Te Fai Fakamafola ʼi Te ʼu ʼApi—He Koʼē ʼe Maʼuhiga ʼi Te Temi Nei?

“ ʼI te ʼaho fuli pē, ʼi te fale lotu pea mo te ʼu ʼapi, tuʼumaʼu pē, neʼe natou haga akoʼi pea mo tala ia te logo lelei ʼo ʼuhiga mo Kilisito, Sesu.”—GĀUE 5:42.

1, 2. (a) Ko te faʼahiga fai fakamafola fea ʼaē ʼe logona ai te kau Fakamoʼoni ʼa Sehova? (b) Koteā ʼaē kā tou vakaʼi anai ʼi te ʼalatike ʼaenī?

KO HE faʼahi kua māhani kiai ia te hahaʼi ʼi te ʼu potu fuli pē ʼo te kele. Ko he toko lua ʼe nā teu maʼa pea ʼe nā fakaovi ki he ʼapi, pea ʼe nā fakatuʼutuʼu ke nā fai palalau fakanounou mo he tahi ʼo te loto fale ʼaki te Tohi-Tapu ʼo ʼuhiga mo te Puleʼaga ʼo te ʼAtua. Kapau ko ia ʼo te loto fale ʼe fia logo, pea ʼe lagi nā fakahā age anai ia he tohi Fakatohi-tapu pea mo nā fakahā age ʼe feala he fai ʼo hana ako Tohi-Tapu kae mole totogi. ʼOsi ʼaia, pea nā hoko atu tanā fai fakamafola ki he tahi age ʼapi. Kapau ʼe kotou kau ki te gāue ʼaia, ʼe lagi kotou fakatokagaʼi ʼi te agamāhani, iā muʼa pē ʼo hakotou palalau ki te hahaʼi kua natou ʼiloʼi mai ko koutou ko he Fakamoʼoni ʼa Sehova. ʼIo, kua logona tatatou fai fakamafola ʼaē ʼi te ʼu ʼapi.

² ʼE lahi te ʼu faʼahiga fai fakamafola ʼe tou fakaʼaogaʼi moʼo fakahā te logo ʼaē neʼe foaki e Sesu ke fakamafola pea mo fai ni ʼu tisipulo. (Mat. 28:19, 20) ʼE tou fai fakamafola ʼi te ʼu fakatauʼaga, ʼi te ʼu ala, pea mo te ʼu faʼahi ʼaē ʼe tou maʼu ai ni hahaʼi. (Gāue 17:17) ʼE kaugamālie te hahaʼi ʼaē ʼe tou felōgoi mo nātou ʼaki te telefoni pea mo tou faitohi kiā nātou. ʼE tou fakahā ia te ʼu moʼoni ʼo te Tohi-Tapu kiā nātou ʼaē ʼe tou felāveʼi mo nātou ʼi tatatou ʼu gāue ʼi te ʼaho fuli. ʼE ʼi ai mo tatatou tuʼasila ʼi te Itineti, ʼaē ʼe feala ai ki te hahaʼi ke natou maʼu he ʼu fakamatala Fakatohi-tapu iā lea e 300.a Pea ʼe fua lelei ia te ʼu faʼahiga fakatuʼutuʼu fuli ʼaia moʼo fakahā ia te logo. Kae ʼe lahi te ʼu fenua, ko tatatou faʼahiga fai tāfito moʼo fakahā ia te logo lelei, ʼe ko te fai fakamafola ʼi te ʼu ʼapi. Koteā ʼaē ʼe fakatafito kiai ia te faʼahiga fai fakamafola ʼaia? He koʼē neʼe fakaʼaogaʼi tāfito e te hahaʼi ʼa te ʼAtua iā ʼaho nei ia te faʼahiga fai fakamafola ʼaia? Pea he koʼē ʼe maʼuhiga ia te taʼi fai fakamafola ʼaia ʼi te temi nei?

Te Faʼahiga Fai Fakamafola ʼi Te Temi ʼo Te Kau ʼApositolo

3. Koteā te ʼu fakatotonu ʼo ʼuhiga mo te fai fakamafola neʼe foaki e Sesu ki te kau ʼapositolo, pea koteā ʼaē ʼe hā mai ʼo ʼuhiga mo te meʼa ʼaē neʼe tonu ke natou fai ʼi tanatou fai fakamafola?

³ ʼE fakatafito ki te Tohi-Tapu ia te faʼahiga fai fakamafola ʼaē ʼi te ʼu ʼapi. ʼI te temi ʼaē neʼe fekauʼi ai e Sesu te kau ʼapositolo ke natou ʼolo ʼo fai fakamafola, neʼe ina fakatotonu fēnei age kiā nātou: “ ʼI he kolo lahi, pe ko he kolo veliveli ʼe kotou hū kiai, kotou kumi pe ko ai ʼaē ʼe tāu mo ia.” Neʼe tonu ke natou kumi feafeaʼi ia nātou ʼaē ʼe tāu mo nātou ia te logo lelei? Neʼe ʼui age e Sesu ke natou ʼolo ki te ʼu ʼapi ʼo te hahaʼi, ʼo ʼui māʼana kiā nātou: “ ʼI takotou hū ki te loto fale, kotou fakaʼalofa ki ʼona hahaʼi; pea kapau ʼe tāu mo te ʼapi, pea ke haʼu kiā te ia te tokalelei ʼaē ʼe kotou fakaʼamu ke ina maʼu.” Neʼe tonu koa ke natou ʼolo kiō nātou kae neʼe heʼeki fakaafe nātou? Kotou fakatokagaʼi te ʼu palalau ʼaenī ʼa Sesu: “Kapau ʼe mole fakatalitali koutou e he tahi peʼe mole fagono ki ʼakotou palalau, kā kotou mavae mai te loto fale ʼaia pe ko te kolo ʼaia, kotou tū te efu ʼo tokotou ʼu vaʼe.” (Mat. 10:11-14) ʼE hā lelei mai ʼi te ʼu fakatotonu ʼaenī, ko te kau ʼapositolo ʼi tanatou “fakalaka ʼi te telituale ʼo olo ʼi te ʼu kolo liliki, ʼo natou kalagaʼi te logo lelei,” neʼe tonu ke natou fakatuʼutuʼu ke natou ʼolo ʼo ʼaʼahi te hahaʼi ʼi ʼonatou loto fale.—Luka 9:6.

4. Ko te ʼu koga tohi fea ʼi te Tohi-Tapu ʼe fakahā lelei mai te fai fakamafola ʼaē ʼi te ʼu ʼapi?

⁴ ʼE fakahā lelei mai ʼi te Tohi-Tapu neʼe ʼolo te kau ʼapositolo ʼo fai fakamafola ki te ʼu ʼapi ʼo te hahaʼi. Ohagē lā, ʼe ʼui fēnei ʼo ʼuhiga mo nātou iā Gāue 5:42: “ ʼI te ʼaho fuli pē, ʼi te fale lotu pea mo te ʼu ʼapi, tuʼumaʼu pē, neʼe natou haga akoʼi pea mo tala ia te logo lelei ʼo ʼuhiga mo Kilisito, Sesu.” Lagi hili kiai taʼu e 20, neʼe fakamanatuʼi e te ʼapositolo ko Paulo ki te ʼu tagata ʼāfea ʼo te kōkelekāsio ʼo Efesi: “Neʼe mole au tātāʼofi ia au ʼi te fakahā atu kiā koutou te ʼu meʼa fuli ʼaē neʼe ʼaoga, pea mo te akoʼi ʼo koutou iā muʼa ʼo te kaugamālie pea mo te ʼu ʼapi.” Neʼe ʼaʼahi koa nātou e Paulo ʼi muʼa ʼo tanatou liliu ko ni hahaʼi tui? ʼE feala ke tou ʼui neʼe ʼaʼahi nātou kae neʼe heʼeki nātou tui, he neʼe akoʼi age e Paulo kiā nātou ia te ʼu meʼa ʼaia, ʼe kau ai te ʼu meʼa “ ʼo ʼuhiga mo te fakahemala ki te ʼAtua pea mo te tui ki totatou ʼAliki ko Sesu.” (Gāue 20:20, 21) ʼO ʼuhiga mo te koga tohi ʼo Gāue 20:20, neʼe ʼui fēnei e Robertson ʼi te tohi Word Pictures in the New Testament: “Tou fakatokagaʼi ko te tagata fai fakamafola faiva ʼaia neʼe fai fakamafola ʼi te ʼu ʼapi.”

Te Foʼi Kautau ʼo Te ʼu Heʼe ʼi Totatou Temi

5. ʼE fakamatala feafeaʼi ʼi te lea fakapolofetā ʼa Soele ia te gāue fai fakamafola?

⁵ Neʼe fai te fagonogono ʼi te ʼuluaki sēkulō, kae neʼe ko he fakatātā pē ʼaia ʼo te gāue lahi ʼaē kā fai anai ʼi totatou temi. Neʼe fakatatau e te polofetā ko Soele ia te gāue fai fakamafola ʼa te kau Kilisitiano fakanofo ki he ʼu kiʼi manu ʼe natou maumauʼi ia meʼa fuli, ohagē ko te ʼu heʼe. (Soe. 1:4) Ohagē ko he foʼi kautau ʼe natou hūfi he koga meʼa, ʼe mole he meʼa ʼe ina lava tāʼofi ia te ʼalu ʼa te ʼu heʼe, ʼe natou hūfi te ʼu loto fale, ʼe natou kai ia meʼa fuli ʼi tonatou ala. (Lau ia Soele 2:2, 7-9.) ʼI fakatātā fakaofoofo ʼo ʼuhiga mo te toe gāue lelei ʼe fai e te hahaʼi ʼa te ʼAtua moʼo fakahoko ia te gāue fagonogono ʼi totatou temi! Ko te faʼahiga fai fakamafola ʼaē ʼe maʼuhiga age ʼi te ʼu fakatuʼutuʼu fai fakamafola, ʼaē ʼe fakaʼaogaʼi e te kau Kilisitiano fakanofo pea mo tonatou ʼu kaugā gāue ia te “tahi ʼu ovi” moʼo fakahoko ia te lea fakapolofetā ʼaia, ʼe ko te fai fakamafola ʼaē ʼi te ʼu ʼapi. (Soa. 10:16) Neʼe feafeaʼi kiā tātou ʼu Fakamoʼoni ʼa Sehova hatatou mulimuli ki te faʼahiga fai fakamafola ʼaē neʼe fai ʼi te temi ʼo te kau ʼapositolo?

6. ʼI te taʼu 1922, koteā te fakalotomālohi ʼaē neʼe fai ʼo ʼuhiga mo te fai fagonogono ʼi te ʼu ʼapi, kae neʼe feafeaʼi ʼihi ki te fakatuʼutuʼu ʼaia?

⁶ Talu mai te taʼu 1919, neʼe fakahā lelei ki te kau Kilisitiano ʼe ko tonatou maʼua takitokotahi ke natou kau ki te fai fagonogono. Ohagē lā, ko te ʼalatike ʼaē ko tona kupu tāfito “Te Selevisi ʼe Maʼuhiga” ʼi Te Tule Leʼo ʼo te ʼaho 15 ʼo ʼAukusitō 1922 (Fakapilitānia), neʼe ina fakamanatuʼi ki te kau Kilisitiano fakanofo ia te maʼuhiga ʼaē ke natou “faʼafai ʼo ʼave ia te logo ʼaē neʼe tā [ʼi te ʼu tohi] ki te hahaʼi pea mo fai palalau mo nātou ʼi tonatou ʼu muʼa matapā, ʼo fakamafola kiā nātou ko te puleʼaga ʼo selō kua ovi mai.” Neʼe tā mo te ʼu faʼahiga fai palalau ʼaē neʼe feala ke fai ʼi te pepa ʼe higoa ko te Bulletin (ʼi te temi nei kua fakahigoa ko Te Minisitelio ʼo Te Puleʼaga). Kae ʼi te kamata neʼe tokosiʼi ia nātou ʼaē neʼe kau ki te fai fakamafola ʼi te ʼu ʼapi. Ko ʼihi neʼe mole natou lagolago ki te faʼahi ʼaia, he neʼe natou maʼu ia te ʼu tuʼuga takuʼaki kiai, kae ʼi tona fakahagatonu neʼe natou manatu ko honatou fakatō laloʼi tanatou ʼolo ki te ʼu ʼapi ʼo te hahaʼi ʼo fai fakamafola kiā nātou. ʼI te fakamālohiʼi tuʼumaʼu ʼaē ke toe fakahoko atu ia te faʼahiga fai fakamafola ʼaia, tokolahi iā nātou ʼaia ʼaki te temi neʼe natou mavae ʼi te kautahi ʼa Sehova.

7. Koteā ʼaē neʼe hā lelei ʼi te ʼu taʼu 1950?

⁷ ʼI te ʼu taʼu e lauʼi hogofulu ki muli age, neʼe kaugamālie leva ia nātou neʼe kau ki te fai fakamafola. Kae neʼe kua hā lelei leva ia te ʼaoga ʼaē ke fai he ʼu fakatuʼutuʼu moʼo akoako nātou ki te minisitelio ʼaē ʼi te ʼu ʼapi. Ohagē lā ʼi Amelika, ʼi te kamataʼaga ʼo te ʼu taʼu 1950, ko te toko 28 ki te teau ʼo te kau Fakamoʼoni ʼo te fenua ʼaia, neʼe natou fai fakamafola ʼaki pē tanatou tufa ia te ʼu pepa lotu peʼe natou tutuʼu ʼi te ʼu ala mo he ʼu nusipepa. Pea ko te toko 40 tupu ki te teau neʼe mole natou kau tuʼumaʼu ki te gāue fai fakamafola, ʼo mole natou kau ki te fai fagonogono lolotoga ni ʼu māhina. Koteā lā he fakatuʼutuʼu ke fai moʼo tokoni ki te kau Kilisitiano fuli ʼaia ke natou kau ki te fai fakamafola ʼi te ʼu ʼapi?

8, 9. Koteā te polokalama ako neʼe kamata fakatuʼu ʼi te taʼu 1953, pea neʼe koteā tona ʼu fua?

⁸ ʼI te fakatahi fakamālamanei ʼaē neʼe fai ʼi New York ʼi te taʼu 1953, neʼe fakamaʼuhigaʼi ai ia te minisitelio ʼaē ke fai ʼi te ʼu ʼapi. Neʼe fakahā e te Tehina ko Nathan H. Knorr ko te gāue tāfito ʼa te kau taupau Kilisitiano fuli, ʼe tonu ke natou tokoni ki te kau Fakamoʼoni fuli ke natou kau tuʼumaʼu ki te minisitelio ʼaē ke fai ki te ʼu ʼapi. Neʼe ina ʼui fēnei: “Ko te kau Fakamoʼoni fuli ʼe tonu ke natou lava kau ki te fakamafola ʼo te logo lelei ʼi te ʼu ʼapi.” Pea moʼo fakahoko te fakatuʼutuʼu ʼaia, neʼe kamata ai te polokalama ako fakamālamanei. Ko nātou ʼaē neʼe mole heʼeki natou kau ki te fai fakamafola ʼi te ʼu ʼapi, neʼe akoʼi nātou ke natou popoto ʼi te kamata ʼo ni ʼu fai palalau mo te hahaʼi ʼi ʼonatou ʼu muʼa matapā, mo fakamahino kiā nātou ʼaki te Tohi-Tapu, pea mo popoto ʼi te tali ki ʼanatou fehuʼi.

⁹ Neʼe fua lelei ia te polokalama ako ʼaia. Lolotoga taʼu e hogofulu, neʼe tuputupu ia te kaugamālie ʼo te kau fai fakamafola ʼi te mālamanei ko te toko 100 ki te teau, ko ʼaʼahi e 126 ki te teau, pea ko ako Tohi-Tapu e 150 ki te teau. Iā ʼaho nei, ʼe teitei ko te toko fitu miliona kau fai fakamafola ʼo te Puleʼaga ʼe natou fakamafola ia te logo lelei ʼi te mālamanei. Ko te tuputupu ʼaupitō ʼaia ʼe ko he fakamoʼoni mai ʼe tapuakiʼi e Sehova ia te ʼu faiga ʼo tana hahaʼi ke natou kau ki te fai fakamafola ʼi te ʼu ʼapi.—Isa. 60:22.

Ko Te Fakaʼiloga ʼo Te Hahaʼi Ki Te Maʼuli

10, 11. (a) Koteā ʼaē neʼe hā kiā Esekiele, ohagē ko tona fakahā ʼi te kāpite 9 ʼo te tohi ʼa Esekiele? (b) ʼE fakahoko feafeaʼi ia te meʼa ʼaia neʼe hā ʼi totatou temi?

¹⁰ ʼE feala ke tou sio ki te maʼuhiga ʼo te minisitelio ʼi te ʼu ʼapi ʼaki te meʼa ʼaē neʼe hā ki te polofetā ko Esekiele. ʼI te meʼa ʼaia neʼe hā kiā ia, neʼe sio ia Esekiele ki te ʼu tagata e toko ono mo tanatou ʼu mahafu tau ʼi ʼonatou nima, ʼo fēia mo te fitu tagata ʼe kofu lino mo te vaitohi ʼo te sīkalaipe ʼi tona faʼahi. Neʼe ʼui ki te fitu tagata ke “fakalaka ʼi te loto kolo” pea “ke [ina] fakaʼiloga ʼi te laʼe ʼo te hahaʼi ʼaē ʼe natou toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko ʼi te loto kolo ʼaia.” ʼI te ʼosi fai ʼo te fakaʼiloga ʼaia, neʼe fakatotonu ki te ʼu tagata e toko ono mo tanatou ʼu mahafu tau ke natou tauteaʼi ia nātou fuli ʼaē ʼe mole natou maʼu ia te fakaʼiloga ʼi ʼonatou laʼe.—Lau ia Esekiele 9:1-6.

¹¹ ʼE tou mahino ʼi te fakahoko ʼo te lea fakapolofetā ʼaenī, ko te tagata ʼaē “ ʼe kofu lino” ʼe ina fakatā te toe ʼo te kau Kilisitiano fakanofo. ʼAki te gāue fai fakamafola pea mo te fai ʼo ni tisipulo, ko te kalasi ʼo te kau fakanofo ʼe natou ʼai te fakaʼiloga fakatātā ki te laʼe ʼo nātou ʼaē ʼe natou liliu ko te “tahi ʼu ovi” ʼa Kilisito. (Soa. 10:16) Koteā te fakaʼiloga ʼaia? ʼE ko te fakamoʼoni ʼaia, ohagē pē ʼe tou sio ʼi te ʼu laʼe ʼo te ʼu ovi ʼaia kua foaki tonatou maʼuli kiā Sehova, kua natou papitema ko he ʼu tisipulo ʼa Sesu Kilisito pea kua natou kofuʼi ia te ʼulugaaga foʼou Fakakilisitiano. (Efe. 4:20-24) Ko te hahaʼi ʼaia kua hagē ko ni ʼu ovi kua natou liliu ko he faga ovi e tahi mo te kau Kilisitiano fakanofo pea ʼe natou lagolago kiā nātou ʼi tanatou gāue maʼuhiga ʼaē ko te fakaʼiloga ʼo ʼihi hahaʼi.—Fakh. 22:17.

12. ʼE hā feafeaʼi ʼi te meʼa ʼaē neʼe hā kiā Esekiele ʼo ʼuhiga mo te fakaʼiloga ʼaē ke fai ki te ʼu laʼe, ia te maʼuhiga ʼaē ʼo tatatou kumi tuʼumaʼu ia te hahaʼi ʼaē ʼe hagē ko ni ʼu ovi?

¹² Ko te meʼa ʼaē neʼe hā kiā Esekiele, ʼe ina fakahā mai pe koʼē ʼe maʼuhiga ʼaupitō ʼi te temi nei ke tou kumi tuʼumaʼu te hahaʼi ʼaē ʼe “toʼetoʼe pea mo lotomamahi.” ʼE fakalogo te haofaki ʼo te hahaʼi kiā tātou. Ko te kautau ʼāselo ʼa Sehova, ʼaē ʼe fakatā e te ʼu tagata e toko ono mo tonatou ʼu mahafu tau, kua vave pē tanatou fakaʼauha ia nātou ʼaē ʼe mole natou maʼu ia te fakaʼiloga fakatātā ʼi ʼonatou laʼe. ʼO ʼuhiga mo te ʼamanaki hoko mai ʼo te tautea ʼaia, neʼe ʼui e te ʼapositolo ko Paulo ko te ʼAliki ko Sesu pea mo “tana kau ʼāselo mālohi” ʼe natou fakahoko anai ia “te lagavaka kiā nātou ʼaē ʼe mole natou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu.” (2 Tes. 1:7, 8) Kotou fakatokagaʼi, ʼe fakamāu anai te hahaʼi ʼo mulimuli pē ki tanatou faʼahiga tali ʼaē ia te logo lelei. Koia, ko te tala ʼo te logo lelei ʼo te ʼAtua ke tou faʼafai tuʼumaʼu ʼo aʼu ki te fakaʼosi. (Fakh. 14:6, 7) Pea ʼe ko he fakatotonu ʼe fakamaʼua ke fai e te ʼu kaugana fuli ʼa Sehova ʼaē kua foaki tonatou maʼuli kiā te ia.—Lau ia Esekiele 3:17-19.

13. (a) Koteā ʼaē neʼe logoʼi e te ʼapositolo ko Paulo neʼe ko hona maʼua, pea koteā tona tupuʼaga? (b) Koteā ʼaē ʼe kotou logoʼi ʼe ko hokotou maʼua ki te hahaʼi ʼo tokotou telituale?

¹³ Neʼe logoʼi e te ʼapositolo ko Paulo ʼi tona loto, ʼe ko hona maʼua ke ina fakamafola ia te logo lelei ki ʼihi. Neʼe ina ʼui fēnei: “ ʼE ʼi ai toku maʼua ki te hahaʼi Keleka pea mo te hahaʼi Matāpule, ki te hahaʼi ʼatamai pea mo nātou ʼe vavale: koia lā ʼaē ʼe au toe lotomālohi ai foki ke au fakahā atu te logo lelei kiā koutou ʼaē ʼi Loma.” (Loma 1:14, 15) ʼI tana loto fakafetaʼi ki te manavaʼofa ʼaē neʼe ina maʼu, neʼe logoʼi e Paulo ʼe tonu ke ina fai ia meʼa fuli moʼo tokoni ki niʼihi ke natou maʼu ohagē pē ko ia, ia te ʼofa makehe ʼo te ʼAtua. (1 Tim. 1:12-16) Neʼe hagē pē ko hona maʼua ke ina huʼi ki te hahaʼi takitokotahi ʼaē neʼe felāveʼi mo ia, pea ko he maʼua neʼe feala pē ke ina totogi ʼaki tana fakamafola age ia te logo lelei ki te hahaʼi ʼaia. ʼE kotou logoʼi koa mo koutou ʼe ʼi ai mo tokotou maʼua ki te hahaʼi ʼo tokotou telituale?—Lau ia Gāue 20:26, 27.

14. Koteā te tupuʼaga tāfito ʼo tatatou fai fakamafola ʼi te ʼu koga meʼa ʼaē ʼe tou maʼu ai ia te hahaʼi pea mo tou ʼolo ʼi te ʼu ʼapi?

¹⁴ ʼE mahino ia, ko te maʼuli ʼe maʼuhiga ʼaupitō, kae ʼe ʼi ai te tahi tupuʼaga tāfito ʼo tatatou kau ʼaē ki te fai fakamafola ʼi te ʼu ʼapi. ʼI te lea fakapolofetā iā Malakia 1:11, ʼe ʼui fēnei ai e Sehova: “Mai te hopoʼaga ʼo te laʼā ʼo aʼu ki tona tō, ʼe māʼoluga anai toku huafa ʼi te ʼu puleʼaga, pea . . . ʼe foaki anai ki toku huafa [he mōlaga], ʼeī ko he mōlaga maʼa; koteʼuhi ko toku huafa ʼe māʼoluga anai ʼi te ʼu puleʼaga.” Moʼo fakahoko ia te lea fakapolofetā ʼaia, ko te ʼu kaugana ʼa Sehova ʼaē kua foaki tonatou maʼuli kiā te ia, ʼe natou fakavikiviki tona huafa ʼi muʼa ʼo te hahaʼi ʼi te kele kātoa ʼaki tanatou fakahoko ʼaē ia tanatou minisitelio. (Pes. 109:30; Mat. 24:14) Ko te fai ʼo “he sākilifisio fakavikiviki” kiā Sehova, ʼe ko te tupuʼaga tāfito ʼaia ʼo tatatou fai fakamafola ʼi te ʼu koga meʼa ʼaē ʼe tou maʼu ai te hahaʼi pea mo tou ʼolo ʼi te ʼu ʼapi.—Hep. 13:15.

Te ʼu Meʼa Maʼuhiga ʼAupitō ʼe ʼAmanaki Hoko Mai

15. (a) Neʼe fakalahi feafeaʼi e te kau Iselaele ia tanatou gāue ʼi tanatou foli ʼaē ia te kolo ʼo Seliko ʼi te fitu ʼaho? (b) Koteā ʼaē ʼe hā mai ai ʼo ʼuhiga mo te fai fakamafola?

¹⁵ Koteā te tahi age ʼu fetogi ʼo ʼuhiga mo te fai fakamafola? Ko te ʼohofi ʼo Seliko ʼaē ʼe fakamatala ʼi te tohi ʼa Sosue, ʼe ina tuku mai ia te faʼifaʼitaki. Kotou manatuʼi ʼi muʼa pē ʼo te fakaʼauha e te ʼAtua ia te kolo ʼo Seliko, neʼe fakatotonu ki te kau Iselaele ke natou foli tuʼa tahi ʼi te ʼaho ia te kolo iā ʼaho e ono. Kae ʼi te fitu ʼaho leva, neʼe tonu ke natou fakaʼiloga kehe tanatou haʼele ʼaki hanatou fakalahi ia tanatou gāue. Neʼe ʼui fēnei age e Sehova kiā Sosue: “ ʼE kotou foli tuʼa fitu anai ia te kolo, pea ʼe pupuhi fakatagi anai ia te kau pelepitelō. Pea koʼenī ia te meʼa ʼaē kā hoko anai mo kapau ʼe kotou logo ki te tatagi ʼo te pupuhi fakatagi, . . . ko te hahaʼi fuli ʼe tonu anai ke natou fai he toe kalaga tau lahi; pea ʼe tonu anai ke holo ifo ia te kaupā ʼo te kolo.” (Sos. 6:2-5) ʼE feala anai ke hoko he toe gāue fēia ʼo ʼuhiga mo tatatou fai fakamafola. ʼE mahino ia, ʼi te temi ʼaē kā fakaʼauha ai ia te tuʼu ʼo te ʼu faʼahiga meʼa ʼaenī, ʼe tou mamata anai ki te toe fakamafola lahi ʼi te mālamanei kātoa ʼo te huafa ʼo te ʼAtua pea mo te Puleʼaga.

16, 17. (a) Koteā anai kā hoko ʼi muʼa ʼo te fakaʼosi ʼo “te mamahi lahi”? (b) Koteā ʼaē kā tou vakaʼi anai ʼi te ʼalatike kā hoa mai?

¹⁶ ʼE lagi hoko mai anai te temi mokā liliu ai te logo ʼaē ʼe tou fakamafola ohagē ko he “toe kalaga tau lahi.” ʼI te tohi ʼo Fakahā, ko te ʼu logo mālohi ʼo ʼuhiga mo te fakamāu ʼe fakatātā ki he “ ʼua maka lahi ʼaki te ʼu maka ko tona mamafa takitahi ko te mamafa ʼo te taleta.”b Pea ʼe ʼui fēnei iā Fakahā 16:21: “Neʼe lahi ʼaupitō te tautea.” ʼE mole heʼeki tou ʼiloʼi peʼe koteā anai te ʼaoga ʼo te fai fakamafola ʼi te ʼu ʼapi ki te tala ʼo te ʼu logo fakamāu fakaʼosi ʼaia. Kae ʼe feala ke tou tui papau, ʼi muʼa ʼo te fakaʼosi ʼo “te mamahi lahi,” ʼe fakaʼiloʼilo anai ki te mālamanei kātoa ia te huafa ʼo Sehova.—Fakh. 7:14; Esk. 38:23.

¹⁷ ʼI tatatou fakatalitali ki te ʼu meʼa fakatalakitupua ʼaē kā ʼamanaki hoko mai, ʼofa pē ke tou haga faʼafai ʼo tala ia te logo lelei ʼo te Puleʼaga. ʼI tatatou fakahoko ia te gāue ʼaē neʼe hinoʼi tātou kiai, koteā te ʼu fihifihia ʼaē ʼe felāveʼi mo tātou ʼi tatatou fai fakamafola ʼi te ʼu ʼapi, pea ʼe feafeaʼi hatatou mālo ʼi te ʼu fihifihia ʼaia? ʼE tou vakaʼi anai te ʼu fehuʼi ʼaia ʼi te ʼalatike ʼaē kā hoa mai.

[ʼU nota]

ʼE Kotou Tali Feafeaʼi Anai?

• Koteā te fakatafito Fakatohi-tapu ki te fai fakamafola ʼi te ʼu ʼapi?

• ʼE fakamaʼuhigaʼi feafeaʼi ʼi totatou temi ia te fai fakamafola ʼaē ki te ʼu ʼapi?

• He koʼē ʼe ko te maʼua ʼo te ʼu kaugana ʼa Sehova ʼaē kua foaki tonatou maʼuli ke natou kau ki te fai fakamafola?

• Koteā te ʼu meʼa maʼuhiga ʼaupitō ʼaē kā ʼamanaki hoko mai?

[Paki ʼo te pasina 14]

Ohagē ko te ʼapositolo ko Paulo, ʼe kotou logoʼi koa tokotou maʼua ʼaē ke kotou fakamafola ki te hahaʼi?

[Paki ʼo te pasina 15]

Tehina ko Knorr, 1953