Ke Hoholo Atu Tatatou Fai Faka Mafola ʼi Te ʼu ʼApi
1 ʼI te Iselaele ʼāfea, neʼe fai te ʼu sakilifisio ʼi te ʼaho fuli. (Ek. 29:38-42) Ko te afi ʼo te ʼaletale neʼe ulo hoholo; ko te ʼahu ʼo te afi ʼaē ʼe hake neʼe ko he meʼa neʼe “mamanu fakafiafia” ʼo leleiʼia e Sehova. (Ek. 29:18) Ia ʼaho nei, ʼe maʼuhiga ke tou “momoli tuʼumaʼu ki te ʼAtua he sakilifisio fakavikiviki, ko tona faka ʼuhiga ko te fua ʼo te ʼu laugutu ʼaē ʼe nātou fai te fakahā ia muʼa ʼo te hahaʼi ki tona huafa.” (Hep. 13:15) ʼO mole tou fakaʼaogaʼi te ʼu sakilifisio ʼaē neʼe tuʼu ʼi te Lao, kaʼe ke tou atolasio kia Sehova ʼaki tatatou fakamatala hoholo ʼo tana ʼu fakavikiviki.—Is. 43:21; Gāue 5:42.
2 Ko Sesu Kilisito, te Fakamoʼoni lahi ʼaē neʼe maʼuli ʼi te kele ʼaenī, neʼe ina ako mai peʼe feafeaʼi tatatou fai he atolasio maʼa ʼaki tatatou foaki he ʼu sakilifisio fakavikiviki. Neʼe ina akoʼi ki tana kau tisipulo te maʼuhiga ʼaupito ʼo te logo ʼaē neʼe nātou faka mafola. Neʼe ina ʼiloʼi ko te ala ʼaē ʼe maʼuhiga ʼaupito moʼo fakahā ʼo te logo lelei ki te hahaʼi, ko te ʼolo ʼo faka felāveʼi mo nātou ʼi tonatou ʼu ʼapi. (Mat. 10:7, 12) Koia ʼe tou maʼu ai, neʼe mulimuli te kau ʼapositolo ki tana takitaki ʼaē ʼe haʼu mai te ʼAtua ʼo ʼuhiga mo te fai faka mafola ʼi te ʼu ʼapi.—Gāue 20:20.
3 ʼE mole kehe ia mo te faʼahi ʼe fai ia ʼaho nei. ʼUhi ko nātou ko te ʼu tisipulo ʼa Sesu, ko te kau Kilisitiano moʼoni ʼe nātou muliʼi tana faʼifaʼitaki ʼaki tanatou faka mafola te logo lelei ʼi te ʼu ʼapi. Logope la peʼe fatufatuʼi pea mo fakatagaʼi tatou ʼuhi ko te faʼahi ʼaia, ko te toko lauʼi miliona neʼe nātou ako te moʼoni pea ko te lauʼi teau afe tisipulo foʼou ʼe nātou hū ki te toe hahaʼi tokolahi ʼi te taʼu fuli, ʼo nātou fakamoʼoni ko te ala ʼaia ʼa Sehova moʼo fakahoko ʼo tona finegalo. Ko te tupuʼaga la ʼaia ʼo tatatou faʼa kātaki ʼi tatatou minisitelio.
4 Te ʼu Fua Lelei ʼo Te Fai Faka Mafola ʼi Te ʼu ʼApi: “Ko te ʼAtua ʼe mole fakapulepule . . . ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.” (Gāue 10:34, 35) Ko tatatou ʼolo ʼaē ki te ʼu ʼapi takitahi ʼi totatou telituale ʼe hā lelei ai ʼe mole tou fakapulepule, ʼo faka fealagia ai ki te hahaʼi takitokotahi ke nātou logo tuʼumaʼu ki te logo ʼo te Puleʼaga. Pea ko te hahaʼi ʼaē ʼe fia logo ʼe nātou maʼu he tokoni ʼo mulimuli pe ki te ʼu meʼa ʼaē ʼe ʼaoga kia nātou takitokotahi.
5 Ko te kau faka mafola fuli, ʼo kau ki ai te kau tūpulaga, te hahaʼi matutuʼa, pea mo nātou ʼaē ʼe foʼofoʼou, ʼe feala ke nātou kau ki te fai faka mafola ʼi te ʼu ʼapi. ʼI te faʼahi ʼaia, ko tatou takitokotahi ʼe feala ke tou “fakahā ia muʼa ʼo te hahaʼi ʼo ʼuhiga mo te mauli.” (Lom. 10:10) Ko tatatou gāue mo niʼihi ʼi te minisitelio ʼi te ʼu ʼapi ʼe fakatahiʼi ai tatou ʼi te ʼofa pea mo te logo tahi. ʼI te temi ʼaia, ʼe tou foaki ai anai te fealagia ke tou fakahā tatatou faʼa kātaki mokā ʼe tou felāveʼi mo niʼihi ʼe mole fia logo peʼe ko te fakafeagai. Ko te fakahā ʼaia ʼo tatatou tui ki te hahaʼi ʼe ina fakaliliu ai tatou “ko te meʼa ʼe sioʼi ʼi te malamanei,” ʼo feala ai te ʼiloʼi e te hahaʼi ʼaē ʼe fakamalotoloto neʼe tou fakatuʼutuʼu moʼo akoʼi ʼo te Tohi-Tapu pea ʼe feala ke nātou fai hanatou ako. (1 Ko. 4:9) Ko te ʼu meʼa fuli ʼaia ʼe hā lelei mai ai ko Sehova ʼe ina tapuakina te fai faka mafola ʼi te ʼu ʼapi pea ʼe ina fakaʼaogaʼi te faʼahi ʼaia moʼo tatānaki ʼo te toe hahaʼi tokolahi ki tona “fale” ia tana tauhi maʼa.—Is. 2:2-4.
6 ʼI te temi nei ʼo lahi ake ʼi he tahi temi ʼo te hisitolia, ʼe ʼaoga ke fagono te hahaʼi ki te logo ʼo te Puleʼaga. Ke hoholo atu tatatou fai faka mafola ʼi te ʼu ʼapi ʼo aʼu ki te temi ʼe ʼui mai ai e Sehova kua feʼauga. (Is. 6:11) ʼAki tatatou fai te faʼahi ʼaia, ʼe fakapale anai tatou ʼaki te fiafia ʼaē ʼe haʼu mai tatatou fakahā ki te hahaʼi ia te logo maʼuhiga pea ʼe fua lelei ʼi te minisitelio ʼi te temi fakaʼosi ʼaenī.—1 Ko. 15:58.