Tou Fakamaʼuhigaʼi Ia Te Pilivilēsio Lahi ʼAē Ko Te Fai Fakamafola
1. Koteā te manatu ʼa te tokolahi ʼi te mālama ʼo ʼuhiga mo tatatou gāue fai fakamafola?
1 Ko te tokolahi ʼi te mālama ʼa Satana ʼe natou fakaʼuhiga ko tatatou gāue fai fakamafola ʼe ko ‘he meʼa vale ia.’ (1 Ko. 1:18-21) Kapau ʼe mole tou nofo tokaga, ko te manatu hala ʼaia ʼe feala ke tupu ai hatatou lotovaivai pea mo puli ai tatatou faʼafai. (Taag. 24:10; Isa. 5:20) Koteā te ʼu tupuʼaga ʼo te fakamaʼuhigaʼi tatatou pilivilēsio ʼaē ʼi totatou ʼuhiga Fakamoʼoni ʼa Sehova?—Isa. 43:10.
2. He koʼē ʼe feala ke ʼui ko te minisitelio ʼe ko he “gāue māʼoniʼoni”?
2 Ko He “Gāue Māʼoniʼoni”: Neʼe talanoa ia te ʼapositolo ko Paulo ki te minisitelio ohagē ko he “gāue māʼoniʼoni.” (Loma 15:15, 16) ʼE liliu feafeaʼi ia te minisitelio ko he “gāue māʼoniʼoni”? ʼI tatatou kau kiai, ʼe tou liliu ko he ‘ ʼu kaugā gāue’ ʼo “te Māʼoniʼoni,” ia Sehova, pea mo tou lagolago ai ki te fakatapuhā ʼo tona huafa. (1 Ko. 3:9; 1 Pet. 1:15) Maʼa Sehova, ko tatatou fai fakamafola ʼe ko “he sākilifisio fakavikiviki,” koia lā ʼaē ko te minisitelio ʼe ko he koga tāfito ʼaia ʼo tatatou tauhi.—Hep. 13:15.
3. He koʼē ko he pilivilēsio lahi ia te fakamafola ʼo te logo lelei?
3 Ko te fakamafola ʼo te logo lelei ʼe ko he pilivilēsio lahi, kae tokosiʼi te hahaʼi ʼe natou leleiʼia. ʼE mahino ia ʼe fiafia ia te kau ʼāselo mo kanapau lā neʼe foaki age te gāue ʼaia kiā nātou pea ʼe mahino papau ia ʼe lagi lelei ʼaupitō tanatou fakahoko te gāue ʼaia. (1 Pet. 1:12) Kae, neʼe filifili ia tātou e Sehova, ʼaē ko he ʼu hahaʼi agahala, ohagē ko he “ ʼu ʼipu kele,” ki te pilivilēsio fakaofoofo ʼaia!—2 Ko. 4:7.
4. ʼE feala ke tou fakahā feafeaʼi ʼe tou fakamaʼuhigaʼi ia te minisitelio?
4 Ko He Maʼua Tāfito: ʼI tatatou fakamaʼuhigaʼi moʼoni tatatou pilivilēsio ʼaia, ʼe kau te minisitelio ki “te ʼu meʼa ʼaē ʼe maʼuhiga tāfito” ʼi totatou maʼuli. (Filp. 1:10) Koia, ʼe tou fakatuʼutuʼu he temi ke tou kau ki te gāue ʼaia ʼi te vāhaʼa fuli. Ko he tagata fai māholo ʼe ina fakamaʼuhigaʼi tana pilivilēsio, ʼaē ke gaoʼi ʼi he foʼi māholo ʼe ʼiloa ʼi te mālamanei, ʼo ina teuteu anai ʼi muʼa ʼo tana ʼalu ʼo fai māholo pea mo gāue anai moʼo hikihiki tana faiva. ʼO toe fēia aipē mo tātou, ʼe tou teuteu anai iā muʼa ʼo tatatou ʼolo ʼo fai fakamafola, ke feala hatatou “fakaʼaogaʼi lelei te folafola ʼo te moʼoni,” pea ʼe tou gāue anai ke tuputupu totatou “fakapotopoto ʼi te faiakonaki.”—2 Tim. 2:15; 4:2.
5. Ko ai ʼaē ʼe ina leleiʼia tatatou minisitelio?
5 ʼAua naʼa kotou tuku te ʼu manatu hala ʼa te hahaʼi tokolahi ke natou fakavaivaiʼi koutou. Kotou manatuʼi ʼe kei ʼi ai te hahaʼi tokolahi ʼi totatou telituale ʼe natou leleiʼia tatatou ʼaʼahi ia nātou. Kae, ʼe mole tou faiga ke leleiʼia tātou e te hahaʼi. Ko te faʼahi ʼaē ʼe maʼuhiga age, ʼe ko te manatu ʼa Sehova, pea ʼe ina fakamaʼuhigaʼi ʼaupitō tatatou ʼu faiga mālohi.—Isa. 52:7.