Te Fai Faka Mafola ʼi Te ʼu ʼApi
1. Koteā te fehuʼi ʼe lagaʼi ʼo ʼuhiga mo te fai faka mafola ʼi te ʼu ʼapi, pea koteā tona tupuʼaga?
1 “Ko nātou ʼaē kua māhani ʼi te ʼu faʼahi kehekehe ʼi te faka mafola ʼo te Moʼoni, ʼe natou manatu tahi anai ki te ʼui ʼaē, ʼo aʼu mai ki te temi nei, ʼe ko te fai faka mafola ʼi te ʼu ʼapi moʼo tufa ʼo te tohi LʼAURORE DU MILLÉNIUM, ʼe ko te faʼahi ʼaē ʼe fua lelei age moʼo faka mafola ʼo te Moʼoni.” Ko te ʼu palalau ʼaia ʼi Te Tule Leʼo ʼo te ʼaho 1 ʼo Sūlio 1893 (Fakapilitania), neʼe fakahā lelei ai te maʼuhiga ʼo te fai faka mafola ʼi te ʼu ʼapi. ʼE ʼiloʼi e te hahaʼi ʼi te mālamanei ʼe ko te gāue ʼaia ʼaē ʼe fakahoko tāfito e te kau Fakamoʼoni ʼa Sehova. ʼE kei fua lelei koa te faʼahiga fai ʼaia, mai tona ʼaluʼaga ʼaē ʼi ʼihi fenua, kua fakahaʼuhaʼu ʼo faigataʼa te maʼu ʼo te hahaʼi ʼi tonatou ʼu ʼapi?
2. Koteā te fakatafito faka Tohi-Tapu ki te fai faka mafola ʼi te ʼu ʼapi?
2 ʼE Fakatafito Ki Te Tohi-Tapu Pea ʼe Maʼuhiga: Ko te fai faka mafola ʼi te ʼu ʼapi ʼe fakatafito ki te Tohi-Tapu. Neʼe fakatotonu e Sesu ki tana toko 70 kau tisipulo ke natou ʼolo taki toko lua ki te ʼu ʼapi. (Luka 10:5-7) Hili pe te mate ʼo Sesu, ʼe ʼui ʼi te Tohi-Tapu ʼo ʼuhiga mo tana kau tisipulo: “Ko te aho fuape, nee mole gata tanatou akonaki pea mo tanatou fagonogono te Logolelei, . . . i te faletapu pea mo te u api.” (Gaue 5:42) Neʼe toe faʼafai ia te ʼapositolo ko Paulo ʼi te faiako ʼi te ʼu ʼapi.—Gaue 20:20.
3. Koteā ʼihi ʼu lelei ʼo te fai faka mafola ʼi te ʼu ʼapi?
3 Ko te fai faka mafola ʼi te ʼu ʼapi ʼe ko te faʼahiga fai pe ʼaia ʼaē ʼe maʼuhiga moʼo faka mafola ʼo te logo lelei iā ʼaho nei. ʼE ko he fakatuʼutuʼu lelei ʼaia ke tou “kumikumi” te hahaʼi ʼaē ʼe tāu mo nātou te logo ʼaia. (Mat. 10:11) ʼI te agamāhani, ʼe fiafia te hahaʼi ʼi tonatou ʼu ʼapi. Ko tatatou fai palalau mo nātou—ʼo tou logo ki tonatou leʼo, mo tou sio ki tonatou fofoga, pea mo sio ki te koga meʼa ʼaē ʼe natou māʼuʼuli ai—ʼe feala ai ke tou mahino ki te ʼu meʼa ʼaē ʼe natou fia logo kiai pea mo fia palalau kiai. Pea ʼi te agamāhani, ʼe tou maʼu ai he faigamālie lelei ke tou fai palalau mo nātou.
4. Koteā ʼaē ʼe feala ke tou fai ke fua lelei ai tatatou fai faka mafola ʼi te ʼu ʼapi?
4 Tou Fai He ʼu Fetogi: Neʼe lotolelei te ʼapositolo ko Paulo ke ina fai he ʼu fetogi “ ʼuhi ko te logo lelei.” (1 Ko. 9:23, MN ) ʼE lagi feala ke tou fetogi tatatou polokalama ke tou fai faka mafola ai ʼi te ʼu lakaga ʼaē ʼe feala ke tou maʼu ai te hahaʼi ʼi tonatou ʼu ʼapi, ohage ko te afiafi, peʼe ʼi te fakaʼosi vāhaʼa, peʼe ʼi te ʼu ʼaho mālōlō. Kotou tohi te ʼu ʼapi ʼaē neʼe lāvaki, pea kotou faiga ke kotou toe liliu ʼi he tahi ʼaho peʼe ʼi he tahi hola ʼo te vāhaʼa.
5. ʼE lava feafeaʼi ki te hahaʼi ʼaē ʼe māhahaki hanatou kau ki te gāue ʼi te ʼu ʼapi?
5 Māʼiape lā mo nātou ʼaē ʼe māhahaki ʼe feala ke natou kau ki te fai faka mafola ʼi te ʼu ʼapi. Lagi feala ke tou fakatuʼutuʼu ke tou kaugā ʼolo mo nātou ʼaia ʼi te ʼu ʼapi ʼaē ʼe faigafua te kaku kiai, ke feala ai hanatou ʼolo māmālie ʼi te gāue. Ko te tuagaʼane neʼe kinakina tana mānava pea neʼe feala ke ina fai he ʼapi e tahi pea neʼe tonu ke ʼatalitali ʼi he vaeluaʼi hola pea toe hoko atu. Kae neʼe fiafia ʼaupito ʼi tana ʼosi gāue faka mafola fakatahi mo te ʼu tēhina mo tuagaʼane!
6. He koʼe ʼe tonu ke tou kau tuʼumaʼu ki te fai faka mafola ʼi te ʼu ʼapi?
6 ʼE kei lahi te hahaʼi ʼaē ʼe tou maʼu ʼi te gāue, ʼe natou hage ko he ʼu ōvi. Ko te kau fagona neʼe fisifisi ki te matapā pea neʼe ʼui fēnei age e ia ʼoʼona te ʼapi: “Haʼu. ʼE au ʼiloʼi pe ko ai ia koe. Neʼe au faikole ki te ʼAtua ke ina fekauʼi mai he tahi moʼo tokoni mai, pea neʼe au logo ai ki te fisifisi ʼo te matapā. Neʼe logo ki taku faikole pea neʼe ina fekauʼi mai koe.” Ko te ʼu fua ʼaē ʼe tou maʼu ʼi te gāue ʼaia, ʼe ko he fakamoʼoni ko Sehova ʼe ina tapuakina te faʼahiga fai ʼaia ʼo te faka mafola. (Mat. 11:19) Kotou fakatotonu ke kotou kau tuʼumaʼu ki te fai faka mafola ʼi te ʼu ʼapi.