Tou Tauʼi Te ʼu Fihifihia ʼAē ʼe Felāveʼi Mo Tātou ʼi Tatatou Fai Fakamafola ʼi Te ʼu ʼApi
“Neʼe matou maʼu ia te lototoʼa ʼuhi ko tomatou ʼAtua, ke matou tala atu kiā koutou ia te logo lelei ʼo ʼuhiga mo te ʼAtua, ʼi te lotolotoiga ʼo te ʼu fakafeagai.”—1 TES. 2:2.
1. Koteā te ʼu fihifihia ʼaē neʼe tauʼi e Selemia, pea neʼe ina lava tauʼi feafeaʼi?
KO SELEMIA neʼe ko te tagata pē ohagē ko tātou. ʼI te temi ʼaē neʼe fakahā age e Sehova tana fekau ʼaē ke liliu ko he “polofetā ki te ʼu puleʼaga,” neʼe ina kalaga fēnei: “ ʼOi! Ê Tuʼi ʼAliki ko Sehova! Sio mai ʼe mole au poto ʼi te palalau, heʼe kei au tamasiʼi.” Kae ʼaki tana falala ʼaē kiā Sehova, neʼe ina tali te gāue ʼaē neʼe hinoʼi age ke ina fai. (Sel. 1:4-10) Iā taʼu e 40 tupu, neʼe tauʼi e Selemia ia te fakaʼauʼauganoa ʼa te hahaʼi, tanatou fakafeagai, tanatou vāvā pea mo tanatou fakatagaʼi ia ia. (Sel. 20:1, 2) ʼI ʼihi temi, neʼe mole kei fia fai fakamafola. Kae neʼe faʼa kātaki aipē ʼo tala ia he logo neʼe mole leleiʼia e te hahaʼi tokolahi. ʼAki te mālohi ʼaē neʼe foaki age e te ʼAtua, neʼe fai e Selemia ia meʼa fuli neʼe mole feala anai ke ina fai ʼaki tona mālohi fakatagata.—Lau ia Selemia 20:7-9.
2, 3. ʼE tatau feafeaʼi ia te ʼu fihifihia ʼaē ʼe felāveʼi mo te ʼu kaugana ʼa te ʼAtua iā ʼaho nei pea mo ʼaē neʼe hoko kiā Selemia?
2 Tokolahi te ʼu kaugana ʼa te ʼAtua iā ʼaho nei, ʼe feala ke natou hagē ko Selemia. Ko ʼihi iā tātou, ʼi tatatou fakakaukauʼi ia te gāue fai fakamafola ʼi te ʼu ʼapi, neʼe lagi tou manatu fēnei: ‘ ʼE ko he faʼahi ia ʼe mole au lavaʼi anai tona fai.’ Kae ʼi tatatou mahino ʼaē ko te finegalo ʼo Sehova ʼaē ke tou fakahā te logo lelei, koia neʼe tou tekeʼi ai totatou mataku pea mo tou hoko atu tatatou fai fakamafola. Kae tokolahi iā tātou, neʼe tou felāveʼi mo ni ʼu ʼaluʼaga ʼi totatou maʼuli neʼe liliu ai ʼo faigataʼa ʼi ʼihi temi hatatou kau ki te fai fakamafola. ʼE tou fakamoʼoni, neʼe mole faigafua tatatou kamata kau ki te fai fakamafola ʼaē ʼi te ʼu ʼapi pea mo faʼafai tuʼumaʼu ʼo kaku ki te fakaʼosi.—Mat. 24:13.
3 ʼE feafeaʼi lā mo kapau kua fuafualoa hakotou ako te Tohi-Tapu mo te kau Fakamoʼoni ʼa Sehova pea mo kau ki te ʼu fono kae kei kotou mataku ʼi te kau ki te fai fakamafola ʼi te ʼu ʼapi? Peʼe feafeaʼi age lā mo kapau ko koutou ko he Fakamoʼoni, kae ʼe faigataʼa kiā koutou hakotou kau ki te gāue fai fakamafola ʼi te ʼu ʼapi, logopē lā takotou maʼu te ʼu fealagia ʼaē ke kotou kau kiai? Ke mahino kiā koutou ʼe ko te hahaʼi ʼi te ʼu fenua fuli pē ʼaē ʼe natou tau mo te ʼu fihifihia ʼi te fai fakamafola ʼi te ʼu ʼapi. ʼAki te tokoni ʼa Sehova, ʼe kotou lava tekeʼi ia te ʼu fihifihia ʼaia.
Ke Tou Lototoʼa
4. Koteā ʼaē neʼe lava ai ki te ʼapositolo ko Paulo ke palalau ki te logo lelei ʼaki he lototoʼa?
4 ʼE kotou fakamoʼoni anai ko te fai fakamafola ʼaē ʼe lolotoga fakahoko nei ʼi te mālamanei, ʼe mole fai ʼaki te mālohi ʼo te tagata peʼe ko tona poto, kae ʼaki te laumālie ʼo te ʼAtua. (Sakl. 4:6) ʼO toe fēia pē foki ʼo ʼuhiga mo te minisitelio ʼa te ʼu Kilisitiano takitokotahi. (2 Ko. 4:7) Tou vakaʼi age ia te faʼifaʼitaki ʼa te ʼapositolo ko Paulo. ʼI tana manatuʼi ia te temi ʼaē neʼe gaohi koviʼi ai ia ia pea mo tona ʼu kaugā gāue misionea e te ʼu hahaʼi fakafeagai, neʼe ina tohi fēnei: “ ʼI te hili ʼo tamatou tali mamahi pea mo laukoviʼi ʼi Filipe, neʼe matou maʼu ia te lototoʼa ʼuhi ko tomatou ʼAtua, ke matou tala atu kiā koutou ia te logo lelei ʼo ʼuhiga mo te ʼAtua, ʼi te lotolotoiga ʼo te ʼu fakafeagai.” (1 Tes. 2:2; Gāue 16:22-24) ʼE lagi ʼi tatatou manatu neʼe mole feala ki he tagata fai fakamafola faʼafai ohagē ko Paulo ke faigataʼa kiā ia ʼi ʼihi temi hana fai fakamafola. Kae ohagē pē ko tātou fuli, neʼe tonu ke falala ia Paulo kiā Sehova ke feala hana palalau ʼo ʼuhiga mo te logo lelei ʼaki he lototoʼa. (Lau ia Efesi 6:18-20.) ʼE feafeaʼi hatatou muliʼi ia te faʼifaʼitaki ʼa Paulo?
5. Koteā ʼaē kā tokoni mai ke tou lototoʼa ʼo fai fakamafola?
5 Ko te faikole ʼe lava tokoni mai ke tou lototoʼa ʼo fai fakamafola. Neʼe ʼui fēnei e te tuagaʼane pioniē: “Neʼe au faikole ke feala haku palalau ʼaki he loto falala, neʼe au faikole ke malave taku ʼu palalau ki te loto ʼo te hahaʼi, pea neʼe au faikole ke au fiafia ʼi taku minisitelio. ʼI tona fakahagatonu, ʼe ko te gāue ʼaenī ʼa Sehova kae ʼe mole ko hatatou gāue, koia ʼe tou lava fai ia te gāue ʼaia ʼaki pē tana tokoni.” (1 Tes. 5:17) ʼE ʼaoga kiā tātou fuli ke tou kole ʼi te temi fuli pē te tokoni ʼa te laumālie māʼoniʼoni ʼo te ʼAtua ke tou fai fakamafola ʼaki he lototoʼa.—Luka 11:9-13.
6, 7. (a) Koteā te meʼa ʼaē neʼe hā kiā Esekiele, pea koteā tona fakaʼuhiga? (b) Koteā te ako ʼe maʼu ʼi te temi nei e te ʼu kaugana ʼa te ʼAtua mai te meʼa ʼaē neʼe hā kiā Esekiele?
6 ʼE fakahā mai ʼi te tohi ʼa Esekiele ia te tahi age meʼa ʼe feala ke tokoni mai kiā tātou ke tou palalau ʼaki he lototoʼa. ʼI te meʼa ʼaē neʼe hā kiā Esekiele, neʼe foaki e Sehova ia te takaiga tohi neʼe tohi ʼi loto mo tuʼa ia “te ʼu tagi, mo te ʼu toʼetoʼe pea mo te ʼu lāuga” pea neʼe ʼui age ke ina kai te takaiga tohi, ʼo ʼui fēnei age: “Foha ʼo te tagata, ʼe tonu anai ke ke fafaga tou fatu, ke ke fakafonu tou ʼu vāvā ʼaki te takaiga tohi ʼaia neʼe au foaki atu.” Koteā te fakaʼuhiga ʼo te meʼa ʼaia ʼaē neʼe hā kiā Esekiele? Neʼe tonu kiā Esekiele ke ina kai fuli ia te logo ʼaē neʼe tonu ke ina tala. Neʼe hagē pē neʼe tonu ke nofo ia te logo ʼaia ʼi tona sino, ʼo gāue ki tana ʼu manatu ʼaē neʼe loloto iā ia. Pea ʼe toe ʼui fēnei e te polofetā: “Neʼe au kamata kai, pea neʼe malie ʼi toku gutu ohagē ko te meli.” Ko te tala ʼo te logo ʼa te ʼAtua ki te hahaʼi, neʼe ko he gāue fakafiafia kiā Esekiele ohagē pē ko te malie ʼo te meli. Neʼe ko he toe pilivilēsio lahi kiā te ia hana fakafofoga ia Sehova pea mo fakahoko te gāue ʼaia neʼe hinoʼi age e te ʼAtua, logolā ko he logo maʼuhiga neʼe tonu ke ina tala ki te hahaʼi neʼe mole natou leleiʼi ia.—Lau ia Esekiele 2:8–3:4, 7-9.
7 ʼE maʼu e te ʼu kaugana ʼa te ʼAtua ʼo te temi nei ia te ako maʼuhiga mai te meʼa ʼaia ʼaē neʼe hā. Mo tātou foki ʼe tonu ke tou tala ia te logo maʼuhiga ki te hahaʼi ʼaē ʼe mole natou fia mahino ki tatatou ʼu faiga ʼaē moʼo tala ia te logo ʼaia. Ke tou fakaʼuhiga tuʼumaʼu ia te minisitelio ohagē ko he pilivilēsio neʼe foaki mai e te ʼAtua ke tou fai, ʼe tonu ke tou fafaga fakalelei ia totatou loto ʼi te faʼahi fakalaumālie. Ko te ʼu taʼi ako māhani ʼaē ʼe mole loloto peʼe tōtō tona fai ʼi ʼihi ʼaho, ʼe mole lelei anai moʼo fafaga fakalelei ia totatou loto ʼaki te Folafola ʼa te ʼAtua. ʼE feala koa ke kotou hikihiki te lelei ʼo takotou lau ia te Tohi-Tapu pea mo tona akoʼi, pea mo fai tuʼumaʼu? ʼE feala koa ke kotou metitāsioʼi tuʼumaʼu ia te ʼu manatu ʼaē ʼe kotou ako?—Pes. 1:2, 3.
Tou Kamata He ʼu Fai Palalau Fakatohi-tapu
8. Koteā he faʼahiga fakatuʼutuʼu ke feala ai ki te kau fai fakamafola ʼo te Puleʼaga ke natou kamata he ʼu fai palalau Fakatohi-tapu ʼi tanatou fai fakamafola ʼi te ʼu ʼapi?
8 Ki te kau fai fakamafola tokolahi, ko te fihifihia tāfito ʼaē ʼe felāveʼi mo nātou ʼi te fai fakamafola ʼi te ʼu ʼapi, ʼe ko te kamata ʼo hanatou ʼu fai palalau mo te hahaʼi. ʼE moʼoni, ʼi ʼihi telituale ʼe ko he fihifihia ia te kamata ʼo ni ʼu fai palalau mo te hahaʼi. Ko ʼihi kau fai fakamafola ʼe natou leleiʼia hanatou fai palalau mo te hahaʼi ʼi te ʼu muʼa matapā, mo kapau ʼe natou kamata te fai palalau ʼaki he ʼu kupu nounou neʼe natou filifili lelei, pea natou foaki he kiʼi pepa lotu, ohagē ko tona fakahā ʼaē ʼi te fakamatala ʼe ʼātakai ʼi te pāsina 18. Ko te kupu tāfito ʼo te kiʼi pepa lotu peʼe ko tona pāki ʼe feala ke sio kiai te hahaʼi, ʼo tou fakahā fakanounou age te tupuʼaga ʼo tatatou ʼaʼahi nātou pea mo tou lagaʼi he fehuʼi. Ko te tahi faʼahiga fakatuʼutuʼu ke feala ai hatatou fai palalau mo te hahaʼi, ʼe ko hatatou fakahā age he ʼu kiʼi pepa lotu e tolu peʼe fā pea mo tou tuku ke natou filifili he pepa lotu ʼe natou fia lau. ʼE mahino ia, ʼe mole tou faiga pē anai ke tou tufa ni ʼu pepa lotu peʼe ke tou fakaʼaogaʼi ʼi te ʼu matapā fuli, kae ʼe tou fakatuʼutuʼu tāfito ke tou kamata ni ʼu fai palalau Fakatohi-tapu ʼe iku anai ki he ʼu ako Tohi-Tapu.
9. He koʼē ʼe maʼuhiga ke kotou teuteu lelei ki te fai fakamafola?
9 ʼE tahi fakalogo pē kiā koutou takotou faʼahiga fai, kae kapau ʼe kotou teuteu lelei pea ʼe feala ai anai ke kotou palalau fakatokatoka mo te hahaʼi ʼaē kā felāveʼi mo koutou ʼi takotou fai fakamafola ʼi te ʼu ʼapi pea mo kotou fiafia ai. Neʼe ʼui fēnei e te tehina pioniē: “ ʼE lahi age taku fiafia mo kapau neʼe au teuteuʼi lelei taku fai fakamafola. ʼE tupu ai haku fia fai palalau mo te hahaʼi.” Ko te tahi tehina pioniē neʼe ina ʼui fēnei: “ ʼI taku kua ʼiloʼi te ʼu ʼalatike ʼo te ʼu nusipepa ʼaē ʼe au tufa, pea ʼe au fiafia ʼi tona fakahā.” Ko ʼihi ʼe natou leleiʼia tanatou toe akoako fakalogologo ia te ʼu palalau ʼaē kā natou fakaʼaogaʼi, kae ki te tokolahi ʼe fua lelei age hana toe akoako leʼo lahi. ʼI tanatou fai ia te faʼahi ʼaia, ʼe natou foaki ia te meʼa ʼaē ʼe lelei kiā Sehova.—Kol. 3:23; 2 Tim. 2:15.
10. Koteā ʼaē ʼe feala ke fai ke liliu ai te ʼu fono gāue ʼo ʼaoga pea mo maʼu ni ʼu fua lelei?
10 Ko he ʼu fono gāue ʼe ʼaoga ki te fai fakamafola ʼe lagolago ki te fua lelei ʼo tatatou gāue pea ke tou fiafia ʼi tatatou fai fakamafola ʼi te ʼu ʼapi. Kapau ʼe talanoa fakahagatonu te koga tohi ʼo te ʼaho ki te gāue fai fakamafola, pea ʼe feala hona lau pea mo fai palalau fakanounou kiai. Kae ko te tehina ʼaē ʼe ina takitaki te fono gāue ki te fai fakamafola ʼe tonu anai ke ina toʼo he temi ke fai palalau ai mo te nofoʼaki peʼe fai he faʼifaʼitaki ʼo ni ʼu ʼuluaki palalau ʼe ʼaoga ki te telituale, peʼe fakaʼaogaʼi he tahi age ʼu manatu ʼe feala ke fakaʼaogaʼi ki te minisitelio ʼo te ʼaho ʼaia. ʼE ko he tahi tokoni ʼaia ki te nofoʼaki ke natou maʼu ni ʼu fua lelei ʼi tanatou fai fagonogono. ʼAki he teuteu fakatomuʼa ʼe lelei, ko te ʼu tagata ʼāfea pea mo ʼihi ʼaē ʼe natou fai te ʼu fono ʼaia, ʼe feala ke natou fai te faʼahi ʼaia pea mo fakaʼosi ia te fono ʼo mulimuli pē ki te temi ʼaē neʼe kua tuku mai.—Loma 12:8.
Te ʼu Faʼahi ʼAē ʼe Feala Ke Hoko Mokā ʼe Tou Fakalogo Lelei
11, 12. Kapau ʼe tou fakalogo mo he lotoʼofa mokā palalau mai te hahaʼi, pea ʼe malave feafeaʼi anai ki tanatou tali ʼaē ia te logo lelei? Tuku mai he ʼu faʼifaʼitaki.
11 ʼE mole feʼauga pē hata teuteu fakalelei ki te fai fakamafola kae kapau ʼe tou toe tokagaʼi te ʼu faʼahi ʼaē ʼe ʼaoga ki te hahaʼi, pea ʼe tokoni ai anai kiā tātou ke tou kamata he ʼu fai palalau Fakatohi-tapu pea mo tou faigaʼi ke malave tatatou ʼu palalau ki te loto ʼo te hahaʼi ʼaē ʼe tou fai fakamafola ki ai. Ko he faʼahi ʼe feala ai ke tou fakahā ia tatatou tōkakaga ki te hahaʼi, ʼe ko hatatou fakalogo lelei mokā ʼe natou palalau mai. Ko te taupau feʼaluʼaki neʼe ina ʼui fēnei: “Ko te faʼa kātaki pea mo he fakalogo lelei mokā palalau mai ia te hahaʼi, ʼe ko he faʼahi ʼe feala ke tupu ai hanatou fia logo ki te logo lelei, pea ko he fakahā ʼaia ʼo he tokaga fakalelei ki te hahaʼi.” Kapau ʼe tou fakalogo mo he lotoʼofa mokā palalau mai te hahaʼi, pea ʼe feala ke uga ai nātou ke natou fia fai palalau mo tātou ki te Tohi-Tapu, ohagē ko tona fakahā ʼi te meʼa ʼaenī neʼe hoko.
12 ʼI te kamataʼaga ʼo te tohi neʼe tā ʼi te sulunale Le Progrès ʼi te kolo ʼo Saint-Étienne ʼi Falani, neʼe fakamatala e te fafine tona ʼaʼahi e te ʼu Fakamoʼoni e toko lua, neʼe nā ʼomai kiō ia kae neʼe heʼeki faʼa fualoa ia te mate atu ʼo tana kiʼi taʼahine e māhina tolu. Neʼe ina tohi fēnei: “Neʼe au ʼiloʼi atu aipē ko te ʼu Fakamoʼoni ʼa Sehova. Neʼe au fakatuʼutuʼu ke au fekauʼi fakalelei pē nāua ke nā ʼolo, kae neʼe au fakatokagaʼi te kaupepa ʼaē neʼe ʼomai mo nāua. Neʼe talanoa te kaupepa pe koʼē ʼe fakagafua e te ʼAtua ia te mamahi. Koia neʼe au fakahū ai leva nāua ʼaki te fakatuʼutuʼu ʼaē ke au fakafeagai ki tanā ʼu palalau. . . . Neʼe fakalaka ʼi te hola kātoa te nonofo ʼa te ʼu Fakamoʼoni ʼaia mo au. Neʼe nā fakalogo mo he lotoʼofa ki taku ʼu palalau, pea ʼi te temi ʼaē neʼe nā mavae ai, neʼe au logoʼi ʼi toku loto ia he toe fīmālie lahi, pea neʼe au tali ke nā toe liliu mai.” (Loma 12:15) ʼAki te temi, ko te fafine ʼaia neʼe ina tali ke fai hana ako Tohi-Tapu. Ko te ako maʼuhiga ʼaē ʼe tou maʼu mai te meʼa ʼaē neʼe tāʼofi e te fafine ʼi te ʼuluaki ʼomai ʼaia ʼa te ʼu Fakamoʼoni, neʼe mole ko te ʼu meʼa ʼaē neʼe nā palalau kiai kae ko te fakalogo ʼa te ʼu Fakamoʼoni ki tana ʼu palalau.
13. ʼE feafeaʼi hatatou fai ia tatatou ʼu palalau ʼo ʼuhiga mo te logo lelei, ʼo mulimuli pē ki te ʼaluʼaga ʼo te ʼu hahaʼi ʼaē ʼe felāveʼi mo tātou?
13 Kā tou fakalogo mo he lotoʼofa mokā palalau mai ia te hahaʼi, ʼe mahino ia ʼe tou fakafealagia ke natou ʼui mai pe koʼē ʼe ʼaoga kiā nātou ia te Puleʼaga. ʼE ko he faigamālie lelei ʼaia ke tou fakahā age kiā nātou ia te logo lelei. Neʼe lagi kua kotou fakatokagaʼi, ko te kau fai fakamafola ʼaē ʼe faiva, ʼi te agamāhani ʼe ko nātou ʼaē ʼe fakalogo fakalelei mokā palalau age te hahaʼi. (Taag. 20:5) ʼE natou fakahā he tokaga moʼoni ki te hahaʼi ʼaē ʼe felāveʼi mo nātou ʼi te minisitelio. ʼE mole natou tohi pē ʼonatou higoa pea mo tonatou ʼu tuʼasila kae ʼe natou toe tohi foki mo te ʼu meʼa ʼaē neʼe fia logo kiai te hahaʼi pea mo ʼaoga kiā nātou. Kā fakahā age e he tahi he meʼa ʼe mamahi kiai, ʼe natou fai ni ʼu kumi pea ʼe natou toe foimo liliu ki ai, ʼo fakahā age te ʼu faʼahi ʼaē neʼe natou maʼu. Ohagē ko te ʼapositolo ko Paulo, ʼe natou fai tanatou ʼu palalau ʼo ʼuhiga mo te logo ʼo te Puleʼaga, ʼo mulimuli pē ki te ʼaluʼaga ʼo te ʼu hahaʼi ʼaē ʼe felāveʼi mo nātou. (Lau ia 1 Kolonito 9:19-23.) Ko te taʼi tokaga fakamālotoloto ʼaia ʼe tupu ai te fia logo ʼa te hahaʼi ki te logo lelei pea ʼe fakahā lelei ai ia “te manavaʼofa ʼo totatou ʼAtua.”—Luka 1:78.
Tou Taupau Ia He Manatu ʼe Lelei
14. Kā tou fakahoko ia tatatou minisitelio, ʼe feafeaʼi hatatou lava fakahā ʼe tou maʼu ia te ʼu kalitātē ʼo Sehova?
14 ʼI te foaki mai e Sehova ia te loto faʼitaliha kiā tātou fuli, neʼe ina fakahā ai ia tana fakamaʼuhigaʼi ʼaē ʼo tātou. Logolā ko ia ko te ʼAtua Māfimāfi, kae ʼe mole ina fakamālohiʼi he tahi ke kaugana age kiā te ia kae ʼe ina taki te hahaʼi kiā te ia ʼaki te ʼofa, ʼo ina tapuakina ia nātou ʼaē ʼe natou loto fakafetaʼi ki tana ʼu fakatuʼutuʼu taulekaleka. (Loma 2:4) ʼUhi ko tātou ko tana ʼu minisi, ʼe tonu ke tou nonofo teuteu ke tou fakahā ia te logo lelei ʼi hona ʼaluʼaga ʼe tuha mo totatou ʼAtua manavaʼofa ʼi te temi fuli pē ʼaē ʼe tou fai fagonogono ai. (2 Ko. 5:20, 21; 6:3-6) Moʼo fakahoko ia te faʼahi ʼaia, ʼe ʼaoga ke tou taupau ia he manatu ʼe lelei ʼo ʼuhiga mo te hahaʼi ʼo totatou telituale. Koteā ʼaē ʼe feala ke tokoni mai mokā ʼe ko he fihifihia ʼaia kiā tātou?
15. (a) Koteā ʼaē neʼe akoʼi e Sesu ki tana ʼu ʼapositolo ke natou fai mo kapau ʼe mole tali e te hahaʼi ia te logo lelei? (b) Koteā ʼaē kā tokoni mai anai ke tou tokaga tāfito ke tou maʼu ia te hahaʼi ʼaē ʼe tuha mo nātou ia te logo lelei?
15 Neʼe akoʼi e Sesu ia tana ʼu tisipulo ke ʼaua naʼa natou tuʼaniaʼi fau mo kapau ʼe mole tali e niʼihi ia te logo lelei kae ke natou tokaga tāfito ke natou maʼu ia te hahaʼi ʼaē ʼe tuha mo nātou ia te logo lelei. (Lau ia Mateo 10:11-15.) Kapau ʼe tou fai hatatou ʼu kiʼi fakatuʼutuʼu pea mo faigafua hona fakahoko, pea ʼe feala ai anai ke tou tōkakaga ʼo maʼu ia te hahaʼi ʼaē ʼe tuha mo nātou ia te logo lelei. Ko te tehina ʼe ina fakatatau ia ia totonu ki he tagata ʼe kumi ʼaulo. Ko tana kiʼi tāʼaga lea ʼaenī: “ ʼE au fakaʼamu ʼi te ʼaho nei ke au maʼu ia he foʼi ʼaulo matalelei.” Ko te tahi tehina ʼe ina fakatuʼutuʼu ʼi te vāhaʼa fuli ke ina maʼu he tahi ʼe fia logo pea ke toe liliu ki ai ʼi te ʼu ʼaho pē ʼaē ʼe hoa mai ki ai ʼo fakatuputupu tana fia logo ʼaē ki te moʼoni. Ko ʼihi kau fai fakamafola ʼe natou faigaʼi ke natou lau ia he vaega ki te hahaʼi mo kapau ʼe feala. Koteā te ʼu fakatuʼutuʼu lelei ʼaē ʼe feala ke kotou fai?
16. He koʼē ʼe tou haga fakamafola ia te logo lelei?
16 ʼE mole fakalogo ia te fua lelei ʼo tatatou fai fakamafola ʼi te ʼu ʼapi ki te tali ʼaē ʼo tatatou gāue e te hahaʼi. ʼE moʼoni, ʼe maʼuhiga ia te gāue fai fakamafola ki te haofaki ʼo te hahaʼi fakamālotoloto, kae ʼe toe ʼaoga foki ia te gāue ʼaia ki te tahi age ʼu fakatuʼutuʼu maʼuhiga. Ko te minisitelio Fakakilisitiano ʼe ina foaki mai ia te faigamālie ʼaē ke tou fakahā ai totatou ʼofa ʼaē kiā Sehova. (1 Soa. 5:3) ʼE ina fakafealagia ke tou maʼa mai te toto ʼo te hahaʼi. (Gāue 20:26, 27) ʼAki tatatou fai fakamafola, ʼe tou fakatokaga ki te hahaʼi heʼe lotu ia te ‘hoko mai ʼo te hola ʼo te fakamāu ʼa te ʼAtua.’ (Fakh. 14:6, 7) Pea ko te faʼahi ʼaē ʼe maʼuhiga, ʼaki te fakamafola ʼo te logo lelei ʼe vikiʼi ai te huafa ʼo Sehova ʼi te kele kātoa. (Pes. 113:3) Koia, peʼe fakalogo peʼe kailoa te hahaʼi ki tatatou fai fagonogono, kae ʼe tonu ke tou haga fakamafola ia te logo lelei ʼo te Puleʼaga. ʼIo, ʼe matalelei kiā mata ʼo Sehova ia tatatou ʼu faiga ʼaē ke tou tala ia te logo lelei.—Loma 10:13-15.
17. Koteā ʼaē kā vave fakamoʼoni pē anai kiai te hahaʼi?
17 Logolā iā ʼaho nei, tokolahi ʼe mole natou leleiʼia ia tatatou fai fakamafola, kae kua vave pē anai ia te fetogi ʼo tanatou manatu. (Mat. 24:37-39) Neʼe fakafīmālieʼi e Sehova ia Esekiele, kā hoko moʼoni te ʼu fakamāu ʼaē neʼe ina fakamafola, pea ko te kau Iselaele agatuʼu ʼe natou ‘ ʼiloʼi anai neʼe tuʼu te polofetā ʼi te lotolotoiga ʼo nātou.’ (Esk. 2:5) ʼO toe fēia pē mokā fakahoko e te ʼAtua ia tana ʼu tautea ki te ʼu faʼahiga meʼa ʼo te tuʼu ʼaenī, ʼe tonu anai ke fakamoʼoni e te hahaʼi, ko te logo lelei ʼaē neʼe fakamafola e te kau Fakamoʼoni ʼa Sehova ʼi te ʼu potu fuli pē ʼo te kele pea mo te ʼu ʼapi, neʼe haʼu moʼoni ia mai te ʼAtua moʼoni pē e tahi, ko Sehova, pea ko te kau Fakamoʼoni ʼe natou fakafofoga moʼoni ia te ʼAtua. ʼE ko he toe pilivilēsio lahi tatatou fua ia tona huafa pea mo tala tana logo lelei ʼi te ʼu temi faigataʼa ʼaenī! ʼAki tona mālohi, ʼofa pē ke tou haga tauʼi te ʼu fihifihia ʼaē ʼe felāveʼi mo tātou ʼi tatatou fai fakamafola ʼi te ʼu ʼapi.
ʼE Kotou Tali Feafeaʼi Anai?
• ʼE feafeaʼi hatatou lototoʼa ʼo fai fakamafola?
• Koteā ʼaē kā tokoni mai ke tou kamata he ʼu fai palalau Fakatohi-tapu ʼi tatatou fai fakamafola ʼi te ʼu ʼapi?
• ʼE feafeaʼi hatatou fakahā ʼe tou tokaga moʼoni ki te hahaʼi?
• Koteā ʼaē kā tokoni mai ke tou taupau ia he manatu ʼe lelei ʼo ʼuhiga mo te hahaʼi ʼo totatou telituale?
[Talanoa ʼo te pasina 18]
He Faʼahiga Kamata ʼo He ʼu Fai Palalau Fakatohi-tapu
Moʼo kamata he fai palalau:
◼ ʼI takotou kua ʼosi fakamālo, ʼe feala ke kotou fakatoʼo age ki ai he kiʼi pepa lotu pea mo kotou ʼui fēnei age: “ ʼE au fakatuʼutuʼu ʼi taku haʼu ʼaenī ke au vaevae mo koe ia he manatu ʼe fakatupu fiafia ʼo ʼuhiga mo te faʼahi maʼuhiga ʼaenī.”
◼ Peʼe lagi kotou foaki age he kiʼi pepa lotu pea mo kotou ʼui fēnei age: “ ʼE au haʼu ʼi te ʼaho nei koteʼuhi ʼe au fia ʼiloʼi tau manatu ʼo ʼuhiga mo te faʼahi ʼaenī.”
Kapau ʼe ina tali ia te kiʼi pepa lotu:
◼ ʼAua naʼa kotou fakatalitali, kae kotou fehuʼi age pe koteā ia tana manatu ʼo ʼuhiga mo te kupu tāfito ʼo te kiʼi pepa lotu.
◼ Kotou fakalogo lelei, pea mo faigaʼi ke kotou mahino ki tana ʼu manatu. Pea kotou fakamālo age ki tana tali atu pea mo kotou talanoa ki tana manatu ʼaia ʼi te lolotoga ʼo takotou fai palalau.
Moʼo hoko atu ia te fai palalau:
◼ Kotou lau age pea mo fai palalau ki he vaega peʼe ko he ʼu vaega Fakatohi-tapu, ʼo mulimuli pē ia takotou ʼu palalau ki te ʼu meʼa ʼaē ʼe ʼaoga ki te hahaʼi.
◼ Kapau ʼe fia logo moʼoni he tahi ki te logo lelei, kotou foaki age ia te tohi ʼaē ʼe tufa ʼi te māhina pea kapau ʼe feala kotou fakahā age ia te faʼahiga fai ʼo he ako Tohi-Tapu. Kotou fakatuʼutuʼu ke kotou toe liliu ʼo ʼaʼahi.