Lolotoga Te Mahina ʼo Te ʼAho Fakamanatu, ʼe Tou Faʼafai Anai Koa Ohage Ko Sehova Pea Mo Sesu?
1. Kotea ʼae ʼe faigaʼi e te kau Fakamoʼoni ʼa Sehova ke natou fai lolotoga te ʼu mahina ʼae ʼe fai ai te ʼAho Fakamanatu?
1 ʼE fakahoko e Sehova ʼana fakatuʼutuʼu ʼaki he faʼafai. ʼE ui fenei ia Isaia 9:7, MN, ʼo ʼuhiga mo te ʼu tapuakina ʼe foaki mai e te Puleʼaga ʼo te ʼAtua: “ ʼE fakahoko tonu anai e te faʼafai ʼa Sehova ʼo te ʼatu kautau.” ʼO toe feia pe mo te ʼAlo ʼo te ʼAtua, neʼe faʼafai ʼi te tauhi moʼoni lolotoga tana minisitelio ʼi te kele. (Soa. 2:13-17; 4:34) ʼI te taʼu fuli, lolotoga te ʼu mahina ʼae ʼe fai ai te ʼAho Fakamanatu, ʼe faigaʼi e te toko lauʼi miliona kau faifakamafola, ke natou faʼifaʼitakiʼi ia te faʼafai ʼa Sehova pea mo Sesu, ʼo natou fakaʼaogaʼi lahi tonatou temi ki te faifakamafola. ʼE kotou kau anai koa kia natou ʼaia?
2. Kapau ʼe tou faʼafai, kotea ʼae ka tou fai anai ʼo kamata atu ʼi te ʼaho 7 ʼo Malesio?
2 Te Fakaafe Ki Te ʼAho Fakamanatu: ʼI te taʼu ʼaeni, ʼe kamata anai ia te tufa ʼo te ʼu pepa fakaafe ki te ʼAho Fakamanatu ʼi te Moeaki ʼaho 7 ʼo Malesio. Kotou fakatuʼutuʼu nei ke kotou lagolago malohi ki te gaue faifakamafola. ʼE fiafia anai ia te ʼu kokelekasio moka natou faiga malohi ke natou faifakamafola ʼi ʼonatou telituale katoa. ʼE tou faigaʼi anai ke tou fakaafe ʼotatou kau ako, mo ʼatatou ʼaʼahi, mo ʼotatou kaugā gaue, mo ʼotatou kaiga, mo ʼotatou kaugā ako. Tou fakatoʼo age kia natou he ʼu pepa fakaafe peʼe tou fakaʼaogaʼi ia te jw.org ʼi te Neti.
3. ʼE tou lava lagolago malohi feafeaʼi ki te gaue faifakamafola ʼi te ʼu mahina ʼo Malesio pea mo Apelili?
3 Pionie Vaeluaʼi Temi: Kapau ʼe tou faʼafai, ʼe tou faigaʼi anai ke tou fakaʼaogaʼi lahi totatou temi ki te faifakamafola. ʼE mahino ia, tokolahi ʼe natou lava toʼo anai tanatou selevisi pionie vaeluaʼi temi ʼi te ʼu mahina ʼo Malesio pea mo Apelili, koteʼuhi ʼe feala pe tanatou fai ni hola ʼe 30. Kotou faipalalau ʼo ʼuhiga mo te faʼahi ʼaia ʼi takotou ako fakafamili. Kotou vakaʼi pe ʼe kotou lava lagolago malohi feafeaʼi ki te gaue faifakamafola. (Taag. 15:22) Kapau ʼe kotou palalau ki ni ʼihi ʼi te kokelekasio ʼo ʼuhiga mo ʼakotou fakatuʼutuʼu, ʼe feala ke kotou uga ai natou ke natou toe fai feia. Kapau ʼe kotou fetogi ʼakotou fakatuʼutuʼu ke feala hakotou lagolago malohi ki te gaue faifakamafola, ʼe kotou faʼifaʼitakiʼi anai ia te faʼafai ʼa Sesu.—Mko. 6:31-34.
4. Kotea te ʼu lelei ʼe tou maʼu mo kapau ʼe tou faʼifaʼitakiʼi ia te faʼafai ʼa Sehova pea mo Sesu?
4 Kapau ʼe tou faʼifaʼitakiʼi ia te faʼafai ʼa Sehova pea mo Sesu lolotoga te ʼu mahina ʼaia, ʼe tou maʼu anai he ʼu tapuakina. Tokolahi ʼi totatou telituale ʼe natou logo anai ki te moʼoni. Pea ʼe tou fiafia anai koteʼuhi neʼe tou gaue maʼa Sehova pea neʼe tou lotofoaki. (Gaue 20:35) Kaʼe ko te maʼuhiga, neʼe tou fakafiafiaʼi ia totatou ʼAtua faʼafai pea mo tona ʼAlo.