Tou Ako Te Tohi ʼo Te ʼu Hisitolia Faka Tohi-Tapu
1 Neʼe ʼui fēnei e te tagata ʼāfea ʼo te kokelekasio: “ ʼE ʼaoga te tohi ʼaia kia tatou.” Neʼe ʼui e te tahi tēhina: “ ʼE lahi te toʼo ʼo te tohi ʼaia e te hahaʼi. ʼE faigafua, kae ʼe lahi ʼaupito te ʼu meʼa ʼe tou ako ai!” Ko te ʼu palalau ʼaia ʼa te tokolahi ʼo ʼuhiga mo Te Tohi ʼo Te ʼu Hisitolia Faka Tohi-Tapu. Ko te tohi ʼaia ʼe ina foaki mai koa he tupuʼaga ke tou maʼu te taʼi loto fakafetaʼi ʼaia? Ei! ʼE lahi te ʼu agaaga lelei ʼo te tohi ʼe tou fia sioʼi pea ʼe malave ki totatou loto: te fakahoahoa ʼo te ʼu hisitolia ʼo mulimuli ki te temi ʼaē neʼe hoko ai, tona ʼu mataʼi tohi lalahi, tona ʼu tuʼuga paki, tona faʼahiga fakamahino, pea mo tona ʼu hisitolia nounou. Koia ʼe ko he fakaloto mālohi lahi kia tatou hatatou ako te koga ʼaia ʼo te Folafola ʼo te ʼAtua ʼi te Ako Tohi ʼo te kokelekasio. ʼE tou kau koa ki te ako ʼaia ʼi te vāhaʼa fuli? He koʼe ʼe tonu ke tou fai feiā?
2 Ia Isaia 30:20, ʼe fakahigoaʼi ia Sehova ko totatou “Tagata Faiako Lahi.” ʼE tonu ki te kau Kilisitiano takitokotahi ke nātou fakalogo lelei mokā palalau mai ia Sehova ʼaki tana Folafola, pea mo te ʼu tohi faka Tohi-Tapu ʼaē ʼe foaki mai e “te kaugana agatonu mo fakapotopoto.” (Mat. 24:45; Isa. 48:17, 18) ʼE mahino ia ʼe moʼoni te faʼahi ʼaia ʼo ʼuhiga mo te tohi ʼo Te ʼu Hisitolia Faka Tohi-Tapu. ʼE lava feafeaʼi hona ʼaoga lahi kia koutou mo kapau ʼe koutou ako te tohi ʼaia?
3 Koutou Teuteuʼi Ke Koutou Fai Tali: Koutou fakaʼaogaʼi he temi lahi ʼi te vāhaʼa fuli moʼo teuteuʼi te ako tohi. ʼE mole he numelo ʼo te ʼu pasina ʼo te tohi, koia neʼe tā e te Sosiete te polokalama ʼo te ʼu kapite ʼaē ʼe tonu ke ako, pea ʼi te agamāhani ʼe ko kapite e tolu ʼi te vāhaʼa fuli. Koutou fakakaukauʼi te ʼu kapite takitahi ʼaē kua hinoʼi ke akoʼi. Koutou tohi ʼi takotou tohi te faʼahiga fakaʼaogaʼi ʼo te ʼu puani ʼaē neʼe koutou talanoa kiai. Pea koutou vaevae mo takotou ako tohi te ʼu puani ʼaē neʼe koutou teuteuʼi. ʼI te ʼosi lau e te tēhina te kapite katoa, ko te tēhina takitaki ʼo te ako tohi ʼe ina fai anai he ʼu fehuʼi, moʼo uga te ako tohi ke nātou fai he ʼu tali lelei, ʼe fakahā ai pe koʼe ʼe maʼuhiga te ʼu puani ʼaia kia tatou pea ʼe feafeaʼi tona fakaʼaogaʼi. Ko te ʼu vaega ʼaē ʼe tuʼu ʼi te fakaʼosi ʼo te kapite, ʼe tonu anai ke lau mo kapau ʼe ko he ʼu vaega ʼo te Tauhi Foʼou. Ko te ʼu vaega ʼaē ʼe loaloaga, ʼe feala ke vaevae ke lau faka koga veliveli, ke feala ki he ʼu tēhina mo tuagaʼane kehekehe ke nātou lau te ʼu koga tohi ʼaia.
4 Ko te tēhina ʼaē ʼe ina takitaki te ako tohi, ʼe tonu ke tokoni ki te ako tohi ke nātou fakaʼaogaʼi fakalelei te Tohi-Tapu, pea ke nātou mahino ki te ʼaoga ʼo te ʼu puani ʼaē ʼe nātou vakaʼi. Kapau ʼe koutou fai te ʼuluaki tali, pea koutou fai he tali ʼe faigafua, ʼe tali fakahagatonu ki te fehuʼi. Kapau kua fai e he tahi te ʼuluaki tali, pea ʼe koutou lava hilifaki kiai he tahi ʼu tali. Koutou tali ʼaki takotou ʼu palalau totonu, pea mo koutou fiafia ʼi takotou kau ki te fai palalau.
5 Tou fakaʼamu ke tou vakavakaʼi fakatahi te ʼu hisitolia taulekaleka ʼo Te Tohi ʼo Te ʼu Hisitolia Faka Tohi-Tapu. ʼE nātou fakaloto mālohiʼi anai tatou ke loloto totatou ʼofa, pea mo tou fakalogo ki te ʼu fakatotonu ʼa Sehova.—Pes. 119:97.