ʼE Feala Ke Fua Lelei Te Fagonogono ʼi Te Telefoni
1. He koʼē ʼe lagi lelei ke tou fakakaukauʼi ki te fagonogono ʼi te telefoni ke liliu ko he koga maʼuhiga ki tatatou minisitelio?
1 He koʼē ʼe lagi lelei hatatou fakakaukauʼi ke hilifaki te fagonogono ʼi te telefoni ki tatatou minisitelio? Koteʼuhi ʼe ko he tahi tokoni ʼaia ki te hahaʼi ke natou maʼu ia te ʼatamai mālama totonu ʼo ʼuhiga mo te haofaki. (2 Pet. 3:9) Logolā ko te ʼuluaki tokoni moʼo tala te logo lelei ʼo te Puleʼaga ʼo te ʼAtua ʼe ko te fai fakamafola ʼi te ʼu ʼapi, kae ʼe tou leleiʼia hatatou fakaʼaogaʼi he tahi ʼu faʼahiga tokoni ke feala ai hatatou felōgoi mo nātou ʼaē ʼe lagi mole kita maʼu atu ki ʼonatou ʼapi.—Mat. 24:14; Luka 10:1-7; Fakh. 14:6.
2. ʼE feafeaʼi te fakatuʼutuʼu ʼo te fagonogono ʼi te telefoni?
2 ʼE Feafeaʼi Tona Fakatuʼutuʼu?: Ohagē pē ko te ʼu fakatuʼutuʼu ʼaē ki te fai fakamafola ʼi te ʼu ʼapi, ʼe foaki anai he telituale ʼo ʼuhiga mo te fagonogono ʼi te telefoni ki te kau fai fakamafola. ʼE feala ke fai pē e he tokotahi, peʼe ke fai e he toko lua peʼe ko he toko tolu. Ko te kogafale ʼaē kā fakaʼaogaʼi ki te fagonogono ʼi te telefoni, ʼe tonu anai ke ʼāteaina pē ki te faʼahi ʼaia pea ke ʼaua naʼa ʼi ai he meʼa ʼe fakalelu ki te faʼahi ʼaia. ʼE leleiʼia e he tokolahi hanatou heheka ʼo ovi ki he laupapa ʼe hili ai te ʼu tohi ʼaē ʼe natou fakaʼaogaʼi māhani mokā natou fai fakamafola ʼi te ʼu ʼapi.
3. Koteā ʼaē ʼe tonu ke tou manatuʼi mokā tou fagonogono ʼi te telefoni?
3 Te Fagonogono ʼi Te Telefoni: Kā tou fagonogono ʼi te telefoni, pea ʼe tou palalau anai ohagē pē ko hakita fai palalau. Ko ʼihi moʼo kamata ia tanatou fai palalau ʼaē ʼi te telefoni, ʼe lagi natou lau he ʼu ʼuluaki palalau ki ʼaē ʼe fai palalau mo ia, kae ohagē pē ko hanatou fai palalau. Ko te ʼu ʼuluaki palalau ʼaē ʼi te tohi Comment raisonner, mo Te Minisitelio ʼo Te Puleʼaga pea mo te kiʼi pepa lotu ʼE Kotou Fia ʼIloʼi Koa Te Moʼoni?, ʼe feala ke fakaʼaogaʼi ki te faʼahi ʼaia. Kā kotou fai hakotou ʼu ʼuluaki palalau, kotou fakakaukauʼi he logo ʼe kotou fia talanoa anai kiai, mo he fehuʼi, pea mo kotou teuteu ke kotou fakahā he ʼu vaega Tohi-Tapu ʼe tali ki te ʼu faʼahi ʼaia. ʼI te agamāhani, ʼe kotou foaki pē anai ia te ʼu tohi ʼaē ʼe kotou fakaʼaogaʼi ki te fai fakamafola ʼi te ʼu ʼapi. Kotou tokagaʼi te ʼu fakamanatu ʼaenī: Tuku takotou hoha pea kotou palalau fakatokatoka. Kotou aga fakaʼapaʼapa, mo faʼa kātaki, pea mo aga fakakaumeʼa, ko he ʼu faʼahi ʼe feala ke logoʼi e ia ʼaē ʼe kotou telefoni ki ai. Kotou fakalogo mokā ina fakahā mai tana ʼu manatu, ʼosi ʼaia pea kotou fakahā ki ai takotou lotomahino pea mo takotou leleiʼia tana fai palalau. Kotou tōkakaga naʼa kotou talanoa ki te fakatuʼutuʼu ʼo ʼuhiga mo te ʼu meʼa ʼofa, heʼe feala anai ke fakaʼuhiga kovi ohagē ko he kole falā ʼi te telefoni.
4. Koteā ʼaē ʼe fakafealagia e te fagonogono ʼi te telefoni ke tou fai ʼi tatatou telituale?
4 Ko he tahi ʼe fai telefoni mo tātou, ʼe lagi māʼimoa peʼe mahaki, peʼe ko he tahi ʼe faigataʼa hata maʼu atu ki tona ʼapi ʼi te fai fakamafola ʼi te ʼu ʼapi, ʼuhi ko tona ʼu hola gāue. Ko ʼihi ʼe natou nonofo ʼi te ʼu koga meʼa ʼe leʼo peʼe ʼi he ʼu falefata ʼe mole fakagafua ki te hahaʼi fuli ke hū ki loto. Koia, ʼi tatatou loto ʼaē ke tou fakahoko kātoa tatatou minisitelio, tou fakakaukauʼi ke tou fakaʼaogaʼi te fakatuʼutuʼu lelei ʼaia ko te fagonogono ʼi te telefoni.