ʼE Tonu Ke Tou Faʼafai Tuʼumaʼu ʼi Te Minisitelio
1 ʼI te taʼu fuli talu mai te taʼu 1992, ʼe faʼafai ia te kau Fakamoʼoni ʼa Sehova, ʼo natou fai ia hola e tahi miliale tupu ʼi te fakamafola ʼo te Puleʼaga pea mo fai ʼo he ʼu tisipulo ʼi te mālamanei kātoa. ʼE tou fiafia lahi ʼi hatatou lava tokoni veliveli pē ki te gāue fakaofoofo ʼaia!—Mat. 28:19, 20.
2 ʼE mahino ia, ko te ʼu fakamālo pea mo te ʼu fakavikiviki fuli ʼe tonu ke fai kiā Sehova, ʼaē ʼe tokoni mai ki tatatou minisitelio ʼi “te ʼu temi maʼuhiga” ʼaenī. (2 Tim. 3:1) Koteā ʼaē ʼe tonu ke tou fai mo kapau ʼe tou loto ke tou faʼafai tuʼumaʼu ʼi te gāue maʼuhiga ʼaia?
3 Te Tupuʼaga ʼo Tatatou Faʼafai: Ko totatou ʼofa lahi ki te ʼAtua pea mo totatou kāiga, pea mo tatatou loto moʼoni ʼaē ke tou fakahoko tatatou foaki ʼaē ʼo totatou maʼuli ki te ʼAtua, ʼe uga ai tātou ʼi tatatou fakamafola ia te Puleʼaga. (Mat. 22:37-39; 1 Soa. 5:3) Ko te ʼofa ʼe ina uga tātou ke tou fai he ʼu sākilifisio moʼo lagolago mālohi ki te gāue fai fakamafola.—Luka 9:23.
4 Tou Faiga Lahi Ke Tou Faʼafai Tuʼumaʼu: Ko totatou fili, ia te Tēvolo, ʼe faiga ʼaupitō ke vaivai ʼi tatatou faʼafai ʼi te minisitelio. Ko te mole fia logo ʼa te hahaʼi ʼi totatou telituale, ʼo fēia ki te ʼu fakafiafia ʼo te mālama, te ʼu faigataʼaʼia ʼo te maʼuli, pea mo tatatou tuʼania ʼo ʼuhiga mo tatatou mahamahaki, ʼe ko ni ʼu ʼaluʼaga ʼe fakaʼaogaʼi e te Tēvolo moʼo fakalotovaivaiʼi tātou.
5 Koia, ʼe tonu ai ke tou faiga lahi ke tou faʼafai tuʼumaʼu. ʼE maʼuhiga ke tou maʼu ia “te ʼofa ʼaē neʼe [tou] maʼu ʼi te kamata.” Ko tona fakaʼuhiga, ke tou lau tuʼumaʼu pea mo metitāsioʼi ia te Folafola ʼa te ʼAtua, te Tohi-Tapu, pea mo tou fakaʼaogaʼi ia te ʼu fakatuʼutuʼu fuli pē ʼaē ʼe foaki mai e Sehova ʼaki ia “te tagata kaugana agatonu pea mo poto” ke mālohi ai tatatou tui.—Fakh. 2:4; Mat. 24:45; Pes. 119:97.
6 Ohagē ko tona fakahā lelei e te ʼu lea fakapolofetā ʼi te Tohi-Tapu, kua vave hoko mai ia te ʼaho ʼo Sehova, ʼaē kā ina fakaʼauha ai te hahaʼi aga heʼe fakalotu. (2 Pet. 2:3; 3:10) Tou manatuʼi lelei te faʼahi ʼaia, pea tou faiga lahi ke tou faʼafai tuʼumaʼu ʼi te minisitelio, ʼo tou lagolago mālohi ki te fakamafola ʼo te Puleʼaga pea mo te fai ʼo he ʼu tisipulo, ʼaē ʼe lolotoga fai nei!