Te ʼu Tapuakina Heʼe Kita Loto Fakafetaʼi Ki Te ʼOfa ʼo Sehova—Koga 1
1 Neʼe tohi fēnei e te ʼapositolo ko Soane: “E tou ofa, koteuhi [ko Sehova] nee uluaki ofa ia kia tatou.” (1 Soa. 4:19) Ka tou fakakaukauʼi te ʼu meʼa fuli ʼaē neʼe foaki mai e Sehova maʼa tatou, pea ʼe uga ai tatou ke tou loto fakafetaʼi kia te ia. Neʼe tuku mai e Sesu he faʼifaʼitaki lelei ki te faʼahi ʼaia, he neʼe fakalogo ʼo ʼalu ʼo kalagaʼi te huafa ʼo te ʼAtua pea mo tona Puleʼaga. (Soa. 14:31) ʼE lelei ke tou tokagaʼi he ʼu agaaga ʼe tou lava fakahā ai tatatou loto fakafetaʼi ki te ʼofa ʼo Sehova, pea mo te ʼu tapuakina ʼaē ʼe tou maʼu ai.
2 Tou ʼOlo Ki Te ʼu ʼApi: Neʼe akoʼi e Sesu ki tana ʼu tisipulo peʼe feafeaʼi te fai ʼo te gāue ʼaē ko te faka mafola ʼo te Puleʼaga. ʼE hā lelei ʼi tana ʼu fakatotonu, neʼe nātou ʼolo ki te ʼu ʼapi, ʼo faka mafola te logo lelei. (Lu. 9:1-6; 10:1-7) ʼE tonu ke kita ʼofa ki te ʼAtua pea mo tokita kāiga ke kita haga ʼalu ki te ʼu ʼapi, heʼe kita felāveʼi ai mo te mole fia logo pea mo te fakafeagai ʼa te hahaʼi. Kae ʼi takita ʼalu ʼi te ʼu ʼapi, ʼe fua lelei kia kita, heʼe ʼāsili mālohi ai takita tui, mo takita falala, pea mo takita ʼamanaki.
3 ʼAki te takitaki ʼa te kau ʼaselo, neʼe tou maʼu te tokolahi ʼe nātou pakupaku pea mo fia ʼiʼinu ki te moʼoni. (Apk. 14:6) Neʼe ʼui e ʼihi hahaʼi ʼi te temi ʼaē neʼe tau age te Fakamoʼoni ki tonatou ʼapi, neʼe nātou lolotoga faikole ke tokoni age he tahi kia nātou. ʼI te motu ʼi Caraïbes, ko te ʼu Fakamoʼoni e lua pea mo te kiʼi tamasiʼi, neʼe nātou ʼolo ʼo faka mafola ʼi te ʼu ʼapi. Neʼe kua fia tuku e te ʼu Fakamoʼoni e lua tanā faka mafola, kae neʼe toe ʼalu te kiʼi tamasiʼi ʼo fisifisi ki te tahi matapā. Neʼe avahi mai te matapā e te fafine kei finemui. ʼI te sio ʼa te ʼu Fakamoʼoni ki te faʼahi ʼaia, neʼe nā ʼolo atu ʼo palalau ki ai. Neʼe ina fakaulu nātou ki tona ʼapi, pea ina fakamahino age neʼe faikole ʼi te temi ʼaia ki te ʼAtua, ke ʼolo age he ʼu Fakamoʼoni ʼo akoʼi age te Tohi-Tapu!
4 Te Faka Mafola ʼi Te ʼu Ala: Mai tona ʼuhiga ʼaē kua faigataʼa te maʼu ʼo ʼihi hahaʼi ʼi tonatou ʼapi, koia ʼe lelei ai te faka mafola ʼi te ala ki te hahaʼi. Tahi ʼaē meʼa, ko te tokolahi ʼe nātou nonofo ʼi te ʼu kolo ʼe punupunu, peʼe ko he ʼu falefata ʼe mole feala hatatou faka mafola ai, heʼe leʼohi. Kae ko tatatou loto fakafetaʼi ki te ʼofa ʼo Sehova, ʼe ina uga tatou ke tou fakaʼaogaʼi te ʼu faigamālie fuli, moʼo tala ki te hahaʼi te logo ʼo te Puleʼaga, ʼo kau ai mo te fagono ʼi te ala.—Taag. 1:20, 21.
5 Tou Fai Te ʼu ʼAʼahi: Mai tona ʼuhiga ʼaē ʼe tou kumi te hahaʼi ʼaē ʼe “nātou ʼiloʼi tonatou masiva fakalaumālie,” koia ʼe tou fia fai te meʼa ʼaē ʼe feala ke ina fakafimālie nātou ʼi te faʼahi ʼaia. (Mat. 5:3, MN ) Koia ʼe tonu ai ke tou liliu moʼo fakavai te pulapula ʼo te moʼoni ʼaē neʼe tou tō. (1 Ko. 3:6-8) Ko te tuagaʼane ʼi Ositalalia neʼe ina tufa te kiʼi pepa lotu ki te fafine neʼe mole faʼa fia logo ki tana faka mafola. Kae neʼe faigaʼi e te tuagaʼane ke ina maʼu te ʼapi ʼo te fafine ʼaia. ʼI tana toe maʼu te fafine ʼaia, neʼe fakatokagaʼi e te tuagaʼane, ʼi te hili ʼo te ʼuluaki ʼaʼahi, neʼe toʼo e te fafine te Tohi-Tapu totogi kovi. Pea neʼe kamata fai e te tuagaʼane tana ako!
6 Tou Fai He ʼu Ako Tohi-Tapu: Ko te faʼahi ʼaia ʼe feala ke liliu ko he meʼa fakafiafia ʼaupito, pea mo liliu ko he fakapale ki totatou minisitelio. ʼE ko he tapuakina lahi hatatou tokoni ki te hahaʼi ke nātou ako peʼe ko ai ia Sehova, pea mo hatatou sio ʼe nātou fetogi tonatou maʼuli moʼo fakafiafia ia ia, pea mo fakamoʼoni ki tanatou papitema moʼo fakahā kua nātou foaki tonatou maʼuli ki te ʼAtua!—1 Tes. 2:20; 3 Soa. 4.
7 ʼI te 2 koga, ʼe tou vakaʼi anai te tahi ʼu ʼaluʼaga ʼe tapuakina ai tatou, ʼuhi ko tatatou loto fakafetaʼi ki te ʼofa ʼo Sehova.