ʼE Koutou Faka Mafola Koa ʼAki He Lototoʼa?
1 Neʼe puke pea mo fakamatakuʼi ia Petelo pea mo Soane e te kau fakafeagai, kae ʼaki he lototoʼa neʼe nā hoko atu tanā tala te logo ʼo te Puleʼaga. (Gaue 4:17, 21, 31) Kia tatou ia ʼaho nei, e feafeaʼi hatatou fai faka mafola ʼaki he lototoʼa?
2 Tou Faka Mafola ʼAki He Lototoʼa: Ko he tahi ʼe “lototoʼa” ʼe ko he tahi “ ʼe mole mataku ʼi te meʼa ʼaē neʼe ina fakatotonu ke ina fai, ʼe lotomālohi pea mo faʼa kātaki.” Maʼa te kau Kilisitiano moʼoni, ko te faka mafola ʼaki he lototoʼa ko tona faka ʼuhiga ʼe mole nātou matataku ʼi te palalau faʼifaʼitaliha mokā ʼi ai he faigamālie moʼo fakahā te logo lelei ki te hahaʼi. (Gaue 4:20; 1 Pet. 3:15) Ko tona faka ʼuhiga ʼe mole tou ufiufi ʼi te faka mafola te logo lelei. (Pes. 119:46; Loma 1:16; 2 Tim. 1:8) Koia, ko te lototoʼa ʼe ko he kalitate ʼe ʼaoga moʼo fakahoko tatatou fekau ʼaē ko te faka mafola ʼo te logo lelei ʼi te temi ʼaenī ʼo te fakaʼosi. ʼE ina uga tatou ke tou vaevae te logo lelei mo te hahaʼi ʼi te ʼu potu fuli ʼaē ʼe tou maʼu ai nātou.—Gaue 4:29; 1 Ko. 9:23.
3 Tou Lototoʼa ʼi Te Faleako: ʼE faigataʼa koa hakotou faka mafola ki takotou ʼu kaugā ako heʼe koutou matataku peʼe koutou umiuminoa? ʼI ʼihi temi ʼe mole faigafua; ʼi tona fakahagatonu, ʼe feala ke faigataʼa moʼoni. Kae ʼe foaki atu anai e Sehova te mālohi mo kapau ʼe koutou kole te lototoʼa moʼo faka mafola ki te hahaʼi. (Pes. 138:3) Ko te lototoʼa ʼe tokoni atu anai ke koutou fakahā ko koutou ko te Fakamoʼoni ʼa Sehova, pea ke koutou tuʼu mālohi mokā valokiʼi koutou. Ki muli age, ko takotou faka mafola ʼi te faleako ʼe feala ke ina hāofaki ia nātou ʼaē ʼe fakalogo atu kia koutou.—1 Tim. 4:16.
4 Tou Lototoʼa ʼi Te Gāue: ʼI takotou fale gāue, ʼe ʼiloʼi koa ko koutou ko te Fakamoʼoni ʼa Sehova? ʼE lagi feala pe ke logo takotou ʼu kaugā gāue ki te logo lelei mo kapau ʼe koutou faka mafola age kia nātou. ʼE toe tokoni atu anai takotou lototoʼa ke koutou toʼo hakotou ʼu ʼaho mālōlō ki takotou ʼu fono pea mo te ʼu fakatahi.
5 Tou Lototoʼa Mokā ʼAhiʼahiʼi Tatou: ʼE maʼuhiga ke tou lototoʼa mokā hoko mai he ʼu fakafeagai. (1 Tes. 2:1, 2) ʼE tokoni mai ke tou pipiki maʼu ki tatatou tui mokā fakamatakuʼi tatou, peʼe fakalainoaʼi tatou, peʼe fakatagaʼi tatou. (Filp. 1:27, 28) ʼE tou maʼu ʼaki te lototoʼa te mālohi moʼo tauʼi te ʼu fakaneke ʼaē ke tou līaki te ʼu lekula ʼo Sehova, totatou ʼAtua. ʼE tou lotomālohi ai ke tou nofo tokalelei mokā laga kē mai te hahaʼi.—Loma 12:18.
6 Tatau aipe pe koteā te ʼu faigataʼaʼia ʼaē ʼe tou tahi tauʼi, kae ʼofa pe ke tou faʼa kātaki ʼo faka mafola te logo lelei ʼaki he lototoʼa.—Ef. 6:18-20.