Koutou Fakahū Māmālie Ki Te Loto ʼo Te Hahaʼi Te ʼAmanaki ʼo Te Maʼuli Heʼegata
1 Logope la neʼe kumi e te tagata te ʼu faʼahiga meʼa moʼo fakatuai tona temi matuʼa pea mo fakaloaloa tona temi maʼuli, kae ʼe mole heʼeki feala ke ina tāʼofi te temi matuʼa pea mo te mate. ʼE tou loto fakafetaʼi ki te fakamahino mai e te Tohi-Tapu te tupuʼaga ʼo te liliu ʼa te hahaʼi ʼo matutuʼa pea mo mamate, pea mo tana fakamahino mai peʼe feafeaʼi anai te fetogi ʼo te ʼu faigataʼaʼia ʼo te temi matuʼa pea mo te pulihi anai ʼo te mate. ʼE fakahā lelei mai te ʼu moʼoni ʼaia e te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. ʼE tali fakalelei te tohi ki te ʼu fehuʼi ʼaē ʼe faigataʼa tatatou mahino kiai, ʼo ʼuhiga mo te maʼuli pea mo te mate, ʼo ina fakahā kia ia ʼaē ʼe ina lau te tohi ʼaia te temi ʼaē ka fakatuʼu ai anai te Palatiso.
2 ʼI Malesio, ʼe tou tufa anai te tohi Te ʼAtamai Mālama ʼaki te fakatuʼutuʼu ʼaē ke tou kamata he ʼu ako Tohi-Tapu. (Mateo 28:19, 20) Pea ʼe tou toe liliu anai ʼo ʼaʼahi ia nātou fuli ʼaē ʼe nātou fia logo ki te logo lelei ʼo te Puleʼaga. ʼAki te faʼahiga fai ʼaia, ʼe feala ke tou fakahū māmālie ki te loto ʼo te hahaʼi te ʼamanaki ʼo te maʼuli heʼegata. (Tito 1:2) Moʼo fakahoko te faʼahi ʼaia, ʼe lagi ʼaoga anai kia koutou te ʼu manatu ʼaē ʼe hoa mai.
3 ʼI takotou ʼuluaki fai palalau, ʼe feala ke koutou fai te fehuʼi ʼaenī:
◼ “Neʼe mole heʼeki ke fai koa la te fehuʼi ʼaē pe koʼe ʼe holi te hahaʼi ke nātou maʼuʼuli fualoa? [Koutou tuku ke fai hana tali.] Ko te kau Putisi, mo te kau Kilisitiano, mo te kau Inituisi, mo te kau Mahometa, pea mo te tahi ʼu hahaʼi ʼe nātou ʼamanaki fuli ki he maʼuli ʼi te hili ʼo te mate.” Koutou avahi te tohi Te ʼAtamai Mālama ʼi te kapite 6, “He Koʼe ʼe Tou Matutuʼa Pea Tou Mamate?” pea mo koutou lau te palakalafe 3. Koutou fakakaukauʼi mo ia te ʼu vaega ʼaē ʼe tuʼu ai. ʼI takotou lau te ʼu fehuʼi e lua ʼaē ʼe tuʼu ʼi te fakaʼosi ʼo te palakalafe, koutou fehuʼi age peʼe ina fia maʼu e ia totonu te ʼu tali kiai. Kapau ʼe loto kiai, pea koutou hoko atu te fai palalau ki te ʼu palakalafe ʼaē ʼe hoa mai kiai. Kua koutou kamata te ako Tohi-Tapu! Kae kapau ʼe mole loto kiai, pea koutou tuku age te tohi ke ina lau, pea mo koutou fakatuʼutuʼu ke koutou toe liliu mai, ʼo ʼaʼahi ia ia ʼo koutou tuku ke hili kiai he ʼaho katoa peʼe ko ʼaho e lua, ke koutou vakaʼi te ʼu tali.
4 Mokā koutou fai he ʼaʼahi ʼi takotou ʼosi tuku te tohi “Te ʼAtamai Mālama,” ʼe feala ke koutou ʼui fēnei:
◼ “Neʼe ʼau toe liliu mai ke tā vakaʼi te ʼu fehuʼi e lua ʼaē neʼe mole tā tali kiai, ʼo ʼuhiga mo te mate.” Koutou toe fakamanatuʼi age te ʼu fehuʼi. Pea koulua fai palalau ki te manatu ʼo te kapite 6, ʼi te kupu “Ko He Fakatuʼutuʼu Fakamataku.” Kapau ʼe feala, koutou hoko atu te ako peʼe koutou fai te fehuʼi fakamuli ʼi te fakaʼosi ʼo te palakalafe 7 moʼo fakatafito kiai takotou tahi ʼaʼahi. Koutou fai he ʼu fakatuʼutuʼu ke koutou toe liliu mai ʼo ʼaʼahi ia ia. Koutou tuku age he pepa fakaafe ki te ʼu fono, pea mo koutou fakamatala fakanounou peʼe feafeaʼi te fakaʼaluʼalu ʼo te ʼu fono. Koutou fakaafe fakamalotoloto ia ia ke kau kiai.
5 Peʼe koutou fai faka mafola ʼi te ʼu ʼapi peʼe koutou fai fagonogono faigamālie, ʼe feala ke koutou kamata fēnei takotou palalau:
◼ “Neʼe mole heʼeki ke fai koa la te fehuʼi ʼaē pe koteā ʼaē ka hoko anai kia tatou pea mo te kele ʼi te temi ka haʼu? [Koutou tuku ke fai hana tali.] ʼI te Tohi-Tapu, ko te ka haʼu ʼe faka ʼuhiga ki te Palatiso! ʼE ina fakamahino mai, ʼi te kamataʼaga, neʼe fakaliliu e te ʼAtua te koga meʼa ʼo te kele ko he palatiso taulekaleka, ʼo ina tuku kiai te taumatuʼa ʼaē neʼe ina fakatupu. Neʼe tonu ke nā fakafonu te kele katoa, ʼo fakaliliu māmālie ko he palatiso. Koutou fakatokagaʼi te fakamatala ʼaenī ʼo ʼuhiga mo te agaaga ʼo te palatiso ʼaia.” Koutou avahi te tohi Te ʼAtamai Mālama ʼi te pasina 8, pea koutou lau te palakalafe 9, ʼi te kupu tāfito “Te Maʼuli ʼi Te Palatiso.” Pea koutou fai palalau ki te ʼu puani ʼo te palakalafe 10, pea koutou lau te vaega ʼo Isaia 55:10, 11 ʼaē ʼe tuʼu ai. Koutou fakaafe ke hoko atu takotou fai palalau ki te agaaga ʼo te maʼuli ʼi te Palatiso ʼaē ka toe fakatuʼu anai pea mo koutou lau te palakalafe 11 ki te 16. Peʼe koutou fakaloto mālohi ia ia ke ina lau e ia totonu, pea mo koutou fakatuʼutuʼu ke koutou toe liliu mai ʼo palalau ki te faʼahi ʼaia.
6 Kapau neʼe mole kamata he ako ʼi te ʼuluaki fai palalau, ʼe feala ke koutou faiga ke koutou fai ʼi takotou toe liliu mai, ʼo koutou ʼui fēnei:
◼ “Ohage ko te meʼa ʼaē neʼe tā talanoa kiai ʼi tatā fai palalau talu mai ai, ʼe ko te fakatuʼutuʼu ʼa te ʼAtua ke ina fakaliliu te kele katoa ko he palatiso. Koia ʼe feala ke tou lagaʼi te fehuʼi ʼaenī: ʼE feafeaʼi anai te agaaga ʼo te Palatiso?” Koutou avahi te tohi Te ʼAtamai Mālama ʼi te kapite 1, pea koutou vakavakaʼi te palakalafe 11 ki te 16, ʼi te kupu “Te Maʼuli ʼi Te Palatiso ʼAē Ka Toe Fakatuʼu.” ʼOsi ʼaia, pea koutou fakahā te paki ʼo te pasina 4 mo te 5, pea koutou fehuʼi age peʼe fia maʼuli anai ʼi he ʼu ʼaluʼaga matalelei feiā. Pea koutou lau te kamataʼaga ʼo te palakalafe 17 ʼi te pasina 10. Kapau ʼe feala, koutou hoko atu te ako peʼe koutou ʼui age ʼi takotou toe liliu mai, ʼe koutou fakamahino age anai te meʼa ʼaē ʼe fakamaʼua ki he tahi ke feala hana maʼuli ʼi te Palatiso ʼaē ka toe fakatuʼu. Koutou tuku age he pepa fakaafe ki te ʼu fono, mo koutou fakamahino age te polokalama ʼo te fono, pea mo koutou fakaafe fakamalotoloto ia ia ke kau ki te fono ʼaia ʼi te Fale ʼo te Puleʼaga.
7 Ko te tohi Te ʼAtamai Mālama ʼe ko he meʼa gāue lelei ʼaupito moʼo fakahā ki te hahaʼi te fakapapau ʼaē neʼe fai mai e te ʼAtua ʼo ʼuhiga mo “te maʼuli heʼegata.” Ko te ʼu ako Tohi-Tapu ʼaē ʼe koutou fai mo te hahaʼi, ʼe feala anai ke ina fakahū māmālie ki tonatou loto te ʼamanaki taulekaleka ʼaia ʼaē ʼe haʼu mai te ʼAtua, “ ʼaē ʼe mole feala ke loi.”