Neʼe Foaki Mai Te Koloa
1 Neʼe maʼuhiga ʼaupitō ki te ʼapositolo ko Paulo ia te gāue fai faka mafola ʼaē neʼe fakatotonu age e te ʼAtua, ʼo ina fakatatau ki he “koloa.” (2 Ko. 4:7) Neʼe ina kātakiʼi ia te ʼu faigataʼaʼia pea mo te ʼu fakataga ʼuhi ko tana fakahoko ia te gāue ʼaia. Neʼe fai faka mafola tuʼumaʼu ki te hahaʼi ʼaē neʼe felāveʼi mo ia. ʼI tana ʼu folau ʼi ʼuta pea mo te tai, neʼe felāveʼi mo te ʼu tuʼutāmaki pea mo te ʼu faigataʼaʼia. ʼE tou lava faʼifaʼitakiʼi feafeaʼi ia Paulo pea mo fakahā ʼe maʼuhiga ʼaupitō kiā tātou ia totatou minisitelio? (Loma 11:13) He koʼē ʼe feala ke fakatatau totatou minisitelio ki he toe koloa maʼuhiga?
2 Ko He Koloa ʼe Maʼuhiga Age ʼi Te Tahi Atu ʼu Koloa: ʼI te agamāhani, kā maʼu e he tahi hona ʼu koloa fakamālama pea ʼe ina toe maʼu foki mo tona ʼu tuʼania pea ko te ʼu fiafia ʼaē ʼe ina maʼu mai ʼi te ʼu koloa ʼaia ʼe fakatemi pē ia. Kae ʼi totatou minisitelio, ʼe tou maʼu te ʼu lelei ʼe tologa maʼa tātou ʼo fēia mo ʼihi atu. (1 Tim. 4:16) ʼE tou faka fealagia ai ki te hahaʼi loto moʼoni ke natou ʼiloʼi ia Sehova, mo natou fai ia te ʼu fetogi ʼaē ʼe ʼaoga ʼi tonatou maʼuli, pea mo natou maʼu ia te ʼamanaki moʼoni ʼaē ke natou māʼuʼuli ʼo heʼegata. (Loma 10:13-15) ʼI tatatou faka maʼuhigaʼi ia totatou minisitelio, ʼe tou maʼu ai he fakatuʼutuʼu fakafiafia ʼi totatou maʼuli, ʼe tou logoʼi fualoa ai ʼe tou fai he gāue ʼe ʼaoga, pea mo tou maʼu he ʼamanaki fakafiafia ki te kā haʼu.—1 Ko. 15:58.
3 Kotou Fakahā ʼe Maʼuhiga ʼAupitō Kiā Koutou Tokotou Koloa: Kā maʼuhiga kiā tātou he meʼa, pea ʼi te agamāhani ʼe ʼiloga ʼi te foʼi falā ʼaē kā fakaʼaogaʼi kiai. ʼE ko he pilivilēsio hatatou fakaʼaogaʼi totatou temi pea mo totatou mālohi moʼo fakavikiviki kiā Sehova! (Efe. 5:16, 17) ʼI tatatou faʼahiga fakaʼaogaʼi ʼo totatou temi, ʼe tou fakahā ai ʼe maʼuhiga age kiā tātou te ʼu meʼa fakalaumālie ʼi te ʼu koloa fakamālama. Mai tona ʼaluʼaga ʼaē ʼe ko he toe koloa maʼuhiga ʼaē ʼe tou faka mafola, ʼe tou fia fakahoko anai te gāue ʼaia ʼaki he loto fiafia, pea ʼe tou fakaʼaogaʼi anai te ʼu faigamālie fuli pē moʼo tala ia te logo lelei.
4 ʼI te agamāhani, ʼe mole fufū he ʼu koloa maʼuhiga ʼaupitō, kae ʼe fakahāhā ke sio kiai te hahaʼi. Kapau ʼe hagē kiā tātou totatou minisitelio ko he koloa, pea ʼe takimuʼa anai te potu ʼaia ʼi totatou maʼuli. (Mat. 5:14-16) ʼAki he loto fakafetaʼi lahi, ʼofa pē ke tou faʼifaʼitakiʼi tuʼumaʼu ia te ʼapositolo ko Paulo, pea mo tou fakaʼaogaʼi te ʼu faigamālie fuli moʼo fakahā ʼe tou faka maʼuhigaʼi ʼaupitō totatou minisitelio, ohagē ko he koloa.