Ko Totatou Minisitelio ʼe Ko Te Fakahā ʼAia ʼo Te ʼOfa Moʼoni
1 ʼAki totatou minisitelio, ʼe tou fakahā ai tatatou fakalogo ki te ʼu fakatotonu lahi tokotahi e lua. (Mateo 22:37-39) Ko totatou ʼofa kia Sehova ʼe ina uga tatou ke tou vikiʼi ia ia. Ko totatou ʼofa ki totatou kāiga ʼe ina uga tatou ke tou fakaloto mālohiʼi nātou ke nātou ako pe koteā te finegalo pea mo te ʼu fakatuʼutuʼu ʼa te ʼAtua, ke feala ai ohage ko tatou, ke nātou ʼoʼofa kia Sehova pea mo nātou maʼu te fakapale ʼo te maʼuli heʼegata. Koia, ʼaki totatou minisitelio, ʼe tou faka maʼuhigaʼi ai te huafa ʼo Sehova pea mo vaevae te ʼamanaki taulekaleka ʼo te Puleʼaga ki totatou kāiga. Ei, ko totatou minisitelio ʼe ko te fakahā ʼaia ʼo te ʼofa moʼoni ki te ʼAtua pea mo te tagata.
2 Ko totatou ʼofa ʼe ina uga tatou ke tou palalau ki te hahaʼi fuli pe, ʼi te ʼu faʼahiga ʼaluʼaga fuli pe. (1 Ko. 9:21-23) Koʼeni te faʼifaʼitaki: ʼI te vakalele, neʼe heka te tagata ʼāfea ia tafa ʼo te patele Katolika. ʼAki ni ʼu fehuʼi fakapotopoto, neʼe uga e te tagata ʼāfea ke palalau faʼifaʼitaliha te patele, pea neʼe ina talanoa age leva ʼo ʼuhiga mo te Puleʼaga. ʼI te temi ʼaē neʼe hifo ai te patele ʼi te vakalele, neʼe ina toʼo totatou ʼu tohi e lua. ʼE ko he ikuʼaga lelei ʼaia ʼo te ʼofa moʼoni ʼaē neʼe fakahā e te tagata ʼāfea ki tona kāiga!
3 ʼE Uga Tatou e Te ʼOfa Moʼoni Ke Tou Fai Faka Mafola: ʼE mahino papau ia, ko nātou ʼaē ʼe kau ki te selevisi pionie vaeluaʼi temi pea mo nātou ʼaē ʼe pionie katoa, ʼe nātou fakahā te ʼofa moʼoni ki te ʼAtua pea mo tonatou kāiga. ʼE fakaʼaogaʼi tuʼumaʼu e te kau pionie tonatou temi pea mo tonatou mālohi moʼo tokoni ki te hahaʼi ʼi te faʼahi fakalaumālie. Koteā ʼaē ʼe ina uga ai nātou ke nātou fai te faʼahi ʼaia? Neʼe ʼui fēnei e te pionie: “ ʼE ʼau ʼiloʼi ko te ʼofa ʼe ko te fua ʼo te laumālie maʼoniʼoni. Kanaʼauala te ʼofa, neʼe mole ʼau maʼu anai te moʼoni, pea mo ʼau liliu ʼo pionie. Ko te ʼofa ʼe ina uga ʼau ke ʼau tokaga ki te hahaʼi pea mo te ʼu meʼa ʼaē ʼe ʼaoga kia nātou, pea ʼe ʼau fakatokagaʼi ko te ʼofa ʼe lave ki tonatou loto.” Neʼe fakahā e Sesu te ʼofa ʼaia ki te hahaʼi. ʼI te tahi ʼaho, ko ia pea mo tana ʼu tisipulo ʼaē neʼe kua gaʼegaʼe, neʼe nātou ʼolo ki he koga meʼa ke ‘ ʼai hanatou kiʼi mālōlō,’ kae neʼe muʼamuʼa te hahaʼi tokolahi ia nātou. Koteā ʼaē neʼe fai e Sesu? “Neʼe ʼofa mamahi kia nātou,” pea neʼe mole ina fakamuʼamuʼa te ʼu meʼa ʼaē neʼe loto kiai, kae neʼe ina “akonaki kia nātou te ʼu meʼa lahi.”—Maleko 6:30-34.
4 Tatau aipe peʼe fakafisi te hahaʼi ki te logo lelei ʼaē ʼe tou fakahā, kae ʼe lahi tatatou fiafia koteʼuhi ʼe tou ʼiloʼi, ʼi tatatou ʼofa kia nātou, neʼe tou fai ia meʼa fuli moʼo tokoni kia nātou ke nātou maʼu te maʼuli. ʼI te fakaʼosi, ka fakamāuʼi anai ia tatou fuli e Sesu, ʼe tou fiafia ʼaupito anai he neʼe tou fakahā te ʼofa moʼoni ʼi tatatou ‘fakahoko katoa totatou minisitelio.’—2 Tim. 4:5.