼaē ʼe ako, koia ʼaē ʼe ʼaoga ʼi muʼa ʼo te teuteu ia te ako, ke kita hūfakiʼi ia ia ʼaē ʼe ako pea mo te ʼu meʼa ʼaē ʼe ʼaoga tāfito ki ai. (1 Ko. 3:6; Sake 1:5) ʼE feala ki te taʼi faikole ʼaia, ke tokoni kiā tātou ke tou ʼiloʼi peʼe koteā he tahi age tokoni ʼe feala ke tou foaki ki ai, moʼo fakafonu ia tona loto “ ʼi te ʼatamai mālama totonu” ʼo te finegalo ʼo Sehova.—Kol. 1:9, 10.
3. ʼE feafeaʼi hatatou teuteu lelei mokā ʼe tou fakakaukauʼi ia te ʼu meʼa ʼaē ʼe ʼaoga kiā ia ʼaē ʼe ako?
3 Tou Manatuʼi Ia Ia ʼAē ʼe Ako: Neʼe ʼiloʼi e Sesu ko he faiako ʼe fua lelei, ʼe tonu ke fakakaukauʼi ia te ʼu meʼa ʼaē ʼe ʼaoga kiā ia ʼaē ʼe ako. Tuʼa lua neʼe fai age kiā Sesu ia te fehuʼi ʼaenī: “Koteā te meʼa ʼaē ʼe tonu ke au fai ke au maʼu ai te maʼuli heʼegata?” Neʼe mole tatau ia tana ʼu tali e lua kiai. (Luka 10:25-28; 18:18-20) ʼE tonu ke tou fakakaukauʼi ia te ʼu meʼa ʼaē ʼe ʼaoga kiā ia ʼaē ʼe ako mokā tou teuteuʼi tana ako. Ko te vaega Fakatohi-tapu fea ʼaē kā tou lau age anai ki ai? Ko palakalafe e fia ʼaē kā tou vakaʼi fakatahi anai mo ia? Ko te ʼu puani fea ʼo te ako ʼe lagi feala anai ke faigataʼa tana mahino kiai pea mo ina tali lelei? Kapau ʼe tou lava fakakaukauʼi fakatomuʼa ia he ʼu fehuʼi ʼe lagi feala ke ina lagaʼi mai, pea ʼe lelei anai tatatou teuteu kiai ke tou tali fakalelei age.
4. Koteā ia te teuteu lelei ʼaē ʼe tonu ke kita fai?
4 Tou Vakaʼi Te ʼu Palakalafe ʼAē Ki Te Ako: Tatau aipē peʼe kua lahi tatatou ako ia te tohi ʼaia, kae ko tatatou hoki ako ʼaē mo ia ʼaē ʼe ako. Ke malave tatatou ʼu palalau ki tona loto, ʼe maʼuhiga ʼaupitō ke tou teuteu fakalelei ki te ʼu ako fuli ʼaē ʼe tou fai. Ko tona fakaʼuhiga ke tou fai ia te ʼu meʼa ʼaē ʼe tou fakalotomālohiʼi ia tatatou kau ako ke natou fai. Tou vakaʼi ia te ʼu palakalafe ʼaē ki te ako, ʼo kau kiai ia te vakaʼi ʼo te ʼu vaega Fakatohi-tapu, ʼo tou fakakaukauʼi te ʼu meʼa ʼaē ʼe ʼaoga kiā ia ʼaē ʼe ako, pea lagi feala hatatou fakaʼiloga ia te ʼu manatu tāfito.—Loma 2:21, 22.
5. ʼE tou lava faʼifaʼitakiʼi feafeaʼi ia Sehova?
5 ʼE tokaga tāfito ia Sehova ki te tuputupu ʼa te kau ako Tohi-Tapu fuli. (2 Pet. 3:9) ʼAki hatatou fakaʼaogaʼi he temi moʼo teuteuʼi te ʼu ako Fakatohi-tapu fuli, ʼe tou fakahā aipē ia te taʼi tokaga ʼofa ʼaia ʼe maʼu e Sehova.